Esekiel 7:1-27
7 La skʼoponun tal yan velta li Jeovae, xi laj yalbune:
2 «Xnichʼon krixchano, li Ajvalil Jeova ti jaʼ Mukʼul Jpasmantale xi chalbe li slumal Israele: ‹¡Chvul xa li alajebe! Tal xa slajeb li xchanjotal stiʼil balumile.
3 Vul xa ta atojolal li lajebale xchiʼuk ta jlokʼes skotol skʼakʼal koʼonton ta atojolal, ta jchapanot ta skoj ti kʼu yelan atalelale* xchiʼuk chkakʼbot kastigo ta skoj li kʼusitik ibalik sba* chapase.
4 Muʼyuk chopol chkaʼi jba ta atojolal xchiʼuk muʼyuk chakʼuxubaj ta koʼonton,+ ta xkakʼ atoj ta skoj ti kʼu yelan atalelale* xchiʼuk chavil avokol ta skoj li kʼusitik ibalik sba chapase.+ Vaʼun, chanaʼik ti voʼon Jeovaune›.+
5 »Xi chal li Ajvalil Jeova ti jaʼ Mukʼul Jpasmantale: ‹¡Kʼelavil! Chtal jun vokolil, chtal jun vokolil ti stuk noʼox jeche.+
6 Chtal xa lajebal. Chtal lajebal, ta anil noʼox chtal* ta atojolal. ¡Kʼelavil! Chtal xa.
7 Jnaklejetik ta jteklum, kʼot xa avorail. Sta xa skʼakʼalil, jutuk xa skʼan li yoraile.+ Mu xa xanaʼ kʼusi chapasik ta vitsetik xchiʼuk muʼyuk xa xa-avetik ta muyubajel.
8 »›Poʼot xa ta jmal talel skapemal jol ta atojolal+ xchiʼuk ta jlokʼes skotol skʼakʼal koʼonton ta atojolal,+ ta jchapanot ta skoj ti kʼu yelan atalelale* xchiʼuk chkakʼbot kastigo ta skoj li kʼusitik ibalik sba chapase.
9 Muʼyuk chopol chkaʼi jba ta atojolalik xchiʼuk muʼyuk chakʼuxubajik ta koʼonton,+ ta xkakʼ atojik ta skoj ti kʼu yelan atalelalike* xchiʼuk chavil avokolik ta skoj li kʼusitik ibalik sba chapasike. Vaʼun, chanaʼik ti voʼon Jeovaun ti chkakʼboxuk kastigoe.+
10 »›¡Chvul xa li skʼakʼalile! ¡Poʼot xa!+ ¡Vul xa li avoraile! Nichin xa li vachʼe xchiʼuk mas xa lik stoy sba li jkontrainvaneje.
11 Li saʼkʼope kʼot xa kʼuchaʼal jun vachʼ ti chakʼ kastigoe.+ Chlaj akʼoplalik, chlaj li akʼulejalike, chlaj li epal krixchanoetik avuʼunike xchiʼuk chlaj skʼoplal li amukʼulalike.
12 Chvul xa li yoraile, chvul xa li skʼakʼalile. Mu me xmuyubaj li jmanolajele xchiʼuk mu me xat yoʼonton li jchonolajele, yuʼun solel xtiltun skʼakʼal yoʼonton Dios ta stojolal sjunul li jteklume.*+
13 Yuʼun li jchonolajele muʼyuk xa chichʼ sutel li kʼusi la xchone, akʼo mi kuxul to xkom, yuʼun li kʼusi laj yichʼ akʼel ta ilele chkʼot ta stojolal sjunul li jteklume. Mi junuk kolem chkom li ta vokolile. Ta skoj li smulike, mi junuk buchʼu kuxul chkom.
14 »›Laj xa sjupanik li okʼese+ xchiʼuk chapalik xa skotolik, pe muʼyuk buchʼu chbat ta paskʼop, yuʼun solel xtiltun skʼakʼal koʼonton ta stojolal sjunul li jteklume.+
15 Te oy ta spat jteklum li espadae,+ pe jaʼ te oy ta yut jteklum li tsatsal chamel xchiʼuk tsatsal viʼnale. Buchʼuuk noʼox ti te oy ta osiltike chlaj ta espada xchiʼuk buchʼuuk noʼox ti te oy ta jteklume chlaj ta tsatsal chamel xchiʼuk ta tsatsal viʼnal.+
16 Li buchʼutik kuxul chkomike chjatavik batel ta vitstik; xkoʼolajik kʼuchaʼal paloma ta stenlejaltik, x-avetik ta okʼel ta jujuntal ta skoj li smulike.+
17 Chʼabal xa yip te majajtik* chkom li skʼobike xchiʼuk stsʼujlajet yaʼlel li sjol yakanike.*+
18 Laj xa slapik chʼixal kʼuʼil*+ xchiʼuk nikik xa ta xiʼel. Chichʼik akʼel ta kʼexlal skotolik xchiʼuk tʼaxjol* chkom skotolik.+
19 »›Ta sjipik batel ta kaye li splataike xchiʼuk ch-ib-o yoʼontonik li s-oroike. Muʼyuk chpojatik yuʼun splataik mi jaʼuk s-oroik li ta yorail skʼakʼal yoʼonton Jeovae.+ Muʼyuk jun yoʼonton chkomik xchiʼuk muʼyuk tsnojes xchʼutik, yuʼun li splataik xchiʼuk li s-oroike jaʼ la smak-o* yakanik sventa saʼ smulik.
20 La stoy-o sbaik ta skoj ti kʼupil sba xvinaj li snatsʼike* xchiʼuk jaʼ la spas-o* li santoik ti ibal sbae, li lokʼoletik yuʼunik ti toj ibal sbae.+ Jech oxal, chkakʼ ti x-ib-o yoʼontonike.
21 Ta xkakʼbe* ta skʼob jyanlumetik sventa spojik batel xchiʼuk ta skʼob li buchʼutik toj chopolik ta balumil sventa xelkʼanik batele, vaʼun ta sokesbeik skʼoplal.
22 »›Ta jkʼej lokʼel jsat ta stojolalik,+ li stukike ta sokesbeik skʼoplal ti bu chʼul kuʼune;* ch-och j-elekʼetik te xchiʼuk ta sokesbeik skʼoplal.+
23 »›Pasbo skadenailtak+ li buchʼutik chichʼ chukel batele, yuʼun li ta jteklume jaʼ noʼox chchapanvanik sventa chmilvanik+ xchiʼuk noj ta saʼkʼop.+
24 Ta jtak tal li viniketik ti mas chopolik li ta mukʼtik lumetike+ xchiʼuk jaʼ chtal yuʼuninbeik li snaike.+ Jech xtok, ta jchʼaybe skʼoplal stoyobbailik li buchʼutik tsotsike xchiʼuk chichʼ sokesbel skʼoplal ti butik chʼul yuʼunike.+
25 Mi tal tsots svokolike, tsaʼik jun oʼontonal, pe muʼyuk ta staik.+
26 Xtal-o xtal-o* svokolik xchiʼuk xvul-o xvul-o aʼyejetik. Li krixchanoetike chbatik ta stojolal j-alkʼopetik sventa x-albatik li kʼusi ch-akʼbat yilike,+ muʼyuk xa chchanubtasvanik ta mantal li paleetike xchiʼuk muʼyuk xa chtojobtasvanik li moletike.+
27 Ta xlik yat yoʼonton li ajvalile+ xchiʼuk chlik chʼayuk spatobil yoʼonton li bankilale, chlik nikuk ta xiʼel skʼobik li krixchanoetik ta jteklume. Jech ta xkakʼbe stojik ti kʼu yelan stalelalike* xchiʼuk jech ta jchapanik kʼuchaʼal chapanvanike. Vaʼun, jech tsnaʼik ti voʼon Jeovaune›».+
Tsʼibetik ta yok vun
^ Literal «li abee».
^ Literal «li abee».
^ Literal «chlik tal».
^ Literal «li abee».
^ Literal «li abeike».
^ Jaʼ xkaltik, mu kʼusi tstabe sbalil li buchʼu oy kʼusi tsmane mi jaʼuk li buchʼu oy kʼusi chchone, yuʼun chlaj skʼoplal skotolik.
^ Jaʼ xkaltik, tskʼabta sba skotolik ta skoj ti ta xiʼike.
^ O «jokʼajtik».
^ Jaʼ xkaltik, ta xjux stsotsil sjolik ta skoj at-oʼonton.
^ O «jaʼ tʼab-o».
^ Te tsakal skʼoplal arete, aniyo, xchuk kʼobil xchiʼuk yan kʼusitik.
^ Jaʼ xkaltik, li kʼusitik yuʼunik ta plata xchiʼuk ta oroe.
^ Jaʼ xkaltik, li splataik xchiʼuk li s-oroik ti tspas-o santoetike.
^ Literal «ti bu nakʼal kuʼune». Yaʼeluke, jaʼ skʼoplal li ta yutil to ti bu chʼul yuʼun Jeovae.
^ O «Nopolik noʼox chvul».
^ Literal «li sbeike».
