Esekiel 8:1-18
8 Li ta svakibal jabil,* li ta svoʼobal kʼakʼal ta svakibal ue, kʼalal jaʼo te chotolun ta jna xchiʼuk te chotolik ta keloval li moletik ta Judae, vul ta jtojolal li skʼob Ajvalil Jeova ti jaʼ Mukʼul Jpasmantal sventa xikʼun batele.
2 Vaʼun, oy buchʼu laj kil ti xkoʼolaj yilel kʼuchaʼal kʼokʼe; li ta yolon xchukbenal* yilele oy kʼokʼ xchiʼuk li ta yakʼol xchukbenal yilele solel xojobinaj,+ stsʼayayet tajek ti xkoʼolaj kʼuchaʼal li oro ti kapal ta platae.*+
3 Vaʼun, oy kʼusi la syeʼ tal ti xkoʼolaj yilel kʼuchaʼal jun kʼobile xchiʼuk la snitbun jyom stsotsil jol, jech xtok, oy kʼusi laj yakʼ kil li Diose, li espiritue* laj yikʼun muyel ta toyol xchiʼuk laj yikʼun batel ta Jerusalen, te laj yikʼun batel ta yochebal li tiʼ na ti te oy ta yutil amakʼ*+ ti skʼeloj batel nortee, jaʼ te vaʼal li lokʼol ti tsabe skʼakʼal yoʼonton Diose.+
4 Jaʼ to chkile te oy li smukʼulal Dios yuʼun Israele,+ jech kʼuchaʼal laj xa onoʼox kil ta stenlejaltike.+
5 Vaʼun, xi laj yalbune: «Xnichʼon krixchano, avokoluk, toyo batel asat li ta stukʼil nortee». Jaʼ yuʼun, la jtoy batel jsat li ta stukʼil nortee, jaʼ to chkile te oy ta ochebal li lokʼol ti tsabe skʼakʼal yoʼonton Diose, te ta snorteal li stiʼ skajleb matanale.
6 Xi to laj yalbune: «Xnichʼon krixchano, ¿mi xavil li kʼusitik toj chopol tspasik xchiʼuk ti toj ibal sba* tspasik li jteklum Israele,+ ti jaʼ chinamaj-o batel ti bu chʼul kuʼune?+ Pe oy to kʼusitik chavil ti mas to toj ibalik sbae».
7 Vaʼun, laj yikʼun batel ta yochebal amakʼ.* Kʼalal la jkʼel batele, laj kil ti jomol li muroe.
8 Xi laj yalbune: «Xnichʼon krixchano, avokoluk, jomo ochel li muroe». Jaʼ yuʼun, la jom ochel li muroe, vaʼun laj kil ti oy jun ochebal tee.
9 Xi laj yalbune: «Ochan batel xchiʼuk kʼelavil li kʼusitik toj chopol xchiʼuk ibalik sba tspasik liʼe».
10 Jaʼ yuʼun, li-och batel xchiʼuk la jkʼel, jaʼ to chkile oy ep ta tos slokʼoltak chonbolometik ti xkilet chanavike, slokʼoltak ibal sba chonbolometik+ xchiʼuk slokʼoltak skotol li ibal sba santoetik* yuʼun jteklum Israele;+ te slokʼtaojik ta sjoyobal li muroe.
11 Oy 70 ta voʼ moletik yuʼun jteklum Israel ti te vaʼajtik ta yeloval li lokʼoletike, te oy ek li Jaasanias ti jaʼ xnichʼon Safane.+ Ta jujuntal stsakoj yav yakʼalik xchiʼuk xtomet noʼox muyel xchʼailal* yuʼunik li muil pome.+
12 Xi laj yalbune: «Xnichʼon krixchano, ¿mi xavil kʼusi tspasik ta ikʼal osil li moletik yuʼun jteklum Israele, li kʼusi tspasik ta jujuntal ta skuartoik ti bu cholol li lokʼoletik yuʼunike?* Yuʼun xi chalike: ‹Muʼyuk chilutik tal li Jeovae. Laj xa yikta komel jteklum li Jeovae›».+
13 Jech xtok, xi laj yalbune: «Oy to kʼusitik chavil ti yakal tspasik ti mas to toj ibalik sbae».
14 Jaʼ yuʼun, laj yikʼun batel ta yochebal stiʼ sna Jeova ti te xkom ta nortee, laj kil ti te chotajtik antsetik ti yakal chokʼitaik li dios Tamuse.
15 Xi to laj yalbun xtoke: «Xnichʼon krixchano, ¿mi xavil li kʼusi tspasik liʼe? Oy to kʼusitik chavil ti mas to toj ibalik sbae».+
16 Jaʼ yuʼun, laj yikʼun batel li ta bikʼit amakʼ* te ta sna Jeovae.+ Li te ta yochebal stemplo Jeovae, te ta oʼlol ti bu oy li ochebal xchiʼuk ti bu oy li skajleb matanale, te oyik 25 ta voʼ viniketik ti svalopatinojik komel li stemplo Jeovae xchiʼuk ti skʼelojik batel li slokʼeb kʼakʼale; te nijajtik ta yeloval kʼakʼal li ta slokʼeb kʼakʼale.+
17 Xi laj yalbune: «Xnichʼon krixchano, ¿mi xavil li kʼusi tspasik liʼe? ¿Mi mu baluk noʼox chaʼi jteklum Juda ti tspasik li kʼusitik toj ibal sbae, ti ta to snojesik ta saʼkʼop li jteklume+ xchiʼuk ti jech-o tsabeikun jole? Liʼ yakal tsyeʼik tal ta jsat li skʼob teʼe.*
18 Jaʼ yuʼun, oy kʼusi ta jpasbeik ta skʼakʼal koʼonton. Muʼyuk chopol chkaʼi jba ta stojolalik xchiʼuk muʼyuk chkʼuxubajik ta koʼonton.+ Akʼo mi x-avetik tskʼanbeikun koltael, muʼyuk ta jchikintabeik».+
Tsʼibetik ta yok vun
^ Jaʼ skʼoplal ti svakibal xa ox jabil yichʼoj chukel batel li ajvalil Joakin, Esekiel xchiʼuk yan judaetike. Kʼelo Esekiel 1:2.
^ O «xchʼut».
^ Jaʼ xkaltik, kʼalal chichʼ kapel oro xchiʼuk plata ti stsʼayayet tajeke.
^ Li ta ebreo kʼope xuʼ van jaʼ skʼoplal li s-espiritu Diose o junuk anjel.
^ Li ta ebreo kʼope xuʼ van te nitil skʼoplal ta jpʼel kʼop ti «tsoʼ» skʼan xale, jaʼo chichʼ alel kʼalal oy kʼusi chichʼ pʼajele.
^ O «xchʼayilal».
^ O «li ta yutil to skuartoal lokʼoletik yuʼunike».
^ O «tiʼ na».
^ Yaʼeluke, li kʼob teʼ taje tstunesik sventa xichʼik ta mukʼ yan diosetik.
