Jeremias 29:1-32
29 Li j-alkʼop Jeremias ti te oy ta Jerusalene la stakbe batel jlik karta li buchʼutik chukbilik batele: li jayvoʼ moletike, li paleetike, li j-alkʼopetike xchiʼuk li jteklume, te ikʼatik lokʼel ta Jerusalen yuʼun Nabukodonosor sventa xchukatik batel ta Babilonia,
2 pe baʼyel xa onoʼox lokʼemik batel ta Jerusalen li ajvalil Jekonias+ xchiʼuk smeʼe,+ li bankilal j-abteletik ta pasob mantale, li bankilaletik ta Juda xchiʼuk ta Jerusalene, li buchʼutik xtojobik spasel kʼusitike xchiʼuk li buchʼutik chabtelanik takʼine.*+
3 Li Jeremiase jaʼ laj yakʼbe batel karta li Elasa ti jaʼ xnichʼon Safan+ xchiʼuk li Guemarias ti jaʼ xnichʼon Ilkiase, ti jaʼ takatik batel yuʼun li Sedekias+ ti jaʼ ajvalil ta Juda sventa xbat skʼelik ta Babilonia li ajvalil Nabukodonosore. Xi chal li kartae:
4 «Voʼon li Jeova ti bankilalun yuʼun soltaroetike,* ti Diosun yuʼun Israele, xi chkalbe skotol li buchʼutik chukbilik batele, ti laj kakʼ ti x-ikʼatik lokʼel ta Jerusalen sventa xchukatik batel ta Babiloniae:
5 ‹Vaʼano anaik xchiʼuk naklebinik. Tsʼunik jsatinom teʼetik xchiʼuk lobeik sat.
6 Saʼo avajnilik xchiʼuk ayanuk akerem atsebik; sabo yajnil li akeremike xchiʼuk akʼo malijuk li atsebik sventa x-ayan skerem stsebik eke. Epajanik te, mu me xajutukajik.
7 Oyuk kʼusi lek xapasik ta stojolal li jteklum ti bu laj kakʼ ti xavichʼik chukel batele xchiʼuk kʼoponik Jeova ta stojolal, yuʼun mi jun yoʼonton li jteklume, jun avoʼontonik ek.+
8 Yuʼun xi chal li Jeova ti jaʼ bankilal yuʼun soltaroetike, li Dios yuʼun Israele: «Mu xavakʼ sloʼlaoxuk li j-alkʼopetik avuʼunike,+ li jtʼunoletik* ti te oy ta atojolalike xchiʼuk mu xachikintabeik li buchʼutik chalbeik smelolal vaychiletike.
9 Yuʼun ‹yakal chalboxuk jecheʼ albil kʼopetik ta jbi. Muʼyuk la jtakik tal›,+ xi li Jeovae»›».
10 «Yuʼun xi chal li Jeovae: ‹Kʼalal mi tsʼaki li 70 jabil ti te oyoxuk ta Babiloniae, chkakʼ batel jsat ta atojolalik+ xchiʼuk chkʼot ta pasel kuʼun ti kaloj chkikʼoxuk sutel tal li ta alumalike›.+
11 »Xi chal li Jeovae: ‹Yuʼun jnaʼoj lek li kʼusi ta jpas ta atojolalike, chkakʼboxuk jun oʼontonal, maʼuk vokolil, sventa oyuk kʼusi lek xataik ta jelavel+ xchiʼuk sventa oyuk spatobil avoʼontonik.+
12 Jaʼ yuʼun, chatalik, chakʼanbeikun vokol xchiʼuk chataikun ta kʼoponel, vaʼun ta jchikintaboxuk›.+
13 »‹Ta xasaʼikun, vaʼun chataikun,+ yuʼun ta sjunul avoʼonton chasaʼikun.+
14 Li voʼon eke chkakʼ ti xataikun ta saʼele›,+ xi li Jeovae. ‹Ta jtsoboxuk sutel tal voʼoxuk ti chukbiloxuk batele, ta jtsoboxuk sutel tal ta skotol li mukʼtik lumetik xchiʼuk ti butik tanpuk labatik kuʼune.+ Ta xkikʼoxuk sutel tal ti bu lachukatik toʼox batel kuʼune›, xi li Jeovae.+
15 »Pe xi avalojike: ‹Li Jeovae svaʼanojbunkutik xa j-alkʼopetik li ta Babiloniae›.
16 »Yuʼun li Jeovae xi chalbe li ajvalil ti te chotol ta xchotleb ajvalil Davide+ xchiʼuk xi chalbe sjunul li jteklum ti te nakal ta Jerusalene, li achiʼiltakik ti muʼyuk chukbil batik xchiʼuk voʼoxuke:
17 ‹Xi chal li Jeova ti jaʼ bankilal yuʼun soltaroetike: «Ta xkakʼ ti xlajik ta espadae, ta tsatsal viʼnal xchiʼuk ta tsatsal chamel+ xchiʼuk chkakʼ ti xkʼotik kʼuchaʼal li igoetik ti kʼaʼemik* xa tajek ti mu xa stakʼ loʼele»›.+
18 »‹Ta xkakʼbe svokolik ta espada,+ ta tsatsal viʼnal xchiʼuk ta tsatsal chamel xchiʼuk xibal sba chkomik kuʼun ta sba sat skotol jteklumetik ta balumil,+ ti xichʼik chopol kʼoptaele, ti chʼayal to xkʼot yoʼonton yuʼunik yantike, ti xichʼik labanele*+ xchiʼuk ti xichʼik kʼexlaltasel yuʼun skotol li mukʼtik lumetik ti butik tanpuk batik kuʼune,+
19 taje jaʼ ta skoj ti muʼyuk la achikintaik li kʼusi laj kal ta stojolal li j-alkʼopetik ti jaʼik kajtuneltake, ti ep ta velta la jtak tale›,*+ xi li Jeovae.
»‹Pe muʼyuk la achikintaik›,+ xi li Jeovae.
20 »Jaʼ yuʼun, chikintaik kʼusi chal Jeova voʼoxuk ti la jtakoxuk lokʼel ta Jerusalene, ti chukbiloxuk batel ta Babiloniae.
21 Li Jeova ti jaʼ bankilal yuʼun soltaroetike, li Dios yuʼun Israele, xi chal ta stojolal li Akab ti jaʼ xnichʼon Kolaya xchiʼuk ta stojolal li Sedekias ti jaʼ xnichʼon Maaseyae, ti yakal chalboxuk jecheʼ albil kʼopetik ta jbie:+ ‹Chkakʼik batel ta skʼob li Nabukodonosor* ti jaʼ ajvalil ta Babiloniae, vaʼun te akʼelojik chichʼik milel yuʼun li ajvalile.
22 Li kʼusi chkʼot ta stojolalik li Akab xchiʼuk Sedekiase jaʼ tstaik ta alel li judaetik ti chukbilik batel ta Babilonia kʼalal oy buchʼu chchopol kʼoptaike: «¡Jechuk akʼo spasbot Jeova jech kʼuchaʼal la spasbe li Sedekias xchiʼuk Akabe, ti chikʼatik ta kʼokʼ yuʼun li ajvalil ta Babiloniae!».
23 Yuʼun toj kʼexlal sba kʼusi spasojik li ta Israele,+ mulivajik xchiʼuk yajnil xchiʼiltakik xchiʼuk jecheʼ kʼusi chalik batel ta jbi ti muʼyuk jech kalojbeik mantale.+
»›«Jnaʼoj skotol taje xchiʼuk kʼotemun ta testigo»,+ xi li Jeovae›».
24 «Xi xavalbe li Semaya+ ti likem ta Neelame:
25 ‹Li Jeova ti jaʼ bankilal yuʼun soltaroetike, li Dios yuʼun Israele, xi chale: «Ta skoj ti ta abi atuk la atakbe batel karta sjunul li jteklum te ta Jerusalene, li pale Sofonias+ ti jaʼ xnichʼon Maaseyae xchiʼuk skotol li paleetike, ti xi laj avale:
26 ‹Sofonias, li Jeovae laj xa svaʼanot ta pale sventa xakʼot ta xkʼexol li Jeoiada ti jaʼ palee, sventa xakʼot ta jkʼelvanej li ta sna Jeovae, sventa xakʼel kʼusi chapasbe mi oy jun chuvaj vinik ti tspas sba ta j-alkʼope xchiʼuk ti xalatsʼbe yok skʼob xchiʼuk sjol li ta latsʼob teʼe;*+
27 vaʼun chaʼa, ¿kʼu yuʼun muʼyuk la atsak ta utel li Jeremias ti likem ta Anatot+ ti tskuy sba kʼuchaʼal j-alkʼop avuʼunike?+
28 Yuʼun la stakbunkutik talel jlik karta liʼ to ta Babiloniae, xi laj yale: «¡Chajalijik te! Jaʼ yuʼun, vaʼano anaik xchiʼuk naklebinik. Tsʼunik jsatinom teʼetik xchiʼuk lobeik sat...»›»›».+
29 Kʼalal laj yapta karta li j-alkʼop Sofonias+ sventa xaʼi li j-alkʼop Jeremiase,
30 xi kʼoponat tal yuʼun Jeova li Jeremiase:
31 «Xi xavalbe batel yaʼi li buchʼutik chukbilik batele: ‹Xi chal Jeova ta stojolal li Semaya ti likem ta Neelame: «Ta skoj ti laj yalboxuk Semaya ti oy kʼusi chkʼot ta pasel akʼo mi muʼyuk la jtak talele xchiʼuk ti jecheʼ noʼox la apat avoʼontonik yuʼun ta sventa li kʼusi laj yalboxuke,+
32 jaʼ yuʼun xi chal li Jeovae: ‹Chkakʼbe kastigo li Semaya ti likem ta Neelame xchiʼuk li snitilulale. Mi junuk yutsʼ yalal kuxul chkom li ta jteklume xchiʼuk muʼyuk chil li lekilal chkakʼbe jteklumale, yuʼun la stijbe yoʼonton yantik sventa stoy sbaik ta stojolal li Jeovae›, xi li Jeovae»›».
Tsʼibetik ta yok vun
^ O jaʼ van skʼoplal «li buchʼutik tsmeltsanik muroe».
^ Jaʼ li buchʼu tskʼan tsnabe skʼoplal li kʼusi chkʼot ta pasel ta tsʼakal ti tsaʼ koltael ta stojolal pukujetike.
^ O jaʼ van skʼoplal «ti javemik».
^ Literal «ti xichʼik piobtaele».
^ Literal «sob lilik xchiʼuk la jtak tal ta atojolalik».
^ Literal «Nabukodorosor», jech ta stsʼibaik li yantike.
