Job 2:1-13
2 Laje, kʼot skʼakʼalil ti bat svaʼan sbaik ta yeloval Jeova+ li anjeletike,*+ te tijil och batel ek li Satanas sventa xbat svaʼan sba li ta yeloval Jeovae.+
2 Vaʼun, li Jeovae xi laj yalbe li Satanase: «¿Bu lalik tal leʼ une?». Xi la stakʼbe Jeova li Satanase: «Ay xanavkun tal ta balumil, xiyal ximuy noʼox ta skʼelel».+
3 Li Jeovae xi laj yalbe li Satanase: «¿Mi yuʼun avakʼoj asat* ta stojolal li kajtunel Jobe? Stuk noʼox jech ta balumil maʼ li vinik leʼe. Tukʼ yakʼoj sba+ xchiʼuk muʼyuk smul; xiʼtaoj* Dios xchiʼuk spʼajoj li kʼusi chopole. Jpʼel-o yoʼonton tukʼ yakʼoj sba,+ akʼo mi jech, chakʼan chasabun jol yoʼ jlajes+ manchuk mi muʼyuk srasonal».
4 Pe li Satanase xi la stakʼbe li Jeovae: «Kʼalal oy buchʼu chcham xae, xuʼ xakʼ skotol kʼusi oy yuʼun sventa kuxul xkom.
5 Pe akʼo akʼob avil ta stojolal* xchiʼuk pikbo li sbakil xchiʼuk sbekʼtale, vaʼun te chavil ti chchopol kʼoptaot ta asate».+
6 Laje, li Jeovae xi laj yalbe li Satanase: «¡Kʼelavil! ¡Chkakʼbot ta avok akʼob!* ¡Jaʼ noʼoxe mu me xamil!».
7 Jech oxal, li Satanase lokʼ batel ti bu oy li Jeovae, bat yakʼbe svokol ta tsatsal kʼaʼal chin*+ li Jobe, lik ta xpachʼomal yakan xchiʼuk kʼot kʼalal to ta sjol.
8 Li Jobe la stsak sjepelul pʼin sventa tsjotʼ-o sba, te xchotanoj sba ta tantik.+
9 Xi albat yuʼun li yajnile: «¿Mi yokel-o tukʼ avoʼonton avakʼoj aba? ¡Chopol kʼoptao li Diose xchiʼuk chaman xa!».
10 Pe xi laj yalbe yajnil li Jobe: «Jaʼ jech chakʼopoj chkaʼi kʼuchaʼal chkʼopoj li bol antsetike. ¿Mi yuʼun jaʼ noʼox ta jchʼamtik li kʼusi lek chakʼbutik li melel Diose, ti jaʼ muʼyuk ta jchʼamtik li kʼusi chopole?».+ Akʼo mi ep kʼusi kʼot ta stojolal li Jobe, muʼyuk kʼusi chopol lokʼ ta ye.+
11 Oy oxvoʼ yamigotak Job ti kʼot ta xchikinik skotol li svokoltak la snuptane, ta jujuntal lokʼik tal ti bu nakalike: li june Elifas+ sbi ti likem ta Temane, li june Bildad+ sbi ti jaʼ jsua+ vinike xchiʼuk li yane Sofar+ sbi ti jaʼ jnaama vinike. Jaʼ yuʼun, la xchap skʼopik sventa oyuk bu sta sbaik yoʼ xbat yakʼbeik ta ilel ti kʼux ta yoʼontonike xchiʼuk ti spatbeik yoʼonton li Jobe.
12 Kʼalal nomnom toʼox la staik batel ta ilele, muʼyuk xojtikinik mi jaʼ li Jobe. Vaʼun, lik smil sbaik ta okʼel xchiʼuk la sliʼ ta jatel skʼuʼ spokʼik, la svijik muyel pukuk,* jech kʼot ta sjolik.+
13 Laje, te chotiik ta lumtik ti bu oy li Jobe, vukub kʼakʼal xchiʼuk vukub akʼobal jech la spasik. Mi jpʼeluk kʼusi laj yalbeik, yuʼun toj echʼ xa noʼox kʼux laj yilbeik li svokole.+
Tsʼibetik ta yok vun
^ Literal «li xnichʼnab Diose».
^ Literal «avakʼoj avoʼonton».
^ O «xachʼo batel akʼob ta stojolal».
^ O «Chkakʼbot aventain».
^ O «kʼuxul voʼan chin; kʼakʼet chin».
^ O «lum».
