Job 42:1-17
42 Vaʼun, li Jobe xi la stakʼbe li Jeovae:
2 «Li avie, jnaʼoj xa ti spas avuʼun skotolexchiʼuk skotol li kʼusi anopoj chapase muʼyuk kʼusi xuʼ smak ta be.+
3 Xi laj avale: ‹¿Buchʼu ti yakal tsokes li kʼusi chkale xchiʼuk ti mu snaʼ li kʼusi chlokʼ ta yee?›.+
Jaʼ yuʼun, likʼopoj, pe muʼyuk smelolal li kʼusi laj kale,mu jnabe skʼoplal ta sventa li kʼusitik toj labalik sba chkaʼie.+
4 Xi laj avale: ‹Avokoluk, chikintao, voʼon chikʼopoj.
Ta jakʼbot tal, vaʼun chapbun tal smelolal›.+
5 Ta jchikin noʼox kaʼioj akʼoplal,pe li avie chkilot xa ta jsat jtuk.
6 Jaʼ yuʼun, chopol chkaʼi li kʼusi laj kale,+chotolun ta tantik xchiʼuk ta pukuktik* sventa chkakʼ ta ilel ti ta jsutes koʼontone».+
7 Kʼalal laj xa ox kʼoponatuk yuʼun Jeova li Jobe, xi albat yuʼun Jeova li Elifas ti likem ta Temane:
«Solel xtiltun skʼakʼal koʼonton ta atojolal xchiʼuk ta stojolal li chaʼvoʼ achiʼiltake,+ yuʼun mu meleluk kʼusi laj avalik ta jtojolal,+ mu jechuk la apasik kʼuchaʼal li kajtunel Jobe.
8 Li avi une, saʼik vukot tot vakax xchiʼuk vukot tot chij, vaʼun batanik ta stojolal li kajtunel Jobe xchiʼuk akʼik chikʼbil matanal ta sventa li apaltailike.* Vaʼun, tspas orasion ta atojolalik li kajtunel Jobe.+ Ta sjunul koʼonton ta jchikinta li kʼusi tskʼanbun* sventa mu jechuk jpasboxuk ti kʼu yelan xataik-o ta skoj li abolilike, yuʼun mu meleluk kʼusi laj avalik ta jtojolal, mu jechuk la apasik kʼuchaʼal li kajtunel Jobe».
9 Jaʼ yuʼun, li Elifas ti likem ta Temane, li Bildad ti jaʼ jsua vinike xchiʼuk li Sofar ti jaʼ jnaama vinike batik xchiʼuk la spasik li kʼusi albatik yuʼun Jeovae. Vaʼun, li Jeovae la stakʼbe s-orasion li Jobe.
10 Kʼalal laj xa ox spas orasion ta stojolal yamigotak li Jobe,+ la slokʼesbe svokol Job li Jeovae+ xchiʼuk la xchaʼakʼbe li kʼusitik toʼox oy yuʼune. Li Jeovae chib to velta jech yepal laj yakʼbe jech kʼuchaʼal oy toʼox yuʼun ta slikebale.+
11 Skotol li sbankil yitsʼin, li xvix yixleltak xchiʼuk skotol li svoʼne amigotake+ tal skʼelik xchiʼuk te veʼik ta sna. Kʼux laj yaʼibeik li svokole xchiʼuk la spatbeik yoʼonton ta skoj ti laj yakʼ permiso Jeova ti xtal vokolil ta stojolale. Ta jujuntal laj yakʼbeik jujusep takʼin xchiʼuk arete ti pasbil ta oroe.
12 Jaʼ yuʼun, akʼbat bendision yuʼun Jeova li ta slajebtik xa batel xkuxlejal Jobe, mas to ep akʼbat, jaʼ mu sta li ta baʼyele,+ ayan 14 mil xchijtak, vakmil skameyotak, chaʼmil xvakaxtak* xchiʼuk jmil smeʼ svurotak.+
13 Jech xtok, ayan to vukvoʼ skeremtak xchiʼuk oxvoʼ stsebetak.+
14 Jemima laj yakʼbe sbi li xvixil tsebe, Kesias li oʼlol mukile, Keren-Apuk laj yakʼbe sbi li slajeb mukile.
15 Stuk xa noʼox jech toj kʼupil sbaik ta sjunul slumalik li stsebetak Jobe. Jech xtok, akʼbat komel xrexto* yuʼun stotik jech kʼuchaʼal akʼbatik li skeremalike.
16 Laje, kuxi to batel 140 jabil li Jobe, laj to yil xnichʼnab xchiʼuk smamobtak... chankʼol kuxlejal.
17 Vaʼun, kʼalal jal xa ox kuxi xchiʼuk ti jun yoʼonton echʼ li Jobe, cham.
Tsʼibetik ta yok vun
^ O «lumtik».
^ O «li achopolilike».
^ Literal «Ta sjunul koʼonton ta jtoybe sat».
^ Literal «jmil par xvakaxtak».
^ O «spukulal; sparte».
