Job 9:1-35
9 Xi la stakʼ li Jobe:
2 «Jnaʼoj onoʼox ti jaʼ jech maʼ taje.
Pe li jun krixchano ti snaʼ xchame, ¿kʼuxi xuʼ oy srason ta yeloval li Diose?+
3 Mi oy buchʼu tskʼan tsaʼ ta kʼop* li Diose,+akʼo mi jmil ta tos li kʼusi chjakʼbate, mi junuk chtakʼbe yuʼun.
4 Oy spʼijil* xchiʼuk toj echʼem sjuʼel li Diose.+
¿Buchʼu xuʼ yuʼun tskontrain ti muʼyuk yayijem chkome?+
5 Tslokʼes batel ta yavil li vitsetike, akʼo mi muʼyuk buchʼu chakʼ venta;tsvalkʼun ta skʼakʼal yoʼonton.
6 Ta snikes lokʼel ta yavil li balumile,sventa xnik li yoyaltake.+
7 Tspas ta mantal li kʼakʼal sventa mu xakʼ xojobalexchiʼuk tsmakbe xojobal li kʼanaletike;+
8 jaʼ chlichʼan batel stuk li vinajele+xchiʼuk chanav ta sba li syukʼbenaltak nab ti mukʼtik tajeke.+
9 Jaʼ la spas li jtsop kʼanal Ax,* Kesil,* Kima*+xchiʼuk li kʼanaletik ta sural vinajele;*
10 mukʼtik tajek xchiʼuk mu xa noʼox albajuk li kʼusitik tspase,+mu stakʼ chapel li kʼusitik labalik sba spasoje.+
11 Te ch-echʼ ta jxokon, pe mu xkil;te ch-echʼ ta keloval, pe mu xkil buchʼu jaʼ.
12 Kʼalal oy kʼusi tspoj batele, ¿buchʼu xuʼ yuʼun tspajtsan?
¿Buchʼu xuʼ xi xalbee: ‹¿Kʼu yuʼun jech chapas leʼe?›?+
13 Muʼyuk tspajes skʼakʼal yoʼonton li Diose;+kʼalal to ta yajkoltaobbatak Raab*+ tskejan sbaik ta stojolal.
14 ¡Mas to kʼalal voʼon ta jtakʼbe sutele,skʼan jtʼuj lek li kʼusi chkal kʼalal ta jpak jkʼoplal ta stojolale!
15 Akʼo mi oy jrason, muʼyuk onoʼox ta jtakʼbe sutel.+
Jaʼ noʼox ta jkʼan ti xikʼuxubaj ta yoʼonton li jchapanvanej kuʼune.*
16 ¿Mi tstakʼbun van tal mi la jkʼopone?
Mu xaʼibun jnaʼ li yechʼomal kee,
17 yuʼun tslilinun ta tsatsal ikʼaloʼxchiʼuk chʼabal srasonal ti chepajes batel li jyayijemale.+
18 Mu xakʼ xkichʼ ikʼ;yakal chakʼbun-o jvokol.
19 Mi jaʼ chkalbetik skʼoplal juʼelale, toj tsots maʼ stuke.+
Mi jaʼ chkalbetik skʼoplal li tukʼilale, xi chale: ‹¿Buchʼu van xuʼ xalbun ti xbat kal li kʼusi jpasoje?›.*
20 Akʼo mi oy jrason, chalbun ke ti oy kʼusi muʼyuk lek la jpase;akʼo mi tukʼ-o koʼonton,* jaʼ chalbun stuk ti oy jmule.*
21 Akʼo mi tukʼ-o koʼonton, mu jnaʼ kʼusi xuʼ xkʼot ta jtojolal.Jpʼajoj* li jkuxlejale.
22 Koʼol noʼox skʼoplal skotol. Jaʼ yuʼun, xi chkale:‹Koʼol tslajes li buchʼutik muʼyuk smule* xchiʼuk li buchʼutik toj chopolike›.
23 Mi tal ta anil nojelal ta voʼ ti ta anil chmilvane,li Diose tslaban li buchʼutik muʼyuk smul ti mu xa snaʼ kʼusi tspasike.
24 Li balumile jaʼ xa laj yichʼ akʼbel li buchʼutik toj chopolike;+tsmakbe sat li jchapanvanejetik yuʼune.
Mi maʼuk tspase, ¿buchʼu jech tspas un chaʼa?
25 Toj anil chjelav li jujun kʼakʼal jkuxlejale, jaʼ mas to kʼun ch-anilaj li j-anilajele;+anil chbat, muʼyuk chil li kʼusi leke.
26 Xnulet* noʼox batel kʼuchaʼal varko ti pasbil ta aje,jech kʼuchaʼal aguilaetik ti xjipetik yalel ta anil sventa chbat stsak li sveʼelike.
27 Mi xi chkale: ‹Ta jchʼay ta jol li jvokole,ta jel ti kʼu yelan xvinaj li jsate xchiʼuk chimuyubaj›,
28 akʼo mi jech, chixiʼo to onoʼox skotol li kʼusi kʼux chkaʼie+xchiʼuk jnaʼoj ti chatabun jpaltaile.*
29 Chkichʼ tabel jmul.*
Jaʼ yuʼun, ¿kʼusi xa bal-o ti chkakʼ to persae?+
30 Mi ta jpok jba li ta yaʼlel taiv ti unijemexchiʼuk mi ta jpok jkʼob li ta yaʼlel tanil kʼokʼe,+
31 chajipun ochel ta chʼen un bi,ta skoj taje, kʼalal to ta jkʼuʼ jpokʼ tspʼajun.
32 Yuʼun maʼuk jun krixchano kʼuchaʼal voʼon ti xuʼ jtakʼbe sutelexchiʼuk ti jmoj xibatkutik ta snail chapanobbaile.+
33 Mi junuk krixchano stakʼ xal kʼusi xuʼ jpastik,*mi jaʼuk stakʼ xkʼot ta jchapanvanej kuʼuntik.*
34 Ti muʼyukuk xa tsmajun*xchiʼuk ti muʼyukuk xa tsibtasun-o li kʼusitik xibalik sba yuʼune,+
35 muʼyuk xa chixiʼ ta skʼoponel un bi,yuʼun maʼuk onoʼox jech kelanil ti chixiʼe.
Tsʼibetik ta yok vun
^ O «chikʼ batel ta snail chapanobbail».
^ Literal «Oy spʼijil yoʼonton».
^ Jaʼ van skʼoplal li jtsop kʼanal Osa Mayore.
^ Literal «yutil kuartoetik ta sure».
^ Jaʼ van skʼoplal li jtsop kʼanal Pleyades ti te oy li ta jtsop kʼanal Tauroe.
^ Jaʼ van skʼoplal li jtsop kʼanal Orione.
^ Jaʼ van skʼoplal jkot mukʼta chanul nab.
^ O jaʼ van skʼoplal «li kajkontra ta sventa mantale».
^ Literal «xuʼ tstakun ta ikʼel».
^ O «akʼo mi muʼyuk jmul».
^ Literal «ti xotxotune».
^ O «Mu jkʼan».
^ O «li buchʼutik tukʼ-o yoʼontone».
^ O «Xjipet».
^ O «jchopolile».
^ Literal «Toj chopolun».
^ O «Muʼyuk jkʼopojel kuʼuntik».
^ Literal «xakʼ skʼob ta jtojolaltik».
^ Literal «Ti skʼejuk batel xvachʼ ta jtojolal».
