Xi chal Juan 19:1-42
-
La stsitsik xchiʼuk la slabanik li Jesuse (1-7)
-
Oy kʼusi la sjakʼbe yan velta Jesus li Pilatoe (8-16 sbavokʼal)
-
Laj yichʼ bajel ta jtel teʼ ta Golgota li Jesuse (16 xchaʼvokʼal kʼalal ta 24)
-
La spatbe komel yoʼonton smeʼ li Jesuse (25-27)
-
Cham li Jesuse (28-37)
-
Laj yichʼ mukel li Jesuse (38-42)
19 Li vaʼ orae, laj yikʼ batel Jesus li Pilatoe xchiʼuk la stsits.*+
2 Vaʼun, li soltaroetike la xotik chʼix sventa tspasik ta korona, la xojbeik ta sjol xchiʼuk laj yakʼbeik slap jlik kuxul morado natil kʼuʼil;+
3 vaʼun nopajik batel ta stojolal xchiʼuk xi laj yalike: «¡Liʼote, ajvalil yuʼun judaetik!». Jech xtok, la xtʼaxilanbeik ta majel sat.+
4 Lokʼ tal yan velta li Pilatoe xchiʼuk xi laj yale: «¡Kʼelavilik! Laj kikʼboxuk lokʼel tal yoʼ xanaʼik ti muʼyuk bu la jtabe jsetʼuk spaltaile».*+
5 Vaʼun, lokʼ tal li Jesuse, te xa xojol tal ta sjol li korona pasbil ta chʼixe xchiʼuk slapoj xa tal li kuxul morado natil kʼuʼile. Xi laj yal li Pilatoe: «¡Kʼelavilik li vinike!».
6 Pe kʼalal laj yilik li bankilal paleetik xchiʼuk li j-abteletike, xi tsots avanike: «¡Akʼo yichʼ jokʼanel ta jtel teʼ! ¡Akʼo yichʼ jokʼanel ta jtel teʼ!».*+ Xi albatik yuʼun li Pilatoe: «Ikʼik batel voʼoxuk xchiʼuk milik,* yuʼun li voʼone muʼyuk bu la jtabe jsetʼuk spaltail».*+
7 Xi la stakʼik li judaetike: «Oy jun mantal kuʼunkutik, li mantale chal ti akʼo yichʼ milel+ ta skoj ti la spʼis sba ta Xnichʼon Diose».+
8 Kʼalal laj yaʼi Pilato li kʼusi laj yalike, mas to lik xiʼuk;
9 jech oxal och batel yan velta ta pasob mantal xchiʼuk xi laj yalbe li Jesuse: «¿Bu likemot tal?». Pe li Jesuse muʼyuk bu la stakʼbe.+
10 Jaʼ yuʼun, xi laj yal li Pilatoe: «¿Kʼu yuʼun ti mu xatakʼbune? ¿Mi mu xanaʼ ti oy kabtel sventa ta jkoltaot xchiʼuk ti oy kabtel sventa ta jmilote?».*
11 Xi la stakʼ li Jesuse: «Ti manchukuk yakʼojbot avabtel li Diose, muʼyuk kʼusi xuʼ xapasbun ti jechuke. Jaʼ yuʼun, li buchʼu laj yakʼun ta akʼobe jaʼ mas oy smul».
12 Ta skoj taje, li Pilatoe la snopilan kʼuxi xuʼ tskolta, pe xi avanik li judaetike: «Mi chakolta batel li vinik leʼe, maʼuk yamigoot li Sesare. Yuʼun li buchʼu tspʼis sba ta ajvalile jaʼ tskontrain li Sesare».+
13 Vaʼun, kʼalal laj yaʼi Pilato li kʼusitik chalike, laj yikʼ lokʼel li Jesuse, vaʼun te choti ta chapanobbail ti bu xi sbi chalbeike: Pasbil ta Ton, ti Gabbata sbi ta ebreoe.
14 Jaʼo yorail chchapan sbaik+ ta sventa li Kʼin Koltaele; te van ta svakibal ora.* Vaʼun, xi laj yalbe li judaetike: «¡Kʼelavilik li ajvalil avuʼunike!».
15 Vaʼun, xi avanike: «¡Milo! ¡Milo! ¡Akʼo yichʼ jokʼanel ta jtel teʼ!».* Xi laj yal li Pilatoe: «¿Mi chakʼanik milbel li ajvalil avuʼunike?». Xi takʼavik li bankilal paleetike: «Jaʼ noʼox ajvalil kuʼunkutik li Sesare».
16 Vaʼun, li Pilatoe laj yakʼbe ta skʼobik sventa tsmilik ta jtel teʼ.+
Laje, laj yikʼik batel li Jesuse.
17 La xkuch batel stuk li jtel teʼ sventa vokolile,* vaʼun bat ti bu Yavil Bakil Jolil chalike,+ ti Golgota sbi ta ebreoe.+
18 Te la sbajik ta jtel teʼ+ xchiʼuk chaʼvoʼ viniketik, jun ta jujujot xokon, jaʼ ta oʼlol kom li Jesuse.+
19 Jech xtok, oy kʼusi la stsʼiba li Pilatoe, vaʼun te laj yakʼ li ta jtel teʼ sventa vokolile.* Xi tsʼibabile: «Jnasaretal Jesus, jaʼ li ajvalil yuʼun judaetike».+
20 Ep judaetik la skʼelik li kʼusi tsʼibabile, yuʼun nopol xil jteklum ti bu laj yichʼ bajel ta jtel teʼ li Jesuse, taje tsʼibabil ta ebreo, ta latin xchiʼuk ta griego.
21 Pe li bankilal paleetik yuʼun judaetike xi laj yalbeik li Pilatoe: «Mu xiuk xatsʼibae: ‹Ajvalil yuʼun judaetik›, yuʼun xi laj yal stuke: ‹Voʼon ajvalilun yuʼun judaetik›».
22 Xi la stakʼ li Pilatoe: «Li kʼusi laj xa jtsʼibae jech xa tsʼibabil kom-o».
23 Vaʼun, kʼalal laj xa ox sbajik ta jtel teʼ Jesus li soltaroetike, la stambeik li skʼuʼ tslap ta sbae, vaʼun la spasik ta chanlik, jujulik laj yichʼik li jujun soltaroe, jech xtok, la stambeik li skʼuʼ tslap ta yute. Pe li kʼuʼil tslap ta yute muʼyuk stsʼisbenal, yuʼun jalbil sliklej.
24 Jaʼ yuʼun, xi lik yalbe sbaike: «Mu jatik, jaʼ lek kakʼtik suerte sventa jkʼeltik buchʼu chichʼ».+ Taje jaʼ sventa chkʼot ta pasel li Tsʼibetike: «La spukbe sbaik li jkʼuʼ jpokʼe xchiʼuk laj yakʼik ta suerte li jkʼuʼ jpokʼe».+ Ta melel, li kʼusitik taje jaʼ jech la spasik li soltaroetike.
25 Te ta stsʼel li jtel teʼ sventa vokolil* yuʼun Jesuse, te vaʼal li smeʼe,+ li smuk smeʼe, li Maria yajnil Klopase xchiʼuk li Maria Magdalenae.+
26 Jaʼ yuʼun, kʼalal laj yil ti te nopol vaʼal smeʼ li Jesuse xchiʼuk li jchankʼop ti skʼanoje,+ xi laj yalbe li smeʼe: «Ants, ¡kʼelavil! ¡Te oy li akereme!».
27 Jech xtok, xi laj yalbe li jchankʼope: «¡Kʼelavil, te oy li ameʼe!». Li vaʼ orae, li jchankʼope laj yikʼ batel ta sna.
28 Kʼalal kʼot xa ox ta pasel taje, ti snaʼoj xa ox Jesus ti kʼot xa ta pasel skotol li kʼusitike, xi laj yal sventa chkʼot ta pasel li Tsʼibetike: «Chtakij koʼonton».+
29 Te vuchul jpʼej kʼib ti noj ta pajal vinoe. Vaʼun, la stsʼajik jun esponja ta pajal vinoe, la xojik ta isopo* teʼ xchiʼuk laj yakʼbeik ta ye.+
30 Kʼalal laj xa ox yuchʼ li pajal vinoe, xi laj yal li Jesuse: «¡Kʼot xa ta pasel!».+ La snijan sjol, vaʼun cham.*+
31 Vaʼun, sventa mu teuk xkom sbekʼtalik ta jtel teʼ sventa vokolil+ ta savado ta skoj ti jaʼo skʼakʼalil chchapan sbaike+ (yuʼun toj mukʼ li skʼakʼalil savado taje),+ li judaetike laj yalbeik Pilato ti akʼo yichʼ kʼasbel li yakanike xchiʼuk ti akʼo yichʼ ichʼbel batel li sbekʼtalike.
32 Jaʼ yuʼun, talik li soltaroetike, vaʼun la skʼasbeik yakantak li baʼyel vinike xchiʼuk li yan vinik ti te jokʼol ta jtel teʼ xchiʼuke.
33 Pe kʼalal kʼotik ti bu oy li Jesuse, laj yilik ti chamem xae, jaʼ yuʼun muʼyuk xa la skʼasbeik li yakantake.
34 Pe li jun soltaroe la sjombe xokon ta jun lansa,+ vaʼun ta anil noʼox lokʼ tal chʼichʼ xchiʼuk voʼ.
35 Li jchankʼop ti kʼanbil yuʼun Jesus ti laj yil taje chalbe batel skʼoplal, melel li kʼusi chale. Snaʼoj ti melel li kʼusitik laj yal sventa xuʼ xachʼunik eke.+
36 Li kʼusitik kʼot ta pasel taje jaʼ sventa chkʼot ta pasel li Tsʼibetike: «Mi junuk sbakil chichʼ kʼasbel».*+
37 Jech xtok, xi to chal yan Tsʼibetike: «Ta to xilik li buchʼu la spajbeik lansae».+
38 Kʼalal jech kʼot ta pasel li kʼusitik taje, li Jose ta Arimateae, ti ta mukul noʼox ochem ta yajchankʼop Jesus ta skoj ti chiʼta li judaetike,*+ laj yalbe Pilato mi xuʼ xichʼbe batel sbekʼtal li Jesuse, li Pilatoe laj yal ti xuʼe. Vaʼun, tal xchiʼuk laj yichʼbe batel li sbekʼtale.+
39 Te kʼot ek li Nikodemoe,+ li buchʼu ta akʼobaltik ay xa onoʼox skʼel ta sba veltae, yichʼoj kʼotel mirra ti kapbil ta aloee,* te van 30 kilouk* ta skotol.+
40 Vaʼun, la xkuchbeik batel li sbekʼtal Jesuse xchiʼuk la xpixik batel ta lino pokʼ ti yichʼoj muil tsʼiʼleletike,+ jaʼ jech kʼuchaʼal nopem onoʼox xaʼiik li judaetik kʼalal oy buchʼu tsmukike.
41 Ti bu laj yichʼ milele, oy te jun nichimaltik, li ta nichimaltike oy te jun achʼ mukinal+ ti muʼyuk buchʼu te stelanojik-oe.
42 Ta skoj ti jaʼo skʼakʼalil chchapan sbaik+ li judaetike xchiʼuk ti nopol te oy li mukinale, te la stelanik li Jesuse.
Tsʼibetik ta yok vun
^ O «laj yakʼbe nukul».
^ O «jutebuk xchopolile».
^ O «¡Akʼo yichʼ milel ta jtel teʼ! ¡Akʼo yichʼ milel ta jtel teʼ!».
^ O «milik ta jtel teʼ».
^ O «jutebuk xchopolil».
^ O «jmilot ta jtel teʼe».
^ Jaʼ xkaltik, te van ta oʼloltik batel kʼakʼal.
^ O «¡Akʼo yichʼ milel ta jtel teʼ!».
^ O «paj ta yichʼel ikʼ».
^ O «vochʼbel».
^ Taje jaʼ skʼoplalik li jnitvanejetik ta relijion yuʼun judaetike.
^ Jaʼ sbi jtekʼ teʼ ti lek xmuete. Kʼalal jaʼo tsʼibaj li Vivliae, tstunesik kʼuchaʼal perfume.
^ Literal «te van sien librauk». Jaʼ xkaltik, libra yuʼun jromaetik. Kʼelo Apendise B14.
