Jueses 14:1-20
14 Li Sansone yal batel ta Timna, te laj yil jun jfilistea ants* li ta Timnae.
2 Vaʼun, muy batel ti bu oy li stot smeʼe, xi laj yalanbee: «Kʼot ta koʼonton jun jfilistea ants li ta Timnae, jaʼ yuʼun ta jkʼan xbat ajakʼbeikun sventa xkʼot ta kajnil».
3 Pe xi albat yuʼun li stot smeʼe: «¿Mi yuʼun muʼyuk yan ants chavil li ta kutsʼ kalaltike o li ta sjunul jlumaltike?+ ¿Mi yuʼun te to chbat asaʼ ta stojolal jfilisteaetik ti muʼyuk yichʼojik sirkunsisione?».* Xi la stakʼbe li stote: «Jaʼ ta jkʼan chbat ajakʼbun, yuʼun jaʼ kʼot ta koʼonton».*
4 Li stot smeʼe mu xakʼik venta ti jaʼ beiltasbil yuʼun li Jeovae, yuʼun li Diose yakal tsabe yorail sventa skontrain li jfilisteaetik ta skoj ti jaʼ yakal tspasik ta mantal li j-israeletike.+
5 Vaʼun, li Sansone yal batel ta Timna xchiʼuk li stot smeʼe. Kʼalal te kʼot ti bu tsʼunajtik uva ta Timnae, te x-avet tal jkot leon* ti tskʼan chtiʼate.
6 Pe akʼbat stsatsal yuʼun li s-espiritu Jeovae,+ jaʼ yuʼun bikʼitik la slilin li leone jech kʼuchaʼal li buchʼu ta skʼob noʼox tslilin li uni chʼiom tentsune. Pe muʼyuk laj yalbe stot smeʼ li kʼusi la spase.
7 Li Sansone yal batel sventa xbat skʼopon li antse, yuʼun jech-o lek chil.+
8 Kʼalal echʼ kʼuk sjalile, sut batel yan velta sventa xuʼ xikʼ batel ta sna li antse,+ kʼalal yakal chanav batele, kʼejpʼuj* batel sventa chbat skʼel li sbekʼtal leone, jaʼ to laj yile te xa volol chanul pom li ta sbekʼtal leone xchiʼuk yakʼoj xa spomal.
9 Li Sansone la sjotsʼ ta skʼob li pome xchiʼuk la slajes batel ta be. Vaʼun, la xchaʼtam batel li be ti bu yakal chanavik li stot smeʼe, laj yakʼbe slajesik ek. Pe muʼyuk laj yalbe ti te la sjotsʼ lokʼel ta sbekʼtal li leone.
10 Li Sansone jmoj yal batel xchiʼuk stot ti bu oy li antse xchiʼuk te la spas kʼin, yuʼun jaʼ jech nopem xaʼiik li keremetik tee.
11 Kʼalal laj yilike, laj yikʼbeik talel 30 ta voʼ keremetik sventa xchiʼinat.
12 Xi albatik yuʼun li Sansone: «Avokolikuk, ta jkʼan chavalbeik smelolal jun tajimol loʼil. Mi la anabeik smelolal xchiʼuk mi xtakʼ avuʼunik li ta vukub kʼakʼal ti jaʼ jech sjalil chjalij li kʼine, chkakʼboxuk 30 ta lik kʼuʼil pokʼil ti pasbil ta linoe xchiʼuk chkakʼboxuk yan 30 ta chop kʼuʼil pokʼil.
13 Pe mi mu xtakʼ avuʼunike, vaʼun voʼoxuk chavakʼbeikun 30 ta lik kʼuʼil pokʼil ti pasbil ta linoe xchiʼuk yan 30 ta chop kʼuʼil pokʼil». Vaʼun, xi laj yalike: «Albunkutik li tajimol loʼile; ta jkʼan chkaʼikutik».
14 Xi laj yale:
«Te lokʼ talel veʼlil li ta kʼusi snaʼ xtiʼvanexchiʼuk oy kʼusi chiʼ te lokʼ talel ta stojolal li kʼusi tsots yipe».+
Oxib kʼakʼal muʼyuk takʼ yuʼunik li jun tajimol loʼile.
15 Li ta xchanibal kʼakʼale, xi laj yalbeik li yajnil Sansone: «Loʼlao li amalale+ sventa xalbunkutik kʼusi smelolal li jun tajimol loʼile. Yuʼun mi moʼoje, ta jchikʼotkutik ta kʼokʼ xchiʼuk li buchʼutik te oy ta sna atote. ¿Mi yuʼun jaʼ noʼox sventa xapojbunkutik kʼusi oy kuʼuntik ti laj avikʼunkutik tale?».
16 Jaʼ yuʼun, li yajnil Sansone xi x-okʼolet tal ta stojolale: «Apʼajojun, muʼyuk akʼanojun.+ Yuʼun laj avalbe jun tajimol loʼil li jteklumale, pe muʼyuk avalojbun kʼusi smelolal». Xi takʼbate: «¡Muʼyuk kalojbe li jtot jmeʼ eke!, ¿mi yuʼun voʼot xa chkalbot avaloje?».
17 Pe li antse te x-okʼolet-o ta stojolal smalal jaʼ to ti kʼuxi tsʼaki li svukubal kʼakʼale. Jaʼ yuʼun, li ta svukubal kʼakʼale, li Sansone laj yalbe ta skoj ti te xvulvun tajek li yajnile. Vaʼun, li antse laj yalbe steklumal kʼusi smelolal li jun tajimol loʼile.+
18 Jaʼ yuʼun, li ta svukubal kʼakʼale, kʼalal jutuk xa ox skʼan xmak batel kʼakʼale,* xi laj yalik li viniketik te ta jteklume:
«¿Kʼusi ti xjelav to xchiʼil kʼuchaʼal pomexchiʼuk kʼusi ti xjelav to yip kʼuchaʼal jkot leone?».+
Xi takʼbatike:
«Ti manchukuk jaʼ laj avakʼ slok avosilik li kuni chʼiom meʼ vakaxe,+muʼyuk x-al avuʼunik jechuk kʼusi smelolal li jun tajimol loʼile».
19 Vaʼun, akʼbat stsatsal yuʼun li s-espiritu Jeovae+ xchiʼuk yal batel ta Askelon,+ te la smil 30 ta voʼ viniketik, laj yichʼbe batel li skʼuʼike sventa xakʼbe li buchʼutik laj yalik kʼusi smelolal li jun tajimol loʼile.+ Kapem tajek sjol kʼalal sut batel ta sna stote.
20 Li yajnil Sansone+ jaʼ laj yakʼbeik yikʼ jun kerem ti laj toʼox xchiʼin li Sansone.+
Tsʼibetik ta yok vun
^ Literal «jun ants ti jaʼ stseb jfilisteaetike».
^ Literal «lek chil jsat».
^ O «chʼiom leon ti xtinlajet sjol».
^ O «kʼejev; tsʼepʼuj».
^ O jaʼ van skʼoplal «kʼalal mu to ch-och batel ta yutil skuartoe».