Xi chal Lukas 1:1-80

CHICHʼ TIJEL TA

Oy kʼusi chichʼ albel batel li Teofiloe (1-4)
Li Gabriele laj yal ti chvokʼ li Juan J-akʼ-ichʼvoʼe (5-25)
Li Gabriele laj yal ti chvokʼ li Jesuse (26-38)
Bat skʼel Elisabet li Mariae (39-45)
La smukʼibtasbe skʼoplal Jeova li Mariae (46-56)
Vokʼ xchiʼuk laj yichʼ akʼbel sbi li Juane (57-66)
Laj yal albil kʼop li Sakariase (67-80)

1 Ep buchʼutik lik sabeik skʼoplal li kʼusitik kʼotem ta pasele xchiʼuk la stsʼibaik, taje jpatoj lek koʼontontik ti jech kʼot ta pasel ta melele.+ ² Jech xtok, jaʼ onoʼox laj yalbunkutik li buchʼutik laj yil ta satik ta slikebale+ xchiʼuk li buchʼutik la spukik aʼyejetike.+ ³ Ta skoj ti la jkʼelbe lek skʼoplal ek li kʼusitik kʼotem ta pasele, laj kakʼ ta koʼonton ti tukʼ xcholet ta jtsʼiba tal ti kʼu yelan kʼot ta pasele, jaʼ jech chkalbot tal, voʼot Teofilo+ ti lek ichʼbilot ta mukʼe. ⁴ Taje jech la jpas sventa xavojtikin lek li kʼusitik la-albat kʼalal laj avichʼ chanubtasele.+ ⁵ Li ta skʼakʼalil ajvalil Erodes*+ ta Judeae, oy toʼox jun pale ti Sakarias sbie, ti te tsakal skʼoplal li ta jtsop paleetik ti Abias+ sbie. Li vinik taje yikʼojbe stseb Aaron ti Elisabet sbie. ⁶ Tukʼ skʼoplalik ta stojolal Dios li Sakarias xchiʼuk yajnile, yuʼun muʼyuk smulik ta skoj ti xchʼunojik skotol li mantaletike xchiʼuk skotol li kʼusitik yaloj Jeova* ti skʼan pasele. ⁷ Pe chʼabal yalab xnichʼnabik, yuʼun mu snaʼ x-alaj li Elisabete xchiʼuk mol meʼelik xa. ⁸ Vaʼun, kʼalal jaʼo yakal chtun ta paleal ta stojolal Dios li ta jtsop paleetik+ ti Abias sbie, ⁹ la sta yakʼel pom+ li ta stemplo Jeovae,*+ jech onoʼox kʼuchaʼal nopem xaʼiik spasel li ta abtelal ta paleale. ¹⁰ Kʼalal jaʼo yorail chichʼ akʼel pome, te tspasik orasion ta pana* skotol li epal krixchanoetike. ¹¹ Vaʼun, te laj yakʼ sba ta ilel yaj-anjel Jeova* ta stojolal, te vaʼi ta xokon skajleb matanal sventa pom, te ta batsʼikʼob. ¹² Kʼalal laj yil Sakarias taje, chʼayal to kʼot yoʼonton xchiʼuk xiʼ tajek. ¹³ Pe xi albat yuʼun li anjele: «Mu xaxiʼ, Sakarias, yuʼun laj xa yichʼ aʼiel li kʼusi chakʼane, ta xchiʼin yol li avajnil Elisabete, Juan+ chavakʼbe sbi. ¹⁴ Ta me xata xkuxetel avoʼonton xchiʼuk ta me xamuyubaj tajek, jech xtok, ep me buchʼutik xkuxet yoʼontonik mi vokʼe,+ ¹⁵ yuʼun mukʼ skʼoplal chkʼot ta sat Jeova.*+ Mu me stakʼ xuchʼ vino xchiʼuk mu me stakʼ xuchʼ mi jtosuk pox;+ jech xtok, chlik noʼox ventainatuk yuʼun chʼul espiritu kʼalal muʼyuk to vokʼeme,*+ ¹⁶ jaʼ ta skoj ti ep xnichʼnab Israel tsutik tal ta stojolal Jeovae,* ti jaʼ li Dios yuʼunike.+ ¹⁷ Jech xtok, jaʼ me baʼyel chjelav batel ta stojolal Dios, yuʼun yichʼojbe yoʼonton xchiʼuk yip Elias;+ ta skʼatajesbe yoʼonton totiletik kʼuchaʼal yoʼonton ololetik;+ tskolta li buchʼutik mu xchʼunik mantal sventa oyuk spʼijilik xchiʼuk ti jaʼuk spasik li kʼusi tukʼe, sventa chakʼbe Jeova* jun jteklum ti lek chapale».+ ¹⁸ Xi laj yalbe anjel li Sakariase: «¿Kʼuxi ta jpat koʼonton mi melel taje? Yuʼun toj molun xa xchiʼuk oy xa sjabilal li kajnil eke». ¹⁹ Xi albat yuʼun li anjele: «Voʼon Gabrielun+ ti te nopol vaʼalun ta yeloval Diose,+ laj kichʼ takel tal sventa ta jchiʼinot ta loʼil xchiʼuk sventa xkal avaʼi li lekil aʼyejetik liʼe. ²⁰ Pe ta skoj ti muʼyuk la achʼun li kʼusi laj kalbote, umaʼ chakom xchiʼuk jaʼ to chjam ave mi kʼot skʼakʼalil chkʼot ta pasel li kʼusitik taje, yuʼun chkʼot ta pasel mi la sta yoraile». ²¹ Kʼalal jaʼo jech taje, te chmalaat yuʼun jteklum li Sakariase xchiʼuk toj labal sba chaʼiik ti chjalij tajek ta temploe. ²² Mi jaʼuk xkʼopoj kʼalal lokʼ tale, jech oxal laj yakʼik venta ti oy kʼusi laj yil ta templo ti mu staleluke.* Ta skʼob xa noʼox la spasbe senya li krixchanoetike, yuʼun jech mu xkʼopoj-o lokʼ talel. ²³ Vaʼun, bat ta sna kʼalal kʼot skʼakʼalil tsʼaki li xchʼul abtele. ²⁴ Ta tsʼakal jutuk une, la xchiʼin yol li yajnil ti Elisabet sbie, voʼob u muʼyuk xlokʼ ta sna, xi laj yale: ²⁵ «Li avie, jaʼ jech la spas Jeova* ta jtojolal. Laj yakʼ tal sat ta jtojolal sventa mu xakʼikun ta kʼexlal li krixchanoetike».+ ²⁶ Kʼalal vakib xa ox u xchiʼuk yole, li anjel Gabriele+ laj yichʼ takel batel yuʼun Dios ta jun jteklum ta Galilea ti Nasaret sbie. ²⁷ Bat skʼel jun tojol tseb+ ti makbil xa yuʼun jun vinik ti Jose sbie, jaʼ snitilulal David, Maria+ sbi li tojol tseb taje. ²⁸ Vaʼun, xi laj yal li anjel kʼalal och batele: «Liʼote, tseb, ti ataoj bendisione, liʼ oy ta atojolal li Jeovae».* ²⁹ Pe lik svul yoʼonton ta skoj ti kʼusi albate, lik snopilan kʼu van yuʼun ti jech vul kʼoponatuke. ³⁰ Jaʼ yuʼun, xi albat yuʼun li anjele: «Mu xaxiʼ, Maria, yuʼun lek ilbilot yuʼun li Diose. ³¹ ¡Kʼelavil! Ta xachiʼin avol, ta xavokʼes jun kerem,+ Jesus+ chavakʼbe sbi. ³² Taje mukʼ skʼoplal chbat+ xchiʼuk chichʼ albel skʼoplal ti jaʼ Xnichʼon li Buchʼu toj toyol oye;+ jech xtok, te chchotanat yuʼun Jeova* Dios li ta xchotleb ajvalil Davide, ti jaʼ stote;+ ³³ vaʼun tsventain sbatel osil li snitilulal Jakobe, muʼyuk bu chlaj skʼoplal li Ajvalilal* yuʼune».+ ³⁴ Pe xi laj yalbe anjel li Mariae: «¿Kʼuxi xa noʼox chkʼot ta pasel taje, ti muʼyuk bu ta jchiʼin ta vayel junuk vinike?».+ ³⁵ Xi takʼbat yuʼun li anjele: «Ta xtal ta atojolal li chʼul espiritue+ xchiʼuk chvul ta atojolal sjuʼel li Buchʼu toj toyol oye. Jech oxal, chʼul chichʼ albel skʼoplal+ xchiʼuk Xnichʼon Dios+ ch-albat li olol chvokʼe. ³⁶ ¡Kʼelavil!, la xchiʼin yol ek li avutsʼ avalal ti Elisabet sbie, akʼo mi oy xa sjabilal, oy xa ta svakibal u xchiʼuk yol, jaʼ li buchʼu mu snaʼ x-alaj chalike; ³⁷ yuʼun muʼyuk kʼusi albil ti mu spas yuʼun li Diose».+ ³⁸ Vaʼun, xi laj yal li Mariae: «¡Liʼ oyune! ¡Jaʼ smosoun Jeova!* Akʼo kʼotuk ta pasel ta jtojolal li kʼusi laj avale». Laj une, lokʼ batel te li anjele. ³⁹ Li vaʼ kʼakʼal une, lokʼ batel li Mariae xchiʼuk bat ta anil ta vitstikaltik, ta jun jteklum ta Juda, ⁴⁰ vaʼun te och ta sna Sakarias, te kʼot skʼopon li Elisabete. ⁴¹ Kʼalal laj yaʼi kʼoponat yuʼun Maria li Elisabete, tsots la xijulan sba ta yut xchʼut li olole xchiʼuk lik ventainatuk yuʼun chʼul espiritu li Elisabete ⁴² xchiʼuk xi tsots laj yale: «¡Voʼot toj ep ataoj bendision ti jaʼ mu sta li yan antsetike xchiʼuk ep bendision staoj ek li olol achiʼuke! ⁴³ ¿Kʼuxi xa noʼox ti jtaoj li matanal liʼe, ti jaʼ chtal ta jtojolal li smeʼ Kajvale? ⁴⁴ Yuʼun ¡kʼelavil!, la xijulan sba ta muyubajel li kol jchiʼuk kʼalal kʼot ta jchikin li kʼusi laj aval kʼalal lavule. ⁴⁵ Xmuyubaj noʼox ek li tseb ti la xchʼune, yuʼun chil chkʼot ta pasel skotol li kʼusitik albat yuʼun Jeovae».* ⁴⁶ Xi laj yal li Mariae: «Ta jmukʼibtasbe skʼoplal Jeova*+ li ta jkuxlejale, ⁴⁷ batsʼi xkuxet tajek koʼonton ta stojolal li Jkoltavanej Dios kuʼune,+ ⁴⁸ yuʼun laj yil ti pekʼel skʼoplal li smosoe.+ Yuʼun liʼ ta ora xchiʼuk ta jelavele, ‹xamuyubaj noʼox› xi chalik jkʼoplal skotol li jaykʼol kuxlejaletike,+ ⁴⁹ yuʼun toj labalik sba kʼusi spasoj ta jtojolal li Buchʼu oy sjuʼele xchiʼuk chʼul li sbie,+ ⁵⁰ oy-o xkʼuxul yoʼonton ta sbatel osil ta stojolal li buchʼutik chiʼtaike.*+ ⁵¹ Toj labalik sba kʼusitik spasoj ta sjuʼel; tanpuk batem yuʼun li buchʼutik tstoy sbaik ta skoj li kʼusi oy ta yoʼontonike.+ ⁵² Sjipoj lokʼel ta chotlebal sventa ajvalil li viniketik ti oy yabtelike+ xchiʼuk stoyojbe skʼoplal li buchʼutik bikʼit chakʼ sbaike;+ ⁵³ jun yoʼonton yuʼun li buchʼutik abol sbaike,+ yuʼun ep kʼusitik lek yakʼojbe; yan li jkʼulejetike jecheʼ smeyoj skʼob la stak batel. ⁵⁴ Tal skolta li yajtunel Israele. Jech la spas sventa xakʼ ta ilel ti vulem-o ta sjol ti yaloj chkʼuxubinvane,+ ⁵⁵ jech kʼuchaʼal laj yalbe jmoltotaktik ta voʼnee, li Abraan xchiʼuk snitilulale».+ ⁵⁶ Te van oxibuk u la xchiʼin Elisabet li Mariae, laj une sut batel ta sna. ⁵⁷ Te une, kʼot skʼakʼalil vokʼ yol li Elisabete, vokʼ jun skerem. ⁵⁸ Vaʼun, kʼalal laj yaʼi slakʼnatak xchiʼuk li yutsʼ yalaltake, xkuxet likel yoʼontonik xchiʼuk li Elisabet ta skoj ti ep kʼuxubinat yuʼun Jeovae.*+ ⁵⁹ Bat yakʼbeik yichʼ sirkunsision* kʼalal yichʼoj xa ox vaxakib kʼakʼal li uni olole,+ Sakarias xa ox chakʼbeik sbi kʼuchaʼal li sbi stote. ⁶⁰ Pe xi la stakʼ li smeʼ olole: «¡Moʼoj! Juan chichʼ akʼbel sbi». ⁶¹ Vaʼun, xi laj yalbeike: «Pe muʼyuk buchʼu jech sbi li ta avutsʼ avalale». ⁶² Jech oxal, la sjakʼbeik ta senya kʼusi sbi chakʼbe xnichʼon li totile. ⁶³ Vaʼun, la stak ta kʼanel pechpech teʼ, xi la stsʼibae: «Juan sbi».+ Jech oxal, toj labal sba laj yaʼiik. ⁶⁴ Ta ora noʼox jam ye, vaʼun lik kʼopojuk+ xchiʼuk la skʼupil kʼopta Dios. ⁶⁵ Toj xiʼel kʼot skotol li slakʼnatakike, jech xtok, lik yalbeik skʼoplal li buchʼutik te nakalik ta vitstikaltik ta yosilal Judeae, ⁶⁶ vaʼun laj yakʼ ta yoʼontonik li buchʼutik laj yaʼiik taje, xi laj yalike: «¿Kʼusi van yabtel chbat li uni olole?». Yuʼun ta melel, te oy ta stojolal li sjuʼel Jeovae.* ⁶⁷ Vaʼun, li stote, li Sakariase, lik ventainatuk yuʼun chʼul espiritu, jaʼ yuʼun xi lik yal albil kʼope: ⁶⁸ «Akʼo yichʼ kʼupil kʼoptael li Jeovae,* li Dios yuʼun Israele,+ yuʼun laj yakʼ sat ta stojolal li steklumale xchiʼuk la skolta.+ ⁶⁹ Laj yakʼbutik jun tsatsal jkoltavanej*+ li ta snitilulal David ti jaʼ yajtunele,+ ⁷⁰ jech onoʼox kʼuchaʼal kʼopoj ta voʼne ta stojolal li chʼul yaj-alkʼoptake,+ laj yal ⁷¹ ti tskoltautik lokʼel ta stojolal li kajkontrataktike xchiʼuk ti tskoltautik lokʼel ta skʼob li buchʼutik tspʼajutike,+ ⁷² sventa chakʼ ta ilel li xkʼuxul yoʼonton ti albat li jmoltotaktik ta voʼnee xchiʼuk sventa tsvules ta sjol li xchʼul tratoe,+ ⁷³ ti jamal onoʼox laj yakʼ ye ta stojolal li jmoltotik Abraan ta voʼnee,+ ⁷⁴ sventa xakʼbutik li matanal ta spasbel li xchʼul abtel ti muʼyuk xa xiʼel chkaʼitike, yuʼun laj xa ox spojutik lokʼel ta skʼob li kajkontrataktik ⁷⁵ sventa tukʼuk koʼontontike xchiʼuk ti jaʼuk jpastik ta sjunul jkuxlejaltik li kʼusi tukʼe. ⁷⁶ Pe li voʼote, uni olol, chavichʼ albel akʼoplal ti jaʼ yaj-alkʼopot li Buchʼu toj toyol oye, yuʼun voʼot jbabe chajelav ta stojolal Jeova* sventa chachapanbe sbe.+ ⁷⁷ Jech xtok, jaʼ sventa xavakʼ ta ojtikinel ti tsta skolebal steklumal ta skoj ti chichʼ pasbel perton smulike,+ ⁷⁸ yuʼun kʼuxutik ta yoʼonton li Dios kuʼuntike. Ta skoj li xkʼuxul oʼontonal taje, ta xtal svulaʼanutik li sakil osil jech kʼuchaʼal li sakil osil ta sob ti likem tal ta toyole, ⁷⁹ sventa chakʼbe sakil osil li buchʼutik oyik ta ikʼal osile, li buchʼutik oyik ta snakʼobal lajelale+ xchiʼuk sventa tukʼ sbeiltas batel kakantik li ta sbelel jun oʼontonale». ⁸⁰ Vaʼun, chʼi tal li uni olole xchiʼuk ayan lek stsatsal yoʼonton; te oy-o ta takixokol balumil, jaʼ to kʼalal kʼot skʼakʼalil laj yakʼ sba ta ilel ta stojolal li Israele.