Numeros 10:1-36
10 Vaʼun, li Jeovae xi laj yalbe li Moisese:
2 «Paso chib okʼes+ ta plata; tenbil ta martiyo xapas, jaʼ xatunes sventa xatak ta ikʼel li tsobobbaile xchiʼuk sventa stotsik batel li skarpanaike.
3 Kʼalal jmoj chichʼ jupanel xchibale, jaʼ sventa xichʼ ikʼel talel ta atojolal sjunul li tsobobbail te ta yochebal karpana sventa tsobobbaile.+
4 Mi jun noʼox laj yichʼ jupanele, jaʼ noʼox chtalik ta atojolal li bankilaletike,+ li joliletik ta jujumil j-israeletike.
5 »Li buchʼutik te spasoj skarpanaik ta stukʼil slokʼeb kʼakʼale+ jaʼo chlikik batel kʼalal mi laj yaʼiik ti xyal xmuy ti kʼu yelan yechʼomal chichʼ jupanel li okʼese.
6 Kʼalal xchibal xa ox velta xyal xmuy ti kʼu yelan yechʼomal chichʼ jupanel li okʼese, jaʼ tstotsik batel li buchʼutik te spasoj skarpanaik ta stukʼil sure.+ Jech skʼan xichʼ jupanel li okʼes jujun velta kʼalal chlokʼik batel jujuchope.
7 »Kʼalal jaʼ chatakik ta ikʼel li tsobobbaile, skʼan xajupanik li okʼesetike,+ jaʼ noʼoxe maʼuk me ti xyal xmuy li yechʼomal avuʼunike.
8 Jaʼ tsjupanik+ li xnichʼnabtak Aaron ti jaʼ paleetike. Jaʼ jun mantal sbatel osil ti jech-o tspasik ti jaykʼol kuxlejal chtal avuʼunik ta tsʼakale.
9 »Mi bat atsakik ta kʼop avajkontraik te ta alumalik ta skoj ti chilbajinoxuke, skʼan xajupanik li okʼesetike,+ li yechʼomale jaʼ senyail ti chabatik ta paskʼope, vaʼun tsvulesoxuk ta sjol li Jeova Dios avuʼunike xchiʼuk tspojoxuk lokʼel ta skʼob li avajkontraike.
10 »Jech xtok, kʼalal xkuxet noʼox avoʼontonike+ —kʼalal chapasik kʼinetik+ xchiʼuk li ta slikeb jujun u avuʼunike— skʼan xajupan avokʼesik ta sba li chikʼbil matanal+ chavakʼike xchiʼuk ta sba li milbil matanal sventa jun oʼontonale.+ Jaʼ chtun sventa svulesoxuk ta sjol li Dios avuʼunike. Voʼon Jeova Diosun avuʼunik».+
11 Li ta xchibal jabile, li ta 20 yuʼun li xchibal ue,+ tots batel li tok ti te oy ta sba chʼul karpana+ ti bu oy li xkaxail tratoe.
12 Jech oxal, li j-israeletike lokʼik batel li ta takixokol balumil ta Sinaie, jech lokʼik batel ti kʼu yelan albil chlokʼik batel jujuchope.+ Li toke te kʼot yakʼ sba ta takixokol balumil ta Paran.+
13 Taje jaʼ to sba velta totsik batel, la xchʼunik li mantal ti jech albat yuʼun Jeova li Moisese.+
14 Li oxchop nitilulal ti jmoj oyik* ti jaʼ sventainoj li Judae jaʼ baʼyel lokʼik batel. Li Nason+ xnichʼon Aminadabe jaʼ sbainoj li soltaroetik ta snitilulale.
15 Li soltaroetik ta jchop snitilulal xnichʼnabtak Isakare jaʼ sbainoj Netanel+ xnichʼon Suar.
16 Li soltaroetik ta jchop snitilulal xnichʼnabtak Sabulone jaʼ sbainoj Eliab+ xnichʼon Elon.
17 Li xnichʼnabtak Guerson+ xchiʼuk xnichʼnabtak Merari+ ti jaʼ sbainojik xkuchel batel li axibalnae jaʼo lokʼik batel kʼalal laj xa ox yichʼ tukiel li axibalnae.+
18 Li oxchop nitilulal ti jmoj oyik* ti jaʼ sventainoj li Rubene lokʼik batel. Li Elisur+ xnichʼon Sedeure jaʼ sbainoj li soltaroetik ta snitilulale.
19 Li soltaroetik ta jchop snitilulal xnichʼnabtak Simeone jaʼ sbainoj Selumiel+ xnichʼon Surisadai.
20 Li soltaroetik ta jchop snitilulal xnichʼnabtak Gade jaʼ sbainoj Eliasaf+ xnichʼon Deuel.
21 Ta tsʼakale lokʼik batel li jkoatetike, jaʼ xkuchojik batel li kʼusitik chtun ti bu chʼule.+ Yuʼun kʼalal mi kʼotike, skʼan xa ox lek tsʼakbil chkʼot staik yan velta li axibalnae.
22 Li oxchop nitilulal ti jmoj oyik* ti jaʼ sventainoj li Efraine lokʼik batel. Li Elisama+ xnichʼon Amiude jaʼ sbainoj li soltaroetik ta snitilulale.
23 Li soltaroetik ta jchop snitilulal xnichʼnabtak Manasese jaʼ sbainoj Gamaliel+ xnichʼon Pedasur.
24 Li soltaroetik ta jchop snitilulal xnichʼnabtak Benjamine jaʼ sbainoj Abidan+ xnichʼon Guideoni.
25 Li oxchop nitilulal ti jmoj oyik* ti jaʼ sventainoj li Dane jaʼ slajeb xa lokʼik batel ta skotol li jaychop nitilulale. Li Aieser+ xnichʼon Amisadaie jaʼ sbainoj li soltaroetik ta snitilulale.
26 Li soltaroetik ta jchop snitilulal xnichʼnabtak Asere jaʼ sbainoj Paguiel+ xnichʼon Okran.
27 Li soltaroetik ta jchop snitilulal xnichʼnabtak Neftalie jaʼ sbainoj Aira+ xnichʼon Enan.
28 Taje jaʼ ti kʼu yelan chlokʼik batel ta jujuchop* li j-israeletik kʼalal tsta yorail chlokʼik batele.+
29 Li Moisese xi laj yalbe li Obab ti jaʼ xnichʼon Reuel*+ ti likem ta Madiane, li smolniʼ* Moisese: «Chijbat xa li ta osil ti xi onoʼox laj yalbe skʼoplal li Jeovae: ‹Voʼoxuk chkakʼboxuk›.+ Jaʼ yuʼun, chiʼinunkutik batel,+ lek kʼusi ta jpasbotkutik, yuʼun yaloj ta jamal Jeova ti chakʼbe Israel li kʼusitik lekike».+
30 Xi la stakʼe: «Muʼyuk chibat. Jaʼ lek chisut batel ta jlumal ti bu oy li kutsʼ kalaltake».
31 Xi la stakʼ li Moisese: «Mu xaviktaunkutik avokoluk, yuʼun voʼot lek xavojtikin ti bu xuʼ jpas jkarpanatik li ta takixokol balumile, voʼot xuʼ xabeiltasunkutik batel.*
32 Mi chbat achiʼinunkutike,+ lek kʼusi ta jpasbotkutik jech kʼuchaʼal lek kʼusitik tspasbunkutik li Jeovae».
33 Vaʼun, laj yiktaik li vits yuʼun Jeovae.+ Oxib kʼakʼal xanavik batel, jaʼ jbabe batel yuʼunik li xkaxail+ strato Jeovae. Oxib kʼakʼal jelavem batel sventa saʼik bu xuʼ xkux yoʼontonik.+
34 Kʼalal chlokʼik batel xchiʼuk skarpanaik li ta kʼakʼaltike, te oy ta sbaik li tok yuʼun Jeovae.+
35 Xi chal Moises kʼalal jujukoj chichʼik batel li Kaxae: «Totsan tal, Kajval Jeova,+ akʼo spuk sbaik batel li avajkontratake. Akʼo jatavikuk batel avuʼun li buchʼutik tspʼajoxuke».
36 Kʼalal tsyalesik ta lumtik li Kaxae, xi chale: «Sutan tal, Kajval Jeova, laʼ ta stojolal li j-israeletik ti ta smilal noʼox oyik ti mu xlaj ta chapele».+
Tsʼibetik ta yok vun
^ Literal «ta jujutsop soltaro».
^ Literal «ta jujutsop soltaro».
^ Literal «ta jujutsop soltaro».
^ Literal «ta jujutsop soltaro».
^ Literal «ta jujutsop soltaro».
^ O «smoniʼ; smuniʼ».
^ Jaʼ xkaltik, li Jetroe.
^ O «xakʼot ta jsatkutik».
