Numeros 11:1-35
-
Chlokʼ tal kʼokʼ ta stojolal Dios mi chbikʼtal kʼopojike (1-3)
-
Li jteklume okʼik ta skʼanel bekʼet (4-9)
-
Mu xuʼ yuʼun chaʼi stuk li Moisese (10-15)
-
Li Jeovae laj yakʼbe espiritu li 70 ta voʼ moletike (16-25)
-
Eldad xchiʼuk Medad; tsvul yoʼonton ta stojolal Moises li Josuee (26-30)
-
Tal kodornisetik; li jteklume laj yichʼik kastigo ta skoj xpichʼetel yoʼontonik (31-35)
11 Li jteklume lik bikʼtal kʼopojikuk tajek ta stojolal li Jeovae. Kʼalal kʼot ta xchikin li Jeovae, solel tsan tajek skʼakʼal yoʼonton, vaʼun yal tal kʼokʼ ta stojolalik ti lik talel ta stojolal Jeovae xchiʼuk la xchikʼ jayvoʼuk krixchanoetik li ta spat karpanaetike.
2 Kʼalal lik skʼanik vokol ta stojolal Moises li jteklume, li Moisese la skʼanbe vokol li Jeovae,+ vaʼun tupʼ li kʼokʼe.
3 Jech oxal, Tabera* laj yakʼbeik sbi ti bu kʼot ta pasel taje, yuʼun te kʼot kʼokʼ ta stojolalik ti lik talel ta stojolal Jeovae.+
4 Li jyanlumetik*+ ti te xchiʼukik li j-israeletike oy kʼusi lik xpichʼ oʼontaik tajek+ xchiʼuk lik okʼikuk yan velta li j-israeletik eke, xi laj yalike: «¿Buchʼu xa noʼox chakʼ jtiʼtik bekʼet taj une?+
5 ¡Xvul ta joltik ti jun to noʼox smuil la jtiʼtik choy ta yosilal Ejiptoe, ta moton la jtiʼtik. La jlajestik pepino, sandia, yaxal tuix, tuix xchiʼuk axux!+
6 Pe li avie yantik xijkʼunib, yuʼun puro mana liʼ jkʼelojtike,+ muʼyuk kʼusi yan».
7 Li manae+ xkoʼolaj ta bekʼ kulantu+ xchiʼuk ta xuchʼal teʼ ti mu tajek yikʼe.
8 Li jteklume tspuk sbaik batel ta stsobel, vaʼun tsnoyik ta molino* o moʼoje ta xvochʼik ta boch ti pasbil ta tone. Mi laje, ta slakanik ta pʼinetik o moʼoje ta spasik ta panetik. Jech smuil chlokʼ kʼuchaʼal pan+ ti yichʼoj aseitee.
9 Kʼalal chyal tal job osil ta akʼobaltik ti bu spasoj skarpanaike, te xlamamet chyal tal li mana eke.+
10 Li Moisese laj yaʼi ti ch-okʼik li jteklume, ta jujuchop utsʼ alalil, ta jujuntal te ch-okʼ ta stiʼ skarpanaik. Lik tajek skʼakʼal yoʼonton li Jeovae+ xchiʼuk chopol tajek laj yaʼi sba li Moises eke.
11 Li Moisese xi laj yalbe li Jeovae: «¿Kʼu yuʼun ti chavakʼbun jvokol ti voʼon avajtunelune? ¿Kʼu yuʼun ti muʼyuk lek chavilune, ti voʼon chavakʼbun jventain sjunul li jteklum liʼe?+
12 ¿Mi yuʼun voʼon smeʼikun sjunul li jteklum liʼe? ¿Mi yuʼun voʼon vokʼ kuʼun skotol ti xi chavalbune: ‹Peto batel ta stiʼ avoʼonton jech kʼuchaʼal tspas jun mosoil* ti tspet batel ta stiʼ yoʼonton jun jchuʼnom olol›, sventa chkikʼ batel ta jun balumil ti laj avakʼ ave chavakʼbe li smoltotike?+
13 ¿Bu xa noʼox ta jta talel bekʼet yoʼ xkakʼbeik stiʼ sjunul li jteklum liʼe? Yuʼun xi xvulajetik ta jtojolal kʼalal ch-okʼike: ‹¡Akʼbunkutik bekʼet sventa jtiʼkutik un!›.
14 Mu xa noʼox stsʼikbe kuʼun jtuk li jteklum liʼe; toj echʼ xa noʼox tsots chkaʼi.+
15 Mi jech-o chapasbune, jaʼ lek milun xa ta ora avokoluk.+ Pe mi lek chavilune, mu xa xavakʼ xkil mas jvokol».
16 Li Jeovae xi la stakʼbe li Moisese: «Tsobbun tal 70 ta voʼ moletik ta Israel ti anaʼoj lek* ti jaʼ moletik xchiʼuk ti jaʼ j-abteletik ta lume.+ Ikʼo batel ta karpana sventa tsobobbail xchiʼuk te xavaʼan ta atsʼel.
17 Te chiyal talel+ xchiʼuk te ta jchiʼinot ta loʼil,+ vaʼun ta jlokʼesbot jutebuk li espiritu+ avichʼoje xchiʼuk jaʼ chkakʼbeik sventa skoltaoxuk ta sventainel li jteklume yoʼ mu atukuk xaventain.+
18 Xi skʼan xavalbe li jteklume: ‹Chʼultajeso abaik sventa okʼom,+ yuʼun ta melel chatiʼik bekʼet, yuʼun laj yaʼi Jeova+ ti xi chavalik kʼalal xa-okʼoletike: «¿Buchʼu xa noʼox chakʼ jtiʼtik bekʼet taj une? Mas toʼox lek jkuxlejaltik li ta Ejiptoe».+ Li Jeovae ta melel chakʼboxuk bekʼet, vaʼun chatiʼik.+
19 Maʼuk noʼox jun kʼakʼal chatiʼik, maʼuk noʼox chib kʼakʼal, mi jaʼuk voʼob kʼakʼal, mi jaʼuk lajuneb kʼakʼal xchiʼuk mi jaʼuk 20 kʼakʼal.
20 Lek jun u chatiʼik jaʼ to ti kʼuxi chlokʼ ta aniʼike xchiʼuk jaʼ to mi laj yakʼboxuk ib oʼontone,+ yuʼun la apʼajik li Jeova ti te xchiʼukoxuke xchiʼuk ta skoj ti xi xa-okʼoletik ta stojolale: «¿Kʼu yuʼun lijlokʼ tal li ta Ejiptoe?»›».+
21 Xi laj yal li Moisese: «Ti kʼu yepal viniketik liʼ jchiʼuke jaʼ 600 mil ta voʼ ti jaʼ soltaroetike,+ ¡pe xi avaloj li voʼote: ‹Chkakʼbeik bekʼet xchiʼuk ep xa noʼox tstiʼik sjunul u›!
22 ¿Mi xlokʼik-o van ti xichʼ milbel stiʼik skotol li chijetik xchiʼuk vakaxetike? ¿Mi xlokʼik-o van ti xichʼik tsakbel stiʼik skotol li choyetik ta nabe?».
23 Xi albat yuʼun Jeova li Moisese: «¿Mi yuʼun mu spas yuʼun xanaʼ li Jeovae?+ Te xakʼel avil mi chkʼot ta pasel o mi muʼyuk li kʼusi chkale».
24 Lokʼ batel li Moisese, bat yalbe jteklum li kʼusi albat yuʼun Jeovae. La stsob 70 ta voʼ viniketik ti jaʼ moletik ta jteklume, te la svaʼan ta sjoylejal li karpanae.+
25 Vaʼun, li Jeovae te yal tal ta tok,+ te la xchiʼin ta loʼil li Moisese+ xchiʼuk la slokʼesbe juteb li espiritu yichʼoje,+ jaʼ laj yakʼbe ta jujuntal li 70 ta voʼ moletike. Kʼalal naka noʼox kʼot ta stojolalik li espiritue, jech xa stalelal lik spasik kʼuchaʼal li j-alkʼopetike,*+ pe muʼyuk xa jech la spasik yan velta.
26 Oy chaʼvoʼ viniketik ti te oyik ti bu spasoj skarpanaike. Jaʼ sbiik Eldad xchiʼuk Medad. Te kʼot ta stojolalik li espiritue, yuʼun tsakbil sbiik ta lista ek, jaʼ noʼox ti muʼyuk batik li ta karpana sventa tsobobbaile. Jech oxal, jech lik spas stalelalik kʼuchaʼal j-alkʼopetik ti bu spasoj skarpanaike.
27 Vaʼun, te tal ta anil jun kerem, xi laj yalbe li Moisese: «¡Li Eldad xchiʼuk Medade jech xa stalelalik kʼuchaʼal j-alkʼopetik ti bu oy li karpanaetike!».
28 Li Josue+ ti jaʼ xnichʼon li Nune xchiʼuk ti ta skeremal onoʼox lik tunuk ta stojolal li Moisese xi laj yale: «¡Kajval Moises, pajeso li viniketik taje!».+
29 Pe xi la stakʼ li Moisese: «¿Mi chavul avoʼonton ti kʼusi chkʼot ta jtojolal ta skoj taje? Mu xavul avoʼonton, ¡li voʼone oy ta koʼonton ti xkʼotik ta j-alkʼopetik sjunul li steklumal Jeovae xchiʼuk ti x-akʼbatik s-espiritu Jeovae!».
30 Ta tsʼakal li Moisese sut batel ti bu spasoj skarpanaike, te xchiʼuk batel li moletik ta Israele.
31 Lokʼ talel ikʼ ta stojolal Jeova, xkuchoj talel kodornisetik* ti te lokʼ tal ta nabe, te lamal vul ta sjoylejal ti bu spasoj skarpanaike.+ Ti kʼu sjamlej la smak ta sjoylejal ti bu spasoj skarpanaik kʼalal yal li kodornisetike, jaʼ jun kʼakʼal ta xanel li ta jote xchiʼuk jun kʼakʼal ta xanel li ta jot xtoke xchiʼuk jaʼ chib xukʼubil* li spimil yale.
32 Sjunul kʼakʼal, sjunul akʼobal xchiʼuk sjunul kʼakʼal ta yokʼomal julavemik-o li jteklume, yuʼun naka tsak kodornisetik* tspasik. Muʼyuk buchʼu ti muʼyuk stsʼaki yuʼun li lajuneb jomere,* te la slamanik ta sjoylejal ti bu spasoj skarpanaik sventa tstiʼ stukike.
33 Kʼalal naka to la stikʼ ta yeik li bekʼete, kʼalal skʼan toʼox xaxike, tsan skʼakʼal yoʼonton Jeova ta stojolal li jteklume. Lik syayijes jteklum li Jeovae, toj echʼ xa noʼox ep buchʼutik chamik.+
34 Li bu kʼot ta pasel taje Kibrot-Ataava*+ laj yakʼbeik sbi, yuʼun te la smukik li buchʼutik pichʼ tajek yoʼontonik ta sventa li kʼusi tskʼan stukike.+
35 Li jteklume lokʼik batel li ta Kibrot-Ataavae, te batik ta Aserot. Te komik ta Aserot.+
Tsʼibetik ta yok vun
^ Jaʼ skʼan xal ‹skʼakʼemal›, jaʼ xkaltik, lik kʼokʼ o til.
^ Yaʼeluke, jaʼ chalbe skʼoplal li buchʼutik maʼuk j-israeletik ti te xchiʼukike.
^ O «vinik ti enfermeroe».
^ O «xavojtikin lek».
^ O «lik yalik albil kʼopetik».
^ O «voychijetik; jaxpekʼetik».
^ Li jun xukʼubile jaʼ 44.5 sentimetro snatil. Kʼelo Apendise B14.
^ O «voychijetik; jaxpekʼetik».
^ Li jun jomere jaʼ 220 litro. Kʼelo Apendise B14.
^ Jaʼ skʼan xal ‹smukinal li kʼusi chakʼ tajek pichʼ oʼontonale›.
