Numeros 12:1-16
12 Li Miriam xchiʼuk Aarone chopol lik kʼopojikuk ta stojolal Moises ta skoj ti yikʼoj jun ants ti likem ta Kuse.+
2 Xi laj yalike: «¿Mi jaʼ noʼox ta stojolal Moises chchiʼinvan ta loʼil li Jeovae?+ ¿Mi mu tauk xchiʼinvan ta loʼil ta jtojolaltik ek?». Te xchikintaoj li Jeovae.+
3 Li Moisese batsʼi stuk xa noʼox toj manxo ta skotol li viniketik*+ ta sba balumile.
4 Li Jeovae ta anil noʼox xi laj yalbe li Moises, Aaron xchiʼuk Miriame: «Batan avoxvoʼalik li ta karpana sventa tsobobbaile». Jaʼ yuʼun, bat yoxvoʼalik.
5 Li Jeovae te yal tal li ta jvol toke,*+ te laj yakʼ sba ta yochebal karpana, vaʼun la stak ta ikʼel li Aaron xchiʼuk Miriame. Jech nopaj batel xchaʼvoʼalik.
6 Xi albatike: «Avokolikuk, aʼio avaʼiik lek li kʼusi chkale. Mi oy junuk yaj-alkʼop Jeova te ta atojolalike, jaʼo chkakʼ jba ta ojtikinel ta stojolal kʼalal oy kʼusi chkakʼbe yile+ xchiʼuk ta xvayich ta jchiʼin ta loʼil.+
7 ¡Pe mu jechuk ta jpas xchiʼuk li kajtunel Moisese! Yuʼun li stuke kakʼojbe sbain skotol li jnae.*+
8 Jkʼelojbe jba jsatkutik kʼalal ta jchiʼin jbakutik ta loʼile,+ jamal kʼusi chkalbe jbakutik, maʼuk ti mu stakʼ aʼibel smelolale; jech xtok chilbe spat xokon li Jeovae. ¿Kʼu yuʼun ti muʼyuk xaxiʼik kʼalal oy kʼusitik chopol laj avalik ta stojolal li kajtunel Moisese?».
9 Tsan tajek skʼakʼal yoʼonton Jeova ta stojolalik, jaʼ yuʼun iktaatik komel.
10 Li toke tots batel li ta karpanae, kʼalal tots xa ox batele, tsakbil xa ta lepra* li Miriame, sakloʼan tajek jech kʼuchaʼal taiv.+ Li Aarone joyij skʼel li Miriame, laj yil ti tsakbil xa ta leprae.+
11 Li Aarone xi laj yalbe ta anil li Moisese: «¡Ta jkʼanbot vokol, kajval! ¡Avokoluk, mu teuk xanakʼ ta avoʼonton li jmulkutike! ¡Toj bol xa noʼox li kʼusi la jpaskutike!
12 ¡Avokoluk, mu jechuk xavikta komel kʼuchaʼal jun olol ti chamem chvokʼe, ti chkʼaʼ xa batel sbekʼtal kʼalal chvokʼe!».
13 Li Moisese xi lik skʼanbe vokol li Jeovae: «¡Dios Kajval, poxtao avokoluk! ¡Avokoluk!».+
14 Li Jeovae xi laj yalbe li Moisese: «¿Mi mu vukubuk kʼakʼal chopol kʼoptabil chkom ti tauk xtubtabat sat yuʼun li stote? Akʼo yichʼ chʼakel lokʼel vukubuk kʼakʼal ta stojolal li yantike,+ jaʼ to xuʼ x-och talel mi tsʼakie».
15 Jaʼ yuʼun, vukub kʼakʼal laj yichʼ chʼakel lokʼel ta stojolal yantik li Miriame,+ li jteklume muʼyuk la stots skarpanaik jaʼ to ti kʼuxi laj yichʼ ikʼel sutel li Miriame.
16 Ta tsʼakal li jteklume lokʼik batel li ta Aserote,+ te lik spas skarpanaik ta takixokol balumil ta Paran.+
Tsʼibetik ta yok vun
^ O «toj bikʼit yakʼoj sba, jaʼ mu jechuk li yan viniketike».
^ Literal «jtel toke».
^ Literal «tukʼ yoʼonton chakʼ ta ilel ta skotol li jnae».
