Numeros 13:1-33
13 Li Jeovae la xchiʼin ta loʼil li Moisese, xi laj yalbee:
2 «Tako batel viniketik sventa xbat spaʼiik* li yosilal Kanaan ti chkakʼbe li j-israeletike. Tako batel jun vinik ta jujuchop snitilulalik, jun bankilal+ ta jujuchop yuʼunik».+
3 Vaʼun, li Moisese la stakan batel, yuʼun jech albat mantal yuʼun Jeova, te likik batel ta takixokol balumil ta Paran.+ Skotol li viniketike jaʼ joliletik yuʼunik li j-israeletike.
4 Xi sbiik li viniketike: li ta snitilulal Rubene jaʼ Samua xnichʼon Sakur;
5 li ta snitilulal Simeone jaʼ Safat xnichʼon Ori;
6 li ta snitilulal Judae jaʼ Kaleb+ xnichʼon Jefune;
7 li ta snitilulal Isakare jaʼ Igal xnichʼon Jose;
8 li ta snitilulal Efraine jaʼ Osea+ xnichʼon li Nune;
9 li ta snitilulal Benjamine jaʼ Palti xnichʼon Rafu;
10 li ta snitilulal Sabulone jaʼ Gadiel xnichʼon Sodi;
11 li ta snitilulal Josee,+ ti jaʼ snitilulal Manasese,+ jaʼ Gaddi xnichʼon Susi;
12 li ta snitilulal Dane jaʼ Amiel xnichʼon Guemali;
13 li ta snitilulal Asere jaʼ Setur xnichʼon Miguel;
14 li ta snitilulal Neftalie jaʼ Nabi xnichʼon Vofsi;
15 li ta snitilulal Gade jaʼ Gueuel xnichʼon Maki.
16 Taje jaʼ sbiik li viniketik ti takatik batel yuʼun Moises ta spaʼiel* li balumile. Li Moisese la sjelbe sbi li Osea ti jaʼ xnichʼon li Nune, Josue*+ laj yakʼbe sbi.
17 Kʼalal takatik batel yuʼun Moises ta spaʼiel* li yosilal Kanaane, xi albatike: «Muyanik batel ta Negueb, mi laje, te xamuyik batel li ta vitstikaltike.+
18 Skʼan xakʼelik kʼu yelan li balumile+ xchiʼuk skʼan xakʼelik mi lek tsotsik o mi muʼyuk li buchʼutik te nakalike, mi jutebik o mi epik.
19 Kʼelik mi lek o mi muʼyuk lek li balumile, kʼelik mi oy smuroal o mi muʼyuk smuroal li lum ti bu nakalike.
20 Kʼelik mi lek yox* li balumile o mi muʼyuk kʼusi xakʼ,*+ mi oy teʼetik o mi muʼyuk. Skʼan tsotsuk avoʼontonik+ sventa xavichʼik tal jutebuk sat li kʼusitik chchʼi te ta lume». Taje jaʼo yorail kʼalal chlokʼ li baʼyel sat uvaetik ti yijik xae.+
21 Muyik batel li viniketike, lik spaʼiik* li balumile. Te likik ta takixokol balumil ta Sin,+ kʼotik kʼalal to ta Reob,+ laje kʼotik kʼalal to ta stsʼel Lebo-Amat.*+
22 Kʼalal muyik batel ta Neguebe, kʼotik ta Ebron+ ti bu nakalik li Aiman, Sesai xchiʼuk Talmai+ ti jaʼik j-anaketike.+ Li Ebrone svukubal xa ox jabil smeltsajel kʼalal laj yichʼ pasel li Soan te ta Ejiptoe.
23 Kʼalal kʼotik ta stenlejaltik* Eskole,+ te la xtuchʼik jchoj uva, chaʼvoʼ to viniketik la xkuchik batel ta jtel teʼ xchiʼuk la xtuchʼik batel granadaetik* xchiʼuk igoetik.+
24 Stenlejaltik* Eskol*+ laj yakʼbeik sbi, yuʼun jaʼ te la xtuchʼik batel jchoj uva li j-israeletike.
25 40 kʼakʼal+ jalijik spaʼiel* li balumile, vaʼun sutik batel.
26 Sutik batel ta stojolal Moises, Aaron xchiʼuk sjunul li tsobobbail yuʼun j-israeletik ti te oyik ta takixokol balumil ta Parane, ti te xkom ta Kadese.+ Kʼot yalbeik skotol tsobobbail li kʼusi laj yilike xchiʼuk laj yakʼik ta ilel li sat teʼ xkuchojik talel ti te la xtuchʼik li ta balumil ay spaʼiike.*
27 Xi la xchapbeik li Moisese: «Ay jkʼelkutik li balumil bu la atakunkutik batele, ta melel oy lek leche+ xchiʼuk pom te, liʼe jaʼ sat li kʼusitik te chchʼie.+
28 Jaʼ noʼoxe li krixchanoetik te nakalike toj ven tsotsik, mukʼtik tajek li lumetike xchiʼuk joyajtik ta muro. Te laj kilkutik xtok li j-anaketike.+
29 Li j-amaleketike+ te nakalik ta yosilal Negueb.+ Li j-etetike, li jebusetike+ xchiʼuk li j-amorreoetike+ te nakalik li ta vitstikaltike. Li jkanaanetike+ te nakalik ta xokon nab+ xchiʼuk ta xokon Jordan».
30 Li Kalebe tskʼan tspajtsan jteklum kʼalal jaʼo te vaʼalik ta stojolal li Moisese, xi laj yale: «Muykutik noʼox batel ta ora, xpojbe kuʼuntik ta melel li yosilike, ta melel stsal kuʼuntik».+
31 Pe xi laj yalik li yan viniketik ti koʼol ayik xchiʼuke: «Mu xuʼ xbat jtsaktik ta kʼop li krixchanoetike, yuʼun jaʼ mas xuʼ yuʼunik».+
32 Jech-o chopol kʼusi laj yalbeik+ j-israeletik ta sventa li balumil ay spaʼiike,* xi laj yalike: «Li balumil butik echʼ jpaʼikutike tsbikʼ batel li buchʼutik te nakalike, jech xtok, toj echʼ xa noʼox mukʼtik skotol li krixchanoetik te laj kilkutike.+
33 Ta melel, te laj kilkutik li jnefilimetike, li xnichʼnabtak Anak+ ti te likemik talel ta snitilulal jnefilimetike. Kʼalal likʼotkutik ta stojolalike xikoʼolajkutik ta uni pʼilixetik,* jaʼ jech laj kaʼi jbakutik xchiʼuk jaʼ jech laj yilunkutik ek».
Tsʼibetik ta yok vun
^ O «xbat skʼelik».
^ O «spamukʼtael».
^ O «Jeosua». Taje jaʼ skʼan xal ‹jaʼ jkoltavanej li Jeovae›.
^ O «spamukʼtael».
^ Literal «jupʼem».
^ Literal «bak».
^ O «spamukʼtaik».
^ O «yochebal Amat».
^ O «beoʼtik ta stenlejaltik».
^ Jaʼ jtos sat teʼ ti lek tsoj skoloral ti xkoʼolajtik kʼuchaʼal mantsanae.
^ O «beoʼtik ta stenlejaltik».
^ Jaʼ skʼan xal ‹jchoj uva›.
^ O «spamukʼtael».
^ O «spamukʼtaike».
^ O «spamukʼtaike».
^ O «saltamonteetik; chiletik».