Numeros 14:1-45
14 Tsots lik avanikuk sjunul li tsobobbaile, li akʼobal taje, tsots x-avetik likel xchiʼuk sjunul akʼobal okʼik.+
2 Skotol li j-israeletike lik bikʼtal kʼopojikuk ta stojolal Moises xchiʼuk Aaron.+ Sjunul li tsobobbaile xi lik chopol kʼopojikuk ta stojolalike: «¡Jaʼ lek jechuk ti teuk onoʼox lijcham ta yosilal Ejiptoe o ti liʼuk xijcham ta takixokol balumile!
3 ¿Kʼu yuʼun chikʼutik batel Jeova li ta balumil taje ti jaʼ noʼox te chbat lajkutik ta espadae?+ Te tspojik li kajniltik xchiʼuk jnichʼnabtike.+ ¿Mi mu jaʼuk lek ti xijsut ta Ejiptoe?».+
4 Xi to chalilanbe sbaik xtoke: «¡Jvaʼantik yan jnitvanej sventa xijsut batel ta Ejipto!».+
5 Jaʼ yuʼun, li Moises xchiʼuk Aarone la snijan spatan sbaik ta lumtik ta sat j-israeletik kʼalal jaʼo te tsobolike.
6 Li Josue+ ti jaʼ xnichʼon li Nune xchiʼuk li Kaleb+ ti jaʼ xnichʼon li Jefune ti ay spaʼiik* li balumil eke, lik sjat skʼuʼ spokʼik
7 xchiʼuk xi laj yalbeik sjunul li tsobobbail yuʼun j-israeletike: «Toj echʼ xa noʼox lek tajek li balumil ay jpaʼikutike.*+
8 Mi xmuyubaj yoʼonton kuʼuntik li Jeovae, te chikʼutik batel li ta balumil taje, jaʼ chakʼbutik li balumil ti bu oy lek leche xchiʼuk pome.+
9 Jaʼ noʼox mu xatoy abaik ta stojolal li Jeovae xchiʼuk mu xaxiʼik yuʼun li krixchanoetik te ta lume,+ yuʼun stsal noʼox kuʼuntik.* Muʼyuk xa spojobbailik xchiʼuk liʼ xchiʼukutik li Jeovae.+ Mu xaxiʼik yuʼun».
10 Sjunul li tsobobbaile la skomon nopik ti chakʼbeik tone.+ Pe li smukʼulal Jeovae te vinaj ta sba li karpana sventa tsobobbaile, laj yilik sjunul li jteklum Israele.+
11 Li Jeovae xi laj yalbe li Moisese: «¿Kʼu to sjalil jech tspas li jteklum ti muʼyuk chichʼikun ta mukʼe+ xchiʼuk bakʼin to chakʼ xchʼunel yoʼontonik ta jtojolal akʼo mi laj xa yilik li senyailtak la jpas ta stojolalike?+
12 Ta jyayijesik ta chamel xchiʼuk ta jlajesbeik skʼoplal, voʼot chkakʼ kʼotan ta jun mukʼta lum, mas mukʼ chabat xchiʼuk mas tsots chabat ti jaʼ mu sta li stukike».+
13 Pe li Moisese xi la stakʼbe li Jeovae: «Li voʼote ta ajuʼel la alokʼes tal ta Ejipto li jteklum liʼe, jaʼ yuʼun mi laj yaʼi j-ejiptoetik li kʼusi chapase,+
14 chlik sloʼiltabeik li jnaklejetik liʼ ta osile. Li jnaklejetik liʼe yaʼiojik akʼoplal ek Jeova ti te achiʼuk li ateklumale+ xchiʼuk ti laj avakʼ aba ta ilel ta stojolalike.+ Voʼot Jeovaot xchiʼuk te oy ta stojolalik li tok avuʼune, voʼot jbabeot batel yuʼunik ta jvol tok* li ta kʼakʼaltike xchiʼuk voʼot jbabeot batel yuʼunik ta jvol kʼokʼ* li ta akʼobaltike.+
15 Mi ta jun noʼox velta chamil sjunul li jteklum liʼe, xi chlik yalik li lumetik ti yaʼiojik akʼoplale:
16 ‹Li Jeovae muʼyuk xuʼ yuʼun xikʼ ochel li ta balumil ti yakʼoj ye chakʼbe li jteklum liʼe, jaʼ yuʼun te la smil li ta takixokol balumile›.+
17 Jech oxal, avokoluk, Jeova, akʼo ta ilel ti tsots ajuʼele jech kʼuchaʼal xi onoʼox avaloj ta jamale:
18 ‹Li Jeovae mu ta aniluk snaʼ x-ilin, ep tukʼil kʼanelal*+ yuʼun xchiʼuk chakʼ ta perton li buchʼu oy kʼusi chopol tspase xchiʼuk li buchʼu mu xchʼun mantale, pe maʼuk ti te noʼox skʼeloj ti muʼyuk chakʼbe kastigo li buchʼu oy smule. Jech xtok, chakʼbe kastigo nichʼonil ta skoj smul li totile, chakʼbe kastigo kʼalal to ta yoxkʼolal xchiʼuk xchankʼolal kuxlejal›.+
19 Avokoluk, ta skoj ti lek tukʼ xanaʼ xakʼanvane, akʼo ta perton li kʼusi chopol tspas li jteklum liʼe, jech kʼuchaʼal ti laj onoʼox avakʼ talel ta perton ti kʼalal la alokʼes tal ta Ejiptoe».+
20 Xi laj yal li Jeovae: «Chkakʼbe perton jech kʼuchaʼal chavale.+
21 Pe maʼuk noʼox, yuʼun ta xnoj ta yutsilal Jeova+ spʼejel li balumile, jamal chkal ta skoj ti kuxulune.
22 Akʼo mi jech, li viniketik ti laj yilik li jmukʼulale xchiʼuk ti laj yilik li senyailtak+ la jpas ta Ejipto xchiʼuk ta takixokol balumile xchiʼuk ti lajuneb xa velta laj yakʼikun ta preva+ xchiʼuk ti muʼyuk chchikintaik li kʼusi chkale,+ li viniketik taje mi junuk
23 velta chilik li balumil ti kaloj ta jamal chkakʼbe li smoltotakike. Mi junuk muʼyuk buchʼu chil yuʼunik li buchʼutik muʼyuk laj yichʼikun ta mukʼe.+
24 Pe ta skoj ti jelel kʼusi tsnop li kajtunel Kalebe+ xchiʼuk ti ta sjunul yoʼonton la stsʼakliun batele, ta melel jaʼ chkikʼ ochel li ta balumil ti bu aye xchiʼuk jaʼ chkakʼbe yuʼuninik li snitilulale.+
25 Ta skoj ti te nakalik ta stenlejaltik li j-amaleketik xchiʼuk li jkanaanetike,+ skʼan xajoy batel abeik li okʼome, te xabatik ta takixokol balumil ta sbelel li Tsajal nabe».+
26 Vaʼun, xi albatik yuʼun Jeova li Moises xchiʼuk Aarone:
27 «¿Bakʼin to chikta sbaik ti chbikʼtal kʼopojik ta jtojolal li chopol tsobobbail liʼe?+ Yuʼun kaʼioj li kʼusi chopol chalik ta jtojolal kʼalal chbikʼtal kʼopojik li j-israeletike.+
28 Xi xavalbe yaʼiike: ‹«¡Jamal chkal ta skoj ti kuxulune —xi yaloj li Jeovae—, jech ta jpasboxuk li kʼusi chavalik ti kʼotem ta jchikine!+
29 Liʼ telajtik chkom ta takixokol balumil li abekʼtalike,+ ta melel ti kʼu avepalik ti 20 o ti mas ta 20 jabil avichʼojik ti laj avichʼ tsakbel abiike, akotolik ti labikʼtal kʼopojik ta jtojolale+ te telajtik chkom abekʼtalik.
30 Ti kʼu avepalik taje mi junuk ch-och avuʼunik li ta balumil ti laj kakʼ ke* te chanakiike,+ jaʼ noʼox ch-och li Kaleb xnichʼon Jefune xchiʼuk li Josue xnichʼon li Nune.+
31 »›»Jaʼ chkakʼ ochikuk li avalab anichʼnabik ti laj avalik ti chichʼik pojel batele.+ Jaʼ chojtikinik li balumil ti la apʼajike.+
32 Pe li voʼoxuke liʼ noʼox ta takixokol balumil telajtik chkom li abekʼtalike.
33 Li avalab anichʼnabike chkʼotik ta jchabichij 40 jabil li ta takixokol balumile,+ jaʼ ta stojik ti kʼusitik muʼyuk tukʼ chapasike, jaʼ to chlaj svokolik mi lacham akotolik li ta takixokol balumile.+
34 Jaʼ chichʼ tsakel ta venta ti jayib kʼakʼal ay apaʼiik* li balumile, 40 kʼakʼal,+ li jun kʼakʼale jaʼ jun jabil chkʼot, li jun kʼakʼale jaʼ jun jabil chkʼot, 40 jabil chatoj amulik,+ jaʼ to te chavakʼik venta ti chʼabal lek ti chakontrainikune.*
35 »›»Jaʼ jech kaloj ti voʼon Jeovaune. Xi ta jpasbe sjunul li chopol tsobobbail ti jmoj tskontrainikune: liʼ chlaj skʼoplalik ta takixokol balumile, liʼ chchamike.+
36 Li viniketik ti takatik batel yuʼun Moises ta spaʼiel* li balumile xchiʼuk ti jaʼ ta smulik ti lik bikʼtal kʼopojikuk yuʼunik sjunul li tsobobbail ta stojolale, ti jaʼ ta skoj ti muʼyuk kʼusi lek vul yalik kʼalal ay spaʼiik li balumile,+
37 jech, li viniketik ti muʼyuk kʼusi lek vul yalik ta sventa li balumile, chichʼik yayijesel xchiʼuk te chchamik ta yeloval Jeova.+
38 Pe li Josue ti jaʼ xnichʼon li Nune xchiʼuk li Kaleb ti jaʼ xnichʼon li Jefune ti ay spaʼiik* li balumil eke, ta melel kuxul chkomik»›».+
39 Kʼalal jech albatik yuʼun Moises skotol li j-israeletike, solel laj yat tajek yoʼonton li jteklume.
40 Jech xtok, sob xa tajek likik ta yokʼomal xchiʼuk laj yakʼik persa chmuyik batel kʼalal to ta jol vits, xi chalike: «Chapalutik xa sventa xijmuy batel ti bu onoʼox yalojbe skʼoplal li Jeovae, yuʼun laj xa jsaʼ jmultik».+
41 Pe xi laj yal li Moisese: «¿Kʼu yuʼun mu xavichʼik ta mukʼ li kʼusi yaloj Jeovae? Muʼyuk me lek chbat avuʼunik li kʼusi chapasike.
42 Mu xamuyik, yuʼun muʼyuk te xchiʼinojoxuk li Jeovae; jech xtok chavichʼik tsalel yuʼun li avajkontraike.+
43 Yuʼun te smalaojoxuk sventa stsakoxuk ta kʼop li j-amaleketik xchiʼuk li jkanaanetike,+ te chalajik ta espada. Ta skoj ti muʼyuk xa la atsʼakliik li Jeovae, muʼyuk xa chchiʼinoxuk li Jeova eke».+
44 Akʼo mi jech albatik, sujom xa muyik batel li ta jol vitse,+ pe li xkaxail strato Jeovae xchiʼuk li Moisese te noʼox komik ti bu oy li karpanaetike.+
45 Li j-amaleketik xchiʼuk li jkanaanetik ti te nakajtik li ta vits taje, yalik talel xchiʼuk te la stsalik li j-israeletike, snutsojik talel kʼalal to ta Orma.+
Tsʼibetik ta yok vun
^ O «spamukʼtaik».
^ O «jpamukʼtakutike».
^ Literal «pan noʼox kʼotem».
^ Literal «jtel tok».
^ Literal «jtel kʼokʼ».
^ O «slekil yutsil oʼontonal».
^ Literal «la jtoy jkʼob».
^ O «apamukʼtaik».
^ O «avajkontraikun chavilike».
^ O «spamukʼtael».
^ O «spamukʼtaik».
