Numeros 15:1-41
-
Smantalil matanaletik (1-21)
-
Jun noʼox mantal sventa li buchʼu te vokʼem ta Israele xchiʼuk li jyanlume (15, 16)
-
-
Matanaletik sventa mulil ti mu yaleluk chichʼ pasele (22-29)
-
Chichʼ kastigo li buchʼu yalel tspas smule (30, 31)
-
Chichʼ milel li buchʼu mu xchabi savadoe (32-36)
-
Skʼan oyuk stsitsimal ta stiʼil li yok skʼuʼ spokʼike (37-41)
15 Li Jeovae la xchiʼin ta loʼil yan velta li Moisese, xi laj yalbee:
2 «Chiʼino ta loʼil li j-israeletike, xi xavalbe yaʼiike: ‹Mi la-ochik xa ox li ta balumil ti bu chkakʼ naklanike+
3 xchiʼuk mi chachikʼbeik ta kʼokʼ yoʼ xkʼot ta smoton Jeova jkotuk vakax o jkotuk chij sventa lek xmuet yikʼ* chaʼi Jeovae+ —mi jaʼ jun chikʼbil matanal+ o milbil matanal kʼalal oy kʼusi chavakʼ aveik ta spasel ti stuk noʼox jeche o jaʼ jun matanal ti chlokʼ ta avoʼontonike+ o yan matanal kʼalal chapasik li kʼinetike—,+
4 li buchʼu chakʼ li matanale skʼan xichʼbe talel Jeova matanal sat tsʼunobiletik xtok, jaʼuk arina ti lek nine,+ jvokʼ ta lajunvokʼ jun efa* ti kapbil ta jutuk mu junuk litro* aseitee.
5 Jech xtok, skʼan xavakʼ jutuk mu jun litro* matanal vino, jmoj xavakʼ xchiʼuk li chikʼbil matanale+ o kʼalal chichʼ milel li jujukot chʼiom chije.
6 Mi jaʼ laj avakʼ jkot tot chije, skʼan xavakʼ matanal sat tsʼunobiletik, jaʼuk chaʼvokʼ ta lajunvokʼ jun efa arina ti lek nin ti kapbil ta mas ta jun litro* aseitee.
7 Skʼan xavakʼ xtok mas ta jun litro* matanal vino sventa lek xmuet yikʼ* chaʼi li Jeovae.
8 »›Pe mi jaʼ chavakʼ ta chikʼbil matanal+ jkotuk tot vakax o jaʼ chamil kʼalal oy kʼusi chavakʼ ave ta spasel ti stuk noʼox jeche+ o jaʼ chavakʼ ta matanal sventa jun oʼontonal ta stojolal Jeovae,+
9 skʼan xavakʼ matanal sat tsʼunobiletik xtok,+ jaʼ xavakʼ oxvokʼ ta lajunvokʼ jun efa arina ti lek nin ti kapbil ta jutuk mu chibuk litro* aseitee, jmoj xavakʼ xchiʼuk li tot vakaxe.
10 Jech xtok, skʼan xavakʼ jutuk mu chibuk litro* matanal vino,+ jaʼ chkʼot ta chikʼbil matanal ti lek xmuet yikʼ* chaʼi Jeovae.
11 Taje jaʼ jech skʼan pasel kʼalal chichʼ akʼel li jujukot tot vakaxe, li jujukot tot chije, li jujukot chʼiom tot chije o li jujukot tentsune.
12 Kʼuk noʼox yepal chavakʼik li chonbolometike jaʼ jech xapasik ta jujukot, jaʼ ti kʼu yepal chavakʼike.
13 Akotolik ti te vokʼemoxuk ta Israele jaʼ jech skʼan xapasik kʼalal chavakʼik chikʼbil matanal sventa lek xmuet yikʼ* chaʼi li Jeovae.
14 »›Mi oy junuk jyanlum ti te xchiʼukoxuk ta nakleje o mi oy buchʼu ti jal xa tajek te xchiʼukoxuk ti tskʼan chakʼ chikʼbil matanal sventa lek xmuet yikʼ* chaʼi Jeovae, skʼan jech spas kʼuchaʼal chapasik eke.+
15 Li voʼoxuk li ta tsobobbaile xchiʼuk li jyanlum te xchiʼukoxuk ta nakleje jun noʼox mantal avuʼunik. Taje jaʼ jun mantal chkom avuʼunik sbatel osil sventa skotol li jaykʼol kuxlejal chtal avuʼunik ta tsʼakale. Skʼan me koʼoloxuk ta yeloval Jeova xchiʼuk li jyanlumetik ti te achiʼukik ta nakleje.+
16 Voʼoxuk xchiʼuk li jyanlum te xchiʼukoxuk ta nakleje jun noʼox mantal xchiʼuk jun noʼox kʼusi chapanbil ti skʼan xatsakik ta ventae›».
17 Li Jeovae xi to laj yalbe li Moisese:
18 «Chiʼino ta loʼil li j-israeletike, xi xavalbe yaʼiike: ‹Mi la-ochik li ta balumil bu chkikʼoxuk batele
19 xchiʼuk mi la alajesik li veʼlil* te ta osile,+ skʼan xakʼelanbeik li Jeova eke.
20 Skʼan xakʼelanbeik li a-arinaik ti bu jaʼ to sba velta chajuchʼike,+ jutuk noʼox xajuchʼik ti chkʼot ta set-set panetike. Jaʼ jech xavakʼik jech kʼuchaʼal chavakʼik li kʼusi chavikʼaike.
21 Skʼan xakʼelanbeik Jeova jlomuk li a-arinaik ti bu jaʼ to sba velta chajuchʼik ti jutuk noʼox juchʼbile, jech skʼan xapasik ti jaykʼol kuxlejal chtal avuʼunik ta tsʼakale.
22 »›Pe mi oy buchʼu mu yaleluk kʼusi la spas o mi oy buchʼu muʼyuk la xchʼun skotol li mantaletik ti jech albil yuʼun Jeova li Moisese,
23 skotol li mantaletik laj yalboxuk Jeova ta stojolal Moisese, jaʼ li mantal laj yal ta sba velta Jeovae xchiʼuk ti jech-o kʼalal to ti jaykʼol kuxlejal chtal avuʼunik ta tsʼakale,
24 mi mu yaleluk li kʼusi laj yichʼ pasele xchiʼuk mi mu snaʼ li tsobobbaile, sjunul li tsobobbaile skʼan me xakʼik jkot chʼiom tot vakax sventa chikʼbil matanal ti lek xmuet yikʼ* chaʼi li Jeovae, jmoj akʼo yakʼik xchiʼuk matanal sat tsʼunobiletik xchiʼuk matanal vino jech kʼuchaʼal nopem xaʼiike,+ jech xtok, akʼo yakʼik jkotuk chʼiom tentsun sventa mulil.+
25 Li palee akʼo yakʼ ta matanal sventa sta perton sjunul li tsobobbail yuʼun j-israeletike, vaʼun chichʼ pasbel perton li smulike,+ yuʼun mu yaleluk la spasik xchiʼuk laj xa yichʼik tal matanal ti chichʼ chikʼel ta kʼokʼ sventa Jeovae xchiʼuk laj xa yichʼbeik talel Jeova li matanal sventa mulil ta skoj li kʼusi mu yaleluk la spasike.
26 Chichʼik akʼel ta perton sjunul li tsobobbail yuʼun j-israeletike xchiʼuk li jyanlum te nakal xchiʼuk li j-israeletike, yuʼun mu yaleluk kʼusi la spasik sjunul li jteklume.
27 »›Mi oy buchʼu la sta smul ti mu yaleluk la spase, akʼo yakʼ ta matanal sventa mulil+ jkot meʼ tentsun ti jun to jabil yichʼoje.
28 Li palee jaʼ chakʼ ta matanal sventa sta perton li buchʼu mu yaleluk la sta smul ta yeloval Jeovae, chchʼaybat li smule, vaʼun chichʼ akʼel ta perton.+
29 Li buchʼu te vokʼem ta Israel xchiʼuk li jyanlum ti te nakal ta Israele jun noʼox smantalil oy avuʼunik kʼalal oy kʼusi chkʼot ta pasel avuʼunik ti mu yaleluk chapasike.+
30 »›Pe mi oy buchʼu ti yalel xa tspas smule+ akʼo mi te vokʼem ta Israel o mi jaʼ junuk jyanlum ti te nakale, yakal xa me chchopol kʼopoj ta stojolal li Jeovae, persa skʼan xichʼ milel li ta steklumale.
31 Ta skoj ti la spʼaj li kʼusi laj yal Jeovae xchiʼuk ti muʼyuk la xchʼunbe smantale, persa skʼan xichʼ milel.+ Jaʼ chkom ta sba stuk li smule›».+
32 Kʼalal jaʼo te oyik ta takixokol balumil li j-israeletike, te la staik jun vinik ti yakal tstsob siʼ ta skʼakʼalil savadoe.+
33 Li buchʼu yakal tstsob siʼ la staike laj yikʼik batel ta stojolal Moises, Aaron xchiʼuk ta stojolal sjunul li tsobobbaile.
34 Te to la xchukik,+ yuʼun muʼyuk lek jamal chal ta mantal ti kʼusi skʼan xichʼ pasbele.
35 Li Jeovae xi laj yalbe li Moisese: «Persa skʼan xichʼ milel li vinike.+ Sjunul li tsobobbaile skʼan smilik ta ton li vinike, te akʼo smilik ta spat ti bu spasoj skarpanaike».+
36 Jaʼ yuʼun, sjunul li tsobobbaile la xjochik lokʼel ta spat ti bu spasoj skarpanaike, te laj yakʼbeik ton jaʼ to ti kʼuxi cham yuʼunike, jech la spasik jech kʼuchaʼal albat mantal yuʼun Jeova li Moisese.
37 Li Jeovae xi laj yalbe li Moisese:
38 «Chiʼino ta loʼil li j-israeletike, xi xavalbe yaʼiike: ‹Skʼan xavakʼbeik stsitsimal* stiʼil li yok akʼuʼ apokʼike, jech xapasik ti jaykʼol kuxlejal chtal avuʼunik ta tsʼakale. Jech xtok, luchbeik* jichʼil asul chʼojon li ta yakʼol stsitsimal yok akʼuʼ apokʼike.+
39 Skʼan oyuk stsitsimal* li stiʼil yok akʼuʼike, kʼalal chavakʼik ventae jaʼ chvul-o ta ajolik skotol li smantaltak Jeovae xchiʼuk ti skʼan xachʼunike.+ Mu xapasik li kʼusi chal avoʼontonike o li kʼusi chil asatike ti jaʼ yakal tsbeiltasoxuk sventa mu xa tukʼuk xavakʼ abaik ta jtojolale.+
40 Taje jaʼ tskoltaoxuk sventa xvul ta ajolik xchiʼuk xachʼunik skotol li jmantaltake, vaʼun chʼul chakʼotik ta stojolal li Adiosike.+
41 Voʼon Jeova Diosun avuʼunik ti la jlokʼesoxuk ta yosilal Ejipto sventa xikʼot ta Adiosike.+ Voʼon Jeova Diosun avuʼunik›».+
Tsʼibetik ta yok vun
^ O «jun yoʼonton yuʼun». Literal «tslamajes oʼontonal».
^ Li jvokʼ ta lajunvokʼ jun efae jaʼ 2.2 litro. Kʼelo Apendise B14.
^ Literal «jun kuarto in». Li jun ine jaʼ 3.67 litro. Kʼelo Apendise B14.
^ Literal «jun kuarto in». Li jun ine jaʼ 3.67 litro. Kʼelo Apendise B14.
^ Literal «jvokʼ ta oxvokʼ jun in».
^ O «jun yoʼonton yuʼun». Literal «tslamajes oʼontonal».
^ Literal «jvokʼ ta oxvokʼ jun in».
^ Literal «j-oʼlol in».
^ Literal «j-oʼlol in».
^ O «jun yoʼonton yuʼun». Literal «tslamajes oʼontonal».
^ O «jun yoʼonton yuʼun». Literal «tslamajes oʼontonal».
^ O «jun yoʼonton yuʼun». Literal «tslamajes oʼontonal».
^ Literal «pan».
^ O «jun yoʼonton yuʼun». Literal «tslamajes oʼontonal».
^ O «sne».
^ O «tsʼisbeik».
^ O «sne».
