Numeros 16:1-50
16 Li Koree+ jmoj bat xchiʼuk Datan, Abiram xchiʼuk On. (Li Koree jaʼ snitilulal Levi.+ Li Levie oy jun xnichʼon, Koat+ sbi, li Koate oy jun xnichʼon, Isar+ sbi, li Isare oy jun xnichʼon, Kore sbi. Li Datan, Abiram xchiʼuk One jaʼik snitilulal Ruben.+ Li Datan xchiʼuk Abirame jaʼik xnichʼnab Eliab,+ li One jaʼ xnichʼon Peles).
2 La stsob sbaik batel sventa skontrainik li Moisese, jmoj bat xchiʼukik 250 ta voʼ bankilaletik li ta tsobobbail yuʼun j-israeletik ti lek tsakbilik ta mukʼe, jaʼik li buchʼutik tʼujbilik yuʼun li tsobobbaile.
3 Te tsobol kʼotik ta stojolal+ li Moises xchiʼuk Aarone, xi laj yalbeike: «¡Taʼlo xa xkaʼiotkutik achaʼvoʼalik! Chʼul sjunul li tsobobbaile,+ chʼul skotolik xchiʼuk te oy ta stojolalik li Jeovae.+ ¿Kʼu yuʼun xa noʼox ti chakʼan chatoy abaik ta stojolal li stsobobbail Jeovae?».
4 Kʼalal jech laj yaʼi li Moisese, la skejan sba ta anil xchiʼuk la snijan sat ta lumtik.
5 Xi laj yalbe li Kore xchiʼuk xchiʼiltake: «Li sob okʼome chakʼ ta ojtikinel Jeova ti buchʼu jaʼ yuʼune,+ ti buchʼu chʼule xchiʼuk ti buchʼu xuʼ xnopaj batel ta stojolale,+ jaʼ chnopaj batel ta stojolal li buchʼu tstʼuje.+
6 Kore, xi xapas xchiʼuk skotol li achiʼiltake:+ tsako yav avakʼalik,+
7 akʼbeik skʼakʼal xchiʼuk akʼbeik pom okʼom ta yeloval Jeova. Jaʼ chʼul chkom li buchʼu chtʼujat yuʼun Jeovae.+ ¡La-echʼik xa ta mas ti kʼu yelan chapasike, xnichʼnabtak Levi!».+
8 Li Moisese xi laj yalbe li Koree: «Chikintaik avokoluk xnichʼnabtak Levi.
9 ¿Mi mu tsotsuk skʼoplal chavaʼiik ti la stʼujoxuk lokʼel li Sdios Israel li ta tsobobbail yuʼun Israele+ xchiʼuk ti chakʼ nopajanik ta stojolal sventa xapasik abtelal li ta axibalna yuʼun Jeovae xchiʼuk ti te chatunik yuʼun li tsobobbaile?+
10 ¿Mi mu tsotsuk skʼoplal chavaʼiik ti voʼoxuk noʼox xchiʼuk avermanotakik ti jaʼoxuk xnichʼnabtak Levi ti la stʼujoxuk sventa xanopajik ta stojolale? ¿Mi yuʼun chakʼan cha-och avaʼiik ta paleal xtok?+
11 Ti jech chapas xchiʼuk li achiʼiltake jaʼ yakal chakontrainik li Jeovae. ¿Buchʼu avalojik li Aaron ti chakontrainik kʼalal chabikʼtal kʼopojik ta stojolale?».+
12 Ta tsʼakal li Moisese la stak ta ikʼel li Datan xchiʼuk Abirame,+ li xnichʼnabtak Eliabe. Pe xi laj yalike: «¡Muʼyuk chibatkutik!
13 ¿Mi mu baluk noʼox xavaʼi ti la alokʼesunkutik tal ta jun balumil ti bu oy lek leche xchiʼuk pom ti te chbat avakʼ xichamkutik ta takixokol balumile?+ ¿Mi yuʼun chakʼan ti jaʼ xa noʼox atuk ajvalil chakʼot kuʼunkutik xtoke?*
14 Ti kʼusi noʼoxe jaʼ ti muʼyuk avikʼojunkutik batel ta jun balumil ti bu oy lek leche xchiʼuk pome+ xchiʼuk muʼyuk avakʼoj jrexto* osilkutik mi jaʼuk jtsʼunobal uvakutik. ¿Mi yuʼun chakʼan chatʼusbe xchiʼuk chakʼan chapitsbe lokʼel sbekʼ sat li viniketike? ¡Muʼyuk chibatkutik!».
15 Lik tajek skʼakʼal yoʼonton li Moisese xchiʼuk xi laj yalbe li Jeovae: «Mu xatsakbe li matanal sat tsʼunobiletik chakʼike. Muʼyuk jpojojbe mi jkotuk svuroik xchiʼuk mi junuk buchʼu oy kʼusi chopol jpasojbeik».+
16 Li Moises une xi laj yalbe li Koree: «Okʼom xatalik ta stojolal Jeova, chatal voʼot xchiʼuk achiʼiltak xchiʼuk chtal li Aaron eke.
17 Ta jujuntal akʼo stsak tal yav yakʼalik xchiʼuk akʼo yakʼbeik pom ta sba, vaʼun ta jujuntal chakʼik ta yeloval Jeova li yav yakʼalike, 250 yav akʼal. Li voʼot xchiʼuk Aarone jujun yav avakʼalik chavichʼik tal ek».
18 Jech oxal, ta jujuntal laj yichʼ tal yav yakʼalik, laj yakʼbeik skʼakʼal xchiʼuk pom, te kʼot svaʼan sbaik ta yochebal li karpana sventa tsobobbaile, jmoj te vaʼiik xchiʼuk Moises xchiʼuk Aaron.
19 Kʼalal te xa ox tsobol yuʼun xchiʼiltak+ Kore li ta yochebal karpana sventa tsobobbail ti jaʼik li buchʼutik tskontrainik li Moises xchiʼuk Aarone, te vinaj smukʼulal Jeova ta stojolal sjunul li tsobobbaile.+
20 Li Jeovae xi laj yalbe li Moises xchiʼuk Aarone:
21 «Chʼako abaik lokʼel ta stojolal li jvokʼ krixchanoetik liʼe, yuʼun ta ora noʼox ta jtupʼbe skʼoplalik».+
22 Vaʼun, la snijan skejan sbaik ta lumtik, xi laj yalike: «Kajval Dios, voʼot ti chavakʼbe xkuxlejal skotol li krixchanoetike,+ ¿mi cha-ilin ta stojolal sjunul tsobobbail ta skoj noʼox smul li jun vinike?».+
23 Li Jeovae xi laj yalbe li Moisese:
24 «Chiʼino ta loʼil li tsobobbaile, xi xavalbe yaʼiike: ‹¡Chʼako abaik lokʼel li ta skarpanaik Kore, Datan xchiʼuk Abirame!›».+
25 Li Moisese lik batel, bat ti bu oy li Datan xchiʼuk Abirame, te chiʼinat batel yuʼun li moletik+ ta Israele.
26 Xi laj yalbe li tsobobbaile: «Chʼako abaik lokʼel avokolikuk ti bu spasoj skarpanaik li chopol viniketik liʼe, jech xtok, mu xapikbeik li kʼusitik jaʼ yuʼunike sventa mu xavichʼik milel ta skoj skotol li smulike».
27 Ta anil noʼox la xchʼak sbaik lokʼel ti bu spasoj skarpanaik li Kore, Datan xchiʼuk Abirame, ta buyuk noʼox la xchʼak sbaik batel. Li Datan xchiʼuk Abirame lokʼ tal ta yut skarpanaik, te vaʼal kom xchiʼuk yajnilik xchiʼuk stseb skeremik xchiʼuk li kʼoxetik yuʼunik li ta stiʼ skarpanaike.
28 Vaʼun, xi laj yal li Moisese: «Jaʼ jech chavakʼik venta ti jaʼ la stakun tal Jeova sventa jpas li kʼusitik liʼe, ti maʼuk ta koʼonton jtuke.*
29 Mi jech chchamik li krixchanoetik liʼe jech kʼuchaʼal onoʼox chcham li krixchanoetike, mi jech tstaik kastigo kʼuchaʼal tsta skotol krixchanoetik ta spʼejel balumile, jaʼ me senyail ti maʼuk la stakun tal li Jeova un bi.+
30 Pe mi oy kʼusi toj yan to sba tspas li Jeova ta stojolalike, mi chjav* li balumile xchiʼuk mi te chbikʼatik yalel xchiʼuk skotol li kʼusitik oy yuʼunike, mi kuxul chyalik ta Mukinale,* jech chanaʼik ta melel ti la stoy sbaik ta stojolal Jeova li viniketik liʼe».
31 Kʼalal naka noʼox jech laj yal taje, jav li balumil ti bu vaʼalike.+
32 Jav* li balumile, bikʼatik yalel xchiʼuk snaik xchiʼuk skotol li krixchanoetik ti oyik ta sparte li Koree+ xchiʼuk skotol li kʼusitik x-ayan yuʼunike.
33 Kuxul yal skotolik ta Mukinal* xchiʼuk skotol li krixchanoetik ti yakʼoj sbaik ta stojolalike. Mukatik yuʼun li balumile, vaʼun jech te chamik ti bu oy li tsobobbaile.+
34 X-avetik xa li buchʼutik bikʼatik yalel yuʼun balumile, jaʼ yuʼun li j-israeletik ti te joyolik ta stsʼele jatavik batel kʼalal laj yaʼiik ti ch-avanike, yuʼun xi chalike: «¡Xiʼel sba ti sbikʼutik yalel li balumil eke!».
35 Lokʼ talel kʼokʼ ta stojolal Jeova,+ vaʼun te la xchikʼ li 250 ta voʼ viniketik ti te yakal chchikʼik pome.+
36 Li Jeovae xi laj yalbe li Moisese:
37 «Albo Eleasar ti jaʼ xnichʼon li pale Aaron ti akʼo slokʼes ta kʼokʼ li yavtak akʼale,+ yuʼun chʼultajesbilik. Albo xtok ti akʼo nom stani batel li kʼokʼe.
38 Li yavtak yakʼalik li viniketik ti chamik ta skoj smulike, skʼan xichʼ pasel ta jayal pechpech takʼinetik ti chtun sventa xichʼ-o pixel li skajleb matanale,+ yuʼun chʼultajesbil xa kom skotol kʼalal la syeʼik ta stojolal Jeovae. Chtun ta senyail yuʼunik li j-israeletike».+
39 Li pale Eleasare la stsob li yavtak akʼal pasbil ta kovre ti laj yichʼik tal li buchʼu laj yichʼik chikʼele, laj yunijes sventa xpix-o li skajleb matanale,
40 jech la spas jech kʼuchaʼal albat yuʼun Jeova li Moisese. Li kʼusi kʼot ta pasele jaʼ sventa xvulesbat ta sjol j-israeletik ti mi muʼyuk akʼbil permiso li jun krixchanoe,* mu xuʼ xnopaj batel ta xchikʼel pom ta yeloval Jeova mi maʼuk snitilulal Aarone+ xchiʼuk jaʼ sventa xvulesbat ta sjolik ti mu jechuk spasik kʼuchaʼal li Kore xchiʼuk xchiʼiltake.+
41 Ta yokʼomal noʼox lik bikʼtal kʼopojikuk ta stojolal Moises xchiʼuk Aaron+ sjunul li tsobobbail yuʼun j-israeletike, xi laj yalike: «Voʼoxuk la amilik achaʼvoʼalik li steklumal Jeovae».
42 Kʼalal te xa ox stsoboj sbaik ta skontrainel Moises xchiʼuk Aaron li tsobobbaile, joyij skʼelik batel li karpana sventa tsobobbaile, jaʼ to laj yilike pixat ta tok xchiʼuk te lik vinajuk li smukʼulal Jeovae.+
43 Li Moises xchiʼuk Aarone batik li ta karpana sventa tsobobbaile,+
44 xi albat yuʼun Jeova li Moisese:
45 «Namajanik ta stojolal li tsobobbail liʼe sventa ta ora noʼox ta jtupʼbe skʼoplalik».+ Kʼalal jech laj yaʼiike la snijan skejan sbaik ta lumtik.+
46 Li Moisese xi laj yalbe li Aarone: «Tsako batel li yav akʼale xchiʼuk jaʼ xatikʼbe li yakʼalil skajleb matanale+ xchiʼuk akʼbo pom ta sba. Batan ta anil ti bu oy li tsobobbaile sventa staik perton,+ yuʼun ilinem xa li Jeovae. ¡Lik xa li vokolile!».
47 Li Aarone la stsak ta anil li yav akʼal jech kʼuchaʼal albat yuʼun Moisese, anil xa bat ti bu oy li tsobobbaile, yuʼun likem xa vokolil ta stojolal li jteklume. Jech oxal, laj yakʼ pom ta sba li yav akʼale sventa sta perton li jteklume.
48 Te vaʼal-o ta oʼlol ti bu oy li buchʼutik chamemik xchiʼuk li buchʼutik kuxulik toe, jech ta kʼunkʼun paj batel li vokolile.
49 Xi yepal chamik ta skoj li vokolile: 14,700, parte ti kʼu yepal chamik ta skoj Koree.
50 Kʼalal sut batel ta stojolal Moises li Aaron ti te oy ta yochebal karpana sventa tsobobbaile, pajem xa ox li vokolile.
Tsʼibetik ta yok vun
^ O «¿Mi yuʼun chakʼan ti jpʼel xa xaval ta jtojolalkutik xtoke?».
^ O «jpukulal; jparte».
^ O «maʼuk ta jnop jtuke».
^ Literal «chjachʼ ye».
^ Literal «La xjachʼ ye».
^ Literal «mi junuk yan krixchano».
