Numeros 17:1-13
-
Li snamteʼ Aaron ti laj yakʼ xniche jaʼ jun senyail (1-13)
17 Li Jeovae xi laj yalbe li Moisese:
2 «Chiʼino ta loʼil li j-israeletike, kʼanbo jujun snamteʼik ta jujuchop yutsʼ yalalik, jaʼ xakʼanbe li jujun bankilaletik ta jujuchop yutsʼ yalalike,+ 12 namteʼil ta skotol. Te xatsʼibabe sbiik ta jujun snamteʼik.
3 Te xatsʼibabe sbi Aaron li ta snamteʼ Levie, yuʼun jun noʼox namteʼil oy ta sventa li jujun joliletik ta jujuchop yutsʼ yalalike.
4 Te xbat avakʼ ta karpana sventa tsobobbail ta yeloval li xkaxail Mantale+ jaʼ ti bu onoʼox chkakʼ jba ta ilel ta atojolalike.+
5 Li buchʼu ta jtʼuje+ chakʼ s-umul nich li snamteʼe, jech ta xkakʼbe slajeb ti chbikʼtal kʼopojik ta jtojolal li j-israeletike+ xchiʼuk ti chbikʼtal kʼopojik ta atojolalik eke».+
6 Jaʼ yuʼun, li Moisese la xchiʼin ta loʼil li j-israeletike, skotol li bankilaletike laj yakʼ snamteʼik —jujun bankilal ta jujuchop yutsʼ yalalik laj yakʼ snamteʼik, 12 namteʼil laj yakʼik— laj yakʼ snamteʼ li Aaron eke.
7 Li Moisese te laj yakʼ ta yeloval Jeova li namteʼiletike, te laj yakʼ ta chʼul karpana ti bu oy li xkaxail tratoe.
8 Kʼalal och batel Moises ta yokʼomal li ta chʼul karpana ti bu oy li xkaxail tratoe, li snamteʼ Aaron sventa li sna Levie yakʼoj xa skʼelom, oy xa s-umul nich xchiʼuk oy xa tukem xnich xchiʼuk yakal chakʼ sat almendra ti yijik xae.
9 Li Moisese ta sat j-israeletik la slokʼes talel li namteʼiletik ti te oy ta yeloval Jeovae. Te skʼelojik xchiʼuk ta jujuntal la stsak snamteʼ li viniketike.
10 Li Jeovae xi laj yalbe li Moisese: «Te akʼo yan velta li snamteʼ Aaron+ ta yeloval li xkaxail Mantale, te akʼo yichʼ kʼejel* sventa xtun ta senyail+ yuʼunik li xnichʼnabtak toybaile+ sventa mu xa xbikʼtal kʼopojik ta jtojolal xchiʼuk sventa mu xchamik».
11 Li Moisese ta anil noʼox la spas jech kʼuchaʼal albat mantal yuʼun li Jeovae. Jech tajek la spas kʼuchaʼal albate.
12 Li j-israeletike xi laj yalbeik li Moisese: «Jaʼ to chichamkutik un, chilajkutik ta melel, ¡chichamkutik jkotolkutik!
13 ¡Buchʼuuk noʼox ti chnopaj batel ta stsʼel li axibalna yuʼun Jeovae ta xcham!+ ¿Mi jech van chijcham jkotoltik ta skoj taje?».+
Tsʼibetik ta yok vun
^ O «nakʼel».
