Numeros 18:1-32
18 Li Jeovae xi laj yalbe li Aarone: «Voʼot xchiʼuk li anichʼnabtake xchiʼuk li jujuchop avutsʼ avalal chtale, jaʼ chkom ta abaik mi oy kʼusi chopol chichʼ pasbel li bu chʼule,+ voʼot chkom ta aba xchiʼuk anichʼnabtak mi oy kʼusi chopol kʼot ta pasel ta sventa li abtelal ta paleale.+
2 Ikʼo tal li avermanotak ti jaʼik snitilulal Levie, jaʼ li snitilulal atote sventa xtal tunikuk ta atojolal+ xchiʼuk ta stojolal anichʼnab li ta yeloval chʼul karpana ti bu oy li xkaxail tratoe.+
3 Akʼo spasik li kʼusi sbainojik ta atojolale xchiʼuk li kʼusi sbainojik ta sventa sjunul li karpanae.+ Pe mu stakʼ xnopajik ta stojolal li kʼusitik te chtun ti bu chʼule xchiʼuk li ta skajleb matanale sventa mu xchamik xchiʼuk sventa mu xachamik ek.+
4 Chtalik ta atojolal yoʼ spasik li kʼusi sbainojik li ta karpana sventa tsobobbaile xchiʼuk skotol li abtelal ta karpanae, jech xtok, mu me xuʼ xnopaj ta atojolalik li buchʼu muʼyuk akʼbil permisoe.*+
5 Persa skʼan spasik li kʼusi sbainojik ti bu chʼule+ xchiʼuk li ta skajleb matanale+ sventa mu xtal mas skʼakʼal oʼontonal+ li ta steklumal Israele.
6 Jchʼakoj lokʼel ta stojolal j-israeletik li avermanotake, li jlevietike, jaʼ amotonik kʼotem.+ Akʼbilik ta stojolal Jeova sventa sbainik li abtelal chichʼ pasel ta karpana sventa tsobobbaile.+
7 Ta skoj ti voʼoxuk paleoxuk xchiʼuk li anichʼnabe, voʼoxuk oy ta abaik li kʼusitik chichʼ pasel li ta skajleb matanale xchiʼuk li kʼusitik oy ta yut kortinae,+ voʼoxuk skʼan xapasik li abtelale.+ Jaʼ amoton kakʼojboxuk ti chatunik ta paleale, jech xtok, buchʼuuk noʼox ti chnopaj batel ti bu chʼul mi muʼyuk akʼbil permisoe* persa me chichʼ milel».+
8 Li Jeovae laj to xchiʼin ta loʼil li Aarone, xi laj yalbee: «Voʼot chkakʼ abain li matanaletik chakʼbeikune.+ Kakʼojbot xchiʼuk anichʼnab jvokʼuk li chʼul matanaletik chakʼ j-israeletike, jaʼ aparteik chkom sbatel osil.+
9 Liʼe jaʼ li kʼusitik chavichʼ li ta matanaletik ti toj echʼ xa noʼox chʼul ti chichʼ chikʼel ta kʼokʼe: chavichʼ skotol li matanal chakʼike, te kapal skʼoplal li matanal sat tsʼunobiletike,+ li matanaletik sventa mulile+ xchiʼuk li matanaletik sventa skʼanel perton+ ti chichʼbeikun tale. Taje jaʼ chʼul matanaletik xchiʼuk jaʼ avuʼun xchiʼuk li anichʼnabtake.
10 Skʼan te xalajesik ti bu toj echʼ xa noʼox chʼule.+ Xuʼ slajes skotol li viniketike. Toj chʼul chkom ta atojolal.+
11 Jaʼ avuʼun chkʼot xtok liʼe: li matanaletik chakʼ j-israeletik+ ti jmoj chakʼik xchiʼuk li yebil matanale.+ Voʼot kakʼojbot xchiʼuk akeremtak xchiʼuk atsebetak, jaʼ aparteik chkom sbatel osil.+ Skotol li buchʼutik muʼyuk ibal sba* ti te oyik ta anae xuʼ slajesik.+
12 »Skotol ti bu mas lekik aseite xchiʼuk skotol ti bu mas lekik vino xchiʼuk li sat tsʼunobile, li sba sat kʼusitik chlokʼ+ ti chichʼbeik tal Jeovae voʼot chkakʼbot.+
13 Jaʼ avuʼun chkʼot li sba sat kʼusitik chlokʼ ta balumil ti yijik xa ti chichʼbeik tal Jeovae.+ Skotol li buchʼutik muʼyuk ibal sba ti te oyik ta anae xuʼ slajesik.
14 »Jaʼ avuʼun chkʼot skotol li kʼusi laj xa yakʼik-o* li j-israeletike.+
15 »Skotol li kʼusi baʼyel chvokʼ yuʼun li kʼusi kuxajtik*+ ti chakʼbeik Jeovae akʼo mi jaʼ krixchano o mi chonbolome jaʼ avuʼun chkʼot. Jaʼ noʼoxe skʼan xavakʼbe xkʼexol li sba yol xnichʼon krixchanoetike+ xchiʼuk li sba yol chonbolometik ti ibal sbaike.+
16 Ti kʼu yepal stojol chavakʼ ti jaʼ chkʼot ta xkʼexol kʼalal yichʼoj xa ox jun u o mase, jaʼ ti kʼu yepal sbalil li voʼob siklo* platae,+ jaʼ ti kʼu yepal yalal jujun siklo ti bu chʼule. Li jun sikloe jaʼ 20 guera.*
17 Jaʼ noʼox muʼyuk chavakʼbe xkʼexol li sba yol vakax ti stot vokʼe o li chʼiom tot chij ti baʼyel vokʼe o li sba yol tentsune,+ yuʼun chʼul xa kʼotemik. Li xchʼichʼele skʼan xavij ta sba li skajleb matanale.+ Li xepuʼale skʼan xtometuk muyel xchʼailal* avuʼun ti jaʼ chkʼot ta matanal ti chikʼbil ta kʼokʼ ti lek xmuet yikʼ* chaʼi Jeovae.+
18 Jaʼ avuʼun chkʼot li sbekʼtale. Jaʼ avuʼun chkʼot jech kʼuchaʼal jaʼ avuʼun li stiʼ yoʼonton yebil matanale xchiʼuk li sbatsʼi-oʼe.+
19 Skotol li chʼul matanaletik ti chakʼbeik Jeova li j-israeletike voʼot laj kakʼbot,+ laj kakʼbe li akeremtake xchiʼuk li atsebetak ti te achiʼukane, jaʼ aparteik chkom sbatel osil.+ Jaʼ jun trato sbatel osil ta yeloval Jeova ti jech chkom ta atojolal xchiʼuk li anitilulale».
20 Li Jeovae xi laj yalbe li Aarone: «Muʼyuk arexto* chkom li ta yosil j-israeletike xchiʼuk muʼyuk chavichʼ jutebuk osil ti bu oyike.+ Voʼon avosilun chikʼot, voʼon arextoun chikʼot ta stojolal li j-israeletike.+
21 »Naʼo me ti jaʼ kakʼojbe xnichʼnabtak Levi jun ta lajlajuneb+ li kʼusitik chakʼ Israele, jaʼ xrextoik* kʼotem ta skoj li yabtel tspasik te ta karpana sventa tsobobbaile.
22 Mu xa stakʼ xnopajik batel ta karpana sventa tsobobbail li jteklum Israele, yuʼun tsta smulik xchiʼuk chchamik mi nopajik batele.
23 Jaʼ noʼox xuʼ xtunik ta karpana sventa tsobobbail li jlevietike xchiʼuk jaʼ chkom ta sbaik mi la sta smul li j-israeletik ta skoj ti bu chʼule.+ Jaʼ jun mantal sbatel osil avuʼunik xchiʼuk li jaykʼol kuxlejal chtal avuʼunik ta tsʼakal ti mu xuʼ xichʼ jsepuk yosilik ti bu oy li j-israeletike.+
24 Yuʼun jaʼ kakʼojbeik jlevietik li jun ta lajlajuneb li kʼusi chichʼik tal sventa chakʼbeik Jeova li jteklum Israele. Jaʼ yuʼun xi kalojbeike: ‹Mu xuʼ xichʼ yosilik ti bu oy li j-israeletike›».+
25 Vaʼun, li Jeovae xi laj yalbe li Moisese:
26 «Xi xavalbe li jlevietike: ‹Li j-israeletike chichʼik tal jun ta lajlajuneb li kʼusitik oy yuʼunike, jaʼ chkakʼboxuk ta arextoik,*+ vaʼun te xalokʼesik jun ta lajlajuneb sventa xavakʼbeik li Jeovae.+
27 Li matanal chavakʼike xkoʼolaj xa jaʼ chavakʼik li sat tsʼunobil ti ikʼabil xae+ o jech kʼuchaʼal li vino o aseite ti te chichʼ lokʼesel ta spitsʼobile.
28 Jaʼ jech chavakʼbeik ta smoton Jeova li jun ta lajlajuneb kʼusitik chichʼboxuk tal li j-israeletike, jaʼ te chatsakik lokʼel li matanal chavakʼbeik Jeova ti jaʼ chchʼam li pale Aarone.
29 Jaʼ akʼbeik ta smoton Jeova+ kʼusiuk noʼox ti bu mas lekik li ta chʼul matanaletik laj yichʼik tale›.
30 »Xi skʼan xavalbee: ‹Mi laj xa ox avakʼik ti bu mas lekik laj yichʼik tale, voʼoxuk ti jlevioxuke, jaʼ chavichʼik komel li skomenale,* jaʼ xa sat tsʼunobil avuʼunik ti ikʼabil xae o vino o aseite ti te chichʼ lokʼesel ta spitsʼobile.
31 Voʼot xchiʼuk li buchʼutik te oy ta anae, buyuk noʼox xuʼ xalajesik ti bu skʼan avoʼontonike, yuʼun jaʼ stojol li avabtel chapasik te ta karpana sventa tsobobbaile.+
32 Mu xata amulik, jaʼ noʼox venta mi laj avakʼik ti bu mas lekike. Jech xtok, mu me xasokesbeik skʼoplal li kʼusitik chʼul chakʼik j-israeletike, yuʼun chachamik mi jech chapasike›».+
Tsʼibetik ta yok vun
^ Literal «yan krixchano», jaʼ xkaltik, jun krixchano ti maʼuk yutsʼ yalal Aarone.
^ Literal «yan krixchano», jaʼ xkaltik, jun krixchano ti maʼuk yutsʼ yalal Aarone.
^ Jaʼ xkaltik, skotol li kʼusi chʼultajesbil sventa Dios kʼalal laj yichʼ akʼel ta stojolal Diose, mu xa stakʼ jelel o mu xa stakʼ akʼbel xkʼexol.
^ Literal «skotol bekʼet».
^ Li jun sikloe jaʼ 11.4 gramo yalal. Kʼelo Apendise B14.
^ Li jun guerae jaʼ 0.57 gramo yalal. Kʼelo Apendise B14.
^ O «jun yoʼonton yuʼun». Literal «tslamajes oʼontonal».
^ O «xchʼayilal».
^ O «apukulal; aparte».
^ O «spukulalik; sparteik».
^ O «apukulalik; aparteik».
^ O «skomelale».
