Numeros 19:1-22
-
Tsajal meʼ vakax xchiʼuk li voʼ sventa tslekubtas-o sbaike (1-22)
19 Li Jeovae xi laj yalbe yan velta li Moises xchiʼuk Aarone:
2 «Xi chal mantal li Jeova ti skʼan pasele: ‹Albo j-israeletik ti akʼo yikʼboxuk talel jkot tsajal meʼ vakaxe, ti muʼyuk ipe,* ti mu jutebuk xchopolile+ xchiʼuk ti muʼyuk-o kajanbil kʼatlom teʼ ta sbae.
3 Akʼbo li pale Eleasare, vaʼun jaʼ chikʼ batel ta spat li karpanaetike, te skʼeloj chichʼ milel.
4 Li pale Eleasare tstsakbe jutebuk ta sniʼ skʼob li xchʼichʼele, vaʼun vukub velta tsvij batel jlomuk ta stukʼil yochebal karpana sventa tsobobbail.+
5 Te ta sat Eleasar akʼo yichʼ chikʼel li meʼ vakaxe. Li snukulile, li sbekʼtale xchiʼuk li xchʼichʼele jmoj akʼo yichʼ chikʼel xchiʼuk li yikʼobale.*+
6 Li palee tstsak sedro teʼ, isopo*+ xchiʼuk kuxul tsajal pokʼ, te tsjip ochel li ta kʼokʼ ti bu yakal chkʼakʼ li meʼ vakaxe.
7 Li palee skʼan xchukʼ li skʼuʼ spokʼe xchiʼuk skʼan spok sba* ta voʼ, ta tsʼakale xuʼ x-och batel ti bu spasoj skarpanaike, jaʼ noʼoxe ibal to sba* chkom, jech-o chkom jaʼ to mi chʼayem xa ox batel kʼakʼale.
8 »›Li buchʼu la xchikʼ li meʼ vakaxe skʼan xchukʼ ta voʼ li skʼuʼ spokʼe xchiʼuk skʼan spok sba* ta voʼ, jech ibal sba chkom jaʼ to mi chʼayem xa ox batel kʼakʼale.
9 »›Jun vinik ti muʼyuk ibal sbae jaʼ tstsobbe li stanil meʼ vakaxe,+ te chbat yakʼ ta spat ti bu spasoj skarpanaike, ti bu lek sake, akʼo skʼejik* li tsobobbail yuʼun j-israeletik sventa skapik ta voʼ ti tstunesik kʼalal tslekubtas sbaike.+ Jaʼ jun matanal sventa mulil.
10 Li buchʼu tstsobbe stanil li meʼ vakaxe skʼan xchukʼ li skʼuʼ spokʼe, ibal sba chkom jaʼ to mi chʼayem xa ox batel kʼakʼale.
»›Taje jaʼ mantal sbatel osil chkom sventa li j-israeletik xchiʼuk li jyanlumetik ti jmoj te nakalik xchiʼukike.+
11 Buchʼuuk noʼox ti tsta ta tijel junuk animae* vukub kʼakʼal ibal sba chkom.+
12 Skʼan sakubtas sba ta voʼ li ta yoxibal kʼakʼale sventa sak xa xkom li ta svukubal kʼakʼale. Pe mi muʼyuk la sakubtas sba li ta yoxibal kʼakʼale, muʼyuk sak chkom li ta svukubal kʼakʼale.
13 Buchʼuuk noʼox ti tstabe ta tijbel sbekʼtal jun animae,* mi muʼyuk la sakubtas sbae, laj xa sokes li axibalna yuʼun Jeovae,+ persa skʼan xichʼ milel ta Israel ti buchʼu jech la spase.+ Yuʼun ibal-o sba ta skoj ti muʼyuk vijbil ta sba li voʼ sventa tslekubtas-o sbaike.+ Jech-o ibal sba chkom.
14 »›Liʼe jaʼ smantalil kʼalal oy buchʼu te chcham ta yut karpanae: li buchʼu ch-och te ta karpanae xchiʼuk li buchʼu te xa onoʼox oye, ibal me sba chkom vukub kʼakʼal.
15 Skotol li yav kʼusitik ti jamal stiʼ ti muʼyuk laj yichʼ chukbel smake ibal sba chkom ek.+
16 Vukub kʼakʼal+ ibal sba chkom buchʼuuk noʼox ti tsta ta tijbel sbekʼtal junuk krixchano ta osiltik ti laj yichʼ milel ta espadae o mi la sta ta tijel junuk anima o sbakil junuk krixchano o mi la sta ta tijel ti bu mukul animae.
17 Skʼan xichʼ ichʼbel tal jutebuk tan li buchʼu ibal sbae, jaʼ li stanil matanal sventa mulil ti laj yichʼ chikʼele, mi laje, akʼo yichʼ malbel voʼ ta sba li tan ti te chʼambil ta jun boche, li voʼe skʼan lupbil talel ta sat voʼ.*
18 Vaʼun, jun vinik ti muʼyuk ibal sbae+ tstsak isopo+ xchiʼuk tstsʼaj li ta voʼe, ta tsʼakale ta svij ta sba li karpanae. Ta svijbe ta sba skotol li yav kʼusitike xchiʼuk li buchʼutik te oyike, jech xtok, ta svijbe li buchʼu la sta ta tijel bake o li buchʼu la sta ta tijbel sbekʼtal jun krixchano ti laj yichʼ milele o li buchʼu la spik animae o ti la sta ta tijel ti bu mukul animae.
19 Li vinik ti muʼyuk ibal sbae tsvijbe ta sba li buchʼu ibal sbae, jech tspas ta yoxibal kʼakʼal xchiʼuk ta svukubal kʼakʼal, jech tsakubtas ta skoj smul li ta svukubal kʼakʼale;+ ta tsʼakale skʼan xchukʼ skʼuʼ spokʼ li buchʼu ibal sbae xchiʼuk skʼan spok sba ta voʼ, vaʼun lek xa chkom kʼalal chʼayem xa ox batel kʼakʼale.
20 »›Pe li buchʼu ibal sba xchiʼuk ti muʼyuk laj yakʼ sba ta sakubtasele, persa ta xichʼ milel li ta tsobobbaile,+ yuʼun la sokesbe skʼoplal li bu chʼul ti jaʼ yuʼun li Jeovae. Jaʼ yuʼun, ibal-o sba chkom ta skoj ti muʼyuk laj yichʼ vijbel li voʼ sventa tslekubtas-o sbaike.
21 »›Jaʼ jech mantal chkom sbatel osil: li buchʼu ta svij li voʼ sventa tslekubtas-o sbaike skʼan xchukʼ skʼuʼ spokʼ,+ jech xtok, li buchʼu tspik li voʼ sventa tslekubtas-o sbaike ibal sba chkom, jech-o chkom jaʼ to mi chʼayem xa ox batel kʼakʼale.
22 Ibal sba chkom kʼusiuk noʼox ti tsta ta tijel li buchʼu ibal sbae, vaʼun mi oy buchʼu la spik li kʼusitik taje, ibal sba chkom, jech-o chkom jaʼ to mi chʼayem xa ox batel kʼakʼale›».+
Tsʼibetik ta yok vun
^ O «muʼyuk xchopolile».
^ O «stsoʼe».
^ Literal «sbekʼtal».
^ Literal «sbekʼtal».
^ O «snakʼik».
^ Li ta ebreo kʼope jaʼ nefex.
^ O «nioʼ».
