Numeros 20:1-29
20 Li ta sba ue te kʼotik ta takixokol balumil ta Sin sjunul li tsobobbail yuʼun Israele. Te lik nakiikuk ta Kades+ li jteklume, jaʼ te cham li Miriame+ xchiʼuk te laj yichʼ mukel.
2 Pe chʼabal voʼ sventa xuchʼik li tsobobbaile,+ jech oxal la stsob sbaik batel ta skontrainel li Moises xchiʼuk Aarone.
3 Li jteklume la stsakik ta kʼop li Moisese,+ xi chalike: «¡Lijchamuk onoʼox kʼalal chamik ta yeloval Jeova li jchiʼiltaktik ta vokʼele!
4 ¿Kʼu yuʼun laj avikʼik tal li tsobobbail yuʼun Jeova li ta takixokol balumil liʼe, ti liʼ noʼox chichamkutik xchiʼuk li jchonbolomkutike?+
5 ¿Kʼu yuʼun xa noʼox la alokʼesunkutik tal ta Ejipto sventa xavikʼunkutik tal li ta chopol osil liʼe?+ Maʼuk yosilal sventa oyuk kʼusi xichʼ tsʼunel, mu xchʼi igo, mu xchʼi uva, mu xchʼi granada* mi jaʼuk oy voʼ sventa xkuchʼkutik».+
6 Li Moises xchiʼuk Aarone lokʼik talel ti bu oy li tsobobbaile, te batik ta yochebal karpana sventa tsobobbail. La snijan yalel satik ta lumtik, vaʼun te vinaj smukʼulal Jeova ta stojolalik.+
7 Li Jeovae xi laj yalbe li Moisese:
8 «Tsako li anamteʼe xchiʼuk tako ta ikʼel li tsobobbaile, jech xapas xchiʼuk li abankil Aarone. Ta sat jteklum xakʼoponik li mukʼta tayal tone yoʼ xlokʼ talel yaʼlel, te chalokʼes talel voʼ ta mukʼta tayal ton sventa xavakʼbe yuchʼ li tsobobbaile xchiʼuk li xchonbolomike».+
9 Jaʼ yuʼun, li Moisese ta yeloval Jeova la stsak li snamteʼe,+ jech la spas kʼuchaʼal albat mantale.
10 Li Moises xchiʼuk Aarone la stakik ta ikʼel li tsobobbail ta yeloval li mukʼta tayal tone, xi laj yalbeike: «¡Chikintao avaʼiik, jtoybaetik! ¿Mi yuʼun liʼ ta jlokʼeskutik voʼ avuchʼik li ta mukʼta tayal tone?».+
11 Vaʼun, li Moisese la stoy muyel skʼob, chib to velta la smaj ta snamteʼ li mukʼta tayal tone. Lik lokʼuk talel ep voʼ, jaʼ yuʼun te laj yuchʼik voʼ li tsobobbail xchiʼuk xchonbolomike.+
12 Ta tsʼakal li Jeovae xi laj yalbe li Moises xchiʼuk Aarone: «Ta skoj ti muʼyuk laj avakʼik ta ilel xchʼunel avoʼontonik ta jtojolale xchiʼuk ti muʼyuk laj avakʼik ta ilel ti chʼulun ta sat li jteklum Israele, li voʼoxuke muʼyuk chavikʼik ochel li ta balumil ti bu kaloj chkakʼbe li tsobobbaile».+
13 Liʼe jaʼ li voʼ ta Meriba*+ ti bu la stsakik ta kʼop Jeova li j-israeletike, jaʼ yuʼun te laj yakʼ sba ta ilel ti jaʼ Chʼul Dios ta stojolalike.
14 Li Moisese la stak batel j-almantaletik ti te likik batel ta Kades sventa xi xbat yalbeik li ajvalil ta Edome:+ «Xi chalbot li achiʼil ta vokʼel Israele:+ ‹Lek anaʼoj ti jnuptanojkutik ep ta tos vokoliletike.
15 Te batik ta Ejipto li jmoltotkutike, ep jabil*+ te linakikutik ta Ejipto.+ Pe laj yilbajinunkutik xchiʼuk jmoltotkutik li j-ejiptoetike.+
16 Lik jkʼanbekutik vokol Jeova,+ vaʼun la xchikintabunkutik xchiʼuk la stak tal jun anjel+ sventa slokʼesunkutik li ta Ejiptoe. Avi une liʼ oyunkutik ta Kadese, jun jteklum ti stsʼakinoj avosile.
17 Avokoluk akʼo jelavkunkutik ta avosil. Muʼyuk chi-echʼkutik ti bu oy kʼusi atsʼunoje mi jaʼuk ti bu atsʼunoj a-uvae xchiʼuk muʼyuk chkuchʼbekutik yaʼlel junuk li posoe. Te chi-echʼkutik li ta Sbe Ajvalile, muʼyuk chikʼejpʼujkutik* ta batsʼikʼob mi jaʼuk ta tsʼetkʼob,* tukʼ ch-echʼ jtuchʼkutik li avosile›».+
18 Pe xi albat yuʼun li Edome: «Mu xuʼ xajelav li ta kosilkutike, mi la-echʼe, chtal jnupot ta be xchiʼuk j-espada».
19 Xi laj yalik li j-israeletike: «Te chimuykutik li ta mukʼta bee, mi laj kuchʼkutik xchiʼuk jchonbolomkutik li avaʼale, ta jtojbotkutik.+ Muʼyuk kʼusi yan ta jkʼanbotkutik, jaʼ noʼox ti xijelav ta kakankutik li ta avosile».+
20 Pe xi laj yale: «Mu stakʼ xa-echʼik».+ Li Edome lokʼ stsak ta kʼop li Israele, lokʼ batel xchiʼuk epal krixchanoetik xchiʼuk jtsop soltaroetik ti tsots xuʼ yuʼunike.
21 Li Edome muʼyuk laj yakʼ jelavuk Israel li ta yosile. Jech oxal, la xchʼak sba batel ta stojolal Edom li Israele.+
22 Li jteklum Israele, sjunul li tsobobbaile, lokʼ batel ta Kades, te kʼot ta vits Or.+
23 Li Jeovae xi laj yalbe Moises xchiʼuk Aaron li ta vits Or ti stsʼakinoj li yosilal Edome:
24 «Chichʼ ikʼel batel bu oy smoltotak*+ li Aarone. Muʼyuk ch-och li ta osil ti kaloj chkakʼbe li j-israeletike, yuʼun achaʼvoʼalik la atoy abaik kʼalal laj kal mantal sventa li voʼ ta Meribae.+
25 Ikʼo muyel ta vits Or li Aarone xchiʼuk li Eleasar ti jaʼ xnichʼone.
26 Lokʼbo li skʼuʼ spokʼ Aarone,+ jaʼ xalapbe li Eleasar+ ti jaʼ xnichʼone. Vaʼun, te chcham li Aarone».*
27 Jech tajek la spas Moises kʼuchaʼal albat mantal yuʼun Jeovae, te skʼeloj skotol tsobobbail kʼalal muyik batel ta vits Ore.
28 Li Moisese la slokʼbe li skʼuʼ spokʼ Aarone, jaʼ la slapbe li Eleasar ti jaʼ xnichʼon Aarone. Laje, te cham ta jol vits li Aarone.+ Li Moises xchiʼuk Eleasare yalik tal li ta vitse.
29 Kʼalal laj yakʼ venta sjunul tsobobbail ti cham xa li Aarone, skotol li Israele 30 kʼakʼal laj yokʼitaik li Aarone.+
Tsʼibetik ta yok vun
^ Jaʼ jtos sat teʼ ti lek tsoj skoloral ti xkoʼolajtik kʼuchaʼal mantsanae.
^ Jaʼ skʼan xal ‹saʼkʼop›.
^ Literal «kʼakʼaletik».
^ O «chikʼejevkutik; chitsʼepʼujkutik».
^ O «surtokʼob».
^ Taje jaʼ jun nichimal loʼil ti jaʼ chalbe skʼoplal kʼalal oy buchʼu chchame.
^ Literal «Chichʼ ikʼel batel, vaʼun te chcham».
