Numeros 21:1-35
21 Li ajvalil ta Arad+ ti likem ta Kanaan ti te nakal ta Neguebe laj yaʼi ti te xtalik ta sbelel Atarim li Israele, jaʼ yuʼun bat stsak ta kʼop xchiʼuk la xchuk batel jayvoʼuk.
2 Jaʼ yuʼun, li Israele xi laj yakʼ ye ta stojolal li Jeovae: «Mi chavakʼ ta jkʼob li jteklum liʼe, li voʼone ta jlajesbe skʼoplal ta j-echʼel li lumetik yuʼune».
3 Li Jeovae laj yaʼibe skʼop li Israele, jaʼ yuʼun laj yakʼbe ta skʼob li jkanaanetike. Li j-israeletike la slajesbeik skʼoplal ta j-echʼel li krixchanoetik xchiʼuk li jteklumetik yuʼunike. Jech oxal, Orma*+ laj yakʼbeik sbi ti bu kʼot ta pasel taje.
4 Kʼalal yakalik batel ta xanbal ti te likik batel ta vits Or+ ti te echʼik batel ta sbelel Tsajal nab yoʼ te x-echʼik ta stiʼiltak li yosilal Edome,+ lik lubtsajikuk ta xanbal li jteklume.
5 Li jteklume jech-o la stsakik ta kʼop li Dios xchiʼuk Moisese,+ xi laj yalike: «¿Kʼu yuʼun ti la alokʼesunkutik ta Ejipto sventa liʼ xichamkutik ta takixokol balumile? Muʼyuk jveʼelkutik, muʼyuk voʼ xkuchʼkutik+ xchiʼuk chakʼbunkutik xa ib oʼonton* li mu pan liʼe».+
6 Jaʼ yuʼun, li Jeovae la stak talel ta jteklum kiletel chonetik ti oy svenenoale, jech lajik ta tiʼel ta chon li krixchanoetike. Ep j-israeletik chamik ta skoj.+
7 Vaʼun, talik ta stojolal Moises li jteklume, xi laj yalike: «Laj xa jta jmulkutik ta skoj li kʼusi laj kalkutike, yuʼun laj xa jkontrainkutik li Jeovae xchiʼuk laj xa jkontrainotkutik ek.+ Kʼanbo vokol Jeova sventa slokʼes ta jtojolalkutik li kiletel chonetike». Li Moisese la skʼan vokol ta stojolal li jteklume.+
8 Li Jeovae xi laj yalbe li Moisese: «Pasbo slokʼol jkot kiletel chon ti oy svenenoale, te xajokʼan ta jtel teʼ. Vaʼun, kʼalal oy buchʼu chtiʼat ta chone, akʼo skʼel batel li slokʼol kiletel chone sventa mu xcham».
9 Li Moisese ta anil noʼox la spas jkot kiletel chon ta kovre,+ te la sjokʼan li ta jtel teʼe.+ Kʼalal chlaj ta tiʼel ta kiletel chon junuk vinike, muʼyuk chcham+ mi la skʼel batel li kiletel chon ta kovree.
10 Kʼalal kʼot xa ox ta pasel taje, li j-israeletike lokʼik batel xchiʼuk te kʼot spas skarpanaik ta Obot.+
11 Laje, lokʼik batel li ta Obote, te kʼot spas skarpanaik ta takixokol balumil ta Iye-Abarim+ ti te oy ta yeloval Moab ta stukʼil slokʼeb kʼakʼale.
12 Laje, lokʼik batel li ta Iye-Abarime, te kʼot spas skarpanaik ta stenlejaltik* Sered.+
13 Laje, lokʼik batel xtok, te kʼot spas skarpanaik ta yosilal Arnon.+ Li Arnone te xkom ta takixokol balumil, jaʼ li takixokol balumil ti te to chlik talel ta stsʼak yosil j-amorreoetik kʼalal to ta stsʼak yosil li jmoabetike. Li Arnone te xkom ta oʼlol yuʼunik li Moab xchiʼuk j-amorreoetike.
14 Jaʼ yuʼun, li livro sventa Paskʼopetik yuʼun Jeovae chalbe skʼoplal «Vaeb ti te xkom ta Sufae, li stenlejaltik* Arnone
15 xchiʼuk li stiʼiltak stenlejaltik* ti te to chpaj ta jteklum Ar ti chkʼot kʼalal to ta stsʼak Moabe».
16 Laje, batik ta Beer. Taje jaʼ li poso ti bu xi albat yuʼun Jeova li Moisese: «Tsobo li jteklume, yuʼun chkakʼbeik yuchʼ voʼ».
17 Li j-israeletike xi kʼejinik li vaʼ kʼakʼale:
«¡Lokʼuk tal avaʼlel poso! ¡Kʼejintaik!
18 Li poso ti la sjokʼik li jnitvanejetike, ti la sjokʼik li bankilaletik ta jteklume,ta jun noʼox xvaxton komandante xchiʼuk li xvaxtonik ta jujuntale».
Vaʼun, lokʼik batel li ta takixokol balumile, te batik ta Matana,
19 lokʼik batel li ta Matanae, te batik ta Naaliel; laje lokʼik batel li ta Naaliele, te batik ta Bamot.+
20 Laje, lokʼik batel li ta Bamote, batik ta stenlejaltik ti te xkom ta yosilal Moabe,+ te kʼotik ta toyolaltik Pisga+ ti skʼeloj yalel Jesimone.*+
21 Li Israele la stak batel j-almantaletik ta stojolal Seon ti jaʼ ajvalil yuʼun j-amorreoetike, xi laj yalbe batele:+
22 «Akʼo jelavkunkutik ta avosil. Muʼyuk chikʼejpʼujkutik* ti bu oy kʼusi atsʼunoje mi jaʼuk ti bu atsʼunoj a-uvae. Muʼyuk chkuchʼbekutik yaʼlel junuk poso. Te chi-echʼkutik li ta Sbe Ajvalile, jaʼ noʼox ch-echʼ jtuchʼkutik li avosile».+
23 Pe li Seone muʼyuk xakʼ echʼuk ta yosil li Israele. Ti kʼusi la spase, la stsob skotol steklumal li Seone sventa xbat stsak ta kʼop li Israel ta takixokol balumile, bat ta Jaas, vaʼun te lik stsak ta kʼop li Israele.+
24 Pe li Israele la stsal ta espada+ li Seone xchiʼuk laj yichʼbe li yosil+ ti te chlik ta Arnon+ kʼalal to ta Jabok+ ti nopol xkom ti bu oy li j-ammonetike, yuʼun li Jasere+ jaʼ stsʼakinoj sba xchiʼuk li yosil j-ammonetike.+
25 Jaʼ yuʼun, li Israele laj yichʼ skotol li jteklumetik taje, te lik nakiikuk li ta slumal j-amorreoetike,+ li ta Esbone xchiʼuk ta skotol li bikʼtal lumetik ti te noʼox nopajtike.*
26 Yuʼun li jteklum Esbone jaʼ toʼox slumal li Seon ti jaʼ ajvalil yuʼunik li j-amorreoetike. Li Seone laj toʼox stsak ta kʼop li ajvalil ta Moabe xchiʼuk laj toʼox yichʼbe skotol li yosil kʼalal to ta Arnone.
27 Jaʼ te lokʼ talel li pʼijil loʼil sventa chlabanvanike:
«Laʼik ta Esbon.
Akʼo yichʼ vaʼanel li jteklum Seone xchiʼuk lek nakaluk xkom.
28 Yuʼun te lokʼ talel kʼokʼ li ta Esbone, lokʼ talel leb kʼokʼ li ta steklumal Seone.
La xchikʼ li Ar ti te oy ta Moabe, la xchikʼ li bankilaletik ti te oyik ta tayal kʼopojebaletik* ta Arnone.
29 ¡Toj abol aba un Moab! ¡Chavichʼ lajesel un jteklum Kemos!+
Yuʼun jatvil chbat yuʼun li skeremtake, chukbil chbatik yuʼun ta ajvalil Seon li stsebetake, jaʼ li ajvalil yuʼun j-amorreoetike.
30 Jtʼilesbetik batel flecha;li Esbone chichʼ lajesel kʼalal to ta Dibon;+jinestik kʼalal to ta Nofa;tiluk* batel kʼokʼ kʼalal to ta Medeba».+
31 Jech oxal, li Israele te lik nakiuk li ta yosilal j-amorreoetike.
32 Li Moisese la stak batel jayvoʼuk viniketik sventa xbat spaʼiik* li Jasere.+ Laj yuʼuninik li bikʼtal lumetik ti te noʼox nopajtike* xchiʼuk la snutsik lokʼel li j-amorreoetik ti te toʼox nakalike.
33 Ta tsʼakale sutik talel, te muyik batel ti bu Sbelel Basan sbie. Li Og+ ti jaʼ ajvalil ta Basane lokʼ batel xchiʼuk skotol li steklumale, te batik ta Edrei+ sventa te xbat stsak sbaik ta kʼop xchiʼuk li Israele.
34 Li Jeovae xi laj yalbe li Moisese: «Mu xaxiʼ yuʼun,+ yuʼun chkakʼ ta akʼob, chkakʼbot ta akʼob skotol li steklumale xchiʼuk li yosile.+ Jech chlik apasbe kʼuchaʼal la apasbe li Seone, jaʼ li ajvalil yuʼun j-amorreoetik ti te toʼox nakal ta Esbone».+
35 Jaʼ yuʼun, li Israele la smil li ajvalile, la smilbeik li xnichʼnabtake xchiʼuk skotol li steklumale. Mi junuk xa kuxul kom li ta jteklume,+ vaʼun laj yichʼbeik li yosile.+
Tsʼibetik ta yok vun
^ Jaʼ skʼan xal ‹chichʼ lajesbel-o skʼoplal›.
^ O «chtavan xa xkaʼikutik».
^ O «beoʼtik ta stenlejaltik».
^ O «beoʼtik ta stenlejaltik».
^ O «beoʼtik ta stenlejaltik».
^ O jaʼ van skʼoplal «takixokol balumil».
^ O «chikʼejevkutik; chitsʼepʼujkutik».
^ O «ta sjoylejale».
^ O «tsanuk».
^ O «spamukʼtaik».
^ O «ta sjoylejale».
