Numeros 22:1-41
22 Li j-israeletike lokʼik batel, te bat spas skarpanaik ta takixokol balumil ta stenlejaltik yuʼun Moab, ta xokon Jordan ta yeloval Jeriko.+
2 Li Balak+ xnichʼon Sipore laj yakʼ venta skotol li kʼusi la spasbe j-amorreoetik li Israele.
3 Li jmoabetike la xiʼtaik li jteklume, yuʼun epik ta jyalel; ti melel xkaltike, ipajik ta xiʼel ta skoj li j-israeletike.+
4 Jaʼ yuʼun, li jmoabetike xi laj yalbeik li moletik ta Madiane:+ «Li epal krixchanoetik leʼe xkechet noʼox tslajesik talel li buchʼutik liʼ nakalik ta jpat jxokontik jech kʼuchaʼal jkot tot vakax ti xkechet noʼox batel ta lajesel yuʼun li yaxale».*
Li Balak xnichʼon Sipore te ch-ajvalilaj ta Moab li vaʼ kʼakʼale.
5 Li Balake la stak batel j-almantaletik ta stojolal li Balaam ti te vokʼem ta Petor+ ti nopol xil li Ukʼume,* jaʼ li xnichʼon Beore. La stak ta ikʼel xchiʼuk xi laj yalbee: «¡Kʼelavil! Oy jun jteklum ti lokʼik tal ta Ejiptoe, pe noj xa yuʼunik spʼejel li balumile,*+ liʼ xa nopol nakalik ta jtojolale.
6 Jaʼ yuʼun, laʼ chopol kʼoptabun avokoluk li jteklum liʼe,+ yuʼun jaʼ mas echʼem xuʼ yuʼunik. Yikʼal van jaʼ to jech xuʼ stsal kuʼun xchiʼuk jnutsik lokʼel li ta lume, yuʼun jnaʼoj lek ti tsta bendision li buchʼu chavakʼbe bendisione xchiʼuk chopol kʼoptabil chkom li buchʼu chachopol kʼoptae».
7 Jaʼ yuʼun, batik li moletik ta Moabe xchiʼuk li moletik ta Madiane, yichʼojbeik batel li stojol tʼunole.* Bat skʼelik li Balaame+ xchiʼuk laj yalbeik li kʼusi laj yal batel Balake.
8 Xi takʼbatike: «Liʼ xakomik avi akʼobale, chkalboxuk avaʼiik ti kʼusiuk noʼox chalbun li Jeovae». Jech oxal, te komik xchiʼuk Balaam li moletik ta Moabe.
9 Jaʼ yuʼun, xi tal albatuk yuʼun Dios li Balaame:+ «¿Buchʼu li viniketik ti te achiʼuke?».
10 Li Balaame xi la stakʼbe li melel Diose: «Li Balak ti jaʼ xnichʼon Sipor ti jaʼ ajvalil ta Moabe xi la stakbun talel mantale:
11 ‹¡Kʼelavil! Li jteklum ti lokʼik tal ta Ejiptoe yantik xa xnoj yuʼunik spʼejel li balumile.* Jaʼ yuʼun, laʼ chopol kʼoptabun,+ yikʼal van jaʼ to jech xuʼ stsal kuʼun xchiʼuk jnutsik lokʼel›».
12 Pe li Diose xi laj yalbe li Balaame: «Mu xuʼ xachiʼinan batel. Mu xuʼ xachopol kʼopta li jteklume, yuʼun kakʼojbeik bendision».+
13 Sob xa lik ta yokʼomal li Balaame xchiʼuk xi laj yalbe li moletik stakoj batel Balake: «Sutanik batel ta alumalik, yuʼun mu xakʼ jchiʼinoxuk batel li Jeovae».
14 Jaʼ yuʼun, li moletik ta Moabe sutik batel ti bu oy li Balake xchiʼuk xi kʼot yalbeike: «Mu skʼan xchiʼinunkutik talel li Balaame».
15 Pe li Balake la stak batel yan moletik, mas xa epik xchiʼuk mas ichʼbilik ta mukʼ ti jaʼ mu sta li buchʼutik la stak batel ta baʼyele.
16 Batik ta stojolal li Balaame xchiʼuk xi kʼot yalbeike: «Xi stakoj tal mantal li Balak xnichʼon Sipore: ‹Laʼ kʼelun avokoluk, mu xavakʼ kʼusi smakot,
17 yuʼun chkichʼot lek ta mukʼ xchiʼuk ta jpas ti kʼusiuk noʼox chakʼanbune. Jaʼ yuʼun laʼ avokoluk. Laʼ chopol kʼoptabun li jteklum liʼe›».
18 Pe li Balaame xi la stakʼbe li yajtuneltak Balake: «Manchuk mi xakʼbun sna li Balak ti noj ta plata xchiʼuk ta oroe, mu kʼusi stakʼ jpas, yuʼun jaʼ noʼox ta jpas li kʼusi chalbun li Jeova Dios kuʼune akʼo mi tsots skʼoplal o mi muʼyuk.+
19 Avokolikuk, liʼ xakomik li avi akʼobal eke sventa xuʼ jnaʼ kʼusi to yan ta xalbun li Jeovae».+
20 Vaʼun, xi tal albatuk yuʼun Dios ta akʼobaltik li Balaame: «Mi tal yikʼoxuk li viniketike, chiʼinano batel. Pe jaʼ noʼox me xuʼ xaval li kʼusitik chkalbote».+
21 Jaʼ yuʼun, sob xa lik ta yokʼomal li Balaame xchiʼuk la xchapan li smeʼ svuroe, la xchiʼin batel li moletik ta Moabe.+
22 Pe tsan tajek skʼakʼal yoʼonton Dios ta skoj ti bate. Li yaj-anjel Jeovae te laj yakʼ sba ta be sventa mu xjelav li Balaame. Li Balaame te kajal batel ta smeʼ svuro, te xchiʼuk batel chaʼvoʼ yajtuneltak.
23 Li meʼ vuroe laj yil ti te vaʼal ta be li yaj-anjel Jeovae, te stsakoj yespada, jaʼ yuʼun li meʼ vuroe kʼejpʼuj* ta be, och batel ta osiltik. Pe li Balaame lik smaj li smeʼ svuroe sventa sut tal ta be.
24 Li yaj-anjel Jeovae te la svaʼan sba ta jun bikʼit be xtok ti bu tsʼunbil uva ta jujujot xokone, latsbil ton ta jujujot xokon li bee.
25 Li meʼ vuroe laj yil ti te vaʼal li yaj-anjel Jeovae, jaʼ yuʼun la xchʼik sba jelavel, jech lik slatsʼbe yakan ta muro li Balaame. Li Balaame la smaj yan velta.
26 Li yaj-anjel Jeovae jelav batel xtok, te xa laj yakʼ sba ti bu muʼyuk buchʼu stakʼ xjelav batel ta batsʼikʼob mi jaʼuk ta tsʼetkʼobe.*
27 Li meʼ vuroe laj yil ti te vaʼal li yaj-anjel Jeovae, jaʼ yuʼun la xpuchʼan sba. Ilin tajek li Balaame, jech oxal la smaj ta snamteʼ yan velta li smeʼ svuroe.
28 Li Jeovae laj yakʼ kʼopojuk* li meʼ vuroe.+ Xi albat yuʼun meʼ vuro li Balaame: «¿Kʼusi xa noʼox la jpasbot ti oxib xa velta la amajune?».+
29 Li Balaame xi la stakʼbe li meʼ vuroe: «Yuʼun laj xa akuyun ta bol vinik. ¡Liʼuk jtsakoj j-espadae ta jmilot ti jechuke!».
30 Li meʼ vuroe xi laj yalbe li Balaame: «Avuroun onoʼox ti kʼu xa sjalil kuxulote, voʼon jtuk chakajlebinun. ¿Mi yuʼun oy xa onoʼox jech jpasojbot?». Xi la stakʼe: «¡Muʼyuk!».
31 Li Jeovae la sjambe sat li Balaame,+ vaʼun laj yil ti te vaʼal ta be li yaj-anjel Jeovae, te stsakoj s-espada. Ta anil noʼox la snijan sba xchiʼuk la skejan spatan sba.
32 Xi albat yuʼun li yaj-anjel Jeovae: «¿Kʼu yuʼun ti yoxibal xa velta la amaj li smeʼ avuroe? Yuʼun voʼon lokʼ jmakot ta be, yuʼun muʼyuk lek chkil li abe atamoje.+
33 Kʼalal laj yilun li meʼ vuroe, la sjoy sbe, jech la spas yoxibal velta.+ ¡Nopo noʼox avaʼi ti muʼyukuk xnamaj ta jtojolale! Laj xa jmilot ti jechuke xchiʼuk jaʼ kuxul kom kuʼun jechuk li meʼ vuroe».
34 Li Balaame xi laj yalbe li yaj-anjel Jeovae: «Laj xa jta jmul, yuʼun mu jnaʼ mi te vaʼalot chamakun ta be. Mi chopol chavile, chisut batel».
35 Li yaj-anjel Jeovae xi laj yalbe li Balaame: «Chiʼino batel li viniketike, pe jaʼ noʼox me xuʼ xaval li kʼusitik chkalbote». Jech oxal, li Balaame la xchiʼin batel li moletik stakoj batel Balake.
36 Kʼalal laj yaʼi Balak ti tal li Balaame, bat ta anil ta jteklum Moab sventa snup ta be, ta stiʼil Arnon ti stsʼakinoj sba xchiʼuk li yosilal Moabe.
37 Li Balake xi laj yalbe li Balaame: «¿Mi mu lajuk jtakot ta ikʼel? ¿Kʼu yuʼun ti muʼyuk xatal ta orae? ¿Mi yuʼun la anop ti mu xuʼ kuʼun xkichʼot lek ta mukʼe?».+
38 Li Balaame xi la stakʼbe li Balake: «Liʼ xa oyun chkil une. Pe mu jnaʼ mi oy kʼusi stakʼ xkalbot, yuʼun jaʼ noʼox xuʼ xkal li kʼusitik chakʼbun ta ke li Diose».+
39 Jaʼ yuʼun, li Balaame la xchiʼin batel li Balake, te kʼotik ta Kiryat-Usot.
40 Li Balake la smil vakaxetik xchiʼuk chijetik. La stakbe batel jlomuk li Balaam xchiʼuk li moletik ti te oy xchiʼuke.
41 Li Balake laj yikʼ batel Balaam li ta sob yokʼomale, te laj yikʼ batel ta Bamot-Baal. Li ta Bamot-Baale lek xil batel sjunul li jteklum Israele.+
Tsʼibetik ta yok vun
^ O «tsʼiʼlele».
^ Yaʼeluke, jaʼ skʼoplal li Eufratese.
^ O «sjunul li osile».
^ Jaʼ li buchʼu tskʼan tsnabe skʼoplal li kʼusi chkʼot ta pasel ta tsʼakal ti tsaʼ koltael ta stojolal pukujetike.
^ O «sjunul li osile».
^ O «kʼejev; tsʼepʼuj».
^ O «surtokʼobe».
^ Literal «la sjambe ye».
