Numeros 23:1-30
23 Li Balaame xi laj yalbe li Balake: «Vaʼano vukub skajleb matanal li ta jsep osil liʼe+ xchiʼuk chapanbun vukot tot vakax xchiʼuk vukot tot chij».
2 Li Balake ta anil noʼox jech la spas kʼuchaʼal albat yuʼun li Balaame. Laj yakʼik ta matanal jkot tot vakax xchiʼuk jkot tot chij li ta jujun skajleb matanale.+
3 Li Balaame xi laj yalbe li Balake: «Liʼ xakom ta stsʼel li chikʼbil matanal avuʼune, li voʼone chibat. Yikʼaluk xchiʼinun ta loʼil li Jeovae. Chtal kalbot ti kʼusiuk noʼox chalbune». Jech oxal, bat ta bikʼit vits.
4 Li Diose la xchiʼin ta loʼil li Balaame,+ vaʼun li Balaame xi laj yalbe li Diose: «Laj xa jchol ta vaʼanel vukub skajleb matanal xchiʼuk laj xa kakʼ jkot tot vakax xchiʼuk jkot tot chij li ta jujun skajleb matanale».
5 Li Jeovae laj yakʼbe ta ye Balaam ti kʼusi chbat yale,+ xi laj yalbee: «Sutan batel yoʼ bu oy li Balake xchiʼuk jech xavalbe li kʼusi laj kalbote».
6 Sut talel li Balaame, laj yil ti te vaʼal li Balak ta stsʼel li chikʼbil matanal yuʼune xchiʼuk te vaʼal skotol li moletik ta Moab eke.
7 Xi lik yal li jun pʼijil loʼil liʼe:+
«Li ajvalil Balak ta Moabe leʼ to ta Aram+ ay yikʼun tale,te to ta vitstikaltik ta slokʼeb kʼakʼal.
Xi laj yalbune: ‹Abolajan, laʼ chopol kʼoptabun li Jakobe.
Laʼ tikʼbo smul li Israele›.+
8 ¿Kʼuxi xa noʼox ta jchopol kʼopta li buchʼutik muʼyuk chopol kʼoptabilik yuʼun Diose?
¿Kʼuxi xa noʼox ta jtikʼbe smulik li buchʼutik muʼyuk tikʼbil smulik yuʼun li Jeovae?+
9 Liʼ to ta sba tontik jkʼelojik batele,liʼ to ta bikʼtal vitsetik jkʼelojik batele.
Jaʼ jun jteklum ti stuk te nakalike;+muʼyuk te skʼoplal chaʼi sbaik li ta yan lumetike.+
10 ¿Buchʼu xuʼ xchap yuʼun skotol li sviniktak Jakob ti toj epik tajek kʼuchaʼal li pukuk* ta balumile?+¿Mi oy van buchʼu xchap yuʼun li Israele akʼo mi jaʼ noʼox jvokʼ li ta chanvokʼe?
Jechuk xicham kʼuchaʼal chchamik li buchʼutik tukʼike,jechuk xlaj jkʼoplal kʼuchaʼal chlaj skʼoplalike».
11 Vaʼun, li Balake xi laj yalbe li Balaame: «¿Kʼu yuʼun jech la apasbun leʼe? Ti laj kikʼot talele jaʼ sventa xachopol kʼoptabun li kajkontratake, pe muʼyuk jech la apas, jaʼ noʼox laj avakʼbe bendision».+
12 Xi la stakʼe: «¿Mi mu jaʼuk chkal li kʼusi chakʼbun ta ke Jeovae?».+
13 Li Balake xi laj yalbe li Balaame: «Avokoluk, batik ta yan osil ti bu xuʼ xakʼel yalel li jteklume. Jvokʼ noʼox chavil batel, muʼyuk chavil skotol. Jaʼ te chachopol kʼoptabun batel».+
14 Jaʼ yuʼun, laj yikʼ batel ta yosilal Sofim, ta toyolaltik Pisga.+ Te la svaʼan vukub skajleb matanal xchiʼuk laj yakʼ ta matanal jkot tot vakax xchiʼuk jkot tot chij li ta jujun skajleb matanale.+
15 Li Balaame xi laj yalbe li Balake: «Liʼ xakom ta stsʼel li chikʼbil matanal avuʼune, li voʼone leʼ to chbat jchiʼin ta loʼil li Diose».
16 Li Jeovae la xchiʼin ta loʼil li Balaame xchiʼuk laj yakʼbe ta ye ti kʼusi chbat yale,+ xi laj yalbee: «Sutan batel yoʼ bu oy li Balake xchiʼuk jech xavalbe li kʼusi laj kalbote».
17 Jaʼ yuʼun, sut talel li Balaame, laj yil ti te vaʼal chmalavan Balak ta stsʼel li chikʼbil matanal yuʼune xchiʼuk laj yil ti te vaʼal xchiʼuk li moletik ta Moabe. Jaʼ yuʼun, xi la sjakʼ li Balake: «¿Kʼusi laj yal avaʼi li Jeovae?».
18 Xi lik yal li jun pʼijil loʼil liʼe:+
«Likan Balak, chikintao avaʼi.
Chikintabun avaʼi xnichʼon Sipor.
19 Li Diose mu xkoʼolaj kʼuchaʼal krixchano ti tsjut kʼope,*+mu xkoʼolaj kʼuchaʼal xnichʼon krixchano ti tsjel li kʼusi tsnope.*+
¿Mi muʼyuk van tspas li kʼusi chale?
¿Mi muʼyuk van chkʼot ta pasel yuʼun li kʼusi chlokʼ ta yee?+
20 ¡Kʼelavil! Laj kichʼ ikʼel tal sventa xkakʼ bendision;yakʼojbe xa bendision,+ mu xa kʼusi stakʼ jpas sventa xchʼay ta be.+
21 Mu tsʼikbaj chaʼi ti xichʼ pasel majia sventa xichʼ kontrainel li Jakobexchiʼuk mu xakʼ permiso ti xil jtosuk tsatsal vokolil li Israele.
Te chiʼinbilik yuʼun li Jeova Dios yuʼunike,+chichʼ albel skʼoplal ti jaʼ ajvalil yuʼunike.
22 Yakal chichʼik lokʼesel tal ta Ejipto yuʼun li Diose.+
Xkoʼolaj chilik kʼuchaʼal xulub jkot tot teʼtikal vakax.+
23 Muʼyuk buchʼu xuʼ chal jtosuk chopol albil kʼop sventa xichʼ kontrainel li Jakobe,+jech xtok, muʼyuk jtosuk tʼunol* sventa xichʼ kontrainel li Israele.+
Li avie, xi chichʼ alel ta stojolal li Jakob xchiʼuk Israele:
‹¡Kʼelavil li kʼusi spasoj Diose!›.
24 Li jun jteklum liʼe chlik kʼuchaʼal jkot leon,stuk noʼox chlik kʼuchaʼal jkot leon.+
Muʼyuk chpuchʼan sba jaʼ to mi la stiʼ li sveʼelexchiʼuk jaʼ to mi laj xa ox yuchʼbe xchʼichʼel li chonbolometik la sta ta tsakele».
25 Li Balak une xi laj yalbe li Balaame: «Mi muʼyuk xuʼ avuʼun xachopol kʼoptabune, mu xuʼ xavakʼbe bendision ti jechuk xtoke».
26 Xi takʼbat yuʼun li Balaame: «¿Mi mu lajuk onoʼox kalbot ti jaʼ ta jpas skotol li kʼusi chal Jeovae?».+
27 Li Balake xi laj yalbe li Balaame: «Batik avokoluk, chkikʼot batel leʼ ta jot xtoke. Xuʼ van jaʼ to lek chil melel Dios ti te chachopol kʼoptabun li jteklume».+
28 Jaʼ yuʼun, li Balake laj yikʼ batel li Balaam ta toyolaltik Peor ti skʼeloj batel Jesimone.*+
29 Li Balaame xi laj yalbe li Balake: «Vaʼano vukub skajleb matanal li ta jsep osil liʼe xchiʼuk chapanbun vukot tot vakax xchiʼuk vukot tot chij».+
30 Li Balake jech la spas kʼuchaʼal albat yuʼun li Balaame. Laj yakʼ ta matanal jkot tot vakax xchiʼuk jkot tot chij li ta jujun skajleb matanale.
Tsʼibetik ta yok vun
^ O «lum».
^ O «tsnop kʼope; ch-epal kʼopoje».
^ O «chopol chaʼi sbae».
^ Jaʼ li buchʼu tskʼan tsnabe skʼoplal li kʼusi chkʼot ta pasel ta tsʼakal ti tsaʼ koltael ta stojolal pukujetike.
^ O jaʼ van skʼoplal «takixokol balumil».
