Numeros 25:1-18
25 Kʼalal jaʼo te nakalik ta Sitim+ li Israele, lik mulivajikuk xchiʼuk antsetik ta Moab li jteklume.+
2 Li antsetike ay yikʼik li jteklume sventa xbat chiʼinatikuk kʼalal chakʼbeik milbil matanal li sdiosike,+ vaʼun li jteklume te lik veʼikuk xchiʼuk lik snijan sbaik sventa xichʼik ta mukʼ li diosetik yuʼunike.+
3 Li Israele la skap sba* xchiʼukik ta yichʼel ta mukʼ li Baal ta Peore,+ jech lik skʼakʼal yoʼonton Jeova ta stojolal li Israele.
4 Li Jeovae xi laj yalbe li Moisese: «Ikʼo batel skotol li jnitvanejetik* ta jteklume xchiʼuk te xajokʼan ta yeloval Jeova ta kʼakʼaltik* sventa xtupʼ skʼakʼal yoʼonton Jeova ta stojolal li Israele».
5 Li Moisese xi laj yalbe li jchapanvanejetik ta Israele:+ «Ta jujuntal skʼan xamilik li viniketik avuʼunik ti ay skap sbaik* ta yichʼel ta mukʼ li Baal ta Peore».+
6 Kʼalal jaʼo jech yakal chkʼot ta pasele, te tal jun j-israelal vinik ti te yikʼoj kʼotel jun jmadian tseb ti bu oy yermanotake.+ Ta sat Moises yikʼoj kʼotel xchiʼuk ta sat sjunul li tsobobbail yuʼun j-israeletike, jaʼo kʼalal te x-okʼoletik ta yochebal karpana sventa tsobobbaile.
7 Li Fineas+ ti jaʼ xnichʼon Eleasar ti jaʼ xnichʼon li pale Aarone laj yil, vaʼun lokʼ batel ta anil ti bu tsobolike xchiʼuk la stsak batel slansa.
8 Te napʼal och batel ta skarpana li j-israelal vinike, vaʼun la spajbe li lansae, ta skʼunilik la spajbe xchaʼvoʼalik. Jaʼ yuʼun, paj li vokolil ta stojolal j-israeletike.+
9 Ti jayvoʼ chamik li ta vokolil takbatik tale jaʼ 24 mil.+
10 Li Jeovae xi laj yalbe li Moisese:
11 «Li Fineas+ ti jaʼ xnichʼon Eleasar ti jaʼ xnichʼon li pale Aarone, laj xa yakʼ namajuk li skʼakʼal koʼonton ta stojolal li jteklum Israele, yuʼun muʼyuk stsʼik yuʼun ti ch-och jkʼexol yuʼunike.+ Jaʼ yuʼun, muʼyuk la jlajesbeik skʼoplal li j-israeletike akʼo mi oy tajek ta koʼonton ti jtuk noʼox xichʼikun ta mukʼe.+
12 Jaʼ yuʼun, albo ti ta jpas jun trato sventa jun oʼontonal xchiʼuke.
13 Jaʼ jun trato sbatel osil chkom ta stojolal xchiʼuk ta stojolal snitilulal ti jaʼ chtunik ta paleale,+ yuʼun muʼyuk lek laj yil ti sabeik xkʼexol li Sdiose+ xchiʼuk jaʼ koltavan sventa sta perton li jteklum Israele».
14 Li j-israelal vinik ti jmoj laj yichʼ milel xchiʼuk li jmadian tsebe jaʼ sbi Simri, xnichʼon Salu ti jaʼ jun bankilal li ta jchop yutsʼ yalal jsimeonetike.
15 Li jmadian tseb ti laj yichʼ milele jaʼ sbi Kosbi, jaʼ stseb li Sure;+ li Sure jaʼ jun jnitvanej yuʼunik li ta jujuchop yutsʼ yalal Madiane.+
16 Li Jeovae xi laj yalbe ta tsʼakal li Moisese:
17 «Akʼbeik svokol li jmadianetike xchiʼuk lajesbeik skʼoplal,+
18 yuʼun laj yakʼboxuk avokolik kʼalal ta smanyail sjol la sloʼlaoxuk yoʼ xata amulik ta skoj li dios Peore.+ Laj avichʼik loʼlael xtok ta skoj Kosbi ti jaʼ stseb jun jnitvanej ta Madiane, ti cham+ kʼalal jaʼo laj avichʼik takbel tal avokolik ta skoj li dios Peore».+
Tsʼibetik ta yok vun
^ O «la snapʼan sba».
^ Literal «joliletik».
^ Literal «ta sat kʼakʼal».
^ O «snapʼan sbaik».
