Numeros 27:1-23
27 Nopajik batel li stsebetak Selofeade.+ Li Selofeade jaʼ xnichʼon li Efere, xnichʼon Galaad, xnichʼon Makir, xnichʼon Manases. Te likemik ta yutsʼ yalaltak Manases ti jaʼ xnichʼon Josee. Li sbi stsebetake jaʼ Mala, Noa, Ogla, Milka xchiʼuk Tirsa.
2 Li stsebetake bat skʼelik li Moises, li pale Eleasar, li bankilaletik+ xchiʼuk li tsobobbail te ta yochebal karpana sventa tsobobbaile, xi laj yalike:
3 «Te cham ta takixokol balumil li jtotkutike, pe muʼyuk skap sba xchiʼuk li xchiʼiltak Kore+ ti la skontrainik Jeovae. Cham ta smul stuk, jaʼ noʼoxe muʼyuk xkom skeremtak.
4 ¿Kʼu yuʼun chchʼay skʼoplal sbi jtotkutik li ta yutsʼ yalal ta skoj ti muʼyuk skeremtake? Akʼbun jrextokutik* ek ti bu chichʼ xrextoik li xchiʼiltak ta vokʼel jtotkutike».
5 Li Moisese bat yalbe Jeova li svokol tsebetike.+
6 Vaʼun, xi takʼbat yuʼun Jeova li Moisese:
7 «Oy srasonik li stsebetak Selofeade, jaʼ yuʼun persa skʼan xavakʼbe xrextoik* ti bu chichʼ xrextoik li xchiʼiltak ta vokʼel stotike. Jaʼ chrextoinik komel li kʼusi skʼoplal chichʼ ox li stotike.+
8 Xi xavalbe li j-israeletike: ‹Mi cham jun vinik ti chʼabal kom skereme, li xrextoe* jaʼ akʼbeik yichʼ komel li stsebe.
9 Mi muʼyuk kom stsebe, li xrextoe* jaʼ akʼo yichʼ komel li xchiʼiltak ta vokʼele.
10 Mi muʼyuk xchiʼiltak ta vokʼele, li xrextoe* jaʼ akʼo yichʼ komel li xchiʼiltak ta vokʼel stote.
11 Pe mi muʼyuk xchiʼiltak ta vokʼel li stote, li xrextoe* jaʼ akʼo yichʼ komel yan ti jaʼ to mero yutsʼ yalal sbaike. Jaʼ chichʼ komel li rextoile. Liʼe jaʼ jun mantal ti jech chapanbil chkom sventa j-israeletik jech kʼuchaʼal albat mantal yuʼun Jeova li Moisese›».
12 Xi albat yuʼun Jeova li Moisese: «Muyan batel li ta vits Abarime,+ kʼelo batel li balumil chkakʼbe j-israeletike.+
13 Kʼalal mi laj avil une, chavichʼ ikʼel batel ti bu oy amoltotak*+ jech kʼuchaʼal laj yichʼ ikʼel batel li abankil Aarone.+
14 Yuʼun kʼalal te la stsakikun ta kʼop li tsobobbail ta takixokol balumil ta Sine, li voʼoxuke la atoy abaik ta jtojolal kʼalal laj kal mantal ti chkichʼ chʼultajesel kʼalal la jlokʼes voʼe.+ Jaʼ li voʼ ta Meriba+ ta Kades+ ti te oy ta takixokol balumil ta Sine».+
15 Li Moisese xi laj yalbe li Jeovae:
16 «Li Jeova ti jaʼ Dios ti chakʼbe xkuxlejal skotol li krixchanoetike,* akʼo svaʼan jun vinik li ta tsobobbaile
17 ti xlokʼ x-och ta stojolalike, ti akʼo sbeiltas kʼalal chlokʼike xchiʼuk ti sbeiltas ochel xtoke. Vaʼun, li tsobobbail yuʼun Jeovae mu jechuk chkʼot kʼuchaʼal chijetik ti chʼabal buchʼu chchabiatike».
18 Li Jeovae xi laj yalbe li Moisese: «Ikʼo tal li Josue ti jaʼ xnichʼon li Nune ti jaʼ jun vinik ti lek xtojobe* xchiʼuk akʼo akʼob ta stojolal.+
19 Te xavaʼan ta yeloval pale Eleasar xchiʼuk ta yeloval sjunul li tsobobbaile, skʼan te skʼelojik kʼalal chavakʼbe yichʼ yabtele.+
20 Skʼan xavakʼbe jlomuk li avabtele*+ sventa xchʼunbat smantal yuʼun sjunul li tsobobbail yuʼun j-israeletike.+
21 Te chvaʼi ta yeloval li pale Eleasare. Li Eleasare ta stunes Urim+ sventa chapanel yoʼ sjakʼbe Jeova ta sventa li Josuee. Jaʼ chal mantal kʼalal chlokʼik batele xchiʼuk jaʼ chal mantal kʼalal ch-ochik tale, xlokʼ x-och xchiʼuk li j-israeletike, sjunul li tsobobbaile».
22 Li Moisese jech la spas kʼuchaʼal albat mantal yuʼun li Jeovae. Laj yikʼ batel li Josuee, te bat svaʼan ta yeloval pale Eleasar xchiʼuk ta yeloval sjunul li tsobobbaile.
23 Laj yakʼ skʼob ta stojolal xchiʼuk laj yakʼbe yichʼ yabtel+ jech kʼuchaʼal laj yal Jeova ta stojolal li Moisese.+
Tsʼibetik ta yok vun
^ O «jpukulalkutik; jpartekutik».
^ O «spukulalik; sparteik».
^ O «spukulale; spartee».
^ O «spukulale; spartee».
^ O «spukulale; spartee».
^ O «spukulale; spartee».
^ Taje jaʼ jun nichimal loʼil ti jaʼ chalbe skʼoplal kʼalal oy buchʼu chchame.
^ Literal «xchʼulel skotol li bekʼete».
^ Literal «jun vinik ti oy xchʼulele».
^ O «ti tsakbilot ta mukʼe».
