Numeros 28:1-31
28 Li Jeovae xi laj yalbe ta tsʼakal li Moisese:
2 «Xi xavalbe mantal li j-israeletike: ‹Skʼan me mu xchʼay xavaʼiik ti xavakʼbeikun li jmotone, li jpane. Li chikʼbil matanaletik ti lek xmuet yikʼ* chavakʼbeikune jaʼo me xavakʼik jech kʼuchaʼal akʼbil yoraile›.+
3 »Xi xavalbe yaʼiike: ‹Liʼe jaʼ li chikʼbil matanal chavakʼbeik Jeovae: chaʼkot chʼiom tot chij ti muʼyuk ip* xchiʼuk ti jun to jabil yichʼojike, chaʼkot chavakʼik jujun kʼakʼal ta chikʼbil matanal. Jech-o skʼan xapasik.+
4 Li jkot chʼiom tot chije ta sob xavakʼ, li jkote jaʼ to xavakʼ kʼalal chʼayem xa ox batel kʼakʼale,*+
5 jmoj xavakʼ xchiʼuk jvokʼ ta lajunvokʼ jun efa* arina ti lek nin ti kapbil ta jutuk mu jun litro* pukʼbil aseite ti jaʼ chkʼot ta matanal sat tsʼunobiletike.+
6 Jaʼ jun chikʼbil matanal ti jech-o chichʼ akʼele,+ jech laj yichʼ chapel ta vits Sinai ti jaʼ chkʼot ta chikʼbil matanal ti lek xmuet yikʼ* chaʼi Jeovae,
7 ti jmoj chichʼ akʼel xchiʼuk matanal vinoe. Jutuk mu jun litro* vino chichʼ akʼel sventa li jujukot chʼiom tot chije.+ Li poxe te xamal ti bu chʼule, jaʼ chkʼot ta matanal vino sventa Jeova.
8 Li xchaʼkotal chʼiom tot chije, chavakʼ kʼalal chʼayem xa ox batel kʼakʼale.* Jech xavakʼ jech kʼuchaʼal li ta sobe, akʼo li matanal sat tsʼunobile xchiʼuk li matanal vinoe. Jaʼ chkʼot ta matanal ti chikʼbil ta kʼokʼ ti lek xmuet yikʼ* chaʼi Jeovae.+
9 »›Pe li ta skʼakʼalil savadoe,+ li matanal chavakʼike jaʼ chaʼkot chʼiom tot chij ti muʼyuk ip* xchiʼuk ti jun to jabil yichʼojike xchiʼuk chaʼvokʼ ta lajunvokʼ jun efa arina ti lek nin ti kapbil ta aseitee, jaʼ chkʼot ta matanal sat tsʼunobil ti jmoj chichʼ akʼel xchiʼuk li matanal vinoe.
10 Taje jaʼ li chikʼbil matanal chichʼ akʼel ta savadoe, ti jmoj chichʼ akʼel li chikʼbil matanal xchiʼuk li matanal vino ti jech onoʼox chichʼ akʼele.+
11 »›Kʼalal chlik jujun ue, skʼan xavakʼbeik ta chikʼbil matanal Jeova chaʼkot chʼiom tot vakax, jkot tot chij, vukot chʼiom tot chij ti muʼyuk ip* xchiʼuk ti jun to jabil yichʼojike,+
12 oxvokʼ ta lajunvokʼ jun efa arina ti lek nin ti kapbil ta aseite ti chkʼot ta matanal sat tsʼunobiletik ti jmoj chichʼ akʼel+ xchiʼuk li jujukot tot vakaxe, chaʼvokʼ ta lajunvokʼ jun efa arina ti lek nin ti kapbil ta aseite ti chkʼot ta matanal sat tsʼunobiletik ti jmoj chichʼ akʼel xchiʼuk li tot chije+
13 xchiʼuk jvokʼ ta lajunvokʼ jun efa arina ti lek nin ti kapbil ta aseite ti chkʼot ta matanal sat tsʼunobiletik ti jmoj chichʼ akʼel xchiʼuk li jujukot chʼiom tot chije, jaʼ chkʼot ta chikʼbil matanal ti lek xmuet yikʼe,*+ jun chikʼbil matanal sventa Jeova.
14 Li matanal vino ti jmoj chavakʼik xchiʼuk li jujukot tot vakaxe jaʼ jutuk mu chibuk litro.*+ Sventa li tot chije mas ta jun litro* vino+ xchiʼuk sventa li jujukot chʼiom tot chije jaʼ jutuk mu jun litro.*+ Taje jaʼ li chikʼbil matanal chichʼ akʼel jujun u ta sjunul jabile.
15 Jech xtok, skʼan xichʼ akʼbel Jeova jkotuk chʼiom tentsun ti chkʼot ta matanal sventa mulile, parte-o li chikʼbil matanal ti jmoj chichʼ akʼel xchiʼuk li matanal vino ti jech onoʼox chichʼ akʼele.
16 »›Li ta 14 yuʼun li sba ue, chichʼ pasel li Kʼin Koltael sventa Jeovae.+
17 Li ta 15 yuʼun li u taje, chichʼ pasel jun kʼin. Vukub kʼakʼal chichʼ veʼel pan ti muʼyuk slevaduraile.*+
18 Chapasik jun chʼul tsobajel li ta sba kʼakʼale. Mu stakʼ xapasik jtosuk tsatsal abtelal.
19 Chachikʼbeik ta smoton Jeova chaʼkot chʼiom tot vakax, jkot tot chij xchiʼuk vukot chʼiom tot chij ti jun to jabil yichʼojike. Skʼan muʼyukuk ip* li chonbolometik chavakʼike.+
20 Li chonbolometik taje skʼan jmojuk xavakʼik xchiʼuk li matanal sat tsʼunobiletike. Li matanal sat tsʼunobiletik taje skʼan jaʼuk arina ti lek nin ti kapbil ta aseitee,+ jaʼ oxvokʼ ta lajunvokʼ sventa li jujukot tot vakaxe xchiʼuk jaʼ chaʼvokʼ ta lajunvokʼ ta sventa li jujukot tot chije.
21 Ta sventa jujukot li vukot chʼiom tot chije skʼan xavakʼ jvokʼ ta lajunvokʼ,
22 jech xtok, skʼan xavakʼik jkot tot tentsun ti chkʼot ta matanal sventa mulil yoʼ xataik perton ta skoj li amulike.
23 Li matanaletik taje parte-o xchiʼuk li chikʼbil matanal chavakʼik ta jujun sob ti chtun ta chikʼbil matanal ti jech onoʼox chavakʼike.
24 Taje jech skʼan xavakʼik jujun kʼakʼal sventa xkʼot ta veʼlil,* vukub kʼakʼal jech xapasik. Jaʼuk xkʼot ta jun matanal chikʼbil ta kʼokʼ ti lek xmuet yikʼ* chaʼi li Jeovae. Jmoj chichʼ akʼel li chikʼbil matanal xchiʼuk li matanal vino ti jech onoʼox chichʼ akʼele.
25 Li ta svukubal kʼakʼale, skʼan xapasik jun chʼul tsobajel.+ Mu me xapasik jtosuk tsatsal abtelal.+
26 »›Kʼalal jaʼo yorail chlokʼ li sba sat tsʼunobiletik ti lek xa yijike,+ ti jaʼo chavakʼbeik ta smoton Jeova li achʼ sat tsʼunobiletike,+ skʼan xapasik jun chʼul tsobajel kʼalal chapasbeik skʼinal li kʼusitik chlokʼe.+ Mu me xapasik jtosuk tsatsal abtelal.+
27 Skʼan xavakʼik ta matanal chaʼkot chʼiom tot vakax, jkot tot chij xchiʼuk vukot chʼiom tot chij ti jun to jabil yichʼoj ti muʼyuk ipike.*+ Jaʼ chkʼot ta chikʼbil matanal ti lek xmuet yikʼ* chaʼi Jeovae.
28 Jech xtok, li matanal sat tsʼunobiletik ti jmoj chavakʼike jaʼuk arina ti lek nin ti kapbil ta aseitee, oxvokʼ ta lajunvokʼ sventa li jujukot tot vakaxe, chaʼvokʼ ta lajunvokʼ sventa li tot chije.
29 Ta sventa jujukot li vukot chʼiom tot chije skʼan xavakʼ jvokʼ ta lajunvokʼ,
30 jech xtok, skʼan xavakʼik jkot chʼiom tentsun yoʼ xataik perton ta skoj li amulike.+
31 Skʼan xavakʼik li matanaletik taje, parte-o me li chikʼbil matanal ti jmoj chichʼ akʼel xchiʼuk li matanal sat tsʼunobiletik ti jech onoʼox chavakʼike. Skʼan muʼyukuk ipik* ti koʼol chichʼ akʼel+ xchiʼuk li matanal vinoe.
Tsʼibetik ta yok vun
^ O «ti chakʼ jun oʼontonal». Literal «ti tslamajes oʼontonal».
^ O «muʼyuk xchopolil».
^ Literal «kʼalal tsta sba li chib mal kʼakʼale».
^ Li jvokʼ ta lajunvokʼ jun efae jaʼ 2.2 litro. Kʼelo Apendise B14.
^ Literal «jun kuarto in». Li jun ine jaʼ 3.67 litro. Kʼelo Apendise B14.
^ O «jun yoʼonton yuʼun». Literal «tslamajes oʼontonal».
^ Literal «jun kuarto in». Li jun ine jaʼ 3.67 litro. Kʼelo Apendise B14.
^ O «jun yoʼonton yuʼun». Literal «tslamajes oʼontonal».
^ Literal «kʼalal tsta sba li chib mal kʼakʼale».
^ O «muʼyuk xchopolil».
^ O «muʼyuk xchopolil».
^ O «ti chakʼ jun oʼontonale». Literal «ti tslamajes oʼontonale».
^ Literal «jun kuarto in».
^ Literal «jvokʼ ta oxvokʼ jun in».
^ Literal «j-oʼlol in».
^ O «muʼyukuk xchopolil».
^ Literal «pan».
^ O «jun yoʼonton yuʼun». Literal «tslamajes oʼontonal».
^ O «muʼyuk xchopolilike».
^ O «jun yoʼonton yuʼun». Literal «tslamajes oʼontonal».
^ O «muʼyukuk xchopolilik».
