Numeros 3:1-51
3 Liʼe jaʼ snitilulal yutsʼ yalaltak* Aaron xchiʼuk Moises ti kʼalal kʼoponat yuʼun Jeova ta vits Sinai+ li Moisese.
2 Xi sbiik li xnichʼnabtak Aarone: li sba xnichʼone jaʼ Nadab, laje Abiu,+ Eleasar+ xchiʼuk Itamar.+
3 Taje jaʼ sbiik li xnichʼnabtak Aaron ti laj yichʼik tʼujel yoʼ xichʼik vaʼanel* sventa xtunik ta paleale.+
4 Pe li Nadab xchiʼuk Abiue chamik ta yeloval Jeova,+ yuʼun la xchikʼik pom ta yeloval Jeova ta takixokol balumil ta Sinai ti muʼyuk akʼbilik permiso jech tspasike. Muʼyuk xil xnichʼnabik. Yan li Eleasar+ xchiʼuk Itamare+ jech jmoj-o tunik ta paleal xchiʼuk li stotik Aarone.
5 Xi albat yuʼun Jeova li Moisese:
6 «Akʼo nopajikuk tal avuʼun li snitilulal Levie,+ akʼo te vaʼiikuk avuʼun ta yeloval pale Aaron xchiʼuk akʼo te tunikuk+ ta stojolal.
7 Akʼo spasik li kʼusi sbainojik ta stojolal Aaron li ta yeloval karpana sventa tsobobbaile xchiʼuk li kʼusi sbainojik ta stojolal sjunul tsobobbaile, taje jaʼo kʼalal tspas li yabtelik ta axibalnae.
8 Jaʼ skʼan sbainik li kʼusitik te chtun+ ta karpana sventa tsobobbaile xchiʼuk skʼan spasik li kʼusi sbainojik ta stojolal j-israeletik kʼalal tskʼelik li abtelaletik ta axibalnae.+
9 Skʼan xavakʼ ta stojolal Aaron xchiʼuk xnichʼnabtak li jlevietike. Yuʼun chʼakbilik lokʼel ta stojolal j-israeletik+ sventa xichʼik akʼel ta stojolal Aaron.
10 Skʼan xabiiltas ta paleal li Aaron xchiʼuk xnichʼnabtake. Skʼan xkʼot ta pasel yuʼunik li kʼusi sbainojik spasele.+ Buchʼuuk noʼox ti chnopaj batel ti bu chʼul mi muʼyuk akʼbil permisoe* skʼan xichʼ milel».+
11 Xi to albat yuʼun Jeova li Moisese:
12 «¡Kʼelavil!, li voʼone chkikʼ lokʼel ta stojolal j-israeletik li jlevietike, jaʼ chkʼot ta xkʼexol skotol li sba yol xnichʼon* j-israeletike,+ vaʼun jaʼ kuʼun chkʼot li jlevietike.
13 Yuʼun jaʼ kuʼun skotol li sba ololetike.+ Ti kʼusi kʼakʼalil la jmil li sba nichʼoniletik ta yosilal Ejiptoe,+ la jchʼultajes sventa xkʼotik ta kuʼun li sba yol xnichʼon Israele, jaʼ li sba yol xnichʼon krixchanoetik xchiʼuk li sba yol chonbolometike.+ Jaʼ kuʼun chkʼotik, voʼon Jeovaun».
14 Ta tsʼakale, xi to albat yuʼun Jeova li Moises ta takixokol balumil ta Sinaie:+
15 «Tsakbo sbi xnichʼnabtak jlevietik ta jujuchop yutsʼ yalal smoltotik xchiʼuk ta jujuchop yutsʼ yalalik. Skʼan xatsakbe sbi skotol li keremetik ti jun u o ti mas xa ta jun u yichʼojike».+
16 Jech oxal, li Moisese la stsakbe sbiik jech kʼuchaʼal albat mantal yuʼun li Jeovae, jech tajek la spas jech kʼuchaʼal albat mantale.
17 Xi sbiik li xnichʼnabtak Levie: Guerson, Koat xchiʼuk Merari.+
18 Xi sbiik li xnichʼnabtak Guerson ti jaʼ te lik talel li yutsʼ yalalike: Libni xchiʼuk Simei.+
19 Li xnichʼnabtak Koat ti jaʼ te lik talel li yutsʼ yalalike jaʼ Amram, Isar, Ebron xchiʼuk Usiel.+
20 Li xnichʼnabtak Merari ti jaʼ te lik talel li yutsʼ yalalike jaʼ Mali+ xchiʼuk Musi.+
Taje jaʼ yutsʼ yalaltak jlevietik ti te lik talel ta snitilulal smoltotike.
21 Li yutsʼ yalal jlibnietik+ xchiʼuk li yutsʼ yalal jsimeietike te lik talel ta stojolal Guerson. Taje jaʼ li yutsʼ yalaltak jguersonetike.
22 Skotol li keremetik ti jun u o ti mas xa ta jun u yichʼojik ti laj yichʼ tsakbel sbiike jaʼ 7,500.+
23 Li yutsʼ yalaltak jguersonetike te spasoj skarpanaik ta spat axibalna+ ta stukʼil smaleb kʼakʼal.
24 Li bankilal ta jujuchop yutsʼ yalal jguersonetike jaʼ Eliasaf xnichʼon Lael.
25 Li kʼusi sbainojik li xnichʼnabtak Guerson+ li ta karpana sventa tsobobbaile, jaʼ ti chchabiik li axibalna+ xchiʼuk li spokʼaltak+ ta yut xchiʼuk ta spate, li skortinail+ stiʼ yochebal karpana sventa tsobobbaile,
26 li kortina+ sventa yochebal amakʼe,* li kortina te jokʼanbil ta yamakʼil ti sjoyobtaoj li axibalnae xchiʼuk li skajleb matanale, jech xtok, jaʼ oy ta sbaik skʼelel li xchʼojonaltak xchiʼuk skotol li abtelaletik te chichʼ pasele.
27 Li yutsʼ yalal j-amrametik, li yutsʼ yalal j-isaretik, li yutsʼ yalal j-ebronetik xchiʼuk li yutsʼ yalal j-usieletike te lik talel ta stojolal Koat. Taje jaʼ li yutsʼ yalaltak jkoatetike.+
28 Skotol li keremetik ti jun u o ti mas xa ta jun u yichʼojike jaʼ 8,600; jaʼ oy ta sbaik xchabiel ti bu chʼule.+
29 Li yutsʼ yalaltak xnichʼnab Koate te la spas skarpanaik ta xokon axibalna ta stukʼil sur.+
30 Li bankilal ta jujuchop yutsʼ yalal jkoatetike jaʼ Elisafan xnichʼon Usiel.+
31 Jaʼ sbainojik xchabiel li kaxae,+ li mexae,+ li kandeleroe,+ li skajlebtak matanale,+ li kʼusitik chichʼ tunesel+ sventa li jeltos abtelaletik ti bu chʼule, li kortinae+ xchiʼuk skotol li abtelaletik te chichʼ pasele.+
32 Li bankilal yuʼun jlevietike jaʼ Eleasar+ ti jaʼ xnichʼon li pale Aarone. Li Eleasare jaʼ oy ta sba li buchʼutik oy yabtelik ti bu chʼule.
33 Li yutsʼ yalal jmalietik xchiʼuk li yutsʼ yalal jmusietike te lik talel ta stojolal Merari. Taje jaʼ li yutsʼ yalaltak Merarie.+
34 Skotol li keremetik ti jun u o ti mas xa ta jun u yichʼojik ti laj yichʼ tsakbel sbiike jaʼ 6,200.+
35 Li bankilal ta jujuchop yutsʼ yalal Merarie jaʼ Suriel xnichʼon Abiail. Te spasoj skarpanaik ta xokon axibalna ta stukʼil norte.+
36 Li xnichʼnabtak Merarie jaʼ sbainojik xchabiel li steʼeltak axibalnae,+ li skʼatlom teʼaltake,+ li yoyaltake,+ li kʼusi pechajtik ti jomajtik sate, skotol li kʼusitik te chtune+ xchiʼuk skotol li abtelaletik te chichʼ pasele,+
37 jech xtok, jaʼ sbainojik li yoyaltak ta sjoylejal yamakʼile* xchiʼuk li kʼusi pechajtik ti jomajtik sate,+ li estakaetik sventa karpanae xchiʼuk li xchʼojonaltak karpanae.
38 Li buchʼutik te spasoj skarpanaik li ta yeloval axibalna ta stukʼil slokʼeb kʼakʼale jaʼ Moises, Aaron xchiʼuk xnichʼnabtak. Jaʼ oy ta sbaik xchabiel ti bu chʼule, jaʼ kʼotik ta xkʼexol li j-israeletik ta skoj ti jaʼ onoʼox oy ta sbaik xchabiel li j-israeletike. Buchʼuuk noʼox ti chnopaj batel ti muʼyuk akʼbil permisoe* skʼan xichʼ milel.+
39 Ti kʼu yepal lokʼ ta tsakbel sbiik ta jujuchop yutsʼ yalalik li kerem jlevietik ti jun u o ti mas xa ta jun u yichʼojik ti tsakbat sbiik yuʼun Moises xchiʼuk Aaron ti jech albatik mantal yuʼun Jeovae jaʼ 22 mil.
40 Xi albat yuʼun Jeova li Moisese: «Tsakbo sbi li sba yol xnichʼon j-israeletik ti jaʼ keremetik ti jun u o ti mas xa ta jun u yichʼojike.+ Chapo jayvoʼik xchiʼuk tsakbo ta lista li sbiike.
41 Skʼan xavikʼbun tal li jlevietike, yuʼun jaʼ chkʼot ta xkʼexol li sba yol xnichʼon j-israeletike,+ jech xtok, skʼan xavikʼbeikun tal li stsʼunbal xchonbolom jlevietike, yuʼun jaʼ chkʼot ta xkʼexol li sba yol xchonbolom j-israeletike.+ Voʼon Jeovaun».
42 Vaʼun, li Moisese la stsakbe sbi skotol li sba yol xnichʼon j-israeletik jech kʼuchaʼal albat mantal yuʼun Jeovae.
43 Skotol li keremetik ti jaʼ sba nichʼoniletik ti jun u o ti mas xa ta jun u yichʼojik ti laj yichʼ tsakbel sbiike jaʼ 22,273.
44 Li Jeovae xi to laj yalbe li Moisese:
45 «Jaʼ ikʼo tal li jlevietik ta xkʼexol skotol li sba yol xnichʼon j-israeletike, jech xtok, jaʼ ikʼo tal li stsʼunbal xchonbolom jlevietik ta xkʼexol li xchonbolom j-israeletike. Vaʼun, jaʼ kuʼun chkʼot li jlevietike. Voʼon Jeovaun.
46 Li j-israeletik ti jaʼ sba nichʼoniletike 273 ta voʼ mas to epik, jaʼ xkom to li jlevietike.+ Jaʼ yuʼun, ti kʼu yepal stojol sventa xichʼik manel+ ti kʼu yepal jelavem li j-israeletike,
47 skʼan xatsak voʼob siklo* ta jujunik,+ jaʼ ti kʼu yepal yalal jujun siklo ti bu chʼule. Li yalal jun sikloe jaʼ 20 guera.*+
48 Li takʼine jaʼ skʼan xavakʼbe li Aaron xchiʼuk xnichʼnabtake, ti jaʼ stojol ti laj yichʼik manel ti jayvoʼ jelavik li j-israeletike».
49 Jech oxal, li Moisese la stsak li takʼin ti jaʼ stojol ti kʼu yepal jelavemik ta stojolal jlevietik li j-israeletike.
50 Ti kʼu yepal stojol li sba xnichʼnab j-israeletik ti la stsake jaʼ 1,365 siklo, jaʼ ti kʼu yepal yalal jujun siklo ti bu chʼule.
51 Li Moisese jaʼ bat yakʼbe Aaron xchiʼuk xnichʼnabtak ti kʼu yepal stojol laj yichʼik-o manel jech kʼuchaʼal laj yal* Jeovae. Jech la spas jech kʼuchaʼal albat mantal yuʼun Jeova li Moisese.
Tsʼibetik ta yok vun
^ Literal «jaykʼol kuxlejal».
^ Literal «nojesbel skʼobik».
^ Literal «yan krixchano», jaʼ xkaltik, jun krixchano ti maʼuk yutsʼ yalal Aarone.
^ Literal «jujun sba olol ti tsjam alajebale».
^ Literal «yan krixchano», jaʼ xkaltik, jun krixchano ti maʼuk jlevie.
^ Li jun sikloe jaʼ 11.4 gramo yalal. Kʼelo Apendise B14.
^ Li jun guerae jaʼ 0.57 gramo yalal. Kʼelo Apendise B14.
^ Literal «ye».
