Numeros 30:1-16
30 Li Moisese la xchiʼin ta loʼil li joliletik+ ta jujuchop snitilulal Israele, xi laj yale: «Xi laj yal mantal li Jeovae:
2 Mi chakʼ ye+ ta stojolal Jeova li jun vinike o mi jamal chal+ ti oy kʼusi muʼyuk tspas ti jech chakʼ yee, skʼan me xkʼot ta pasel yuʼun.+ Akʼo spas skotol li kʼusi jamal chale.+
3 »Mi oy jun ants chakʼ ye ta stojolal Jeova o mi chakʼ ye ti oy kʼusi muʼyuk tspas kʼalal stsebal toe xchiʼuk mi te to xchiʼuk ta naklej stote,
4 mi laj yaʼi stot ti oy kʼusi laj yakʼ ye tspase o ti laj yakʼ ye ti oy kʼusi muʼyuk tspase, pe mi mu kʼusi xal li stote, akʼo spas skotol li kʼusi laj yakʼ yee xchiʼuk akʼo kʼotuk ta pasel yuʼun li kʼusi laj yakʼ ye ti muʼyuk tspase.
5 Yan mi mu skʼan totil li kʼusi laj yakʼ ye tspas li stsebe o ti mu skʼan ti oy kʼusi laj yakʼ ye muʼyuk tspase, te jechuk. Ta skoj ti jaʼ mu skʼan li totile, ch-akʼat ta perton yuʼun Jeova li tsebe.+
6 »Pe mi nupun kʼalal jaʼo yakʼoj yee o ti anil kʼusi laj yakʼ ye tspase,
7 mi muʼyuk kʼusi chopol chaʼi smalal kʼalal mi laj yaʼie, akʼo spas li kʼusi laj yakʼ yee o akʼo kʼotuk ta pasel yuʼun li kʼusi laj yakʼ ye ti muʼyuk tspase.
8 Pe mi ta skʼakʼalil noʼox laj yal smalal ti mu skʼane, li smalale xuʼ xchʼaybe skʼoplal li kʼusi laj yakʼ yee o li kʼusi anil laj yakʼ ye tspas li yajnile.+ Li antse ch-akʼbat perton yuʼun li Jeovae.
9 »Mi jaʼ jun ants ti chamem smalale o jun sutemal ants laj yakʼ yee, persa skʼan spas skotol.
10 »Pe mi jaʼo laj yakʼ ye ti oy kʼusi tspase o mi jaʼo laj yakʼ ye ti oy kʼusi muʼyuk tspas kʼalal te xa ox oy ta sna smalale,
11 mi laj yaʼi smalal, pe mi mu kʼusi xal xchiʼuk muʼyuk chopol laj yaʼie, skʼan spas skotol li kʼusi laj yakʼ ye li antse xchiʼuk akʼo kʼotuk ta pasel yuʼun li kʼusi laj yakʼ ye ti muʼyuk tspase.
12 Pe mi ta skʼakʼalil noʼox la xchʼaybe skʼoplal ti kʼusi yakʼoj ye li yajnile o li kʼusi jamal laj yal ti oy kʼusi muʼyuk tspas li yajnil ti jech laj yakʼ yee, mu xa persauk spas kʼusi laj yal li antse.+ Yuʼun laj xa xchʼaybe skʼoplal li smalale, vaʼun ch-akʼat ta perton yuʼun li Jeovae.
13 Mi oy kʼusi laj yakʼ ye tspas li ajnilale o mi laj yakʼ ye ti oy kʼusi chikta spasel ti jamal laj yal jech ta spase, jaʼ noʼox xuʼ xchʼaybe skʼoplal li smalale o jaʼ noʼox xuʼ xal ti akʼo spase.
14 Pe mi muʼyuk chopol laj yaʼi smalal kʼalal oy kʼusi chakʼ ye li antse, jaʼ skʼan xal ti akʼbat xa permiso ti akʼo spas skotol li kʼusi yakʼoj yee o akʼo kʼotuk ta pasel yuʼun li kʼusi laj yakʼ ye ti muʼyuk tspase. Mi muʼyuk kʼusi albat yuʼun smalal kʼalal laj yaʼi chakʼ yee, akʼo spas li kʼusi laj yale.
15 Pe mi jaʼ to tskʼan chchʼaybe skʼoplal ta tsʼakal kʼalal echʼ xa ox jayibuk kʼakʼal ti laj yaʼie, jaʼ xa chkom ta sba vinik li smul antse.+
16 »Taje jaʼ mantaletik akʼbat yuʼun Jeova li Moises sventa li malalil xchiʼuk yajnile, li totil xchiʼuk stseb ti te to xchiʼuk ta nakleje».
