Numeros 31:1-54
31 Li Jeovae xi laj yalbe li Moisese:
2 «Bat pako akʼoplalik,+ tsakik ta kʼop li jmadianetik+ ta skoj li kʼusi laj yichʼ pasbel j-israeletike. Mi laje, chavichʼ ikʼel batel ti bu oy amoltotake».*+
3 Li Moisese xi laj yalbe li jteklume: «Chapano abaik jayvoʼuk sventa xbat atsakik ta kʼop* li jmadianetike xchiʼuk sventa xbat apakbeik skʼoplal Jeova li ta Madiane.
4 Ta skotol snitilulal Israele, jmil chlokʼ ta jujuchop nitilulal sventa xbatik ta paskʼop».
5 Li ta sjaymilal j-israeletike+ jaʼ jmil lokʼik ta jujuchop nitilulal, 12 mil ti la xchapan sbaik sventa paskʼope.*
6 Li Moisese la stak batel jmil ta jujuchop nitilulal yoʼ xbatik ta paskʼop, koʼol batik xchiʼuk Fineas+ ti jaʼ sventainoj li paskʼope, jaʼ li xnichʼon pale Eleasare. Li Finease jaʼ te yichʼojan li kʼusitik chʼulik xchiʼuk li okʼesetik sventa paskʼope.+
7 Bat stsakik ta kʼop Madian jech kʼuchaʼal albat mantal yuʼun Jeova li Moisese, la smilik komel skotol li viniketike.
8 Pe maʼuk noʼox la smilik taje, la smilik xtok li ajvaliletik ta Madiane, jaʼ li Evi, Rekem, Sur, Ur xchiʼuk Reba, jaʼ li voʼob ajvaliletik ta Madiane. La smilik komel ta espada xtok li Balaam+ ti jaʼ xnichʼon Beore.
9 Pe li j-israeletike la xchukik batel li antsetike xchiʼuk li keremetik te oyik ta Madiane. Laj yikʼik batel xtok li stsʼunbal chonbolomike xchiʼuk skotol li kʼusitik x-ayan yuʼunike.
10 La stsanbeik komel skʼakʼal skotol li jteklumetik ti bu toʼox nakalike xchiʼuk li skarpanaike.*
11 La spojik batel skotol li kʼusitik x-ayan yuʼun li krixchanoetike xchiʼuk la xchukik batel xtok li krixchanoetik xchiʼuk li chonbolometike.
12 Li buchʼutik la xchukik batele xchiʼuk li kʼusitik la spojike laj yichʼik batel ta stojolal Moises, ta stojolal pale Eleasar xchiʼuk ta stojolal li tsobobbail yuʼun j-israeletike. Te laj yichʼik batel ti bu spasoj skarpanaik ta takixokol balumil ta stenlejaltik yuʼun Moabe,+ ta xokon Jordan ta yeloval Jeriko.
13 Vaʼun, li Moisese, li pale Eleasar xchiʼuk li bankilaletik ta tsobobbaile lokʼ snupik ta be ta spat ti bu spasoj skarpanaike.
14 Pe li Moisese ilin ta stojolal li viniketik ti jaʼ vaʼanbilik ta skʼelel li soltaroetike, li bankilaletik ti sbainojik jmil ta voʼ soltaroetike xchiʼuk li bankilaletik ti sbainojik sien ta voʼ soltaroetik ti sutik tal ta paskʼope.
15 Xi albatik yuʼun li Moisese: «¿Kʼu yuʼun ti kuxul laj aviktaik li antsetike?
16 Yuʼun li antsetik leʼe jaʼ la xchʼunbeik smantal Balaam kʼalal la sloʼlaik j-israeletik kʼalal muʼyuk tukʼ laj yakʼ sbaik+ ta stojolal Jeova ta skoj li Peore,+ jaʼ yuʼun la stak talel vokolil Jeova ta stojolal li stsobobbaile.+
17 Jech oxal, milik skotol li keremetike xchiʼuk milik li antsetik ti xchiʼinojik xa ta vayel junuk vinike.
18 Pe xuʼ kuxul xaviktaik skotol li tsebetik ti muʼyuk to xchiʼinojik ta vayel junuk vinike.+
19 Skʼan te xakomik vukub kʼakʼal ta spat ti bu oy li karpanaetike. Li buchʼu milvan avuʼunike xchiʼuk li buchʼu la sta ta tijel junuk sbekʼtal animae*+ skʼan xavakʼ abaik ta lekubtasel+ li ta yoxibal kʼakʼal xchiʼuk li ta svukubal kʼakʼale, jech skʼan xapasik xchiʼuk jech skʼan spasik ek li buchʼutik la achukik tale.
20 Skʼan xasakubtasik xtok li kʼuʼil pokʼiletike, li kʼusitik pasbil ta nukule, skotol li kʼusitik pasbil ta stsotsil tentsune xchiʼuk skotol li kʼusitik pasbil ta teʼe».
21 Li pale Eleasare xi laj yalbe li soltaroetik ti ayik ta paskʼope: «Liʼe jaʼ smantal Jeova ti skʼan pasel ti jech albat yuʼun li Moisese:
22 ‹Li oroe, li platae, li kovree, li takʼine, li estanyo takʼine xchiʼuk li plomoe
23 —skotol li kʼusi xkuch yuʼun kʼokʼe— skʼan xachikʼik ta kʼokʼ sventa xichʼ sakubtasel. Jech xtok, skʼan sakubtasel li ta voʼ sventa ta jlekubtas-o jbatike.+ Yan li kʼusitik mu xkuch yuʼun kʼokʼe akʼo yichʼ sakubtasel ta voʼ.
24 Li ta svukubal kʼakʼale, skʼan xachukʼ akʼuʼ apokʼik sventa lek xakomik, vaʼun xuʼ xa-ochik talel ti bu oy li karpanaetike›».+
25 Vaʼun, li Jeovae xi laj yalbe li Moisese:
26 «Chapo skotol li kʼusitik la spojik tale, chapo jayvoʼ krixchanoetik chukbilik tal xchiʼuk jaykot chonbolometik; koʼol xachap achiʼuk li pale Eleasare xchiʼuk li joliletik ta jujuchop yutsʼ yalalik te ta tsobobbaile.
27 Chʼako ta chaʼvokʼ li kʼusitik la spojik tale, li jvokʼe jaʼ akʼo xchʼakbe sbaik li buchʼutik ayik ta paskʼope, li jvokʼ xtoke jaʼ akʼo yichʼ li tsobobbaile.+
28 Li patan chichʼ akʼbel Jeovae, te akʼo yichʼ lokʼesel li ta jvokʼ ti jaʼ chichʼik li buchʼutik ayik ta paskʼope, jun ta voʼob sien akʼo mi jaʼ krixchano, mi vakax, mi vuro o mi chij.
29 Li j-oʼlol laj yichʼike jaʼ te xatsakbe lokʼel sventa xavakʼbe ta smoton Jeova,+ jaʼ xavakʼbe li pale Eleasare.
30 Li j-oʼlol laj yichʼ akʼbel j-israeletike, te akʼo yichʼ lokʼesel jun ta 50 akʼo mi jaʼ krixchano, mi vakax, mi vuro, mi chij o kʼusiuk noʼox yan tsʼunbal chonbolomal, akʼbo jlevietik+ ti jaʼ oy ta sbaik xchabiel li kʼusitik chtun ta axibalna yuʼun Jeovae».+
31 Li Moises xchiʼuk pale Eleasare jech tajek la spasik jech kʼuchaʼal albat mantal yuʼun Jeova li Moisese.
32 Li skomenal* kʼusitik laj yichʼik tal kʼalal sutik tal ta paskʼope jaʼ 675 mil ta kot chijetik,
33 72 mil ta kot vakaxetik
34 xchiʼuk 61 mil ta kot vuroetik.
35 Li tsebetik ti muʼyuk to xchiʼinojik ta vayel junuk vinike+ jaʼ 32 mil.
36 Li j-oʼlol laj yichʼik li buchʼutik ayik ta paskʼope jaʼ 337,500 ta kot chijetik.
37 Li patan skʼan xakʼbeik Jeovae jaʼ 675 ta kot chijetik.
38 Jaʼ 36 mil ta kot laj yichʼik li vakaxetike, li patan skʼan xakʼbeik Jeovae jaʼ 72 ta kot.
39 Jaʼ 30,500 ta kot laj yichʼik li vuroetike, li patan skʼan xakʼbeik Jeovae jaʼ 61 ta kot.
40 Jaʼ 16 mil ta voʼ li krixchanoetike, li patan skʼan xakʼbeik Jeovae jaʼ 32 ta voʼ.
41 Li Moisese laj yakʼbe ta smoton Jeova li patane, jaʼ laj yakʼbe li pale Eleasar+ jech kʼuchaʼal albat mantal yuʼun Jeovae.
42 Li j-oʼlol laj yichʼ akʼbel j-israeletik ti chʼakbatik yuʼun Moisese, ti jaʼ li kʼusitik la staik talel li buchʼutik ayik ta paskʼope
43 jaʼ 337,500 ta kot chijetik,
44 36 mil ta kot vakaxetik,
45 30,500 ta kot vuroetik
46 xchiʼuk jaʼ 16 mil ta voʼ li krixchanoetike.
47 Li j-oʼlol laj yichʼ akʼbel j-israeletike, te la stsak lokʼel Moises jun ta 50 akʼo mi jaʼ krixchano o mi chonbolom, laj yakʼbe li jlevietik+ ti jaʼ oy ta sbaik xchabiel li kʼusitik chtun ta axibalna yuʼun Jeova+ jech kʼuchaʼal albat yuʼun Jeova li Moisese.
48 Li bankilaletik yuʼun soltaroetike, jaʼ xkaltik, li bankilaletik ti sbainojik jmil ta voʼ soltaroetike+ xchiʼuk li bankilaletik ti sbainojik sien ta voʼ soltaroetike nopajik batel ta stojolal li Moisese,
49 xi laj yalbeike: «Li avajtunelunkutike laj xa jchapkutik li viniketik ti jaʼ jbainojkutik skʼelel ti ayik ta paskʼope, lek tsʼakal lisutkutik tal jkotolkutik.+
50 Jaʼ yuʼun, akʼo permiso ti xkakʼbekutik ta smoton Jeova li kʼusitik la jtakutik talel ti pasbil ta oroe, li skadenail snukʼ akanile, li pulseraetike, li aniyo ti oy seyoale, li areteetike xchiʼuk li yan kʼusitik kʼupilik sbae sventa xakʼunkutik ta perton li Jeovae».
51 Jaʼ yuʼun, li Moises xchiʼuk pale Eleasare laj yichʼik komel li oroe, jaʼ skotol li kʼusitik kʼupilik sbae.
52 Ta skotol li kʼusi laj yakʼbeik ta smoton Jeovae jaʼ 16,750 siklo,* ti jaʼ laj yichʼik tal li bankilaletik ti sbainojik jmil ta voʼ soltaroetike xchiʼuk li bankilaletik ti sbainojik sien ta voʼ soltaroetike.
53 Li buchʼutik ayik ta paskʼope oy kʼusi laj yichʼik komel.
54 Li Moises xchiʼuk pale Eleasare la xchʼamik komel li oro ti laj yichʼik talel li bankilaletik ti sbainojik jmil ta voʼe xchiʼuk li bankilaletik ti sbainojik sien ta voʼe, te laj yichʼik ochel ta karpana sventa tsobobbail sventa chtun ta snaʼobil yuʼun li jteklum Israel ti laj yakʼik ta stojolal Jeovae.
Tsʼibetik ta yok vun
^ Taje jaʼ jun nichimal loʼil ti jaʼ chalbe skʼoplal kʼalal oy buchʼu chchame.
^ O «xabatik ta soltaroal ta skontrainel».
^ O «xbatik ta soltaroale».
^ O «skarpanaik ti joybil ta muroe».
^ O «skomelal».
^ Li jun sikloe jaʼ 11.4 gramo yalal. Kʼelo Apendise B14.
