Numeros 32:1-42
-
Te komik ta naklej ta stukʼil slokʼeb kʼakʼal ta Jordan (1-42)
32 Li xnichʼnabtak Ruben+ xchiʼuk li xnichʼnabtak Gade+ ep tajek xchonbolomik. Vaʼun, laj yakʼik venta ti lek xanav-o xchiʼuk lek xveʼo xchonbolomik li ta yosilal Jaser+ xchiʼuk li ta yosilal Galaade.
2 Jaʼ yuʼun, li xnichʼnabtak Gad xchiʼuk li xnichʼnabtak Rubene nopajik batel ta stojolal Moises, ta stojolal pale Eleasar xchiʼuk ta stojolal li bankilaletik ta tsobobbaile, xi laj yalike:
3 «Li yosilal Atarot, Dibon, Jaser, Nimra, Esbon,+ Eleale, Sebam, Nebo+ xchiʼuk li Beone+
4 toj lek xanav-o xchiʼuk lek xveʼo chonbolometik, jaʼ li osil ti la skoltautik Jeova ta yuʼuninel voʼotik li j-israelutike.+ Li voʼon avajtunelunkutike ep tajek jchonbolomkutik».+
5 Xi to laj yalike: «Mi lek chavilunkutike, jaʼ akʼo kichʼkutik li osil liʼe voʼon li avajtunelunkutike, mu xatakunkutik jelavel leʼ ta jot Jordane».
6 Li Moisese xi la stakʼbe li xnichʼnabtak Gad xchiʼuk li xnichʼnabtak Rubene: «¿Mi yuʼun stuk chbatik ta paskʼop li achiʼilik ta vokʼel ti voʼoxuk liʼ nakal chakomike?
7 ¿Kʼu yuʼun chachibajesbeik yoʼonton li jteklum Israel ti mu xa skʼan xbatik li ta osil ti jpʼel skʼoplal chakʼboxuk Jeovae?
8 Jaʼ jech la spasik li amoltotakik kʼalal likik batel kuʼun ta Kades-Barnea sventa xbat skʼelik kʼu yelan li osile.+
9 Kʼalal muyik batel ta stenlejaltik* Eskole+ xchiʼuk kʼalal laj yilik li osile, lik xchibajesbeik yoʼonton li jteklum Israele sventa mu xa skʼan xbatik li ta osil yaloj ch-akʼbatik yuʼun Jeovae.+
10 Tsan tajek skʼakʼal yoʼonton Jeova li vaʼ kʼakʼale, jaʼ yuʼun xi laj yal ta jamale:+
11 ‹Li krixchanoetik ti 20 o ti mas ta 20 jabil yichʼojik ti lokʼik talel ta Ejiptoe, muʼyuk ch-ochik li ta osil+ ti laj kakʼ ke chkakʼbe li Abraan, Isaak xchiʼuk Jakobe,+ yuʼun maʼuk ta sjunul yoʼontonik la stsʼakliikun.
12 Jaʼ noʼox ch-och li Kaleb+ ti jaʼ xnichʼon Jefune, li jkenis vinike, xchiʼuk li Josue+ xnichʼon li Nune, yuʼun li stukike ta sjunul yoʼontonik la stsʼakliik li Jeovae›.+
13 Jech oxal, tsan tajek skʼakʼal yoʼonton Jeova ta stojolal li Israele, vaʼun 40 jabil xtal xbatik yuʼun ta takixokol balumil,+ jaʼ to ti kʼuxi cham skotol li jkʼol kuxlejal ti jaʼ la spasik li kʼusitik chopol ta sat Jeovae.+
14 Li voʼoxuk avie, jpasmulil viniketik, jaʼ xa jech chapasik kʼuchaʼal li amoltotakike ti tstsan mas skʼakʼal yoʼonton Jeova avuʼunik ta stojolal li Israele.
15 Mi muʼyuk xa chatsʼakliike, te chchaʼiktaoxuk ta takixokol balumil, jech chlaj skʼoplal avuʼunik sjunul li jteklum liʼe».
16 Nopajik batel ta stojolal yan velta xtok, xi laj yalike: «Akʼo jpaskutik koraletik* sventa jchonbolomkutik liʼ toe xchiʼuk akʼo jvaʼankutik jteklumetik sventa li kalab jnichʼnabkutike.
17 Pe li voʼonkutike chapalunkutik sventa chibatkutik ta paskʼop,+ jbabe chibatkutik yuʼun li j-israeletike jaʼ to mi la staik lek ti bu albil chnakiike. Li kalab jnichʼnabkutike liʼ chkomik ta jteklumetik ti oy smuroale sventa mu kʼusi spasbatik yuʼun li jnaklejetik ta lume.
18 Jaʼ to chisutkutik talel ta jnakutik mi laj xa ox yichʼ xrexto* osilik skotol li j-israeletike.+
19 Muʼyuk chkichʼ jrextokutik* ti bu chichʼ xrextoik li jchiʼiltakutik leʼ to ta jot Jordane, yuʼun liʼ noʼox la jta jrextokutik liʼ ta jot xokon Jordan ta stukʼil slokʼeb kʼakʼale».+
20 Xi takʼbatik yuʼun li Moisese: «Xi xapasike: tsako batel avabtejebik sventa xapasik kʼop jech kʼuchaʼal laj yal li Jeovae.+
21 Ta jujuntal xatsak batel avabtejebik xchiʼuk jelavanik batel ta jot Jordan sventa xapasik kʼop ta sbi Jeova, li stuk une tsnuts lokʼel ta stojolal li yajkontratake.+
22 Pasik kʼop jaʼ to mi laj avuʼuninik li osil ti jaʼ tskoltaoxuk ta stael li Jeovae.+ Mi jech chapasik taje, jaʼ to xuʼ xasutik talel+ xchiʼuk muʼyuk xa amulik chkom ta stojolal Jeova xchiʼuk ta stojolal li Israele. Vaʼun, jaʼ avuʼunik chkom li osil ti jaʼ chakʼboxuk li Jeovae.+
23 Yan mi mu jechuk chapasike, chata amulik ta stojolal Jeova xchiʼuk chatoj ta melel li amulike.
24 Xuʼ xavaʼanik jteklumetik sventa avalab anichʼnabik xchiʼuk skoral* achijik,+ jaʼ noʼoxe skʼan xapasik li kʼusi laj avakʼ aveik spasele».
25 Li xnichʼnabtak Gad xchiʼuk li xnichʼnabtak Rubene xi laj yalbeik li Moisese: «Li avajtunelunkutike jech ta jpaskutik kʼuchaʼal chavalbunkutike, kajval.
26 Jaʼ te chkomik ta yosilal Galaad+ li kalab jnichʼnabkutike, li kajnilkutike xchiʼuk skotol li jtsʼunbal chonbolomkutike.
27 Li voʼonkutik ti jaʼ avajtunelunkutike chijelavkutik batel ti jayvoʼ chapalunkutik sventa xibatkutik ta paskʼop jech kʼuchaʼal tskʼan Jeova+ xchiʼuk jech kʼuchaʼal chavalbunkutike, kajval».
28 Jaʼ yuʼun, li Moisese laj yalbe mantal li pale Eleasar xchiʼuk li Josue ti jaʼ xnichʼon li Nune xchiʼuk li joliletik ta jujuchop yutsʼ yalalik ta snitilulal Israel ta sventa li xnichʼnabtak Gad xchiʼuk ta sventa li xnichʼnabtak Rubene.
29 Xi albatik yuʼun li Moisese: «Mi la xchiʼinoxuk jelavel ta jot Jordan li xnichʼnabtak Gad xchiʼuk li xnichʼnabtak Ruben ti jaʼik li viniketik ti lek chapalik sventa xbatik ta paskʼop jech kʼuchaʼal laj yal Jeovae, mi laj xa ox avuʼuninik li osile, jaʼ me skʼan xavakʼbeik yichʼ li yosilal Galaade.+
30 Pe mi mu skʼan stsak batel yabtejebik sventa paskʼop xchiʼuk mi mu skʼan xchiʼinoxuk jelavele, te me chchiʼinoxuk ta naklej li ta yosilal Kanaane».
31 Xi la stakʼik li xnichʼnabtak Gad xchiʼuk li xnichʼnabtak Rubene: «Li kʼusi laj yalbunkutik Jeova voʼonkutik li avajtunelunkutike ta jpaskutik.
32 Ta jtsak batel li kabtejebkutike xchiʼuk chijelavkutik batel ta yosilal Kanaan jech kʼuchaʼal tskʼan Jeovae.+ Pe li jrexto* chkichʼkutike jaʼ liʼ ta jot xokon Jordane».
33 Jaʼ yuʼun, li xnichʼnabtak Gad xchiʼuk xnichʼnabtak Ruben+ xchiʼuk li j-oʼlol snitilulal Manases+ ti jaʼ xnichʼon li Josee akʼbatik yuʼun Moises li osil ti bu kʼalal sventainoj li Seon+ ti jaʼ ajvalil yuʼun j-amorreoetike xchiʼuk ti bu kʼalal sventainoj li Og+ ti jaʼ ajvalil ta Basane, jaʼ xkaltik, li yosilal jteklumetik yuʼunike xchiʼuk skotol li jteklumetik ta sjoylejale.
34 Li xnichʼnabtak Gade la svaʼanik* Dibon,+ Atarot,+ Aroer,+
35 Atrot-Sofan, Jaser,+ Jogbea,+
36 Bet-Nimra+ xchiʼuk Bet-Aran+ ti jaʼ jteklumetik ti lek joyajtik ta muroe. Jech xtok, la svaʼanik koraletik* sventa chijetik.
37 Li xnichʼnabtak Rubene la svaʼanik Esbon,+ Eleale,+ Kiryataim,+
38 Nebo+ xchiʼuk Baal-Meon+ —sjelojbeik li sbie— xchiʼuk Sibma; la sjelbeik sbi li jteklumetik la xchaʼvaʼanike.
39 Li xnichʼnabtak Makir+ ti jaʼ xnichʼon Manasese bat skontrainik li Galaade, och ta skʼobik xchiʼuk la snutsik lokʼel li j-amorreoetik te nakalike.
40 Jaʼ yuʼun, li Moisese laj yakʼbe jmakiretik li Galaade, li snitilulal Manasese. Vaʼun, te lik nakiikuk.+
41 Li Jair ti jaʼ xnichʼon Manasese bat skontrain, vaʼun och ta skʼob li bikʼtal jteklumetik ta Galaade, Avot-Jair* laj yakʼanbe sbi.+
42 Li Nobae bat skontrain, vaʼun och ta skʼob li Kenat xchiʼuk li bikʼtal lumetik ti te noʼox nopajtike.* Noba laj yakʼbe sbi jech kʼuchaʼal sbi stuke.
Tsʼibetik ta yok vun
^ O «beoʼtik ta stenlejaltik».
^ Jaʼ skʼoplal mok ti pasbil ta tonetike.
^ O «spukulal; sparte».
^ O «jpukulalkutik; jpartekutik».
^ O «smokal».
^ O «jpukulal; jparte».
^ O «la xchaʼvaʼanik».
^ Jaʼ skʼoplal mok ti pasbil ta tonetike.
^ Jaʼ skʼan xal ‹bikʼtal jteklumetik yuʼun Jair›.
^ O «ta sjoylejale».
