Numeros 34:1-29
34 Li Jeovae xi laj yalbe yan velta li Moisese:
2 «Xi xavalbe mantal li j-israeletike: ‹Mi la-ochik li ta yosilal Kanaane,+ jaʼ chkʼot ta arextoik,* jaʼ li yosilal Kanaan ti bu to kʼalal stsʼakinojane.+
3 »›Ti bu to kʼalal chkʼot li tsʼak ta sure jaʼ liʼe: chlik ta takixokol balumil ta Sin jaʼ ti kʼu snatil li yosilal Edome. Ti bu chpaj li stsʼakil ta sur li ta jot slokʼeb kʼakʼale te chlik ta nab Muerto.*+
4 Ti bu kʼalal chpaje chkʼejpʼuj* batel ta sur ta muyebaltik ta Akrabim+ kʼalal to ta Sin, laje te to chpaj ta sur ta Kades-Barnea.+ Chjelav batel ta Asar-Addar+ xchiʼuk tstsak to batel Asmon.
5 Li tsʼake te chkʼejpʼuj* batel ta Asmon ta beoʼtik ta stenlejaltik* Ejipto, te to chpaj ta Mukʼta nab.*+
6 »›Ti bu chpaj li avosilik ta smaleb kʼakʼale jaʼ ta Mukʼta nab* xchiʼuk ta stiʼiltak. Taje jaʼ ti bu chpaj ta smaleb kʼakʼale.+
7 »›Ti bu chpaj ta snorteale jaʼ liʼe: te chlik avakʼbeik stsʼakil ta Mukʼta nab kʼalal to ta vits Or.
8 Laje, te chlik avakʼbeik stsʼakil ti chlik ta vits Or ti chjelav batel ta Lebo-Amat*+ xchiʼuk ti tstsak to batel Sedade.+
9 Li atsʼakike chkʼot kʼalal ta Sifron, te chpaj kʼalal to ta Asar-Enan.+ Jaʼ te spajeb atsʼakik li ta nortee.
10 »›Li atsʼakik chavakʼik ta slokʼeb kʼakʼale te chlik ta Asar-Enan kʼalal to ta Sefam.
11 Li atsʼakike chjelav to batel ta Sefam kʼalal to ta Ribla ta slokʼeb kʼakʼal ta Ain, chyal to batel, te chjelav ta oʼlol yalebaltik ta stukʼil slokʼeb kʼakʼal yuʼun li nab Kinerete.*+
12 Li atsʼakike chkʼot kʼalal to ta Jordan, te chpaj ta nab Muerto.*+ Taje jaʼ chkʼot ta avosilik+ xchiʼuk jaʼ jech ti butik chpaj li atsʼakike›».
13 Jaʼ yuʼun, li Moisese xi laj yalbe mantal li j-israeletike: «Liʼe jaʼ li osil ti skʼan xachʼakbe abaik jaʼ ti bu chkʼot li suerte+ jech kʼuchaʼal yaloj Jeova ti jaʼ chakʼbe li baluneb xchiʼuk j-oʼlol nitilulale.
14 Yuʼun laj xa yichʼ xrextoik* li snitilulal jrubenetik ta jujuchop yutsʼ yalalike, li snitilulal jgadetik ta jujuchop yutsʼ yalalike xchiʼuk li j-oʼlol snitilulal Manasese.+
15 Laj xa yichʼ xrextoik* ta slokʼeb kʼakʼal li chib xchiʼuk j-oʼlol nitilulale, te laj yichʼik ta jot xokon Jordan ta yeloval Jeriko, ta stukʼil slokʼeb kʼakʼal».+
16 Li Jeovae xi to laj yalbe li Moisese:
17 «Li buchʼutik chchʼakik li osil sventa xavuʼuninike jaʼ li pale Eleasar+ xchiʼuk Josue+ ti jaʼ xnichʼon li Nune.
18 Skʼan xatʼujik jun bankilal ta jujuchop anitilulalik sventa xchʼakik li osil chavichʼike.+
19 Xi sbiik li buchʼutik chichʼik tʼujele: Kaleb+ xnichʼon Jefune ta snitilulal Juda;+
20 Semuel xnichʼon Amiud ta snitilulal xnichʼnabtak Simeon;+
21 Elidad xnichʼon Kislon ta snitilulal Benjamin;+
22 Buki xnichʼon Jogli, jun bankilal ta snitilulal xnichʼnabtak Dan;+
23 Aniel xnichʼon Efod, jun bankilal ta snitilulal xnichʼnabtak Manases+ xnichʼon Jose.+
24 Kemuel xnichʼon Siftan, jun bankilal ta snitilulal xnichʼnabtak Efrain;+
25 Elisafan xnichʼon Parnak, jun bankilal ta snitilulal xnichʼnabtak Sabulon;+
26 Paltiel xnichʼon Asan, jun bankilal ta snitilulal xnichʼnabtak Isakar;+
27 Aiud xnichʼon Selomi, jun bankilal ta snitilulal xnichʼnabtak Aser;+
28 Pedael xnichʼon Amiud, jun bankilal ta snitilulal xnichʼnabtak Neftali».+
29 Taje jaʼik li buchʼutik albatik mantal yuʼun Jeova ti akʼo xchʼakbeik j-israeletik li yosilal Kanaane.+
Tsʼibetik ta yok vun
^ O «apukulalik; aparteik».
^ Literal «nab Salado».
^ O «chkʼejev; tstsʼepʼuj».
^ Jaʼ xkaltik, li nab Mediterraneoe.
^ O «chkʼejev; tstsʼepʼuj».
^ Jaʼ xkaltik, li nab Mediterraneoe.
^ O «yochebal Amat».
^ Jaʼ xkaltik, mukʼta tsʼantsʼan voʼ ta Jenesaret o nab ta Galilea.
^ Literal «nab Salado».
^ O «spukulalik; sparteik».
^ O «spukulalik; sparteik».
