Numeros 35:1-34
35 Li Jeovae la xchiʼin ta loʼil Moises ta takixokol balumil ta stenlejaltik yuʼun Moab, ta xokon Jordan+ ta yeloval Jeriko, xi laj yalbee:
2 «Albo mantal j-israeletik ti akʼo xchʼakik jutebuk li yosilik chichʼike, vaʼun akʼo yakʼbeik jlevietik sventa oyuk bu xuʼ xnakiik.+ Jech xtok, skʼan xakʼbeik li yaxaltik ta sjoylejal li jujun jteklume.+
3 Jaʼ te chnakiik li ta jteklume. Li yaxaltike jaʼ sventa li stsʼunbal chonbolomike, li kʼusitik tstunesik sventa xchonbolomike xchiʼuk jaʼ sventa skotol li yantik xchonbolomike.
4 Li yaxaltik ta sjoylejal li jteklum chavakʼbeik li jlevietike jaʼ jmil xukʼubil* snatil ti te chlik ta smuroal li jteklume.
5 Li ta jot xokon ta slokʼeb kʼakʼal ta spat li jteklume skʼan xapʼisik chaʼmil xukʼubil, li ta jot ta stukʼil sure chaʼmil xukʼubil, li ta jot ta stukʼil smaleb kʼakʼale chaʼmil xukʼubil, li ta jot ta stukʼil nortee chaʼmil xukʼubil. Jaʼ ta oʼlol chkom li jteklume. Taje jaʼ jech smukʼul li yaxaltik ta sjoylejal li jujun jteklume.
6 »Skʼan xavakʼbeik jlevietik vakib jteklum sventa nakʼobbail+ ti bu xuʼ xjatav batel li jmilvaneje.+ Skʼan xavakʼbeik xtok 42 jteklumetik.
7 Ta skotole 48 jteklumetik skʼan xavakʼbeik li jlevietike, skʼan xavakʼbeik xchiʼuk li yaxaltik ta sjoylejale.+
8 Li osil chavakʼbeike jaʼ te chichʼ chʼakel lokʼel li ta xrexto* j-israeletike.+ Mas ep chakʼik li jujuchop nitilulal ti mas epike, jaʼ juteb chakʼik li jujuchop nitilulal ti mas jutebike.+ Jujuchop nitilulal skʼan xchʼakbeik jlevietik jaʼ ti kʼu yepal yosil chichʼike».
9 Li Jeovae xi to laj yalbe li Moisese:
10 «Chiʼino ta loʼil li j-israeletike, xi xavalbe yaʼiike: ‹Tuchʼik jelavel Jordan sventa xabatik li ta yosilal Kanaane.+
11 Tʼujik jteklumetik ti bu lek chavilik sventa xkʼot ta nakʼobbail ti jaʼ te xuʼ xjatav batel li buchʼu mu yolbajuk chmilvane.+
12 Li ta jteklumetik taje jaʼ te chanakʼ* abaik ta stojolal yutsʼ yalal li buchʼu cham ti jaʼ xa chmilvane*+ sventa mu xichʼ milel li jmilvaneje, yuʼun baʼyel skʼan xichʼ chapanel ta tsobobbail.+
13 Li vakib jteklumetik chavakʼike jaʼ chtun sventa te xanakʼ* abaik.
14 Oxib jteklum chavakʼik li ta jot stukʼil slokʼeb kʼakʼal ta Jordane+ xchiʼuk oxib jteklum chavakʼik li ta yosilal Kanaane+ sventa te xanakʼ* abaik.
15 Li ta vakib jteklumetik taje jaʼ te tsnakʼ* sbaik li j-israeletike, li jyanlum te achiʼukik ta nakleje+ xchiʼuk li buchʼu te talem ta nakleje. Jaʼ sventa te xjatav batel li buchʼu mu yolbajuk milvane.+
16 »›Pe mi la syayijes ta junuk abtejebal ti pasbil ta takʼine xchiʼuk mi cham-o yuʼune, jaʼ xa jun jmilvanej. Persa skʼan xichʼ milel li jmilvaneje.+
17 Mi la syayijes ta jpʼejuk ton ti xuʼ xmilvane xchiʼuk ti chcham-o yuʼune, jaʼ xa jun jmilvanej. Persa skʼan xichʼ milel li jmilvaneje.
18 Mi la syayijes ta junuk abtejebal ti pasbil ta teʼ ti xuʼ xmilvane xchiʼuk ti chcham-o yuʼune, jaʼ xa jun jmilvanej. Persa skʼan xichʼ milel li jmilvaneje.
19 »›Li yutsʼ yalal li buchʼu chame* jaʼ tsmil li jmilvaneje. Jaʼ tsmil mi la snup ta bee.
20 Mi jaʼ cham-o yuʼun kʼalal la xuj batel ta skoj ti yuʼun xtiʼet onoʼox sjol ta stojolale o ta skoj xchopolil yoʼonton* ti oy kʼusi la sjipbe batele+
21 o ta skoj xtiʼet sjol la smaj ti cham-o yuʼune, li buchʼu yayijesvane persa skʼan xichʼ milel. Jaʼ xa jun jmilvanej. Li yutsʼ yalal li buchʼu chame* jaʼ tsmil li jmilvanej mi la snup ta bee.
22 »›Pe mi jaʼ ta skoj ti ta anil noʼox oy kʼusi kʼot ta pasel o mi maʼuk ta skoj ti xtiʼet sjol ti la sta ta xujele o mi maʼuk ta xchopolil yoʼonton* ti oy kʼusi la sjipbe batele+
23 o mi muʼyuk la sta ta ilel kʼalal pʼaj* yalel yuʼun ton ta sba li krixchanoe, pe maʼuk yajkontra mi jaʼuk oy ta yoʼonton kʼusi chopol tspasbe xchiʼuk ti cham yuʼune,
24 li tsobobbaile skʼan xchapan li buchʼu yayijesvane xchiʼuk li yutsʼ yalal buchʼu cham ti jaʼ xa chmilvane,* jaʼ chichʼ tsakel ta venta li mantaletik laj yichʼ alele.+
25 Li tsobobbaile skʼan spoj lokʼel ta skʼob yutsʼ yalal li buchʼu cham ti jaʼ xa chmilvane* xchiʼuk akʼo stak sutel li ta jteklum sventa nakʼobbail ti bu toʼox jatav batele. Te akʼo nakluk-o jaʼ to mi cham li mero bankilal pale ti laj yichʼ tʼujel ta chʼul aseitee.+
26 »›Yan mi lokʼ batel ta jteklum sventa nakʼobbail ti bu jatav batele
27 xchiʼuk mi laj yichʼ tael yuʼun li yutsʼ yalal buchʼu cham* ta spat xokon jteklum sventa nakʼobbaile xchiʼuk mi te milate, li yutsʼ yalal buchʼu cham ti jaʼ xa chmilvane muʼyuk chkom ta sba li xchʼichʼele,
28 yuʼun li jmilvaneje skʼan te xnaki-o ta jteklum sventa nakʼobbail jaʼ to mi cham li mero bankilal palee. Mi cham xa ox li mero bankilal palee, jaʼ to xuʼ sut batel ta yosil li jmilvaneje.+
29 Taje jaʼ jech mantal chkom ta atojolalik ti jaykʼol kuxlejal chtal avuʼunik ta tsʼakale xchiʼuk ti buyuk noʼox chanakiike.
30 »›Mi oy buchʼu la smil junuk krixchanoe, akʼo yichʼ milel+ mi oy jayvoʼuk testigoe,+ li smule jaʼ ti milvane. Pe muʼyuk buchʼu xuʼ xichʼ milel mi kʼajomal noʼox oy jun testigoe.
31 Mu xatsakbeik stojol xkuxlejal jun jmilvanej ti sta-o xchame, persa akʼo yichʼ milel.+
32 Jech xtok, mu xatsakbeik stojol jun jmilvanej ti jatavem batel li ta jteklum sventa nakʼobbail ti jech xa tsut nakluk avuʼunik ta slumal kʼalal muʼyuk toʼox chamem li mero bankilal palee.
33 »›Ta skoj ti tsokes balumil li chʼichʼe, mu xasokesik li balumil bu nakaloxuke,+ yuʼun mu xuʼ sta perton li balumil ta skoj ti te laj yichʼ malel chʼichʼe, jaʼ noʼox mi laj yichʼ malbel xchʼichʼel li buchʼu milvane.+
34 Mu xasokes li balumil bu nakaloxuke, yuʼun jaʼ te nakalun voʼon ti Jeovaune. Te nakalun ta oʼlol yuʼunik li jteklum Israele›».+
Tsʼibetik ta yok vun
^ Li jun xukʼubile jaʼ 44.5 sentimetro snatil. Kʼelo Apendise B14.
^ O «spukulal; sparte».
^ O «chamuk».
^ O «li buchʼu tspakbe skʼoplal chʼichʼe».
^ O «xamuk».
^ O «xamuk».
^ O «tsmuk».
^ O «Li buchʼu tspakbe skʼoplal chʼichʼe».
^ Literal «ti te xa onoʼox spaʼioje».
^ O «Li buchʼu tspakbe skʼoplal chʼichʼe».
^ Literal «ti muʼyuk onoʼox spaʼioj».
^ O «tsʼuj».
^ O «li buchʼu tspakbe skʼoplal chʼichʼe».
^ O «li buchʼu tspakbe skʼoplal chʼichʼe».
^ O «li buchʼu tspakbe skʼoplal chʼichʼ».
