Numeros 36:1-13
-
Mantaletik kʼalal chnupunik li tsebetik ti yichʼoj xrextoike (1-13)
36 Li joliletik ta jujuchop yutsʼ yalal xnichʼnabtak Galaade, li xnichʼon Makir,+ xnichʼon Manases li ta yutsʼ yalal xnichʼnabtak Josee nopajik batel ta stojolal Moises xchiʼuk ta stojolal li bankilaletik yuʼun j-israeletike.
2 Xi laj yalike: «Kajval, laj yalbot mantal Jeova ti akʼo xachʼak ta suerte+ li osil chichʼik li j-israeletike. Kajval, laj yalbot mantal Jeova ti jaʼ xavakʼbe stsebetak li xrexto* osil Selofead ti jaʼ jchiʼilkutik ta vokʼele.+
3 Mi nupunik xchiʼuk j-israeletik ti yan-o snitilulalike, maʼuk xa te skʼoplal chkom ta xrexto* jmoltotkutik li xrexto osil tsebetike, jaʼ xa yuʼun chkʼot li nitilulal ti bu likem smalalike, vaʼun maʼuk xa te skʼoplal chkom ta xrexto jmoltotkutik li osile.
4 Kʼalal mi kʼot yorail li Sjabilal Kolebal+ ta jteklum Israele, li xrexto* antsetike jaʼ xa te chkom-o skʼoplal ta snitilulal smalalik, vaʼun li xrextoike muʼyuk xa te chkom skʼoplal li ta xrexto snitilulal jmoltotkutike».
5 Li Moisese xi laj yalbe mantal li j-israeletike, yuʼun jech albat mantal yuʼun li Jeovae: «Oy srasonik li snitilulal xnichʼnabtak Josee.
6 Li Jeovae xi chal mantal ta sventa li stsebetak Selofeade: ‹Xuʼ xnupunik xchiʼuk ti buchʼuuk noʼox tskʼanike. Pe jaʼ noʼox xuʼ xnupun xchiʼukik li yutsʼ yalal snitilulal stotike.
7 Li xrexto* j-israeletike skʼan mu xjelav ta yan nitilulal, skʼan xchabiik lek sventa te komuk-o ta stojolal snitilulal smoltotik li xrextoike.
8 Skotol li tsebetik ti yichʼoj xrextoik* te ta snitilulal Israele skʼan jaʼ xnupunik xchiʼuk junuk vinik li ta snitilulal stotike+ sventa te noʼox chkom-o ta stojolalik li xrexto smoltotike.
9 Li xrextoike* skʼan mu xjelav ta yan nitilulal, skʼan xchabiik lek sventa te komuk-o xrextoik ta jujuchop snitilulal li Israele›».
10 Li stsebetak Selofeade jech la spasik jech kʼuchaʼal albat mantal yuʼun Jeova li Moisese.+
11 Jaʼ yuʼun, li stsebetak Selofead+ ti jaʼ li Mala, Tirsa, Ogla, Milka xchiʼuk Noae jaʼ nupun xchiʼukik li xnichʼnabtak xchiʼil ta vokʼel stotike.
12 Jaʼ yuʼun, sventa te xkom-o ta yutsʼ yalal stotik li xrextoike,* jaʼ laj yikʼik li viniketik ta yutsʼ yalal Manasese, li xnichʼon Josee.
13 Taje jaʼ li mantaletik xchiʼuk li kʼusitik chapanbil yuʼun Jeova sventa j-israeletik ti jaʼ laj yakʼbe Moises te ta takixokol balumil ta stenlejaltik yuʼun Moab, ta xokon Jordan li ta yeloval Jerikoe.+
Tsʼibetik ta yok vun
^ O «spukulal; sparte».
^ O «spukulal; sparte».
^ O «spukulal; sparte».
^ O «spukulal; sparte».
^ O «spukulalik; sparteik».
^ O «spukulalike; sparteike».
^ O «spukulalike; sparteike».