Numeros 4:1-49
4 Li Jeovae la xchiʼin ta loʼil li Moises xchiʼuk Aarone, xi laj yale:
2 «Skʼan xichʼ pasel jun senso sventa li xnichʼnabtak Koat+ ti likemik tal ta stojolal Levie, ta jujuchop yutsʼ yalalik xchiʼuk ta jujuchop snitilulal smoltotik.
3 Skʼan tsakbel sbi li buchʼutik yichʼojik 30+ kʼalal ta 50 jabil+ ti te oyik li ta jvokʼ ti te ch-abtejik ta karpana sventa tsobobbaile.+
4 »Liʼe jaʼ li kʼusitik tspasik xnichʼnabtak Koat ta karpana sventa tsobobbaile.+ Toj echʼ xa noʼox chʼul maʼ liʼe:
5 kʼalal tstotsik xa batel xchiʼuk skarpanaik li j-israeletike, li Aaron xchiʼuk xnichʼnabtake jaʼo ch-och syalesik li kortina+ ti te jokʼol ta stsʼel kaxae, vaʼun jaʼ chpixik-o li xkaxail+ Mantale.*
6 Akʼo xpixik ta snukulil fokaetik xchiʼuk akʼo slambeik tal ta sba asul pokʼ, mi laje akʼo xojbeik ta yavil li steʼeltak+ sventa xkuchik batele.
7 »Ta sventa li mexa ti bu kajal li pan ti chichʼ akʼel kʼuchaʼal matanale+ akʼo slambeik asul pokʼ ek, te akʼo skajanik li platoetik, li kopaetik, li mukʼta bochetik xchiʼuk li sjarrailtak matanal vinoe;+ li pan ti nopajtik noʼox chichʼ akʼel ta matanale+ te akʼo komuk-o ta sba.
8 Akʼo skʼibeik tal ta sba kuxul tsajal pokʼ xchiʼuk akʼo xpixik ta snukulil fokaetik, mi laje akʼo xojbeik ta yavil li steʼeltak+ sventa xkuchik batele.
9 Akʼo yichʼik tal asul pokʼ, akʼo xpixik li kandelero+ ti chakʼ xojobale, jmoj akʼo xpixik xchiʼuk li skantilaltake,+ li xtuchʼobil xmechailtake,+ li yavtak akʼale xchiʼuk skotol li yavil aseite sventa kantiletike.
10 Ta xpixik ta snukulil fokaetik jech kʼuchaʼal chpixik skotol li kʼusitik chtun tee, mi laje akʼo yakʼbeik steʼel sventa xkuchik batel.
11 Ta tsʼakale, tskʼibeik asul pokʼ ta sba li skajleb matanal pasbil ta oroe,+ chpixik ta snukulil fokaetik, mi laje akʼo xojbeik ta yavil li steʼeltak+ sventa xkuchik batele.
12 Vaʼun, ta xichʼik tal skotol li kʼusitik nopajtik noʼox tstunesik+ li ta yabtelik ti bu chʼule, te chakʼik ta asul pokʼ xchiʼuk akʼo xpixik ta snukulil fokaetik. Mi laje akʼo yakʼbeik steʼel sventa xkuchik batel.
13 »Akʼo slokʼesbeik stanil* li skajleb matanale+ xchiʼuk akʼo skʼibeik ta sba jlik pokʼ ti pasbil ta tsots* ti bonbil ta kuxul moradoe.
14 Te akʼo yakʼik ta sba li kʼusitik tstunesik kʼalal tspas yabtelik ta skajleb matanale: li yavtak akʼale, li natil chavchav takʼinetike, li palaetike, li mukʼta bochetike, skotol li kʼusitik te chtun ta skajleb matanale,+ akʼo skʼibeik snukulil fokaetik xchiʼuk akʼo xojbeik ta yavil li steʼeltak+ sventa xkuchik batel li skajleb matanale.
15 »Kʼalal tstotsik xa batel xchiʼuk skarpanaik li j-israeletike, li Aaron xchiʼuk xnichʼnabtake skʼan xpixik skotol li kʼusitik te oy ti bu chʼule+ xchiʼuk li kʼusitik te chtun ti bu chʼule. Mi laj xa ox xpixike, jaʼ to xuʼ x-ochik batel li xnichʼnabtak Koat sventa xkuchik batel li kʼusi oy ta sbaike,+ pe mu me stakʼ spikik li kʼusitik oy ti bu chʼule, yuʼun chchamik mi jech la spasike.+ Taje jaʼ li kʼusi oy ta sbaik* li xnichʼnabtak Koat te ta karpana sventa tsobobbaile.
16 »Li Eleasar+ ti jaʼ xnichʼon li pale Aarone jaʼ oy ta sba li s-aseiteal kantiletike,+ li pom ti oy sperfumeale,+ li matanal sat tsʼunobiletik ti chichʼ onoʼox akʼele xchiʼuk li aseite ti chtun kʼalal oy buchʼu chichʼ tʼujele.+ Jaʼ oy ta sba spʼejel li axibalnae xchiʼuk skotol li kʼusitik te oye, ti bu chʼule xchiʼuk skotol li kʼusitik te chtune».
17 Li Jeovae xi laj yalbe yan velta li Moises xchiʼuk Aarone:
18 «Mu me xchʼay avuʼunik ta stojolal jlevietik li stsʼunbal snitilulal yutsʼ yalal jkoatetike.+
19 Ti kʼusi xuʼ xapasik sventa mu xchamik ta skoj ti chnopajik batel ta stojolal li kʼusitik toj echʼ xa noʼox chʼule,+ jaʼ ta x-ochik batel te li Aaron xchiʼuk xnichʼnabtake xchiʼuk jaʼ chchʼakbe yabtelik ta jujuntal xchiʼuk jaʼ chalik ti kʼusitik ta xkuchik batele.
20 Mu stakʼ x-ochik batel xchiʼuk mu stakʼ skʼelik jlikeluk li kʼusitik chʼule, yuʼun chchamik mi jech tspasike».+
21 Vaʼun, xi albat yuʼun Jeova li Moisese:
22 «Skʼan xichʼ pasel jun senso ta stojolal xnichʼnabtak Guerson+ ta jujuchop yutsʼ yalalik xchiʼuk ta jujuchop snitilulal smoltotik.
23 Skʼan xatsakbe sbi li buchʼutik yichʼojik 30 kʼalal ta 50 jabil ti te oyik li ta jvokʼ ti te chtunik ta karpana sventa tsobobbaile.
24 Liʼe jaʼ li kʼusi oy ta sba yutsʼ yalaltak jguersonetik ti skʼan xchabiik xchiʼuk ti skʼan xkuchik batele:+
25 Chichʼik batel li spokʼaltak axibalnae,+ li spokʼaltak karpana sventa tsobobbaile, li pokʼ ti pasbil ta snukulil fokaetike,+ li pokʼ ta yolone, li skortinail yochebal karpana sventa tsobobbaile,+
26 li kortina sventa yochebal amakʼe,*+ li kortina te jokʼanbil ta yamakʼil+ ti sjoyobtaoj li axibalnae xchiʼuk li skajleb matanale, li xchʼojonaltak karpanae, skotol li kʼusitik te chtune xchiʼuk skotol li kʼusitik te chtun yuʼunik sventa li abtelal tspasike. Taje jaʼ li kʼusi oy ta sbaik spasele.
27 Skotol li kʼusitik tspasik xchiʼuk li kʼusitik chkuchik batel li jguersonetike+ jaʼ oy ta sbaik skʼelel li Aaron xchiʼuk xnichʼnabtake; jaʼ oy ta sbaik yalel skotol li kʼusitik chkuchik batele.
28 Liʼe jaʼ li kʼusitik tspasik li yutsʼ yalal jguersonetik li ta karpana sventa tsobobbaile,+ li kʼusitik oy ta sbaik spasele jaʼ chbeiltasatik yuʼun Itamar+ ti jaʼ xnichʼon li pale Aarone.
29 »Tsakbo sbi xnichʼnabtak Merari+ ta jujuchop yutsʼ yalalik xchiʼuk ta jujuchop snitilulal smoltotik.
30 Skʼan xatsakbe sbi li buchʼutik yichʼojik 30 kʼalal ta 50 jabile, tsakbo sbi skotolik li buchʼutik te oyik ta jvokʼ abtelal li ta karpana sventa tsobobbaile.
31 Liʼe jaʼ li kʼusitik oy ta sbaik xkuchel batel+ ti chtun ta yabtelik li ta karpana sventa tsobobbaile: steʼeltak axibalna,+ skʼatlom teʼaltak,+ yoyaltak,+ kʼusitik pechajtik ti jomajtik sate,+
32 yoyaltak+ amakʼ* ta sjoyobal, kʼusitik pechajtik ti jomajtik sate,+ s-estakail karpana,+ xchʼojonaltak karpana xchiʼuk yan kʼusitik chtun xchiʼuk skotol li abtelaletik te chichʼ pasele. Voʼoxuk chavalbeik ta jujuntal ti kʼusi oy ta sbaik xkuchel batele.
33 Jaʼ jech yabtel tstaik li yutsʼ yalal xnichʼnabtak Merari+ li ta karpana sventa tsobobbaile, jaʼ chventainatik yuʼun Itamar ti jaʼ xnichʼon li pale Aarone».+
34 Li Moises, Aaron xchiʼuk li bankilaletik+ ta tsobobbaile jech lik stsakbeik sbi li xnichʼnabtak jkoatetik+ ta jujuchop yutsʼ yalalik xchiʼuk ta jujuchop snitilulal smoltotik,
35 tsakbat sbiik skotol li buchʼutik yichʼojik 30 kʼalal ta 50 jabil ti te oyik li ta jvokʼ ti te ch-abtejik ta karpana sventa tsobobbaile.+
36 Ti kʼu yepal ta skotolik laj yichʼ tsakbel sbiik ta jujuchop yutsʼ yalalike jaʼ 2,750.+
37 Jaʼ jech yepal ti laj yichʼ tsakbel sbiik li ta yutsʼ yalal jkoatetike, skotol li buchʼutik ti te chtunik li ta karpana sventa tsobobbaile. Li Moises xchiʼuk Aarone la stsakbeik sbi jech kʼuchaʼal albat mantal yuʼun Jeova li Moisese.+
38 Li xnichʼnabtak Guersone+ laj yichʼ tsakbel sbiik ta jujuchop yutsʼ yalalik xchiʼuk ta jujuchop snitilulal smoltotik,
39 tsakbat sbiik skotol li buchʼutik yichʼojik 30 kʼalal ta 50 jabil ti te oyik li ta jvokʼ ti te ch-abtejik ta karpana sventa tsobobbaile.
40 Ti kʼu yepal ta skotolik laj yichʼ tsakbel sbiik ta jujuchop yutsʼ yalalik xchiʼuk ta jujuchop snitilulal smoltotike jaʼ 2,630.+
41 Jaʼ jech laj yichʼ tsakbel sbiik li yutsʼ yalal xnichʼnabtak Guersone, skotol li buchʼutik te chtunik li ta karpana sventa tsobobbaile. Li Moises xchiʼuk Aarone la stsakbeik sbi jech kʼuchaʼal laj yal mantal li Jeovae.+
42 Li xnichʼnabtak Merarie laj yichʼ tsakbel sbiik ta jujuchop yutsʼ yalalik xchiʼuk ta jujuchop snitilulal smoltotik,
43 tsakbat sbiik skotol li buchʼutik yichʼojik 30 kʼalal ta 50 jabil ti te oyik li ta jvokʼ ti te ch-abtejik ta karpana sventa tsobobbaile.+
44 Ti kʼu yepal ta skotolik laj yichʼ tsakbel sbiik ta jujuchop yutsʼ yalalike jaʼ 3,200.+
45 Jaʼ jech laj yichʼ tsakbel sbiik li yutsʼ yalal xnichʼnabtak Merari ti tsakbat sbiik yuʼun li Moises xchiʼuk Aaron jech kʼuchaʼal albat mantal yuʼun Jeova li Moisese.+
46 Li Moises, Aaron xchiʼuk li bankilaletik ta Israele jech la stsakbeik sbi jlevietik ta jujuchop yutsʼ yalalik xchiʼuk ta jujuchop snitilulal smoltotik.
47 Li buchʼutik laj yichʼ tsakbel sbiike jaʼ li buchʼutik yichʼojik 30 kʼalal ta 50 jabile, skotolik akʼbat yabtelik xchiʼuk albatik kʼusitik xuʼ xkuchik batel sventa li abtelal ta karpana sventa tsobobbaile.+
48 Ti kʼu yepal ta skotolik laj yichʼ tsakbel sbiike jaʼ 8,580.+
49 Tsakbat sbiik jech kʼuchaʼal albat mantal yuʼun Jeova li Moisese. Ta jujuntal laj yichʼ yabtelik xchiʼuk ti kʼusitik chkuchik batele; jech laj yichʼ tsakbel sbiik jech kʼuchaʼal albat mantal yuʼun Jeova li Moisese.
Tsʼibetik ta yok vun
^ O «kaxa ti chtun ta testigoe».
^ O «stanil ti oy xepuʼal», jaʼ xkaltik, tan ti tʼuxul ta xepuʼal chikʼbil matanale.
^ Taje jaʼ stsotsil chij o stsotsil yan chonbolometik.
^ Literal «yikatsik».
^ O «stiʼ axibalna».
