Numeros 5:1-31
5 Li Jeovae xi to laj yalbe li Moisese:
2 «Albo mantal j-israeletik ti akʼo stakik lokʼel ti bu spasoj skarpanaik skotol li buchʼutik ipik ta leprae,*+ skotol li buchʼutik oy kʼusi chlokʼ ta sbekʼtalike+ xchiʼuk skotol li buchʼutik ibal sbaik* ta skoj ti la spikik junuk animae.*+
3 Skʼan xatakik lokʼel manchuk mi vinik o mi ants. Takik lokʼel ti bu apasoj akarpanaik sventa mu sokesbeik+ skarpana li buchʼutik jchiʼukik ta nakleje».*+
4 Jaʼ yuʼun, jech la spasik li j-israeletike, la stakik lokʼel ti bu spasoj skarpanaike. Li j-israeletike jech la spasik jech kʼuchaʼal albat mantal yuʼun Jeova li Moisese.
5 Li Jeovae xi to laj yalbe li Moisese:
6 «Xi xavalbe li j-israeletike: ‹Mi oy la spas smul jun vinik o jun antse xchiʼuk mi muʼyuk tukʼ chakʼ sba ta stojolal li Jeovae, laj xa me spas smul.+
7 Skʼan jamal xal*+ li smul la spase* xchiʼuk lek tsʼakal akʼo yakʼbe stojol+ li smule xchiʼuk akʼo to yakʼ jun ta voʼob ti kʼu yepal stojole; jaʼ akʼo yakʼbe li buchʼu chopol kʼusi la spasbee.
8 Pe mi muʼyuk junuk ti jaʼ to mero yutsʼ yalal li buchʼu cham sventa xichʼbe li stojole, jaʼ skʼan akʼbel Jeova, vaʼun jaʼ yuʼun chkom li palee, chichʼ komel xtok li tot chij ti chichʼ akʼel sventa sta perton li buchʼu oy smule.+
9 »›Skotol li kʼusitik chʼul chakʼbeik+ pale li j-israeletike jaʼ yuʼun chkʼot li palee.+
10 Li kʼusitik chʼul oy yuʼun jujun krixchanoe jaʼ yuʼun chkom li palee. Kʼusiuk noʼox chakʼbeik pale li jujun krixchanoe jaʼ yuʼun chkom-o li palee›».
11 Li Jeovae xi to laj yalbe li Moisese:
12 «Chiʼino ta loʼil li j-israeletike, xi xavalbe yaʼiike: ‹Xi skʼan spas jun vinik mi sok ta be li yajnile, mi mukul satiate
13 xchiʼuk mi chiʼinat ta vayel yuʼun yan vinik li antse,+ ti muʼyuk snaʼoj li smalale xchiʼuk ti muʼyuk vinajeme. Akʼo mi laj xa sokes sba, muʼyuk buchʼu ilvan xchiʼuk muʼyuk buchʼu xuʼ xal mi jech o mu jechuk ti kʼusi la spase.
14 Pe mi tstsak ta itʼixal yajnil xchiʼuk mi tsnop ti mukul satiat ta skoj ti laj xa sokes sba li yajnile o ti jech noʼox chlik stsak ta itʼixal xchiʼuk tsnop ti mukul satiat manchuk mi muʼyuk sokesoj sba li yajnile,
15 li vinike skʼan xikʼ batel ta stojolal pale li yajnile, jech xtok, akʼo yichʼ batel matanal ta skoj li yajnile. Akʼo yichʼ batel jvokʼ ta lajunvokʼ jun efa* s-arinail sevada. Skʼan mu smalbe aseite mi jaʼuk xakʼbe sakil pom* ta sba, yuʼun jaʼ matanal sat tsʼunobil sventa itʼixal, jaʼ jun matanal sat tsʼunobil ti tsvules ta jolil li mulil laj yichʼ pasele.
16 »›Li palee tsnopajes batel xchiʼuk te tsvaʼan ta yeloval Jeova.+
17 Li palee chchʼam chʼul voʼ ta jun lumal pʼin xchiʼuk tstsakbe jutebuk spukukal* balumil ti bu oy li axibalnae, vaʼun te chakʼ li ta voʼe.
18 Li palee te tsvaʼan ta yeloval Jeova li antse xchiʼuk tstitunbe li sjole, jech xtok, chakʼbe ta skʼob li matanal sat tsʼunobil ti tsvules ta jolil li mulile, jaʼ xkaltik, li matanal sat tsʼunobil sventa itʼixale.+ Li palee skʼan te stsakoj ta skʼob li chʼail voʼ ti chakʼ taluk vokolile.+
19 »›Li palee chalbe li ants ti akʼo yakʼ yee, xi chalbee: «Mi muʼyuk la xchiʼinot ta vayel yan vinik kʼalal yikʼojot li amalale+ xchiʼuk mi muʼyuk lasok ta be xchiʼuk mi muʼyuk asokesoj abae, muʼyuk kʼusi chopol tspasbot li chʼail voʼ ti chakʼ taluk vokolile.
20 Pe mi lasok ta be ta skoj ti la asokes aba kʼalal yikʼojot li amalale xchiʼuk mi la achiʼin ta vayel yan vinik+ ti maʼuk amalale...».
21 Li palee chalbe li ants ti akʼo yakʼ ye ti jaʼ chtal-o svokol mi spasoj smule. Xi chalbe li antse: «Li Jeovae akʼo svaʼanot ta skʼelobil ta stojolal jteklum kʼalal chalik ti chtal vokole o kʼalal oy kʼusi chakʼ yeik spasele. Mi ta melel jech la apase, li Jeovae mu xakʼ alajan xchiʼuk tsitub achʼut yuʼun.
22 Li voʼ ti chakʼ taluk vokolile ch-och batel ta abikil sventa situb yuʼun achʼut xchiʼuk muʼyuk xa cha-alaj yuʼun». Mi jech xa ox albat yuʼun li palee, xi skʼan xal li antse: «¡Jechuk! ¡Jechuk!».*
23 »›Li palee skʼan stsʼiba ta livro li chopol kʼoptaeletik taje, mi laje, skʼan spok li ta chʼail voʼe.
24 Chakʼbe yuchʼ ants li chʼail voʼ ti chakʼ taluk vokolile, li voʼ ti chakʼ taluk vokolile ta xuchʼ, vaʼun chil-o svokol xchiʼuk.
25 Li palee tstsakbe sutel ta skʼob ants li matanal sat tsʼunobiletik sventa itʼixale+ xchiʼuk tsyeʼilan ta jujujot ta yeloval Jeova li matanal sat tsʼunobiletike, mi laje chichʼ batel ta skajleb matanal.
26 Li palee tstsak jopuk li matanal sat tsʼunobiletike sventa xkʼot ta svulesobil ta jolil,* ta xchikʼ ta skajleb matanal sventa xtometuk muyel xchʼailal* yuʼun,+ ta tsʼakale chakʼbe yuchʼ voʼ li antse.
27 Mi sokesoj sba xchiʼuk mi smukul satioj li smalale, chlik chʼaubuk ta xchʼut mi akʼbat yuchʼ li voʼ ti chakʼ taluk vokolile, vaʼun chlik situbuk li xchʼute xchiʼuk muʼyuk xa chil yalab, jaʼ xa noʼox chichʼ chopol kʼoptael yuʼun steklumal li antse.
28 Pe mi muʼyuk sokesoj sba xchiʼuk mi lek oy li antse, muʼyuk me chichʼ li kastigo taje, xuʼ xchiʼin yol xchiʼuk chil snitilulal.
29 »›Taje jaʼ li smantalil itʼixale,+ jaʼ kʼalal tsok ta be li antse xchiʼuk ti tsokes sba kʼalal ikʼbil yuʼun li smalale
30 o jaʼo kʼalal chlik stsak ta itʼixal yajnil jun vinik ti tsnop ti mukul satiat xa yuʼune; skʼan svaʼan ta yeloval Jeova li yajnile, vaʼun li palee jech akʼo spas kʼuchaʼal chal skotol li mantal taje.
31 Muʼyuk smul chkom li vinike, pe li yajnile skʼan stoj li smule›».
Tsʼibetik ta yok vun
^ O «naklej ta axibalnae».
^ Literal «xalik».
^ Literal «spasike».
^ Li jvokʼ ta lajunvokʼ jun efae jaʼ 2.2 litro. Kʼelo Apendise B14.
^ O «slumal».
^ O «¡Jaʼ jech kʼotuk ta pasel! ¡Jaʼ jech kʼotuk ta pasel!».
^ O «xchʼayilal».
