Numeros 6:1-27
6 Li Jeovae la xchiʼin ta loʼil yan velta li Moisese, xi laj yalbee:
2 «Xi xavalbe yaʼiik li j-israeletike: ‹Mi laj yakʼ ye ti chkuxi kʼuchaʼal jnasareo*+ ta stojolal Jeova li jun vinik o jun antse,
3 mu stakʼ xuchʼ vino mi jaʼuk kʼusiuk yan poxal. Mu stakʼ xuchʼ pajal vino mi jaʼuk yan kʼusitik poj ti pasbil ta yan poxe.+ Jech xtok, mu me stakʼ xuchʼ jutebuk kʼusi pasbil ta yaʼlel uva mi jaʼuk stakʼ slajes li uvae akʼo mi jaʼ to laj yichʼ tulel o mi takijem xa.
4 Ti jayib kʼakʼal chtun ta jnasareoe mu stakʼ slajes mi jutebuk li kʼusitik chlokʼ ta steʼel uvae, mu stakʼ slajes li uva ti unin* toe mi jaʼuk li spat uvae.
5 »›Ti jayib kʼakʼal yakʼoj ye chtun ta jnasareoe mu me stakʼ slokʼ stsotsil sjol.+ Ti jayib kʼakʼal yakʼoj sba ta stojolal Jeovae te akʼo chʼiuk-o yuʼun li stsotsil sjole sventa chʼuluk-o xkom.
6 Mu me stakʼ xnopaj batel* ta stojolal junuk anima* ti kʼu sjalil yakʼoj sba ta stojolal Jeovae.
7 Mu xuʼ sokes sba+ akʼo mi jaʼ cham li stote, li smeʼe, li yixlel o xvixe, li sbankil o yitsʼine, yuʼun te oy ta sjol li senyail ti jaʼ jnasareo ta stojolal li Sdiose.
8 »›Ti jayib kʼakʼal chtun ta jnasareoe chʼul-o chkom ta stojolal Jeova.
9 Pe mi oy buchʼu te anil cham ta stsʼel+ ti jaʼ sok-o li stsotsil sjol ti jaʼ senyail ti yakʼoj sba ta stojolal Diose, jaʼo skʼan xjux+ ti kʼusi kʼakʼalil tslekubtas sbae. Jech skʼan spas li ta svukubal kʼakʼale.
10 Li ta xvaxakibal kʼakʼale, skʼan xikʼbe batel pale chaʼkotuk tortola* o chaʼkotuk chʼiom paloma, te akʼo yichʼbe batel li ta yochebal karpana sventa tsobobbaile.
11 Li palee skʼan smeltsan jkotuk yoʼ xkʼot ta matanal sventa mulil, li jkote skʼan smeltsan sventa chikʼbil matanal sventa sta perton li buchʼu la sta smul+ ta skoj li animae.* Li vaʼ kʼakʼale, skʼan xchʼultajes sba* li jnasareoe.
12 Skʼan xakʼ sba yan velta ta stojolal Jeova sventa xlik ta achʼ ti kʼu sjalil chtun ta jnasareoe, vaʼun skʼan xikʼ talel jkotuk chʼiom tot chij ti jun to jabil yichʼoj yoʼ xkʼot ta matanal sventa skʼanel pertone. Ta skoj ti sok ta be yuʼun ti tun ta jnasareoe, muʼyuk chichʼ tsakel ta venta ti kʼu sjalil tun ta baʼyele.
13 »›Liʼe jaʼ smantalil li buchʼu chtun ta jnasareoe: mi tsʼaki ti kʼu sjalil chtun ta jnasareoe,+ chichʼ ikʼel batel ta yochebal karpana sventa tsobobbail.
14 Te akʼo yakʼbe smoton Jeova: akʼo yakʼ ta chikʼbil matanal jkotuk chʼiom tot chij ti muʼyuk ip* xchiʼuk ti jun to jabil yichʼoje,+ akʼo yakʼ ta matanal sventa mulil jkotuk chʼiom meʼ chij ti jun to jabil yichʼoj ti muʼyuk ipe,+ akʼo yakʼ ta matanal sventa jun oʼontonal jkotuk tot chij ti muʼyuk ipe,+
15 akʼo yakʼ jun moch set-set panetik ti pasbil ta arina ti lek nin ti muʼyuk slevadurail* ti kapbil ta aseitee, jayal gayetaetik ti muʼyuk slevadurail ti bonbil ta aseitee xchiʼuk akʼo yakʼ li matanal sat tsʼunobiletik+ xchiʼuk li matanal vino+ ti jmoj chichʼ akʼel xchiʼuk li matanaletik taje.
16 Li palee chakʼ ta yeloval Jeova li matanaletike xchiʼuk chakʼ li matanal sventa mulile xchiʼuk li chikʼbil matanale.
17 Jech xtok, chakʼbe Jeova ta milbil matanal sventa jun oʼontonal li tot chije, jmoj chakʼ xchiʼuk li jun moch set-set panetik ti muʼyuk slevaduraile, vaʼun jmoj chakʼ xchiʼuk li matanal sat tsʼunobiletik+ xchiʼuk li matanal vinoe.
18 »›Li jnasareoe te akʼo xjux ta yochebal karpana sventa tsobobbail li stsotsil sjol ti muʼyuk juxbil-oe,+ mi laje, akʼo stsob li stsotsil sjol ti chʼi kʼalal tun talel ta jnasareoe, vaʼun te tstikʼ ochel ta kʼokʼ ta yolon li milbil matanal sventa jun oʼontonale.
19 Li palee akʼo stsakbe jun snekeb li tot chij ti tokʼon xae,+ jpech set-set pan ti muʼyuk slevadurail ti te oy ta moche xchiʼuk jpech jayal gayeta ti muʼyuk slevaduraile, vaʼun akʼo yakʼbe ta skʼob li jnasareo kʼalal xjuxoj xa ox lokʼel li stsotsil sjol ti jaʼ senyail ti chtun ta jnasareoe.
20 Li palee tsyeʼilan ta jujujot sventa xkʼot ta yebil matanal ta stojolal Jeova.+ Chʼul chkʼot ta stojolal li palee, jech kʼuchaʼal li stiʼ yoʼonton ti laj yichʼ akʼel ta yebil matanale xchiʼuk li yoʼ ti laj yichʼ akʼel ta matanale.+ Ta tsʼakal une xuʼ xa xuchʼ vino li jnasareoe.
21 »›Liʼe jaʼ smantalil kʼalal oy kʼusi chakʼ ye tspas li jnasareoe:+ mi laj yakʼ ye oy kʼusi tspas xchiʼuk mi xlokʼ to yuʼun sventa chakʼbe smoton Jeova ti mu xa jechuk chichʼ kʼanbel li jnasareoe, persa skʼan xkʼot ta pasel yuʼun ta skoj ti stsakoj ta mukʼ li kʼusi chal mantal ta sventa li jun jnasareoe›».
22 Vaʼun, xi albat yuʼun Jeova li Moisese:
23 «Xi xavalbe li Aaron xchiʼuk xnichʼnabtake: ‹Xi skʼan xavalik kʼalal chavakʼbeik bendision+ li jteklum Israele:
24 «Akʼo yakʼbot bendision+ xchiʼuk akʼo xchabiot li Jeovae.
25 Akʼo xojobajuk sat Jeova ta atojolal+ xchiʼuk lekuk xilot.
26 Akʼo stoy sat ta atojolal li Jeovae xchiʼuk junuk avoʼonton yuʼun»›.+
27 Sventa xkakʼbe bendision+ li jteklum Israele,+ skʼan staik ta alel jbi li Aaron xchiʼuk xnichʼnabtake».
Tsʼibetik ta yok vun
^ O «unen».
^ O «Mu me stakʼ xnopaj batel jsetʼuk».
^ O «puruvok».
^ Literal «sjol». Yaʼeluke, jaʼ skʼoplal ti chchʼi yan velta li stsotsil sjole.
^ O «muʼyuk xchopolil».
