Numeros 8:1-26
8 Li Jeovae la skʼopon li Moisese, xi laj yalbee:
2 «Chiʼino ta loʼil li Aarone, xi xavalbee: ‹Kʼalal chatsan li kantiletike, li vukub skantilaltak kandeleroe+ skʼan me xakʼ batel xojobal ta yeloval›».
3 Xi la spas li Aarone: la stsanbe skantilaltak li kandeleroe+ sventa xakʼ batel xojobal ta yeloval, jech la spas kʼuchaʼal albat mantal yuʼun Jeova li Moisese.
4 Xi yelan laj yichʼ pasel li kandeleroe: pasbil ta oro xchiʼuk tenbil ta martiyo+ ti chlik ta yakan kʼalal to ta stukem nichimale. Li kandeleroe jech laj yichʼ pasel ti kʼu yelan akʼbat yil+ yuʼun Jeova li Moisese.
5 Li Jeovae xi laj yalbe yan velta li Moisese:
6 «Ikʼo lokʼel ta stojolal j-israeletik li jlevietike xchiʼuk sakubtaso.+
7 Xi skʼan xasakubtase: vijbo ta sbaik li voʼ ti tslokʼes mulile, akʼo xjux ta navaja skotol li stsotsil sbekʼtalike xchiʼuk akʼo xchukʼ li skʼuʼ spokʼike, vaʼun akʼo sakubtas sbaik.+
8 Akʼo yikʼik tal jkot chʼiom tot vakax+ xchiʼuk li arina ti lek nin ti kapbil ta aseite ti chkʼot ta matanal sat tsʼunobiletike,+ vaʼun jmoj akʼo yakʼik, li voʼote ikʼo tal yan jkot chʼiom tot vakax yoʼ xkʼot ta matanal sventa mulil.+
9 Ikʼo batel ta yeloval karpana sventa tsobobbail li jlevietike xchiʼuk tsobo talel sjunul li tsobobbail yuʼun j-israeletike.+
10 Kʼalal chavakʼ ta yeloval Jeova li jlevietike, li j-israeletike skʼan xakʼ skʼobik ta sjol li jlevietike.+
11 Li Aarone chakʼ ta yeloval Jeova li jlevietike, chakʼ ta yebil matanal+ ti jaʼ xkʼexol chkʼot li j-israeletike. Jech chlik tunikuk ta stojolal li Jeovae.+
12 »Li jlevietik une chakʼ skʼobik li ta sjol vakaxetike.+ Laje, chakʼik ta matanal sventa mulil li jkote, li yane chakʼbeik ta chikʼbil matanal li Jeovae, chtun sventa staik perton+ li jlevietike.
13 Te xavaʼan ta stojolal Aaron xchiʼuk xnichʼnabtak li jlevietike. Akʼo ta stojolal Jeova kʼuchaʼal yebil matanal.
14 Chʼako ta stojolal j-israeletik li jlevietike, yuʼun jaʼ kuʼun chkʼot li jlevietike.+
15 Ta tsʼakal li jlevietike xuʼ xa x-och tunikuk li ta karpana sventa tsobobbaile. Jaʼ jech skʼan xasakubtas xchiʼuk jaʼ jech xavakʼ kʼuchaʼal yebil matanal.
16 Yuʼun chʼakbilik lokʼel ta stojolal j-israeletik ti chkʼotik ta jmotone. Jaʼ kuʼun chkʼotik, jaʼ xkʼexol chkʼot skotol li sba xnichʼnabtak* j-israeletike.+
17 Yuʼun jaʼ kuʼun skotol li sba xnichʼnabtak j-israeletike akʼo mi krixchano o mi chonbolom.+ La jchʼultajesik sventa xkʼotik ta kuʼun kʼalal la jmil skotol li sba nichʼoniletik ta yosilal Ejiptoe.+
18 Kuʼun chkʼot li jlevietike, jaʼ xkʼexol skotol li sba xnichʼnabtak j-israeletike.
19 Li jlevietik ti te chlokʼik ta stojolal j-israeletike chkakʼbe ta smoton Aaron xchiʼuk xnichʼnabtak sventa te x-abtejik ta xkʼexol j-israeletik li ta karpana sventa tsobobbaile,+ sventa skoltaik li paleetike yoʼ staik perton li j-israeletike+ xchiʼuk sventa mu snuptan svokol jteklum Israel ta skoj ti chnopajik batel ti bu chʼule».
20 Li Moises, li Aaron xchiʼuk sjunul li tsobobbail yuʼun j-israeletike jech la spasbeik li jlevietike. Li j-israeletike jech la spasbeik jlevietik jech kʼuchaʼal albat mantal yuʼun Jeova li Moisese.
21 Jaʼ jech la slekubtas sba li jlevietike xchiʼuk la xchukʼ li skʼuʼ spokʼike.+ Laje, li Aarone laj yakʼ ta stojolal Jeova li jlevietike yoʼ xkʼotik kʼuchaʼal yebil matanal.+ Li Aarone laj yakʼ matanal sventa staik perton yoʼ xichʼik sakubtasel.+
22 Ta tsʼakal li jlevietike ochik batel ta karpana sventa tsobobbail sventa te spas yabtelik ta yeloval Aaron xchiʼuk xnichʼnabtak. Jech kʼuchaʼal albat mantal yuʼun Jeova li Moisese, jaʼ jech la spasbeik li jlevietike.
23 Li Jeovae xi laj yalbe li Moisese:
24 «Liʼe jaʼ sventa li jlevietike: kʼalal mi lokʼ xa ta 25 jabil li jun vinike xuʼ xa x-och xchiʼin ta abtel li buchʼutik te chtunik ta karpana sventa tsobobbaile.
25 Pe mi lokʼ xa ox ta 50 jabile, chikta komel li xchiʼiltak ta abtele, muʼyuk xa te chtun.
26 Xuʼ skolta li yermanotak ti sbainojik li kʼusitik skʼan pasel ta karpana sventa tsobobbaile, jaʼ noʼoxe mu teuk spas li yabtele. Jaʼ me jech skʼan xapas ta stojolal li jlevietike xchiʼuk jech skʼan xavalbe ti kʼusitik skʼan spasike».+
Tsʼibetik ta yok vun
^ O «skotol sba olol ti tsjam alajebale».
