Numeros 9:1-23
9 Li ta sba u+ kʼalal stsakoj xa ox xchibal jabil slokʼelik ta yosilal Ejipto li j-israeletike, li Jeovae la xchiʼin ta loʼil Moises li ta takixokol balumil ta Sinaie, xi laj yalbee:
2 «Skʼan me xchapanik milbil matanal sventa Kʼin Koltael+ li j-israeletike, jaʼo akʼo spasik jech kʼuchaʼal akʼbil yoraile.+
3 Skʼan xchapanik ta 14 li u liʼe jaʼo kʼalal chʼayem xa ox batel kʼakʼale,* jaʼo akʼo spasik jech kʼuchaʼal akʼbil yoraile. Jech skʼan spasik jech kʼuchaʼal chal skotol li mantaletike xchiʼuk ti kʼu onoʼox yelan chichʼ pasele».+
4 Jaʼ yuʼun, li Moisese laj yalbe j-israeletik ti akʼo xchapanik li milbil matanal sventa Kʼin Koltaele.
5 Vaʼun, la xchapanik li milbil matanal sventa Kʼin Koltaele, jaʼo la spasik ta 14 yuʼun li baʼyel u kʼalal chʼayem xa ox batel kʼakʼale,* te la spasik ta takixokol balumil ta Sinai. Li j-israeletike jech tajek la spasik jech kʼuchaʼal albat mantal yuʼun Jeova li Moisese.
6 Oy jayvoʼ viniketik ti ibal sba* komik ta skoj ti la spikik jun animae,+ jaʼ yuʼun li vaʼ kʼakʼale mu stakʼ xchapanik li milbil matanal sventa Kʼin Koltaele. Jech oxal, batik ta stojolal Moises xchiʼuk Aaron li vaʼ kʼakʼale,+
7 xi kʼot yalbeike: «Ibal jbakutik, yuʼun la jpikutik jun anima. ¿Kʼu yuʼun mu xuʼ xkakʼbekutik smoton Jeova xchiʼuk j-israeletik jech kʼuchaʼal akʼbil yoraile?».+
8 Xi albatik yuʼun li Moisese: «Malaik to liʼe, chkaʼi kʼusi mantal chalbun Jeova ti skʼan xapasike».+
9 Li Jeovae xi laj yalbe li Moisese:
10 «Xi xavalbe li j-israeletike: ‹Akʼo mi oy buchʼu la sokes sba junuk avuʼunik o buchʼuuk noʼox ti chtal avuʼunik ta tsʼakal ta skoj ti la spik anima+ o ti nom bu lokʼ batele, skʼan me xchapan li milbil matanal sventa Kʼin Koltael yuʼun Jeovae.
11 Skʼan jaʼo xchapanik li ta 14 yuʼun li xchibal ue+ jaʼo kʼalal chʼayem xa ox batel kʼakʼale.* Jmoj akʼo slajesik xchiʼuk pan ti muʼyuk slevaduraile* xchiʼuk chʼail itajetik.+
12 Mu me kʼusi xkomenaj* yuʼunik ta yokʼomal+ xchiʼuk mu me stakʼ skʼasbeik junuk sbakil.+ Jaʼ jech akʼo xchapanik jech kʼuchaʼal chal skotol li mantal ta sventa Kʼin Koltaele.
13 Pe mi oy jun vinik muʼyuk chchapan li milbil matanal sventa Kʼin Koltael akʼo mi muʼyuk ibal sba o muʼyuk bu nom bateme, skʼan xichʼ milel ta steklumal,+ yuʼun muʼyuk laj yakʼbe smoton Jeova jech kʼuchaʼal akʼbil yoraile. Skʼan stoj smul li vinik taje.
14 »›Mi oy jun jyanlum te achiʼukik ta nakleje, skʼan me xchapan ek li milbil matanal sventa Kʼin Koltael yuʼun Jeovae.+ Jech skʼan spasik jech kʼuchaʼal chal li smantalil Kʼin Koltaele xchiʼuk ti kʼu onoʼox yelan chichʼ pasele.+ Jun noʼox smantalil avuʼunik xchiʼuk li jyanlumetik te xchiʼukoxuk ta nakleje xchiʼuk li buchʼutik te vokʼem ta avosilike›».+
15 Ti kʼusi kʼakʼalil laj yichʼ vaʼanel li axibalnae,+ volat ta tok li axibalnae, jaʼ xkaltik, li chʼul karpana ti bu oy li xkaxail tratoe, yan kʼalal chʼayem xa ox batel kʼakʼale, li kʼusi xkoʼolaj ta kʼokʼe te kom-o ta sba li axibalnae, te kom-o kʼalal to ta sob yokʼomal.+
16 Xi chkʼotilan ta pasele: li ta kʼakʼaltike chvolat ta tok li axibalnae, li ta akʼobaltike chvolat yuʼun li kʼusi xkoʼolaj ta kʼokʼe.+
17 Jujun velta kʼalal tstots lokʼel ta sba karpana li toke, ta anil chlokʼik batel li j-israeletike,+ ti bu chpaj li toke, jaʼ te tspas skarpanaik li j-israeletike.+
18 Ta smantal Jeova chlokʼik batel li j-israeletike xchiʼuk ta smantal Jeova te tspas skarpanaik.+ Kʼalal muʼyuk tstots batel li tok ti svoloj li axibalnae, muʼyuk tstotsik batel ek.
19 Kʼalal jal te chkom ta sba axibalna li toke, chchʼunbeik smantal Jeova li j-israeletike, jaʼ yuʼun muʼyuk chlokʼik batel.+
20 Bakʼintike jayib noʼox kʼakʼal te chkom ta sba axibalna li toke. Ta smantal Jeova te chkom ta skarpanaik xchiʼuk ta smantal Jeova tstotsik batel.
21 Pe bakʼintik xtoke te chakʼ sba kʼalal chʼayem xa ox batel kʼakʼale xchiʼuk ta sob noʼox yokʼomal chtots batel, vaʼun kʼalal chtots li tok ta sobe chtotsik batel ek. Mi ta kʼakʼaltik o mi ta akʼobaltik chtots batel li toke, chtotsik batel ek.+
22 Akʼo mi chib noʼox kʼakʼal, mi jun u o mi mas, mi muʼyuk tstots batel li tok ta sba axibalnae, te noʼox oyik-o li j-israeletike, muʼyuk tstotsik batel. Pe kʼalal chlik toyuk li toke, tstotsik batel ek.
23 Ta smantal Jeova tspas skarpanaik xchiʼuk ta smantal Jeova tstotsik batel. Tspasik li kʼusi sbainojik ta stojolal Jeova ta skoj ti jech albat mantal yuʼun Jeova li Moisese.
Tsʼibetik ta yok vun
^ Literal «kʼalal tsta sba li chib mal kʼakʼale».
^ Literal «kʼalal tsta sba li chib mal kʼakʼale».
^ Literal «kʼalal tsta sba li chib mal kʼakʼale».
^ O «xkomelaj».
