Oseas 10:1-15
10 «Li Israele xkoʼolaj kʼuchaʼal jpets uva ti muʼyuk sbalil ti chakʼ sate.+
Kʼalal mas ep chakʼ sate, mas ta x-epaj li skajleb matanal yuʼunike.+Kʼalal mas ep kʼusitik chlokʼ li ta yosilike, mas labal sba xvinaj li vaʼanbil tonetik yuʼunik ti chʼule.+
2 Jloʼlavanej* li yoʼontonike;li avie chichʼ tabel smulik.
Oy buchʼu tskʼasbat li skajleb matanal yuʼunike xchiʼuk ti chakʼbe slajeb li vaʼanbil tonetik yuʼunik ti chʼule.
3 Vaʼun, xi chalike: ‹Ta skoj ti muʼyuk jxiʼtaojtik* li Jeovae chʼabal ajvalil kuʼuntik.+
Xchiʼuk ¿kʼusi van xuʼ spas ta jtojolaltik li jun ajvalile?›.
4 Muʼyuk stu li kʼusi chalike,+ mu xkʼot ta pasel li kʼusi jamal chalike xchiʼuk kʼalal tspasik tratoetike;jaʼ yuʼun li chopol chapanele pukem batel kʼuchaʼal jmilvanej tsʼiʼlel li ta surkoal* osile.+
5 Li jnaklejetik ta Samariae ta xiʼik mi oy kʼusi xkʼot ta stojolal li slokʼol chʼiom vakax ta Bet-Avene.+
Yuʼun li steklumale oyik ta at-oʼonton ta stojolal,oyik ta at-oʼonton ek li paleetik yuʼunik ti xmuyubajik toʼox ta stojolal li jecheʼ diosetike xchiʼuk li ta smukʼulale,yuʼun nom chichʼik ikʼel batel.
6 Chichʼ ikʼel talel ta Asiria kʼuchaʼal smoton jun mukʼta ajvalil.+
Chichʼ akʼel ta kʼexlal li Efrainexchiʼuk chkʼexav li Israel ta skoj ti la stsʼakli li tojobtasele.+
7 Ta melel, ta xichʼ lajesel* li Samaria xchiʼuk li ajvalil yuʼune,+jech kʼuchaʼal uni kʼob teʼ ti chchʼay batel ta voʼe.
8 Ta xichʼ lajesel+ li tayal kʼopojebaletik* ta Bet-Aven+ ti jaʼ te tsaʼ smulik li Israele.+
Te chchʼi chʼix xchiʼuk tomalchʼix* li ta skajleb matanal yuʼunike.+
Li krixchanoetike xi chalbeik li vitsetike: ‹¡Loman tal ta jbakutik!›,
xchiʼuk xi chalbeik li bikʼtal vitsetike: ‹¡Nakʼunkutik!›.*+
9 Israel, te xa onoʼox ta skʼakʼalil Guibea la apas amul.+
Jech te yakaloxuk-o spasel.
Li paskʼope muʼyuk bu la slajes ta j-echʼel li krixchanoetik ta Guibea ti muʼyuk tukʼike.
10 Jech xtok, ta jtukʼibtasik ti kʼusi ora xal koʼontone.
Xchiʼuk li jteklumetike ta stsob sbaik sventa xbat stsakik ta kʼop,li kastigo chichʼike jaʼ ti chkuch* batel li chaʼtos spaltailike.*
11 Li Efraine jaʼ toʼox tsebal meʼ vakax ti lek chanubtasbil ti tskʼupin smajel sat tsʼunobile,jaʼ yuʼun muʼyuk laj kakʼbe skʼatlom teʼal li ta snukʼ ti kʼupil sbae.
Li avie, ta xkakʼ ti oyuk buchʼu skajlebin* li Efraine.+
Ta slok balumil li Judae; li Jakobe tspas ta parejo li osile.
12 Tsʼunik tukʼilal, vaʼun chatsobik tukʼil kʼanelal.
Lokik li balumil ti bu oy kʼusi xchʼie,+yoʼ to oy yorail sventa xasaʼik li Jeovae,+jaʼ to mi tale xchiʼuk mi tal xchanubtasoxuk ta sventa tukʼilale.+
13 Pe li voʼoxuke atsʼunojik choplejal,*jaʼ atsobojik li kʼusitik muʼyuk tukʼe,+jech xtok, jaʼ la alobeik sat ti chaloʼlavanike,yuʼun apatoj avoʼontonik ta avipal atukikxchiʼuk ta stojolal li epal jpaskʼopetik avuʼunike.
14 Xvochlajetik* chlik stsakik ta kʼop li ateklumalexchiʼuk ta xichʼ jinesel skotol li jteklumetik avuʼun ti joyobtabil ta muroe,+jech kʼuchaʼal laj yichʼ lajesel yuʼun Salman li Bet-Arbele,li ta skʼakʼalil paskʼop kʼalal laj yichʼik bojilanel xchiʼuk yalabik li meʼiletike.
15 Betel, taje jaʼ jech chavichʼ pasbel ta skoj ti toj echʼ xa noʼox achoplejale.+
Kʼalal jaʼ to chlokʼ talel li xojobal kʼakʼale, jpʼel skʼoplal chichʼ akʼbel slajeb* li ajvalil ta Israele».+
Tsʼibetik ta yok vun
^ O «Chʼulul; Kʼun».
^ O «sjiloal; xcholavil».
^ Literal «xichʼ tsʼijtsanel».
^ O «¡Mukunkutik!».
^ O «chʼix nichim; sakil chʼix».
^ Jaʼ xkaltik, kʼalal chkuch batel kʼuchaʼal jun kʼatlom teʼ li stojobil smule.
^ O «xchopolilike».
^ O «ta xkakʼbe yakʼil».
^ Literal «alokojik choplejal».
^ O «X-avlajetik».
^ Literal «chichʼ tsʼijtsanel».
