Salmos 37:1-40
-
Lek chbat xkuxlejalik li buchʼutik spatoj yoʼontonik ta stojolal Jeovae
-
Mu xa-ilin ta skoj li chopol krixchanoetike (1)
-
«Kʼupiluk tajek xavaʼi ti chatun ta stojolal Jeovae» (4)
-
«Akʼo sbeiltasot batel Jeova li ta be bu atamoj batele» (5)
-
«Li manxoetike jaʼ chuʼuninik li balumile» (11)
-
Muʼyuk xvokolet xa ta skʼanel veʼlil li buchʼu tukʼe (25)
-
Chkuxiik sbatel osil ta balumil li buchʼutik tukʼike (29)
-
Salmo yuʼun David.
א [alef]
37 Mu xa-ilin* ta skoj li buchʼutik toj chopolikemi jaʼuk xa-itʼixaj ta stojolal li jpaschoplejaletike.+
2 Anil chtakijik kʼuchaʼal vomol+xchiʼuk chnukultajik kʼuchaʼal tsʼiʼlel ti unin* toe.
ב [bet]
3 Pato avoʼonton ta stojolal Jeova xchiʼuk paso li kʼusi leke;+naklan ta balumil* xchiʼuk tukʼuk xavakʼ aba.+
4 Kʼupiluk tajek xavaʼi* ti chatun ta stojolal* Jeovae,vaʼun chakʼbot li kʼusi tskʼan avoʼontone.
ג [guimel]
5 Akʼo sbeiltasot batel Jeova li ta be bu atamoj batele,+pato avoʼonton ta stojolal, vaʼun lek kʼusi tspas ta atojolal.+
6 Chojobaj yuʼun li atukʼilal jech kʼuchaʼal kʼalal tsakub talexchiʼuk chojobaj yuʼun atukʼilal jech kʼuchaʼal li kʼakʼal ta oʼlol kʼakʼale.
ד [dalet]
7 Tsʼijlan noʼox ta stojolal li Jeovae+xchiʼuk teuk xa me amalaoj tajek.*
Mu xa-ilin ta skoj li jun krixchanoti lek chkʼot ta lokʼel yuʼun li kʼusitik chopol tsnop tspase.+
ה [e]
8 Iktao li skʼakʼal avoʼontone xchiʼuk komtsano li stiʼemal ajole;+mu xa-ilin xchiʼuk mu xapas li kʼusi toj chopole.*
9 Yuʼun chichʼik lajesel li buchʼutik toj chopolike,+yan li buchʼu spatoj yoʼontonik ta stojolal Jeovae jaʼ chuʼuninik li balumile.+
ו [waw]
10 Mu xa jaluk skʼan, vaʼun chchʼay skʼoplal li buchʼutik toj chopolike;+chakʼel to ti bu toʼox oyike,pe chʼabal xa te oyik.+
11 Yan li manxoetike jaʼ chuʼuninik li balumile+xchiʼuk tskʼupinik tajek li jun oʼontonal ti muʼyuk spajebe.+
ז [sayin]
12 Li buchʼu toj chopole oy kʼusi chopol tsnop tspasbe li buchʼu tukʼe;+xkʼux noʼox stanal ye sventa tskontrain.
13 Pe tseʼej noʼox ch-aʼiat yuʼun Jeova,yuʼun snaʼoj ti chkʼot skʼakʼalile.+
ח [jet]
14 Tsnit lokʼel s-espadaik li buchʼutik toj chopole xchiʼuk tslaʼ* s-arkoiksventa tsjipik ta lum li buchʼutik chil svokole xchiʼuk li buchʼutik abol sbaike,sventa tsmilik li buchʼutik tukʼ kʼusi tspasike.*
15 Pe pajal chkʼot ta yoʼonton stukik li s-espadaike;+chichʼ kʼasbel li s-arkoike.
ט [tet]
16 Akʼo mi jutuk noʼox kʼusi oy yuʼun li buchʼu tukʼe, mas to lek,jaʼ mu sta akʼo mi ep kʼusi oy yuʼun li epal chopol krixchanoetike.+
17 Yuʼun chichʼ kʼasbel skʼob li buchʼu toj chopole,pe ch-ikat yuʼun Jeova li buchʼu tukʼe.
י [yod]
18 Li Jeovae snaʼoj lek kʼusitik chkʼot ta stojolal li buchʼutik chʼabal spaltailike*xchiʼuk te oy-o sbatel osil li xrextoike.*+
19 Muʼyuk ch-akʼatik ta kʼexlal li ta yorail vokolile;oy ep kʼusitik yuʼunik kʼalal jaʼo yorail tsatsal viʼnale.
כ [kaf]
20 Yan li buchʼutik toj chopolike chlajik;+chchʼayik batel kʼuchaʼal kʼupil sba yaxaltik li yajkontratak Jeovae;tsakchʼayik batel kʼuchaʼal chʼail.*
כ [lamed]
21 Lek snaʼ x-och ta chʼom li buchʼu toj chopole, pe mu snaʼ sutes,yan li buchʼu tukʼe muʼyuk kʼusi snaʼ sjalan* xchiʼuk lek snaʼ xakʼ li kʼusitik oy yuʼune.+
22 Chuʼuninik balumil li buchʼutik akʼbilik bendision yuʼun Diose,pe chichʼik lajesel li buchʼutik chopol kʼoptabilik yuʼun Diose.+
מ [mem]
23 Li Jeovae tsbeiltas batel* ti bu chanav li jun krixchano+kʼalal lek chil li be bu stamoj batele.+
24 Akʼo mi xyal ta lum, pe muʼyuk chichʼ jipel batel,+yuʼun chnitbat skʼob yuʼun li Jeovae.+
נ [nun]
25 Keremun toʼox, pe li avi une limalub xa,pe muʼyuk bu kiloj-o ti iktabil komel li buchʼu tukʼe+mi jaʼuk ti xvokoletik xa ta skʼanel veʼlil* li xnichʼnabe.+
26 Skotol ora ta sjunul yoʼonton chakʼ ta chʼom li kʼusitik yuʼune+xchiʼuk ta onoʼox staik bendision li xnichʼnabe.
ס [samek]
27 Chʼako aba lokʼel ta sventa li kʼusi chopole xchiʼuk jaʼ paso li kʼusi leke,+vaʼun te chakom-o sbatel osil.
28 Yuʼun skʼanoj tukʼilal li Jeovaexchiʼuk muʼyuk chikta komel li buchʼutik tukʼ yakʼoj sbaik ta stojolale.+
ע [ayin]
Skotol ora chchabi;+yan li snitilulal buchʼutik toj chopole chichʼik lajesel.+
29 Chuʼuninik balumil li buchʼutik tukʼike+xchiʼuk te chkuxiik-o sbatel osil.+
פ [pe]
30 Pʼijilal chlokʼ ta ye* li buchʼu tukʼexchiʼuk li yokʼe jaʼ chalbe skʼoplal li tukʼilale.+
31 Te oy ta yoʼonton li smantal Sdiose;+muʼyuk bu xtamlajet xa chanav.+
צ [sade]
32 Li buchʼu toj chopole te-o sat ta stojolal li buchʼu tukʼe,oy ta yoʼonton tsmil yaʼi.
33 Pe li Jeovae muʼyuk te chikta ta skʼob li buchʼu toj chopole,+jech xtok, muʼyuk bu tstabe smul kʼalal chichʼ chapanele.+
ק [kof]
34 Pato avoʼonton ta stojolal Jeova xchiʼuk teuk-o xaxanav li ta sbee,vaʼun jaʼ tstoybot akʼoplal sventa xavuʼunin li balumile.
Te akʼeloj+ kʼalal chichʼ lajesel+ li buchʼutik toj chopolike.
ר [rex]
35 Kiloj li buchʼu toj chopol ti muʼyuk xkʼuxul yoʼontone,ti tslin sba batel kʼuchaʼal jtekʼ teʼ ti lek pim yanal kʼalal ta yosilal stuk oy chaʼie.+
36 Pe ta anil noʼox laj skʼoplal xchiʼuk muʼyuk xa te oy,+la jsaʼilan to, pe muʼyuk xa la jta.+
ש [xin]
37 Tsako ta venta li buchʼu chʼabal smule*xchiʼuk teuk asat ta stojolal li buchʼu tukʼe,+yuʼun tsta jun oʼontonal ta jelavel li krixchano taje.+
38 Pe chichʼ lajesel skotol li jpasmuliletike;li buchʼutik toj chopolike jaʼ xa noʼox smalaoj chichʼ tupʼbel skʼoplalik.+
ת [taw]
39 Pe li skolebal buchʼutik tukʼike jaʼ te chlik tal ta stojolal Jeova;+jaʼ stsatsal pojobbailik kʼalal jaʼo yorail vokolile.+
40 Chkoltaatik yuʼun Jeova xchiʼuk chpojatik.+
Chpojatik lokʼel ta stojolal li buchʼutik toj chopole xchiʼuk chkoltaatik,yuʼun te tsaʼ snakʼobbailik ta stojolal.+
Tsʼibetik ta yok vun
^ O «Muʼyukuk skʼakʼal avoʼonton».
^ O «unen».
^ O «osil».
^ O «Jaʼuk xamuyubaj-o tajek».
^ O «chavichʼ ta mukʼ».
^ O «mu xtavan xavaʼi smalael».
^ O jaʼ van skʼoplal «mu xa-ilin, yuʼun jaʼ noʼox xuʼ xakʼ vokolil».
^ O «chakʼbeik yakʼil».
^ O «buchʼutik tukʼ sbeike».
^ Literal «snaʼojbe skʼakʼaliltak li buchʼutik chʼabal xchopolilike».
^ O «spukulalike; sparteike».
^ O «chʼayil».
^ O «chakʼ ta ilel slekil yoʼonton».
^ O «tstekʼanbe lek yok».
^ Literal «pan».
^ O «Kʼun yechʼomal ye chalbe skʼoplal pʼijilal».
^ O «li buchʼu tukʼ-o yoʼontone».
