УЛОН та берпум аръёсы пумен секытгес но секытгес луэ, соин ик Иеговалэн ужась-тыршисьёсызлы азьвыл сярысь но чидасьгес луоно (2 Тим. 3:1—5). Ми улӥськомы асьсэды гинэ яратӥсесь, йыркурзэс вунэтӥсьтэмесь, чидасьтэмесь адямиос пӧлын. Соин котькуд христиан муртлы малпаськоно: «Мыным но со сямъёс ӧз пыӵалэ-а? Мар со сыӵе зэмзэ ик чидась луон? Но мар кароно, мынам со христиан сямы мед луоз шуыса?»

Мае возьматэ «чидан» кыл, кудӥз Библиын кутӥське? Со шуг-секытъёсты чиданэз гинэ уг возьматы. Чидась адями нимысьтыз ужпумен чида: со оске, солэн кӧтсэ ӝож карись муртэн кусыпъёсыз тупалозы шуыса. Сыӵе адями ачиз сярысь гинэ уг малпаськы, со малпа мукет адямиослэн шӧдонъёссы сярысь но, соос сое ӝоже уськыто ке но. Соин ик паймымон ӧвӧл, малы Библия вера, чидан яратон бордысь потэ шуыса (1 Кор. 13:4) a. Озьы ик чидан со одӥгез сям, кудӥз «духлэн емышез» пӧлы пыре (Гал. 5:22, 23). Мар кароно, ми зэмзэ ик чидась мед луомы шуыса?

Чидась луон понна, Иеговалэсь святой духсэ куроно, кудӥз сётэ аслэсьтыз духсэ солы, кин со вылэ оскиське (Лука 11:13). Иеговалэн духез со туж юн кужым ке но, милемлы асьмелы но мар ке но кароно: милемлы вӧсяськеммыя лэсьтоно (Пс. 85:10, 11). Соин ик нуналысь нуналэ тыршоно чидась луыны, милям со сяммы мед луоз шуыса. Но куддыръя милям чиданмы быре. Мар юрттоз милемлы со учыре?

Ми чидась луыны быгатомы, Иисуслэн примерез вылын малпаськимы но солэсь адӟем каримы ке. Апостол Павел чиданэз «выль адями луонлэн» сямъёсыз пӧлы пыртӥз. Озьы ик со гожтӥз: «Тӥляд сюлэмъёсады Инмарлэн сётэм тупаса улонэз мед кузёяськоз» (Кол. 3:10, 12, 15). Сюлмамы тупаса улон мед кузёяськоз шуыса, милемлы, Иисуслы сямен, юн осконо, Инмар ас дыраз ваньзэ тупатоз шуыса. Ми Иисуслэсь адӟем кариськомы ке, котькыӵе югдуре мед сюромы, ми чиданмес ум ыштэ (Иоанн 14:27; 16:33).

Милям ваньмылэн потэ, Инмар выль дунне сярысь сётэм кылзэ ӝоген мед быдэстоз ини шуыса. Но тодамы возиськомы ке, мар кема чида ини милемыз Иегова, ми дышетскиськомы чидасьгес луыны. Библия оскытэ милемыз: «Сӥзиськем кылзэ быдэстыны Кузё-Инмар уг ӝега, кызьы куд-огъёсыз тае ӝеган шуыса лыдъяло. Нокин но медаз быры, ваньмыз ӧпкельыса сьӧлыкъёсызлэсь мед куштӥськоз шуыса, Со асьмеды кема чидаса возьма» (2 Пётр 3:9). Малпаськыса со сярысь, макем чида милемыз Иегова, ми мукетъёсызлы чидасьгес луомы (Рим. 2:4). Кыӵе учыръёсы милемлы чидась луоно?

Ми ӵем сюриськомы сыӵе югдуръёсы, ку чидась луыны капчи ӧвӧл. Кылсярысь, милям мае ке туж кулэзэ вераммы потэ ке, туж чидась луоно, мукетъёсызлэсь верамзэс куспетӥ медам каре шуыса (Иак. 1:19). Озьы ик чидась луоно, куке кин ке вын-агайёс яке сузэр-апайёс пӧлысь милесьтым йырмес кур каре. Соослы вожмес поттон интые, малпаськоно, кызьы Иегова но Иисус милям янгышъёсмы шоры учко. Соос пичи янгышъёсмылы саклыксэс уг висъяло, нош милесьтым умой сямъёсмес адӟыны тыршо но чидаса возьмало, ку ми воштӥськомы (1 Тим. 1:16; 1 Пётр 3:12).

Чидась сям озьы ик кулэ, куке кинлы ке потӥз, ми мае ке шонертэм верамы яке лэсьтӥмы шуыса. Сыӵе учыре ми нырысь ик ӝоже усьыны быгатомы яке со озьы ӧвӧл шуыса вераммы потоз, дыр. Но Библиын таӵе визь-кенеш сётэмын: «Чидась мурт ӟечгес вылӥ мылкыдо адямилэсь. Вождэ поттыны эн дырты, малы ке шуоно вожпотон укылтэмъёслэн сюлмазы каръяське» (Екк. 7:8, 9). Тӥледыз юнме янгыше уськыто ке но, чидалэ но тырше асьтэды кияды возьыны. Ӵапак озьы ассэ возиз Иисус, сое юнме янгыше уськытыкузы (Матф. 11:19).

Чидан сям тужгес но кулэ анай-атайёслы, куке соос шӧдо, нылпиоссылэн шонертэм мылкыдзы но умойтэм мыл потонъёссы кылдо шуыса. Тани Маттиаслэн примерез, кудӥз Европаысь филиалын ужа-тырше. Школаын дышетскыкуз, Инмарлы оскемез понна, сое ялан серекъяло вал. Нырысь атаез но анаез со сярысь ӧз тодэ. Но ултӥямзы пытьы кельтытэк ӧз ортчы: анай-атаез шӧдӥзы, Маттиаслэн осконэз лябӟе шуыса. Йиллис, Маттиаслэн атаез, тодаз вае: «Соку милемлы трос чидан кулэ луиз. Маттиас ялан юа вал: „Кин со Инмар? Нош Библия Инмарлэн Кылыз ӧвӧл ке? Кытысь тӥ тодӥськоды, отын Инмарлэн куронъёсыз гожтэмын шуыса?“» Озьы ик, Маттиас атаезлэсь юалляз на: «Малы тӥ монэ пыкылӥськоды, мынам тӥляд кадь Инмарлы осконэ ӧвӧл шуыса?»

Йиллис азьланьтэ: «Куддыръя со, вожзэ поттыса, юанъёс сётъя вал, но ми вылэ уг, со зэмлыклы вожзэ поттэ вал, кудӥз, со малпамъя, солэсь улонзэ секыт кариз». Кызьы Йиллис со шоры учкиз? Со вера: «Ми  Маттиасэн пуксиськомы но куддыръя быдэс часъёсын вераськыса пукиськомы вал. Тросгес со вералляз, нош мон шер дыръя гинэ юанъёс сётъялляй, валан понна, мар со малпа но мар шӧдэ. Мон солы мае ке валэктӥсько но малпаськыны дыр сётӥсько вал, нош нунал-кык ортчыса, нош ик со сярысь вераськиськомы. Нош куддыръя мыным кӧня ке нунал кулэ вал, валан понна, мар солэн зэмзэ ик верамез потэ вал. Пичиен-пичиен Маттиас валаны кутскиз, мар со сыӵе дун сётон, валаны кутскиз, Инмар милемыз яратэ но солэн кивалтыны правоез вань шуыса. Милемлы трос дыр но кужым кулэ луиз, но пумен солэн сюлмаз Иеговаез яратон вордӥськиз. Ми кышноеным туж шумпотӥськомы, чиданмес ӧм ыштэ но пимылы быдэ вуымтэ дыръяз юрттыны быгатӥмы шуыса! Милям тыршеммы бакель каремын вал: ми солэсь сюлэмзэ вырӟытыны быгатӥмы».

Йиллис кышноеныз быдэсак Иеговалы оскиськизы но пизылы чидаса юрттӥзы. Азьвылзэ малпаса, Йиллис вера: «Мон ӵем вералляй Маттиаслы, ми анаеныз сое туж юн яратӥськомы но Иеговалы вӧсяськиськомы, со солы ваньзэ валаны мед юрттоз шуыса». Маттиаслэн атаез но анаез туж шумпото, чидазы но ӧз сётске шуыса!

Христианъёслы чидась луон сям озьы ик кулэ, куке соос матысь адямизэс утялто, кудӥз ялан кыстӥськись висёнэн курадӟе. Эскеромы Элленлэсь b примерзэ, кудӥз озьы ик Европаын улэ.

Тямыс ар талэсь азьло Элленлэн картэз висьыны усиз, соин сэрен йырвиымез умой ӧз ужа ни. Табере со жалянэз, шумпотонэз но куректонэз уг вала ни. Макем секыт югдуре шедиз Эллен! Тани солэн кылъёсыз: «Мыным туж кулэ чидан сям, но мон ӵем вӧсяськисько. Мыным капчигес луэ, куке мон яратоно кылбурме лыдӟисько — Филиппыослы 4:13, кудаз верамын: „Мон ваньзэ быгатӥсько, солы луыса, кин монэ юнматэ“ c». Иеговалэн юрттэменыз, Эллен ваньзэ чида но юн оске, Иегова сое уз кушты шуыса (Пс. 61:6, 7).

Самой умой пример, кызьы чидась луоно, возьматэ Иегова (2 Пётр 3:15). Библиын трос учыръёс гожтэмын, ку Иегова бадӟым чиданзэ возьматӥз (Неем. 9:30; Иона 4:2). Тодамы ваёмы, мар кариз Иегова, куке Авраам юаз, шонер-а Инмар Содомез быдтыны ужпум кутӥз. Иегова Авраамез куспетӥ ӧз кары, нош солы вераны луонлык сётӥз но пумозяз кылзӥз сое. Собере, Авраамлэсь верам кылъёссэ выльысь вераса, Иегова возьматӥз, Авраамез туж сак кылзӥз шуыса, но оскытӥз сое, Содомын дас шонер улӥсь мурт гинэ сюриз ке но, со карез уз быдты шуыса (Ул.-выл. 18:22—33). Макем умой пример возьматӥз Иегова, кызьы чидась луэмез возьматоно но мукетъёссэ кылзоно!

Чидась луон сям одно ик кулэ, христиан муртлэн выль адями луэмез потэ ке. Нош выль адями луыны кулэ котькуд христиан мурт. Со сямез будэтыны тыршимы ке, ми данъяломы яратӥсь но чидась инмысь Атаймес, нош озьы ик, осконэн улыса, ваньзэ чидаса, Инмарлэсь сӥзиськонъёссэ басьтомы (Евр. 6:10—12).