КЫЛЕМ арын быдэс дунне вылын трос сюрс вын-агайёс кенешлы юрттӥсьёс но тӧроос каремын вал. Тӥ но соос пӧлын ке, соку тӥледлы туж кельше, луоз, кенешын выль сётэм ужъёсты быдэстыны.

Со дыре ик тӥ кӧня ке сюлмаськиськоды но, дыр. Тани мар вера Джейсон нимо егит тӧро: «Монэ тӧро каремзы бере мон малпай: „Мар мында уже табере мынам!“». Моисей но, Иеремия но, куке Иегова соослы уж сётӥз, малпазы, со ужез быдэстыны уз быгатэ шуыса (Пот. 4:10; Иер. 1:6). Тӥляд но со выллем малпанъёсты кылдо ке, кызьы соосты вормоно но мар кароно, тӥледлы сётэм ужез умойгес быдэсъяны дышетскон понна? Ойдолэ эскеромы Тимофейлэсь примерзэ (Ап. уж. 16:1—3).

Тимофейлы 20 арес пала вал, дыр, куке апостол Павел солы ас сьӧраз ветлыны ӵектӥз. Тимофей егит на вал бере, нырысь со уг оскы вал, вылды, солэн кужмыз тырмоз но со быгатоз шуыса солы оскем ужез быдэстыны (1 Тим. 4:11, 12; 2 Тим. 1:1, 2, 7). Но ог дасо аръёс ортчыса, Павел Филиппыысь кенешлы гожтӥз: «Кузё-Инмар Иисус эриксэ сётӥз ке, ӝоген тӥ доры Тимофеез ыстыны малпасько... Мынам ӧвӧл уго мукетыз со кадь тыршисез» (Флп. 2:19, 20).

Мар юрттӥз Тимофейлы туж умой тӧро луыны но малы солэсь дышетскыны луоз?

1. Со зэмзэ ик сюлмаськиз адямиос сярысь. Павел Филиппыысь вын-агайёслы гожтӥз, Тимофей соос сярысь мылысь-кыдысь сюлмаськыны быгатоз шуыса (Флп. 2:20). Тимофейлэн потэ вал, вын-агайёслэн Иеговаен кусыпъёссы юн мед луозы шуыса. Со понна со аслэсьтыз дырзэ но, кужымзэ но сётыны дась вал.

Тӥледлы автобус нуллӥсь кадь луоно ӧвӧл, кудӥз туж кышка, дырыз дыръя уз вуы шуыса, соин ик нокытчы уг дугдылы но адямиосты уг басьты. Тани кыӵе визь-кенеш сётэ алигес кенешлы юрттӥсе яке тӧрое пуктэм вын-агайёслы Уильям, кудӥз 20 арлэсь кемагес ини тӧро луыса ужа-тырше: «Яратэ вын-агайёсты. Малпаське адямиос сярысь, ужез радъянлы гинэ саклыктэс эн висъялэ».

2. Со нырысетӥ интые пуктӥз Иеговалы ужан-тыршонэз. Павел вераз, Тимофей мукет вын-агайёслэсь пӧртэм вал шуыса. Со шуиз: «Ваньзы асьсэлы ярамонзэ утчало, Иисус Христослы ярамонзэ уг утчало» (Флп. 2:21). Павел пусйиз, Римын вын-агайёс, отын, кытын со аслэсьтыз та гожтэтсэ гожтӥз, ас ужъёссылы ортчыт трос дырзэс висъязы шуыса. Куддыръя соос дась ӧй вал Инмарлы ужан-тыршонын сётыны ваньзэ, мае быгато. Но Тимофей соос кадь ӧй вал! Куке ӟеч иворез вӧлмытыны луонлык кылдылӥз, Тимофей Исаиялэн кадь мылкыдзэ возьматъяз, кудӥз шуиз: «Тани мон, монэ ысты» (Ис. 6:8).

Кызьы зарни шорзэ шедьтоно аслэсьтыд ужъёстэ но кенешлэсь ужъёссэ быдэстонын? Нырысь ик, тодады возе, мар ваньмызлэсь кулэгес. Павел ӧтиз: «Ӟечсэ бырйыны быгатӥсесь мед луоды» (Флп. 1:10). Иеговалы ужан-тыршонэз нырысетӥ интые пуктэ. Кыкетӥез, огшоры улэ. Мозмытске солэсь, мар юнме дырдэс но кужымдэс быдтэ. Павел Тимофейлы вераз: «Егит дыр мугор куронъёслэсь палэнскылы. ...Шонерлыко, оскыса, яратыса, тупаса улыны тыршы» (2 Тим. 2:22).

3. Со мылысь-кыдысь Иеговалы ужаз-тыршиз. Павел Филиппыысь вын-агайёслы тодазы вайытӥз: «Тимофейлэсь оскиськымон луонзэ тӥ тодӥськоды, малы ке  шуоно со монэн ӵош атаеныз кадь Ӟеч Ивор тодытыса ветлӥз» (Флп. 2:22). Тимофей ноку но ӧз азьтэмъяськы. Со мылысь-кыдысь Павелэн валче ужаз-тыршиз. Со соослэсь кусыпъёссэс туж юнматӥз.

Туннэ Иеговалэн организацияз уж ваньмызлы тырмоз. Со зэмос шумпотон вае но вын-агайёсын но сузэр-апайёсын кусыпъёсмес юнматэ. Соин ик ваньдылы ужпум пуктоно — Иеговалэн ужаз, вань кужымдэс поныса, тыршыны (1 Кор. 15:58).

4. Со тодэмзэ улоназ пыртӥз. Павел Тимофейлы гожъяз: «Тон ялан, мынэсьтым адӟем карыса, дышетӥд, улӥд-вылӥд, ӟеч мылкыд карыса, оскыса, мукетъёссэ валаса-чидаса, яратыса, чигиськыны сётӥськытэк улӥд» (2 Тим. 3:10). Зэм, Тимофей улоназ пыртӥз сое, малы дышетскиз. Со юрттӥз солы ас вылаз эшшо тросгес уж басьтыны (1 Кор. 4:17).

Вань-а тӥляд тӥлесьтыд бадӟымгес эшты, кудӥзлэн Инмарен юн кусыпъёсыз но кудӥзлэсь тӥ адӟем карыны быгатысалды? Ӧвӧл ке, быгатысалды-а тӥ сыӵе вын-агаез шедьтыны? «Одӥг тодӥсь-валась тӧро монэ ас бурд улаз басьтӥз но тросэзлы монэ дышетӥз,— тодаз вае Том, кудӥз трос аръёс ӵоже ини тӧро луыса ужа-тырше.— Мон ялан солэсь визь-кенешсэ курылӥ но солэн верамезъя лэсьтылӥ. Ӝоген мынам кышканэ быриз, но мон оскыны кутски, сётэм ужез быдэстыны быгато шуыса».

5. Со ялан ассэ кыдатӥз. Павел Тимофейлы визь-кенеш сётӥз: «Инмар азьын шонерлыко улонлы астэ кыдаты» (1 Тим. 4:7). Спортсменлэн тренерез луыны быгатэ, но солы аслыз но ассэ кыдатоно. Павел Тимофеез ӧтиз: «Калыклы Священной Гожтэмез лыдӟы, визь-нод сёткаса, дышетыса ул соосты. [...] Ваньзэ тае сюлэмдэ поныса быдэсъя, та бордын ул, тынад азинсконэд ваньмызлы адӟиськымон мед луоз» (1 Тим. 4:13—15).

Тӥледлы но асьтэлэсь быгатонлыкъёстэс ялан кыдатоно. Ялан Библиез дышетэ но организациысьтымы воштӥськонъёслэсь эн кыле. Со сяна, ас визьдылы гинэ эн оскиське но эн малпалэ, мур эскерон ортчытытэк но, котькуд шуг-секытэз асьтэос сэрттыны-пертчыны быгатоды шуыса. Тимофейлэсь адӟем каре, кудӥзлы верамын вал: «Астэ ачид чакласа ул, адямиосты дышетонэз но» (1 Тим. 4:16).

6. Со Иеговалэн духез вылэ оскиськиз. Тани мар гожтӥз Павел Тимофейлы солэн ужан-тыршонэз сярысь: «Асьме пушкын улӥсь Святой Духлэн кужыменыз тыныд оскыса сётэм ӟечлыкез уть» (2 Тим. 1:14). Азьланяз но ужан-тыршон понна, Тимофейлы Инмарлэн духез вылэ оскиськоно вал.

Дональд, кудӥз тӧро луыса трос аръёс ӵоже ужа-тырше ини, вера: «Кенешын юрттӥсьёслы но тӧроослы Инмарен кусыпъёссэс дунъяно, соку соослэн кужымзы луоз. Соос Инмарлэсь святой духсэ куризы но святой духлэн емышез пӧлы пырись сямъёсты будэтӥзы ке, мукет вын-агайёс понна соос зэмзэ ик бакель карон луозы» (Пс. 83:8; 1 Пётр 4:11).

Туж шумпотоно адӟыны, кызьы кемалась ӧвӧл кенешлы юрттӥсе яке тӧрое пуктэм тросэз вын-агайёс мылысь-кыдысь соослы оскем ужез быдэсто. Джейсон, кудӥз сярысь азьвылгес верамын вал, шуэ: «Со дыр куспын, кӧня мон тӧро луыса ужасько-тыршисько ини, мон тросэзлы дышетски но мынам осконэ будӥз, мыным оскем ужез быдэстыны быгато шуыса. Табере, тӧро луыса ужан-тыршон мыным бадӟым шумпотон вае но мон понна со туж бадӟым дан».

Тыршиськоды-а тӥ кенешлы юрттӥсь яке тӧро луыса ужан-тыршонын быгатонлыкъёстэс кыдатыны? Со удысын Тимофейлэсь адӟем каре. Соку тӥ Инмарлэн калыкез понна зэмзэ ик бакель карон луоды.