1. Кыӵе милям мылкыдмы вань ӵыжы-выжыосмы пумысен?

 «КУКЕ мон зэмлыкез тодӥ, мынам соку ик мылкыды кылдӥз, быдэс семьяе монэн райын мед улоз шуыса,— вера Полин b нимо сузэр.— Но эшшо но зол мынам мылкыды вал Уэйн картэным но милям пиенымы ӵош Иеговалы ужаны-тыршыны». Нош вань-а тӥляд ӵыжы-выжыосты c, кудъёсыз Иеговалэн ужась-тыршисьёсыз уг луо на? Тӥляд но Полинлэн кадь шӧдонъёсты, дыр.

2. Кыӵе юанъёсты ми та статьяын эскеромы?

² Милям потэ, ӵыжы-выжыосмы ӟеч иворез мед кылзозы шуыса, нош ми соосты косыны ум быгатӥське сое лэсьтыны. Озьы ке но ми быгатӥськомы соослы юрттыны Библиысь кылъёс вылын малпаськыны но сюлэмзэс зэмлыклы усьтыны (2 Тим. 3:14, 15). Малы ӵыжы-выжыосмылы тодытоно? Малы соослэсь шӧдонъёссэс лыдэ басьтоно? Кызьы соослы юрттоно Иеговаез яратыны озьы ик, кызьы ми сое яратӥськомы? Но кызьы милемлы быдэс кенеш юрттыны быгатэ? Таӵе юанъёсты ми та статьяын эскеромы.

3. Малы милемлы ӵыжы-выжыосмылы тодытоно, 2 Пётрлэсь 3:9 лыдэ басьтыса?

³ Ӝоген Иегова та лек дуннеез быдтоз. Музъем вылын улыны кылёзы соос гинэ, «кин быронтэм улон шоры шонер амалэн учке» (Ап. уж. 13:48, ВД). Ми трос дырмес но кужыммес  быдтӥськомы, тодмотэм адямиослы Иегова сярысь веран понна, уката но милям потэ, зэмлыкез ӵыжы-выжыосмы но мед тодозы шуыса. Инмысь яратӥсь Атаймылэн, Иеговалэн, потэ, «нокин но медаз быры, ваньмыз ӧпкельыса сьӧлыкъёсызлэсь мед куштӥськоз шуыса». (Лыдӟе 2 Пётрлэсь 3:9.)

4. Мар сярысь ми куддыръя вунэтӥськомы, ӵыжы-выжыосмылы тодытыкумы?

⁴ Тодамы возьыны кулэ: вань шонер амал, кызьы адямиослы утиськон иворез вераны луэ, озьы ик вань шонертэм амал но. Тодмотэм адямиосын ми ӵем дыръя гажаса вераськиськомы, нош ӵыжы-выжыосынымы асьмеды лякытэн возьыны куддыръя вунэтӥськомы.

5. Мар сярысь вунэтоно ӧвӧл, ӵыжы-выжыосынымы зэмлык сярысь вераськеммылэсь азьло?

⁵ Ми пӧлысь тросэз жаляса тодазы ваё, кызьы соос ӵыжы-выжыосынызы зэмлык сярысь нырысетӥзэ вераськыны тыршизы. Али ми ваньзэ мукет сямен лэсьтысалмы. Апостол Павел христианъёслы гожтӥз: «Калыкен котьку визьмо, лякыт кылын вераське, отын сылалэз мед луоз,— тодэ кызьы кулэ котькудӥзлы адямилы ответ сётыны» (Кол. 4:5, 6). Ойдолэ со сярысь ум вунэтэ, куке ӵыжы-выжыосмылы тодытӥськомы. Озьы ӧм лэсьтэ ке, зэмлыкен тодматон интые, ми соосты зэмлыклэсь палэнтомы.

6, 7. Вералэ пример, кудӥз возьматэ, оскисьтэм ӵыжы-выжыосмылэсь шӧдонъёссэс лыдэ басьтоно шуыса.

⁶ Лыдэ басьтэ соослэсь шӧдонъёссэс. Полин, кудӥз сярысь гожтэмын вал ини, вера: «Кутсконаз мынам мылкыды вал картэным Инмар сярысь но Библия сярысь гинэ вераськыны. Огшоры ужъёс сярысь ми ӧм вераськылэ». Нош солэн Уэйн картэз Библиез умой ӧз тоды но ӧз вала, мар сярысь солэн верамез потэ вал. Картэз малпаз, Полинлы, религиез сяна, номыр тунсыко уг поты шуыса.  Озьы ик со малпаз на, кузпалыз кышкыт сектае сюриз шуыса, кытын солэсь визьзэ сурало-пожало.

⁷ Полин вера, ӝытъёсты но шутэтскон нуналъёсты со ӵемысь кенешысь вын-агайёсын но сузэр-апайёсын ортчытъя вал шуыса. Со соос доры куное лыктылӥз, кенешлэн пумиськонъёсаз ветлылӥз но тодытон уже пыриськылӥз. «Куддыръя, Уэйн бертыку, дорамы сое нокин уг возьма вал. Со ассэ огназ кельтэмын шуыса шӧдӥз»,— тодаз вае Полин. Валамон, картэзлэн потэ вал, кышноез но пиез соин ӵош мед луозы шуыса. Со ӧз тоды соосты, кинъёсын кышноез но пиез дырзэс ортчытъяло, но со малпаз, кышноезлэн выль эшъёсыз, соин ӵошатыса, Полинлы дуногес луизы шуыса. Уэйн кышнозэ люкиськонэн кышкатыны кутскиз. Кызьы тӥ малпаськоды, мар карыны быгатысал Полин, картэзлэсь шӧдонъёссэ лыдэ басьтон понна?

8. Малы тужгес но тросгес саклыксэс висъяло ӵыжы-выжыосмы, 1 Пётрлэсь 3:1, 2 лыдэ басьтыса?

⁸ Тодады возе: ужъёс кылъёслэсь тросгес верало. Ӵем дыръя ӵыжы-выжыосмы, верам кылъёсмы интые, ужъёсмылы тросгес саклыксэс висъяло. (Лыдӟе 1 Пётрлэсь 3:1, 2.) Дыр ортчыса, сое Полин но валаз. Со вера: «Мон тодӥ, Уэйн милемыз яратэ но, зэмзэ вераса, солэн люкиськемез уг поты шуыса. Куке со люкиськон сярысь вераськыны кутскиз, мон валай: ваньзэ лэсьтоно озьы, кызьы вера Иегова. Картэлы тодытон интые, кулэгес вал асме соин шонер возьыны». Полин картэныз Библия сярысь кужмысь вераськыны ӧз тыршы ни но табере огшоры ужъёс сярысь вераськыны кутскиз. Уэйн адӟиз, кышноез ассэ лякытгес возьыны кутскиз, нош пиез эшшо но кылзӥськись луиз шуыса (Мад. 31:18, 27, 28). Куке со адӟиз, Библиысь визь-кенешъёс кышноезлы но пиезлы пайда ваё шуыса, со Инмарлэн  Кылысьтыз иворез кылзыны кутскиз (1 Кор. 7:12—14, 16).

9. Малы милемлы азьланяз но ӵыжы-выжыосмылы юрттыны тыршоно?

⁹ Азьланяз но тырше ӵыжы-выжыостылы юрттыны. Милемлы Иеговалэсь адӟем кароно: со «нуналлы быдэ» адямиослы луонлык сётэ ӟеч иворез кылзыны но пырак улон понна оскон басьтыны (Иер. 7:25). Апостол Павел Тимофейлэсь мылкыдзэ ӝутӥз азьланяз но адямиослы юрттыны. Малы? Малы ке шуоно, тазьы лэсьтыса, Тимофей ассэ но, сое кылзӥськисьёсты но утьыны быгатысал (1 Тим. 4:16). Ми яратӥськомы ӵыжы-выжыосмес, соин ик милям потэ, соос Инмарлэн Кылысьтыз зэмлыкез мед тодозы шуыса. Дыр ортчыса, Полинлэн кылъёсыз но ужъёсыз семьяезлы трос пайда вайизы. Солэн малпанэз быдэсмиз: табере со картэныз ӵош Иеговалы ужа-тырше. Соос кыкназы но пионеръёс, нош картэз тӧро луыса ужа-тырше.

10. Малы милемлы чидасесь луоно?

¹⁰ Чидасесь луэ. Куке ми ужпум кутӥмы Инмарлэсь кылзӥськыса улыны, милемлы улонмес но учконъёсмес воштоно луиз. Ӵыжы-выжыосмылы таӵе воштӥськонъёсын соглаш луыны капчи ӧвӧл, дыр. Ӵем дыръя соос соку ик адӟо, ми табере религиен герӟаськем праздникъёсты ум пусйиське но политикае ум пыриськиське шуыса. Куд-ог ӵыжы-выжыосмы милемлы нырысь вожзэс но поттыны быгато (Матф. 10:35, 36). Озьы ке но милемлы киосмес лэзёно ӧвӧл. Милемлы малпаны уг яра, соос ноку но уз воштӥське шуыса. Озьы малпамы ке, вераны луоз, ми ужпум кутӥмы, соос пырак улыны ярамонэсь ӧвӧл шуыса. Нош Иегова милемлы судъяны право ӧз сёты — судэз со Иисуслы сётӥз (Иоанн 5:22). Ми чидась луэммес возьматӥськомы ке, ӵыжы-выжыосмы Библиысь иворез кылзыны мылкыд карозы, вылды. (Учке « Уже кутэ сайтмес» рамкаез.)

11—13. Малы дышетэ тӥледыз Элислэн учырез?

¹¹ Юнэсь луэ, нош со дыре ик лякытэсь (Мад. 15:2). Тани Элис нимо сузэрлэн учырез. Куке Элис Иегова сярысь тодӥз, со кыдёкын улӥз анай-атаезлэсь, кудъёсыз Инмарлы уг оско вал но политикае выемын вал. Элис валаз, со анай-атаезлы Библиысь паймымон зэмлыкъёсты ӝоггес вераны кулэ шуыса. Со вера: «Выль учконъёсыд сярысь соку ик вераны ӧд дырты ке, соослы эшшо но золгес вӧсь луоз». Со тыршиз утчаны юанъёсты, кудъёсыз анай-атаезлы тунсыко луысалзы, кылсярысь, «Мар со сыӵе яратон?». Собере Элис соослы гожтэтъёс гожъяз, кытын пусйиз, мар вера Библия та юанъя, но юаз соослэсь малпанзэс (1 Кор. 13:1—13). Элис анай-атайзэ тау кариз, соос сое умой будэтӥзы но со сярысь сюлмаськизы шуыса, озьы ик со соослы кузьымъёс келяз. Анай-атаез доры бертакуз, вань кужымзэ сётыса, со анаезлы корка котырын юрттыны тыршиз. Куке Элис вералляз со сярысь, малы со табере оске, анаез но атаез нырысь шум ӧз потэ.

¹² Анай-атаез доры бертакуз, Элис котькуд нунал Библиез лыдӟыны тыршиз. «Со анаелы валаны юрттӥз, макем дуно потэ мыным та книга»,— тодаз вае со. Нош со дыре ик солэн атаез Библия сярысь тросгес тодыны ужпум кутӥз, солэн валамез потэ вал, малы нылыз учконъёссэ воштӥз, но озьы ик отысь янгышъёссэ шедьтыны тыршиз. «Мон солы Библия кузьмай,— вера Элис,— но кӧня ке шуныт кылъёс гожтӥ». Кытчы со вуттӥз? Атае Библиысь нокыӵе но янгышъёссэ ӧз шедьты, нош со, мае со отысь тодӥз, сюлмаз мур пыӵаз.

¹³ Шуг-секытъёсын пумиськыкумы но, милемлы юнэсь луоно, нош со дыре ик лякытэсь (1 Кор. 4:12б). Кылсярысь, Элислэн анаез солы пумитъяськыны кутскиз. Со вера: «Куке мон пылатӥськи, анае вераз, мон сое уг яратӥськы шуыса». Кызьы Элис та шоры учкиз?  Со тодаз вае: «Мон ӧй тыршы та вераськонлэсь палэнскыны, нош гажаса валэктӥ, Иеговалэн Адӟись-Ивортӥсез луыны юн ужпум кутӥ но малпанме воштыны уг малпаськы шуыса. Мон анайме оскытыны тырши, сое туж яратӥсько шуыса. Ми кыкнамы ик бӧрдӥмы, но собере мон солы ческыт сиён дасяй. Со дырысен анае валаны кутскиз, Библия мыным умойгес адями луыны юрттэ шуыса».

14. Малы милемлы ӵыжы-выжыосмылэн зӥбемзылы сётӥськоно ӧвӧл?

¹⁴ Ӵыжы-выжыосмылы кӧня ке дыр кулэ луоз валан понна, макем ми дуноен лыдъяськомы Иеговалы ужан-тыршонэз. Кылсярысь, куке Элис ужпум кутӥз пионер луыса ужаны-тыршыны но кельтӥз умой уже интыяськыны луонлыксэ, кудзэ бырйиз солы анай-атаез, солэн анаез нош ик бӧрдыны кутскиз. Но Элис кутэм ужпумзэ ӧз вошты. Со вера: «Тон семьяедлы одӥг удысын ужпумдэ воштыны лэзид ке, соос мукет удысъёсын но ужпумъёстэ воштыны тыршозы, дыр. Нош кутэм ужпумдэ уд воштӥськы ке но со дыре ик соосын астэ лякытэн возиськод ке, соос пӧлысь кин ке но тонэ кылзыны быгатоз». Элислэн учыраз озьы ик луиз. Солэн анаез но атаез али пионеръёс луыса ужало-тыршо, нош атаез озьы ик тӧро луэ.

15. Кызьы ӵыжы-выжыосмылы кенешысь вын-агайёслэн но сузэр-апайёслэн ӟеч ужъёссы юрттыны быгато, Матфейлэсь 5:14—16 но 1 Пётрлэсь 2:12 лыдэ басьтыса?

¹⁵ Христиан кенешысь вын-агайёслэн но сузэр-апайёслэн ӟеч ужъёссылы луыса, Иегова адямиосты ас дораз вайыны быгатэ. (Лыдӟе Матфейлэсь 5:14—16; 1 Пётрлэсь 2:12.) Тӥляд кузпалды Иеговалэн ужась-тыршисез ӧвӧл на ке, тодматскиз-а ни со тӥляд кенешеныды? Полин, кудӥз сярысь верамын вал ини, куное ӧтьылӥз вын-агайёсты но сузэр-апайёсты,  картэныз тодматон понна. Уэйн тодаз вае, кызьы одӥг агай юрттӥз солы Адӟись-Ивортӥсьёс сярысь умойтэм малпанъёссэ воштыны: «Со агай уж дораз шутэтскон нунал басьтӥз, монэн ӵош футболлы укшась шудонэз учкон понна. Тодам вайисько на, мон малпай: „Со умой пиосмурт!“».

16. Малы ӵыжы-выжыосмес кенешлэн пумиськонъёсаз ӧтёно?

¹⁶ Эшшо одӥг умой амал, кызьы ӵыжы-выжыосмылы юрттыны луэ,— ӧтьыны соосты милемын ӵош кенешлэн пумиськоназ мыныны (1 Кор. 14:24, 25). Нырысетӥез пумиськон, кудаз Уэйн ветлӥз, Тодэ ваён ӝытан вал. Со лыктыны соглаш кариськиз, малы ке шуоно та пумиськон ортчытӥськиз ӝыт, куке солэн ужан нуналыз йылпумъяськемын вал ини, но программа туж ик кема ӧз кыстӥськы. Уэйн тодаз вае: «Мон ӧй вала, мар сярысь отын вераськон мынӥз, но мыным отысь адямиос кельшизы. Соос мон доры лыктылӥзы, тодматскылӥзы но, киме юн кутыса, ӟечбуръяськизы. Котьма ласянь адӟиськиз, соос умой адямиос шуыса». Одӥг кузпалъёс Полинлы тужгес но возьматӥзы лякыт сямо луэмзэс, куке соос пумиськонъёсын но ужан-тыршонын юрттӥзы солы пизэ чакланы. Соин ик, куке Уэйн малпаз умойгес тодыны сое, малы Полин оске, со ӵапак та агаез асэныз Библиез дышетыны куриз.

17. Мар пумысен милемлы асьмеды янгыше уськытоно ӧвӧл но малы малпано ӧвӧл, ӵыжы-выжыосмы ноку уз воштӥське шуыса?

¹⁷ Ми оскиськомы, вань ӵыжы-выжыосмы ми сямен Иеговалы ужаны-тыршыны кутскозы шуыса. Нош кызьы гинэ ми медам тырше, луыны быгатоз озьы но, соос зэмлыкез уз кылзэ шуыса. Озьы луиз ке, асьтэды янгыше эн уськытэ. Уг луы кужмысь косыны адямиез оскыны солы, малы ми оскиськомы. Но куке ӵыжы-выжыосты адӟозы, макем шумпотыса тӥ Иеговалы ужаськоды-тыршиськоды, со сюлмазы пырыны быгатоз. Вӧсяське соос понна. Соосын лякытэн вераське. Киостэс эн лэзе! (Ап. уж. 20:20). Оске, Иегова тыршемдэс бакель кароз шуыса. Нош ӵыжы-выжыосты зэмлыкез кылзыны соглаш кариськизы ке, Инмар соосты одно ик утёз!