ВАНЬ-А кенешын кыӵе ке ужъёс, кудъёссэ тӥляд быдэсъямды потэ, нош али тӥ соосты нуыны уд быгатӥське? Оло нош, со ужъёсты али кин ке но мукетыз быдэсъя. Яке тӥ уд быгатӥське азьвыл мында лэсьтыны арлыдды, урод тазалыкты, коньдонэн герӟаськем шуг-секытъёс яке семьяяды нуоно ужъёс сэрен. Яке тӥ яратоно ужан-тыршондэс кельтоно луиды, организациямы воштӥськонъёс ортчемен, тӥ та ужез трос аръёс ӵоже быдэсъяды ке но. Кыӵе гинэ мугъёс медаз луэ, тӥ шӧдыны быгатоды, Иеговалы ужан-тыршонын уд быгатӥське шуыса лэсьтыны ваньзэ, мае лэсьтэмды потэ. Валамон, соин сэрен тӥляд мылкыдды куашка шуыса. Мар кароно, быдэсмымтэ малпан, йыркуръяськон но вожпотон сюлмамы выжы медаз лэзе шуыса? Мар юрттоз шумпотыса улыны?

Иоанн Пылатӥсьлэн улонэз умой возьматэ, кызьы шумпотыса улоно. Солэн туж тунсыко ужъёсты быдэсъяны луонлыкез вал ке но, со син азяз пуктыны но ӧз быгаты, вылды, мар солэн улоназ луоз. Со ӧз малпа, дыр, пытсэтын, ужан-тыршонын сярысь, тросгес дырзэ ортчытоз шуыса. Нош соин сэрен со шумпотонзэ ӧз ышты но сыӵе мылкыдын самой пумозяз улыны быгатӥз. Мар солы юрттӥз? Но кызьы шумпотыса улоно, малпанъёсмы уг быдэсмо ке но?

Асьме вакытысь 29-тӥ арын тулыс Иоанн ужан-тыршонзэ кутскиз, Мессиялы сюрес дасяса. Со вералляз: «Ӧпкельыса сьӧлыкъёстылэсь куштӥське, уго Ин Эксэйлык матэ вуиз» (Матф. 3:2; Лука 1:12—17). Тросэз та ӧтёнлы вазиськизы. Адямиос Иудеялэн пӧртэм палъёсысьтыз лыктылӥзы. Соослэн Иоаннлэсь иворзэ кылзэмзы потэ вал, но тросэз соос пӧлысь сьӧлыкъёссы понна ӧпкелизы но пылатӥськизы. Озьы ик Иоанн вылтӥяськись религиозной кивалтӥсьёслы кышкатэк вералляз, мар соосты возьма, соос ӧз ке воштӥське (Матф. 3:5—12). Иоанн тужгес но кулэ луись уж лэсьтӥз, куке асьме вакытысь 29-тӥ арын сӥзьыл Иисусэз пылатӥз. Со дырысен со мукетъёсызлэсь мылкыдзэс ӝутылӥз мыныны Иисус сьӧры, кудӥз сярысь азьло ик верамын вал, со Мессия луоз шуыса (Иоанн 1:32—37).

Иоаннлы нимысьтыз уж сётэмын вал, соин ик Иисус со сярысь вераз: «Кышномуртлэсь вордӥськемъёс пӧлысь Иоанн Пылатӥсьлэсь быдӟымез  ӧз на вордӥськы» (Матф. 11:11). Веранэз ӧвӧл, сыӵе дано ужлы Иоанн туж шумпотӥз. Туннэ но тросэз вын-агайёс но сузэр-апайёс Иеговалы ужан-тыршонын тунсыко ужъёсты быдэсъяло. Тани Терри нимо агайлэн учырез. Со но солэн Сандра кышноез 50 арлэсь кемагес, вань дырзэс сётыса, Иеговалы ужазы-тыршизы. Терри вера: «Кыӵе гинэ ужъёсты Иегова мыным ӧз оскы! Мон пионер, Вефильын ужась, нимысьтыз пионер, ёросэз но улосэз чаклась луыса ужай-тырши, но табере мон нош ик нимысьтыз пионер луыса ужасько-тыршисько». Зэм но, туж шумпотоно Иеговалэн организацияз пӧртэм ужъёсты быдэсъяны, но, кызьы ми адӟомы Иоаннлэн примерысьтыз, выль югдуръёсын шумпотыса улон понна, тыршыны кулэ.

Шумпотыса улыны Иоанн Пылатӥсьлы юрттӥз тау карон мылкыд. Со котьку но дунъяз ужъёсты, кудъёссэ солы Инмар оскиз. Тодамы ваёмы улонысьтыз одӥг учырез. Иисуслэн пылатӥськемез бере, Иоанн сьӧры мынӥсьёслэн лыдзы кулэсмыны кутскиз, нош Иисус сьӧры мынӥсьёслэн лыдзы — будыны. Та сярысь сюлмаськыса, Иоаннлэн дышетскисьёсыз солы шуизы: «[Иисус] пылатэ, вань калык Со доры мынэ» (Иоанн 3:26). Иоанн вераз: «Кинлэн ичименез [выль кенэз] вань, со эмеспи; нош эмеспилэн сое кылзӥськыса сылӥсь эшез, эмеспилэсь куаразэ кылыса, туж шумпотэ: тани таиз мынам шумпотонэ быдэсмиз» (Иоанн 3:29). Иоанн Иисусэн ӧз ӵошатскы но ӧз малпа, Иисуслы даногес уж сётэмын бере, вань ужез юнме луиз шуыса. Со интые, Иоанн шумпотыса улӥз, малы ке шуоно со туж дунъяз солы оскем ужез — «эмеспилэн... эшез» луыны.

Сыӵе мылкыд юрттӥз Иоаннлы шумпотыса улыны, солэн ужан-тыршонэз капчи ӧй вал ке но. Кылсярысь, вордӥськем дырысеныз ик со назорей вал, но солы вина юыны уг яра вал (Лука 1:15). Тани мар вераз Иисус Иоаннлэн огшоры улонэз сярысь: «Иоанн лыктӥз, со уг но сиы, уг но юы». Нош ачиз Иисус но солэн дышетскисьёсыз сыӵе куронъёсты быдэсъяны кулэ ӧй вал, но соос мукет адямиос кадь улыны быгатӥзы (Матф. 11:18, 19). Со сяна, Иоанн одӥг паймымон уж но ӧз лэсьты, но со тодӥз, сыӵе кужым Иисуслэн дышетскисьёсызлы сётэмын шуыса. Соос пӧлын вал соос но, кинъёс азьвыл Иоаннлэн дышетскисьёсыз пӧлы пыризы (Матф. 10:1; Иоанн 10:41). Озьы ке но Иоаннлэн соин сэрен мылкыдыз ӧз куашка, со интые, вань кужымзэ со сётӥз ужан-тыршонлы, кудзэ оскиз солы Иегова.

Ми дунъяськомы ке дано ужъёсмес, кудъёссэ али Иеговалэн организацияз быдэсъяськомы, ми но шумпотыса улыны быгатомы. Тани мар вера Терри, кудӥз сярысь гожтэмын вал ини: «Куке мыным кыӵе ке уж оско вал, мон вань саклыкме солы висъялляй». Вань дырзэ сётыса ужан-тыршонэз сярысь тодаз вайыкуз, со вера: «Мон номыр сярысь но уг жаляськы, шумпотон вайись тодэ ваёнъёсы гинэ кылизы».

Иеговалы ужан-тыршонын тросгес шумпотонмы мед луоз шуыса, малпаськоно, малы Инмарлэн организацияз котькыӵе уж дуно луэ. Та ужъёсын валтӥсез — «Инмарлэн ужасьёсыз» луыны луонлык (1 Кор. 3:9). Дуно арбери кема дыр ӵоже чебер улоз, куке ми сое сузяса возиськомы. Озьы ик ми шумпотонмес ум ыштэ, куке малпаськомы, макем бадӟым дан Иеговаен ӵош ужаны. Ми ум ӵошатэ асьмелэсь тыршеммес мукет адямиослэн тыршеменызы. Со сяна, ми ум малпалэ, асьмелэн ужан-тыршонмы, мукетъёсызлэн ужан-тыршонэнызы ӵошатыса, сокем дуно уг луы шуыса (Гал. 6:4).

Иоанн тодӥз, дыр, солэн ужан-тыршонэз кема уз кыстӥськы шуыса, нош со ӧз но малпа, дыр, макем шӧдтэк шорысь со йылпумъяськоз (Иоанн 3:30). Асьме вакытысь 30-тӥ арын, Иисуслэн пылатӥськемез бере ӝыны ар ортчыса, Ирод эксэй Иоаннэз пытсэтэ пуктӥз. Нош та Иоаннэз ӧз дугдыты — со лэсьтӥз ваньзэ, мае быгатӥз, зэмлык сярысь веран понна (Марк 6:17—20). Мар юрттӥз солы шумпотыса улыны? Со саклыксэ висъяз солы, мае Иегова кулэен лыдъяз.

Пытсэтын пукыкуз, Иоанн кылӥз иворъёсты со сярысь, макем азинлыко вал Иисуслэн ужан-тыршонэз (Матф. 11:2; Лука 7:18). Иоанн оскиз, Иисус Мессия луэ шуыса, нош солэн тодэмез потэ вал, вылды, кызьы Иисус Мессия сярысь вань азьпалзэ ивортонъёсты быдэстоз. Библия верамъя, Мессиялы эксэй луоно вал. Возьматӥз-а со, Иисуслэн кивалтэмез ӝоген кутскоз ини шуыса? Мозмытозы-а  Иоаннэз пытсэтысь солы луыса? Иоаннлэн тросгес тодэмез потэ вал, мар карыны дасяськиз Иисус, соин ик Иоанн Иисус доры кык дышетскисьёссэ ыстӥз, со сярысь юан понна: «Тон-а Со, Кудӥз лыктыны кулэ, яке милемлы мукетсэ-а витёно?» (Лука 7:19). Иоанн доры берытскыса, дышетскисьёсыз веразы солы, кызьы Иисус паймымон амалэн висисьёсты бурмытӥз но дышетскисьёсты берен Иоанн доры ыстӥз, таӵе кылъёс вераса: «Синтэмъёс адӟыны кутско, чутъёс ветло, гижлочерен висисьёс чылкытало, пельтэмъёс кыло, кулэмъёс улӟо, куанеръёс Ӟеч Ивор тодыто» (Лука 7:20—22).

Со, мае дышетскисьёсыз Иоаннлы веразы, зэм но, солэсь мылкыдзэ ӝутӥз. Со адӟиз, Иисус вылын Мессия сярысь азьпалзэ ивортонъёс быдэсмо шуыса. Иисус Иоаннэз пытсэтысь ӧз мозмыты ке но, Иоанн оскиз, тыршемез юнме ӧй вал шуыса. Секыт дыръёсы но со шумпотон понна мугъёс шедьтылӥз.

Ми но, Иоанн кадь ик, саклыкмес висъяськомы ке солы, мае Иегова кулэен лыдъя, соку быгатомы ваньзэ чиданы но шумпотыса улыны (Кол. 1:9—11). Со понна милемлы Библиез лыдӟоно но со вылын малпаськоно, озьы ик асьмелы тодамы вайытоно, Инмарлы ужан-тыршонмы юнме луыны уг быгаты шуыса (1 Кор. 15:58). Тани мар вера Сандра: «Мон котькуд нунал Библиысь одӥг люкетсэ лыдӟисько но шӧдӥсько, Иеговаен кусыпъёсы юнмало шуыса. Со юрттэ мыным, ачим интые, нырысь ик Иегова сярысь малпаськыны». Ми Иеговалэн калыкезлэн ужъёсыз сярысь иворъёсты чакласькомы ке, соку асьмелэн шуг-секытъёсмы сярысь гинэ ум малпалэ, нош нырысь малпаломы Иеговалэн ужъёсыз сярысь. Сандра вера: «Интернет-телевидениямы котькуд толэзе потӥсь программаослы луыса ми асьмеды Инмарлэн организациезлы матынгес шӧдӥськомы, озьы ик соос юртто милемлы Инмарлэсь ужзэ шумпотыса быдэсъяны».

Иоанн Пылатӥсьлэн ужан-тыршонэз кема ӧз кыстӥськы, нош со «Илиялэн кадь духен но кужымен» тодытӥз. Илия сямен, Иоанн «асьмеос кадь ик адями вал» (Лука 1:17; Иак. 5:17). Асьмелэн сюлэммы тау каронэн тырмемын ке, озьы ик милям мылкыдмы вань ке лэсьтыны сое, мае Иегова кулэен лыдъя, соку ми но, югдуръёсмы шоры учкытэк, Инмарлы шумпотыса ужаны-тыршыны быгатомы.