1. Мар кароно христианъёслы улон басьтон понна бызёнын пумозяз вуыны?

 ХРИСТИАНЪЁС улон басьтон понна бызёнэ пырисько. Кин ке но кемалась ӧвӧл бызьыны кутскиз, кин ке но трос аръёс талэсь азьло, нош ваньмылы милемлы самой пумозяз бызьыны кулэ. Ӧтён, кудӥныз Павел Филиппы карын улӥсьёслы вазиськиз, сюресмылэн пумозяз вуыны милемлы кужым сётыны быгатэ. Нырысетӥ даурын Филиппы карысь вын-агайёс но сузэр-апайёс кӧня ке дыр ӵоже Иеговалы ужазы-тыршизы вал ини. Соос умой бызё вал, нош Павел соослы тодазы вайытӥз, макем кулэ юнэсь кыльыны. Солэн потэ вал, вын-агайёс но сузэр-апайёс азьланяз но солэсь адӟем мед карозы но вань кужмысьтызы пуктэм ужпумзэс мед быдэстозы шуыса (Флп. 3:14).

2. Малы ӧтён, кудӥныз Павел вазиськиз Филиппы карын улӥсьёслы, дырыз дыръя верамын вал?

² Ӧтён, кудӥныз Павел вазиськиз Филиппы карын улӥсьёслы, дырыз дыръя верамын вал. Филиппы карысь кенеш кылдэм дырысеныз ик уйылон-уллянъёсын пумиськылӥз. Ваньмыз кутскиз асьме вакытысь 50-тӥ ар котырын. Павел но Сӥла вазиськизы Инмарлэн куронэзлы Македоние мыныны, но соос Филиппы каре мынӥзы (Ап. уж. 16:9). Отын соос Лидия нимо кышномуртэз пумитазы. Иегова «солэсь сюлэмзэ усьтӥз», ӟеч иворез «кабыл басьтон понна» (Ап. уж. 16:14). Ӝоген со но соин ӵош улӥсьёс пылатӥськизы. Нош Шайтан дырзэ юнме ӧз быдты. Павелэз но Сӥлаез кутӥзы, карысь кузёос доры вайизы но янгыше уськытӥзы, соос карысь улонэз огыр-бугыр каро шуыса. Соосты жугизы, пытсэтэ пуктӥзы, нош берлогес карысь кошкыны косӥзы (Ап. уж. 16:16—40). Озьы ке но соос куректыса ӧз улэ. Нош мар каризы со выль кенешысь  вын-агайёс но сузэр-апайёс? Соос но ӧз сётске. Соос туж юнматскизы, куке адӟизы, кызьы Павел но Сӥла асьсэды возизы.

3. Мае вала вал Павел? Кыӵе юанъёсты ми эскеромы?

³ Павеллэн юн мылкыдыз вал куректытэк улыны (2 Кор. 4:16). Нош со вала вал: пумозяз вуон понна, пуктэм ужпум сярысь вунэтоно ӧвӧл. Малы дышетэ милемыз Павеллэн примерез? Кызьы асьме нуналъёсы улӥсь вын-агайёслэн но сузэр-апайёслэн учыръёссы возьмато, шуг-секытъёс дыръя но юн кыльыны луэ шуыса? Но кызьы вуоноезлы осконмы милемлы кужым сётэ куректытэк улыны?

4. Кызьы Павел, югдурез шоры учкытэк, ӟырдыт мылкыдын ужаны-тыршыны быгатӥз?

⁴ Малпаськомы, кыӵе югдурез вал Павеллэн, куке со Филиппы карын улӥсьёслы гожтэтсэ гожъяз. Римын одӥг коркан со жильыетын пукиз. Мукет интыостӥ ветлыса тодытыны со ӧз быгаты. Озьы ке но зэмлык сярысь со ас дораз лыктӥсь адямиослы вералляз. Со сяна, кыдёкысь кенешъёслы со гожтэтъёс гожъяз. Озьы ик туннэ но тросэз христианъёс, кудъёсыз висеменызы яке трос арлыдзы сэрен дорысьтызы потаны уг быгато, ас доразы котькуд лыктӥсь адямилы тупамон учыре Иегова сярысь верало. Эшшо соос гожъяло мылкыдэз ӝутӥсь гожтэтъёсты адямиослы, кудъёсыныз вын-агайёс но сузэр-апайёс пумиськыны ӧз быгатэ.

5. Мар юрттӥз Павеллы пуктэм ужпумезлэсь палэнскытэк улыны, Филиппыослы 3:12—14 лыдэ басьтыса?

⁵ Павел ӧз лэзьы, азьвыл лэсьтэм азинсконъёсыз яке янгышъёсыз пуктэм ужпумезлэсь сое мед палэнтозы шуыса. Со валэктӥз: «азьпала чуртнаськыса» мынон понна (яке бызёнлэн пумозяз вуон понна), «ортчемзэ-азьвылзэ вунэтыса» кельтоно. (Лыдӟе Филиппыослы 3:12—14.) Мар Павеллы люкетыны быгатэ вал? Нырысетӥез, иудейёс пӧлын лэсьтэм азинсконъёсыз. Нош Павел сое жуг-жаген лыдъяз (Флп. 3:3—8). Кыкетӥез, ассэ янгыше уськытон, христианъёсты азьло уйылыса-улляса воземез понна. Нош Павел та шӧдонэзлы ӧз сётскы. Куинетӥез, со малпаны быгатысал, Иегова понна трос лэсьтӥз ини но табере шутэтскыны кулэ шуыса. Со интые, Павел сыӵе малпанъёсты палэнтылӥз. Павел ужан-тыршонын трос лэсьтӥз, пӧртэм шуг-секытъёс шоры учкытэк: сое пытсэтэ пуктылӥзы, ньӧрен жугизы, изэн лэзьяса тышказы, корабль куашканэ-выёнэ учыралляз, нош дырын-дырын солэн сиёнэз но дӥськутэз тырмыт ӧй вал (2 Кор. 11:23—27). Павел трос азинсконъёс лэсьтӥз ке но, озьы ик трос шуг-секытъёс пыр потӥз ке но, со тодӥз, солы азьланяз но бызёно шуыса. Милям но сыӵе мылкыдмы луыны кулэ.

6. Мае пыртыны луэ азьвылэз-ортчемез пӧлы?

⁶ Кызьы Павеллэн примерез юрттэ милемлы ортчемзэ-азьвылзэ вунэтыны? Азьвыл лэсьтэм сьӧлыкъёсмы сэрен милемыз возьытлыкмы йыръе, вылды. Та учырын умой луысал Иисуслэсь мозмытӥсь курбонзэ мургес эскерыны. Сыӵе эскерон ортчытыса, озьы ик малпаськыса но вӧсяськыса возьытлыкмы милемыз пумен юнме уз йырйы ини. Оло нош, ми асьмеды курадӟытэмысь но дугдомы сьӧлыкъёсмы понна, кудъёссэ Иегова простить кариз ини. Малы эшшо дышетэ на милемыз Павеллэн примерез? Иеговалы тросгес ужан-тыршон понна, кин ке но ужзэ кельтӥз, кудӥзлы луыса со узыр луыны быгатысал. Быгатӥськомы-а ми та учырын азьвылзэ-ортчемзэ вунэтыны но кельтэм луонлыкъёсмы сярысь жалятэк улыны? (Лыд. 11:4—6; Екк. 7:10). Азьвылэз-ортчемез пӧлы озьы ик пыртыны луэ Иеговалы ужан-тыршонын лэсьтэм азинсконъёсмес яке шуг-секытъёсмес, кудъёсыныз милемлы  пумиськоно луиз. Зэм но, тодэ ваёнъёс со сярысь, кызьы Иегова милемлы вань со аръёс ӵоже юрттылӥз, милесьтым соин кусыпъёсмес юнмато. Нош милемлы малпано ӧвӧл, Иегова понна ми тырмыт лэсьтӥмы ини но табере шутэтскыны быгатӥськомы шуыса (1 Кор. 15:58).

7. Мар сярысь милемлы тодамы возёно, улон басьтон понна бызьыкумы, 1 Коринфъёслы 9:24—27 лыдэ басьтыса? Вералэ пример.

⁷ Павел умой вала вал, мае возьматэ Иисуслэн «тыршелэ» шуыса верамез (Лука 13:23, 24). Павел тодӥз, Христослы сямен ик, солы самой пумозяз туж тыршоно луоз шуыса. Соин ик христиан улонэз со бызёнэн ӵошатӥз. (Лыдӟе 1 Коринфъёслы 9:24—27.) Бызись адями тодаз возе, солы пумозяз вуоно шуыса, но мукетызлы саклыксэ уг висъя. Кылсярысь, куке бызён кыӵе ке карын ортчытӥське, ӵошатскисьёс саклыксэс висъяны быгато магазинъёслы яке мар ке но мукетызлы. Луэ-а син азе пуктыны, соос дугдозы но вузаськись арбериос шоры учкыса сылозы шуыса? Уг, уг луы, соослэн вормемзы потэ ук! Улон басьтон понна бызёнын милемлы но кулэтэмезлы саклыкмес висъяно ӧвӧл. Ми кутэм ужпуммы сярысь тодамы возиськомы ке но Павел сямен туж тыршиськомы ке, соку ми бакель каремын луомы.

8. Мар милемлы люкетыны быгатэ ужаны-тыршыны?

⁸ Ойдолэ эскеромы куинь мугъёсты, кудъёсыз милемлы люкетыны быгато ужаны-тыршыны. Со пӧлы пыртыны луэ быдэсмымтэ малпанъёсты, лябӟись тазалыкез но кема кыстӥськись визь сынаськонъёсты. Милесьтым мылкыдмес ӝутозы соос, кинъёс сыӵе шуг-секытъёс пыр потӥзы (Флп. 3:17).

9. Кызьы ми вылын шӧдӥськыны быгато быдэсмымтэ малпанъёс?

⁹ Быдэсмымтэ малпанъёс. Зэм но, ми туж возьмаськомы, ку Иеговалэн кыл сётонъёсыз быдэсмозы. Куке пророк Аввакум Иеговаез куриз Иудеяысь лек ужъёсты ӝоггес быдтыны, Инмар солэсь мылкыдзэ ӝутӥз чидаса возьманы (Авв. 2:3). Нош малпанъёсмы кема дыр ӵоже уг быдэсмо ке, милям мылкыдмы куашка. Соин сэрен милям сюлэммы но куректыны быгатэ (Мад. 13:12). Ӵапак сыӵе учыр кылдӥз XX даурлэн кутсконаз. Со дыре  тросэз зырӟем христианъёс малпазы, 1914-тӥ арын инме тубозы шуыса. Нош со озьы ӧз луы. Мар юрттӥз христианъёслы, быдэсмымтэ малпанзы шоры учкытэк, Инмарлы оскымон кыльыны?

10. Кызьы асьсэды возизы одӥг кузпалъёс, кудъёсызлэн малпанъёссы ӧз быдэсме?

¹⁰ Эскеромы кык христианъёслэсь учырзэс, кудъёсыз Инмарлы оскымон кылизы, быдэсмымтэ малпанъёссы шоры учкытэк. Ройал Спатц агай пылатӥськиз 1908-тӥ арын, куке солы 20 арес вал. Со быдэсак оскиз, ӝоген инме тубоз шуыса. Куке 1911-тӥ арын со Перл сузэрлы кышноез луыны ӵектӥз, со шуиз: «Тон тодӥськод, мар луоз 1914-тӥ арын. Кузпалъяськеммы потэ ке, милемлы дыртоно!» Кызьы соос асьсэды возизы, куке 1914-тӥ арын инме ӧз тубе? Соос куректыса ӧз улэ, малы ке шуоно соос понна валтӥсез вал Инмарлэсь эриксэ быдэсъян, нош инме тубон ӧй вал. Соослэн юн мылкыдзы вал пумозяз бызьыны. Ройал но Перл ӟырдыт мылкыдын Иеговалы ужазы-тыршизы но трос дасо аръёс ӵоже, инме тубытозязы, солы оскымон кылизы. Зэм но, тӥляд туж потэ адӟемды, кызьы Инмар аслэсьтыз нимзэ чылкытатоз, вылӥ кивалтэтэзлэсь шонерлыко луэмзэ возьматоз но кыл сётонъёссэ быдэстоз. Юн оске: Иеговаен пуктэм дыре со одно ик озьы луоз. Нош со дырозь ойдолэ ӟырдыт мылкыдын Иеговалы ужаломы-тыршомы, ум лэзе быдэсмымтэ малпанъёслы мылкыдмес куашкатыны но ум кутске улонэз басьтон понна калленгес бызьыны.

11, 12. Малы ми азьланяз но быгатӥськомы улон басьтон понна бызьыны, ляб тазалыкмы шоры но учкытэк? Вералэ пример.

¹¹ Лябӟись тазалык. Пумозяз вуон понна, бызисьлэн юн тазалыкез луыны кулэ. Нош соослы, кинъёс улонэз басьтон понна бызё, со одно ик кулэ ӧвӧл. Соослэн но, кинъёслэн тазалыксы ляб, луыны быгатэ юн осконзы но Иеговалы ужаны-тыршыны ӟырдыт мылкыдзы (2 Кор. 4:16). Одӥг пол Артур Секорд b агайлэн тунсыко вераськонэз вал сое эмъясь сузэрен, кудӥз Вефильын ужаз-тыршиз. Со дыре агайлэн тазалыкез туж ляб вал ини. Солы 88 арес вал, нош соос пӧлысь 55 арзэ со Вефильын ужаз-тыршиз. Сузэрмы, солы юрттон понна, изён инты дораз лыктӥз но лякытэн шуиз: «Макем трос тон адӟид ук ас даурад! Тон сомында Иегова понна лэсьтӥд. Озьы-а, Секорд агай?» Нош Артур, ортчем улонэз сярысь гинэ малпаса, ӧз улы. Со сузэр шоры учкиз но пальпотыса шуиз: «Со озьы. Нош милям азинсконъёсмы улонын валтӥсь инты уг басьто. Иеговалы оскымон кылён трослы кулэгес луэ».

¹² Оло нош, тӥ трос аръёс ӵоже Иеговалы ужаськоды-тыршиськоды но ляб тазалыкты сэрен троссэ лэсьтыны уд быгатӥське ини.  Киостэс эн лэзе! Оске: Иегова туж дунъя ваньзэ, мае тӥ лэсьтӥды азьвыл аръёсы (Евр. 6:10). Тодады возе: Иеговалы оскымон луонмес уг возьматы со, кӧня ми лэсьтӥськомы ужан-тыршонын. Ми возьматӥськомы, Иеговаез вань сюлмысьтымы яратӥськомы шуыса, куке шумпотонэн но осконэн улӥськомы, озьы ик куке лэсьтӥськомы ваньзэ, мае быгатӥськомы (Кол. 3:23). Иегова вала милемыз но лэсьтыны луонтэмзэ уг куры (Марк 12:43, 44).

13. Мар пыр потоно луизы Анатолий но Лидия но кызьы соослэн учырзы юрттэ милемлы юн кыльыны, визь сынаськонъёс шоры учкытэк?

¹³ Кема кыстӥськись визь сынаськонъёс. Иеговалэн куд-ог ужась-тыршисьёсыз трос дасо аръёс ӵоже шуг-секытъёсты но уйылон-уллянъёсты чидано луо. Тани Анатолий Мельник c агайлэн учырез. Солы 12 арес гинэ вал, куке солэсь атайзэ кутӥзы, пытсэтэ пуктӥзы, нош собере Сибире келязы, кудӥз Молдоваын улон интыезлэсь 7 000 иськем кемын вал. Ар ортчыса, Анатолиез, солэсь анайзэ но анаезлэсь анай-атайзэ озьы ик Сибире келязы. Берлогес соослэн луонлыксы кылдӥз кенешлэн пумиськонъёсаз ветлыны, кудъёсыз мукет гуртын ортчытъяськизы. Нош со понна соослы ӟар кезьыт дыръя 30 иськем лымы вылтӥ пыдын мыноно вал. Собере Мельник агаез Лидия нимо кышноеныз но одӥг аресъем нылыныз люкизы но пытсэтэ пуктӥзы, кытын со куинь ар ортчытӥз. Та визь сынаськонъёс шоры учкытэк, Анатолий но солэн семьяез Иеговалы оскымон ужазы-тыршизы. Али Анатолийлы 82 арес, но со Шор Азиысь филиаллэн комитетаз ужа-тырше. Ойдолэ Анатолийлэсь но Лидиялэсь адӟем каромы но Иеговалы ужан-тыршонын лэсьтомы ваньзэ, мае быгатӥськомы, азьло кадь ик юн луыса (Гал. 6:9).

14. Мар кариз Павел, ужпумзэ быдэстон понна?

¹⁴ Павел оскиз, пумозяз бызьыны но пуктэм ужпумзэ быдэстыны быгатоз шуыса. Зырӟем христиан мурт луыса, со оскиз «Инмысь кузьым» басьтыны. Озьы ке но со вала вал, со понна солы тыршоно шуыса (Флп. 3:14). Филиппы карысь христианъёслы гожтэтаз Павел вера тунсыко ӵошатон сярысь, кудӥз юрттысал соослы быдэстоно ужпумзы сярысь тодазы возьыны.

15. Кыӵе ӵошатон сярысь вераз апостол Павел Филиппы карын улӥсьёслы гожтэтаз но кызьы со соослэсь мылкыдзэс ӝутӥз тыршыны пуктэм ужпумзэс быдэстыны?

¹⁵ Павел Филиппы карын улӥсьёслы тодазы вайытӥз, соослэн дорзы инмын шуыса (Флп. 3:20). Малы соослы та сярысь тодазы  возёно вал? Со дыре тросэз данъяськизы Рим кунлэн адямиез луонэн d. Нош со, кыӵе кунлэн адямиосыз луо вал зырӟем христианъёс, даногес вал. Малы ке шуоно инмын улон соослы тросгес луонлыкъёс сётӥз. Рим кунлэн адямиез луон, соин ӵошатыса, сокем дуно ӧз поты ини. Соин ик Павел Филиппы карын улӥсьёслэсь мылкыдзэс ӝутӥз: «Христослэн Ӟеч Иворезлэн куронэзлы ярамон улэ» (Флп. 1:27). Та кылбурысь «улэ» кылэз озьы ик берыктыны луэ «кыӵе ке кунлэн адямиосыз кадь асьтэды возе» шуыса. Инмын улон басьтыны тыршыса, зырӟем христианъёс милемлы туннэ умой адӟем карон возьмато.

16. Филиппыослы 4:6, 7 лыдэ басьтыса, мар милемлы кароно, кытын гинэ улыны милям осконмы медаз луы?

¹⁶ Кыӵе гинэ медаз луы милям осконмы, инмын-а яке рай музъем вылын-а улыны, милемлы азьланяз но пуктэм ужпуммес быдэстыны тыршоно. Ойдолэ ноку ум жалялэ со сярысь, мае ми кельтӥмы. Номыр но милемлы медаз люкеты Иеговалы ужаны-тыршыны (Флп. 3:16). Тӥ туж кема возьмаськоды ини, дыр, ку Инмарлэн кыл сётонъёсыз быдэсмозы. Оло нош, тӥ егитэсь ӧвӧл ини, кужымды но сокем трос ӧвӧл ини. Яке тӥ трос аръёс ӵоже шуг-секытъёсты но уйылон-уллянъёсты чидаса улӥськоды. Кыӵе гинэ югдурды тӥляд медаз луы, «номыр понна но эн сюлмаське». Сюлворыса вӧсяськыкуды, «Инмар азьын мар куронды вань, курелэ», но со сётоз тӥледлы сыӵе каньыллык, кудӥз сярысь тӥ ӧд но малпалэ. (Лыдӟе Филиппыослы 4:6, 7.)

17. Мае ми эскеромы вуоно статьяын?

¹⁷ Бызись мурт бызёнлэн самой пумаз вань кужымзэ сётэ, пумозяз вуон понна. Со сямен ик, милемлы но вунэтоно ӧвӧл ужпуммы сярысь — улон басьтон понна бызёнын пумозяз вуыны. Иеговалы ужан-тыршонын лэсьтомы ваньзэ, мае быгатӥськомы, но тодамы возёмы туж умой азьпал улон сярысь, кудӥз милемыз азьланяз возьма. Кызьы ми азьланяз но кулэ луись сюрестӥ бызьыны быгатӥськомы? Вуоно статья юрттоз милемлы валаны, мае нырысетӥ интые пуктоно, озьы ик юрттоз «ӟечсэ бырйыны быгатӥсесь» луыны (Флп. 1:9, 10).