1. Кин юрттӥз Филиппы карын кенешез кылдытыны?

 КУКЕ Павел, Сӥла, Лука но Тимофей вуизы Филиппы каре, соос адӟизы, отын трос адямиос уло шуыса, кудъёсызлэн Эксэйлык сярысь иворез кылэмзы потэ. Та ӟырдыт мылкыдоесь ньыль вын-агайёс кенешез кылдытыны юрттӥзы, но со интыысь дышетскисьёс огазе люкаськылыны кутскизы куно карись Лидия нимо сузэр дорын, вылды (Ап. уж. 16:40).

2. Кыӵе шуг-секытъёсын ӝоген пумиськиз Филиппы карысь кенеш?

² Ӝоген выль кенеш шуг-секытъёсын пумиськиз. Шайтан мылкыдзэс ӝутӥз соослэсь, кинъёс зэмлыкез адӟемпотостэм каризы, оскымон христианъёслэн тодытон ужзылы лек пумитъяськыны. Павелэз но Сӥлаез кутӥзы, ньӧръёсын ӝугизы но пытсэтэ пуктӥзы. Мозмытскемзы бере соос выль дышетскисьёс доры лыктӥзы но соослэсь мылкыдзэс ӝутӥзы. Собере Павел, Сӥла но Тимофей Филиппыысь кошкизы, нош Лука та каре ик кылиз, дыр. Мар луиз та кенешен азьланяз? Иеговалэн духезлэн юрттэменыз, али пылатӥськем вын-агайёс но сузэр-апайёс ӟырдыт мылкыдын тодытыны азьланьтӥзы (Флп. 2:12). Павел соосын данъяськыны быгатӥз!

3. Мар сярысь вӧсяськиз апостол Павел, Филиппыослы 1:9—11 лыдэ басьтыса?

³ Ог дас ар ортчыса, Павел гожтэт гожтӥз Филиппы карысь кенешлы. Та гожтэтэз лыдӟыса, адӟыны луэ, макем зол Павел огъя оскисьёссэ яратӥз. Со соослы гожтӥз: «Мон тӥледыз ваньдэс Иисус Христослэн яратонэныз яратӥсько» (Флп. 1:8). Павел озьы ик вераз, со соос понна вӧсяське шуыса. Тӥ соглаш луоды, дыр, Павеллэн сюлмысь кылъёсыз туннэ милемлы  пайда вайыны быгато шуыса. Ойдолэ лыдӟомы, мар Павел гожтӥз Филиппы карын улӥсьёслы. Библиын гожтэмын: «Мон вӧсяськисько, тодон-валан, визьлык басьтыса, тӥляд яратонды эшшо но эшшо мед будоз, эскерыны мед быгатоды, мар тужгес но кулэез луэ, но озьы шектэмесь мед луоды, Христослэн нуналыз вуытозь, мукетъёсызлы канжаськон медад луэ, но Инмарез данъян, ушъян понна Иисус Христос тӥледыз шонер улонлэн емышеныз тыр мед кароз» (Филиппыослы 1:9—11) b.

4. а) Кызьы Иегова возьматӥз, милемыз туж яратэ шуыса, 1 Иоаннлэсь 4:9, 10 лыдэ басьтыса? б) Макем зол милемлы Инмарез яратыны кулэ?

⁴ Иегова возьматӥз, макем зол со милемыз яратэ, куке музъем вылэ аслэсьтыз Пизэ ыстӥз, со милям сьӧлыкъёсмы понна мед кулоз шуыса. (Лыдӟе 1 Иоаннлэсь 4:9, 10.) Инмарлэн яратонэз милесьтым но мылкыдмес ӝутэ сое яратыны (Рим. 5:8). Макем зол милемлы Инмарез яратыны кулэ? Сое валаны юртто Иисус Христослэн фарисейлы верам кылъёсыз: «Инмардэ Кузё-Инмарез вань сюлмыныд, вань лулыныд, вань визьмыныд яраты» (Матф. 22:36, 37). Зэм, милям вань сюлмысьтымы Инмарез яратэммы потэ. Озьы ик милям потэ, нуналысь нуналэ сое яратонмы мед юнмалоз шуыса. Филиппы карын улӥсьёслы Павел гожтӥз, соослэн яратонзы «эшшо но эшшо» будыны кулэ шуыса. Мар юрттоз милемлы Инмарез эшшо но золгес яратыны?

5. Мар кароно, Инмарез золгес яратон понна?

⁵ Инмарез яратон понна, милемлы сое тодыны кулэ. Библиын гожтэмын: «Кинлэн яратонэз ӧвӧл, со Инмарез уг тоды, малы ке шуоно Инмар — со яратон» (1 Иоанн 4:8). Апостол Павел валэктӥз: ми Инмарез золгес яратыны кутскиськомы соку, куке со сярысь зэмлыкез тодӥськомы но пӧртэм юанъёс пумысен солэсь малпанзэ валаськомы (Флп. 1:9). Библиез дышетыны кутскыкумы, ми Инмар сярысь ӧжыт тодӥськомы на вал, озьы ке но сое яратыны быгатӥмы. Но макем тросгес ми Иегова сярысь тодӥмы, сокем золгес сое яратыны кутскимы. Тӥни малы туж кулэ Инмарлэсь Кылзэ ялан дышетыны но со вылын малпаськыны (Флп. 2:16).

6. Мар эшшо кароно на, яратонмы мед будоз шуыса, 1 Иоаннлэсь 4:11, 20, 21 лыдэ басьтыса?

⁶ Куке ми валаськомы, макем зол милемыз Инмар яратэ, милям мылкыдмы ӝутске вын-агайёсмес яратыны. (Лыдӟе 1 Иоаннлэсь 4:11, 20, 21.) Ми малпаськомы, дыр, вын-агайёсмес но сузэр-апайёсмес яратыны капчи луоз шуыса, малы ке шуоно ми Иеговалы ужаськомы-тыршиськомы но солэн паймымон сямъёсызлы адӟем карыны тыршиськомы. Со сяна, ми Иисус Христослэсь адӟем кариськомы, кудӥз милемыз сокем зол яратэ, ми понна улонзэ но сётӥз. Озьы ке но ог-огмес яратыны косонлэсь куддыръя кылзӥськыны капчи ӧвӧл. Тодамы ваёмы, мар луиз Филиппы карысь кенешын.

7. Малы дышетэ милемыз визь-кенеш, кудзэ Павел сётӥз Еводиялы но Синтихиялы?

⁷ Еводия но Синтихия ӟырдыт мылкыдо сузэръёс вал, кудъёсыз апостол Павелэн ӵош ужазы-тыршизы. Озьы ке но соос ог-огенызы керетӥзы, малы ке шуоно соослэн сямъёссы туж пӧртэмесь вал, вылды. Куке Павел гожтэтсэ ыстӥз кенешлы, кудаз Еводия но Синтихия ужазы-тыршизы, со нимысьтыз вераз та сузэръёс сярысь но туж куриз соосты огмылкыдын улыны (Флп. 4:2, 3). Павел малпаз, быдэс кенешлы вераны кулэ шуыса та кылъёсты: «Ваньзэ керӟегъяськытэк, керетытэк лэсьтэ» (Флп. 2:14). Оскыны луэ: та шонерак сётэм визь-кенешъёс Еводиялы  но Синтихиялы гинэ ӧз юрттэ, нош озьы ик Филиппы карысь мукет вын-агайёслы но сузэр-апайёслы ог-огзэс юнгес яратыны юрттӥзы.

8. Малы милемлы вын-агайёсмес но сузэр-апайёсмес яратыны секыт луыны быгатэ но кызьы вормоно та шуг-секытэз?

⁸ Еводиялы но Синтихиялы сямен, милемлы но вын-агайёсмес но сузэр-апайёсмес яратыны секыт луыны быгатэ, малы ке шуоно милям сяммы вань нырысь ик соослэсь тырмымтэоссэс адӟыны. Ми ваньмы котькуд нунал янгышаськомы. Мукет адямиослэн янгышъёссы йырысьтымы уг пото ке, соку соосты яратонмы сӥя. Шуом, кыӵе ке агай милемлы юрттыны вунэтӥз Эксэйлык юртэз чылкытатыны, но милям солы йырмы кур луиз. Ми тодамы вайыны кутскимы ке солэсь вань янгышъёссэ, соку йырмы эшшо но кур луоз, нош яратонмы сӥялоз. Тӥляд но сыӵе учырды вал ке, малпаське: Иегова адӟе милесьтым но тырмымтэосмес, со агайлэсь но тырмымтэоссэ. Озьы ке но, номыр шоры учкытэк, Инмар милемыз но, сое но яратэ. Соин ик милемлы Инмарлэсь адӟем кароно но адямиослэсь умой сямъёссэс адӟыны тыршоно. Ми вань кужмысьтымы вын-агайёсмес яратыны тыршиськомы ке, соку ми эшшо но огкылысь уломы (Флп. 2:1, 2).

9. Мае возьмато Павеллэн «тужгес но кулэез» кылъёсыз Филиппы карын улӥсьёслы гожтэтысьтыз?

⁹ Святой духлэн валтэменыз, Павел мылкыдзэс ӝутӥз Филиппы карысь вын-агайёслэсь но сузэр-апайёслэсь, нош озьы ик мукет христианъёслэсь но, «эскерыны... мар тужгес но кулэез луэ» (Флп. 1:10, ВД). «Тужгес но кулэез» пӧлы пыре Иеговалэсь нимзэ чылкытатон, солэсь эриксэ быдэсъян, озьы ик кенешын тупаса но огкылысь улонэз утён (Матф. 6:9, 10; Иоанн 13:35). Со улонамы валтӥсез луэ ке, ми зэмзэ но Иеговаез яратӥськомы.

10. Мар кароно, Иегова милемыз шектэм адямиосын мед лыдъялоз шуыса?

¹⁰ Озьы ик Павел вераз, милемлы шектэмесь луоно шуыса. Шектэм луон уг возьматы тырбыдэс луэмез. Ми ум быгатӥське Иегова кадь шектэмесь луыны. Нош Иегова милемыз шектэмесь шуыса лыдъялоз, куке ми лэсьтӥськомы ваньзэ, мае быгатӥськомы, яратонмы мед будоз шуыса, но куке эскериськомы сое, мар тужгес но кулэез луэ. Но ми вын-агайёслы яратонмес возьматыны быгатомы, кылсярысь, мукетъёсызлы канжаськон ӧм луэ ке.

11. Малы милемлы мукетъёсызлы канжаськон луыны уг яра?

¹¹ «Мукетъёсызлы канжаськон» луоно ӧвӧл шуыса алон туж кулэ луэ. Мар мукет адямиосты канжаськытыны быгатэ? Со, кыӵе шутэтскон амал, дӥськут но уж бырйиськомы. Со, мае ми бырйиськомы, умойтэм ӧвӧл, вылды. Нош сак луоно, куке милям быръёнмы кинэ ке вӧсь каре. Иисуслэн верамезъя, ми сэрен дуно вын-агайёсмылэн но сузэр-апайёсмылэн Иеговаен кусыпъёссы лябӟо ке, умойгес луысал, солэн чыртыяз секыт из думысалзы ке но зарезь пыдсы выйытысалзы ке (Матф. 18:6).

12. Малы дышетэ милемыз пионер луыса ужась-тыршись кузпалъёслэн учырзы?

¹² Эскеромы, кызьы одӥг кузпалъёс, кудъёсыз пионер луыса ужало-тыршо, Иисуслэсь алонзэ лыдэ басьтӥзы. Соос тыршизы кенешын, кудаз кемалась ӧвӧл пылатӥськизы мукет кузпалъёс. Та кузпалъёс будӥзы семьяын, кудаз троссэ лэсьтыны уг лэзё вал. Соин ик соос малпазы, христиан муртъёслы кинотеатре ветлыны уг яра шуыса,— со фильмъёсы но, кудъёсаз номыр умойтэмзэ уг возьмато. Соос туж паймизы, куке тодӥзы, со пионеръёс фильм учкыны ветлӥзы шуыса. Соку пионеръёс ужпум кутӥзы кинотеатре ветлытэк улыны со дырозь, куке со  кузпалъёс возьытлыксэс дышетозы, озьы ик куке ӟечсэ но уродзэ висъяны быгатозы (Евр. 5:14). Озьы пионеръёс возьматӥзы, кузпалъёсты ярато шуыса, кылъёсынызы гинэ уг, нош озьы ик ужъёсынызы но (1 Иоанн 3:18; Рим. 14:19—21).

13. Кызьы, асьмеос но валатэк, адямилэсь сьӧлык лэсьтыны мылкыдзэ ӝутыны быгатӥськомы?

¹³ Озьы ик ми мукетъёсызлы канжаськон луыны быгатӥськомы соку но, куке, асьмеос но валатэк, соослэсь сьӧлык лэсьтыны мылкыдзэс ӝутӥськомы. Кызьы со озьы луыны быгатэ? Шуом, адями Библиез дышетыны кутскиз но, кема дыр ӵоже нюръяськыса, трос вина юон сямзэ вормыны быгатӥз. Со вала, солы одӥг ымтыр но вина юыны уг яра шуыса. Ас улоназ со трос воштӥськонъёс лэсьтэ но пылатӥське. Кӧня ке дыр ортчыса, сое куное ӧте мукетыз христиан мурт, кудӥз али пылатӥськем агаез кужмысь косэ вина юыны. Со вера: «Табере тон пылатӥськемын, но Иегова святой духез пыр тонэ юнматоз. Святой духлэн емышез пӧлы возиськыны быгатон пыре. Нош возиськыны быгатон вань ке, ӧжыт юыны но луоз». Пуктэ син азяды, мар луысал али пылатӥськем агаен, со та визь-кенешлэсь кылзӥськысалыз ке!

14. Кызьы христиан пумиськонъёсамы ми дышетскиськомы уже кутыны куронъёсты, кудъёсыз гожтэмын Филиппыослы 1:10?

¹⁴ Христиан пумиськонъёсамы ми дышетскиськомы уже кутыны куронъёсты, кудъёсыз гожтэмын Филиппыослы 1:10. Кызьы? Нырысетӥез, со, мае ми эскериськомы пумиськонъёсын, возьматэ милемлы, мае Иегова тужгес но кулэен лыдъя. Кыкетӥез, шектэмесь луон понна, ми дышетскиськомы улонэ  пыртыны сое, мае тодӥмы. Куинетӥез, пумиськонъёсын милесьтым мылкыдмес ӝуто «яратыса, ӟеч ужъёс лэсьтыса улыны» (Евр. 10:24, 25). Куке вын-агайёсмы милесьтым мылкыдмес ӝуто, ми эшшо но золгес яратӥськомы Инмарез но вын-агайёсмес. Куке сюлэммы тырмемын Инмарез но вын-агайёсты яратонэн, ми вань кужмысьтымы тыршомы, мукетъёсыз ми сэрен медаз канжаське шуыса.

15. Мае возьматэ «шонер улонлэн емышеныз тыр» луыны верам?

¹⁵ Павел юн вӧсяськиз, Филиппы карысь христианъёс «шонер улонлэн емышеныз тыр» мед луозы шуыса (Флп. 1:11). Зэм но, та емыш пӧлы пыре вал Иеговаез но солэсь калыксэ яратэмзы, озьы ик Иисуслы но вуоно улонлы паймымон осконзы сярысь верамзы. Филиппыослы гожтэтаз Павел эшшо одӥг тунсыко ӵошатон сярысь вераз: «Тӥ шунды кадь пиштыса улэ» (Флп. 2:15). Со тодамы вайытэ Иисус Христослэсь кылъёссэ, кудӥз дышетскисьёсызлы шуиз: «Тӥ — дуннелэн югытэз» (Матф. 5:14—16). Озьы ик со ас пытьыетӥз мынӥсьёссэ косӥз дышетскисьёсты дасяны но «музъемлэн пумысеныз пумозяз ик» адӟись-ивортӥсьёс луыны (Матф. 28:18—20; Ап. уж. 1:8). Ми «шонер улонлэсь емышсэ» вайиськомы, ӟырдыт мылкыдын та уже пыриськиськомы ке.

16. Кызьы Павеллэн кылъёсыз, кудъёсыз Филиппыослы 1:12—14 гожтэмын, возьмато, секыт югдуръёсы но «шунды кадь пиштыса» улыны луэ шуыса? (Учке вылбамысь суредэз.)

¹⁶ Кыӵе гинэ югдурмы милям медаз луы, ми «шунды кадь пиштыса» улыны быгатӥськомы. Куддыръя со, мае ми шуг-секытэн лыдъяськомы, милемлы ӟеч иворез вераны луонлык сётэ. Тодамы ваёмы апостол Павеллэсь учырзэ. Филиппы карын улӥсьёслы гожтэтсэ со гожъяз, Римын одӥг коркан  жильыетын пукыкуз. Но жильыос солы люкетыны ӧз быгатэ возьмаськисьёслы но со доры лыктӥсьёслы тодытыны. Та секыт югдуръёсы но Павел ӟырдыт мылкыдын тодытӥз, но со юрттӥз вын-агайёслы юн мылкыдын но «чик кышкатэк, эшшо но золгес Инмар кылэз тодытыны». (Лыдӟе Филиппыослы 1:12—14; 4:22.)

17. Вералэ пример, кызьы вын-агайёс, шуг-секытъёс шоры учкытэк, тодытэмысь уг дугдо.

¹⁷ Тросэз вын-агайёс но сузэр-апайёс Павел кадь кышкасьтэмесь. Со шаеръёсын но, кытын кивалтӥсьёс люкето ужмес нуыны, озьы ик коркась корка ветлыны, вын-агайёс но сузэр-апайёс тодытэмысь уг дугдо. Ӟеч иворез веран понна, соос мукет луонлыкъёсты утчало (Матф. 10:16—20). Одӥгаз сыӵе шаерын ёросэз чаклась ивортӥсьёслы ӵектӥз ӵыжы-выжыоссы, бускельёссы, ӵош дышетскисьёссы, ӵош ужасьёссы но тодмооссы шоры тодытон понна инты шоры кадь учкыны. Кык ар куспын та ёросын кенешъёссылэн лыдзы трослы йылӥз. Отын, кытын ми улӥськомы, кивалтӥсьёс ужмес нуыны уг люкето, вылды. Озьы ке но ми та амалоесь вын-агайёслэн но сузэр-апайёслэн учырысьтызы пайдазэ басьтыны быгатӥськомы: котьку луонлык утчано тодытон уже тросгес пыриськыны но осконо, Иегова котькыӵе шуг-секытъёс пыр потыны кужым сётоз шуыса (Флп. 2:13).

18. Мар карыны милям мылкыдмы луыны кулэ?

¹⁸ Туннэ милемлы тужгес но кулэ кылзӥськыны Павеллэн кылъёсызлэсь, кудъёсыз гожтэмын Филиппы карын улӥсьёслы гожтэтаз. Ойдолэ валаны тыршомы, мар тужгес но кулэез луэ, шектэмесь луомы, мукетъёсызлы канжаськон ум луэ но шонер улонлэсь емышсэ ваёмы. Соку яратонмы эшшо но эшшо будоз, но ми сюлмаськись Атаймес, Иеговаез, данъяломы.