1. Мар вераз Давид Иеговалэн зӥбыт-востэм луэмез сярысь?

 БЫГАТӤСЬКОМЫ-А ми вераны, Иегова зӥбыт-востэм луэ шуыса? Бен, быгатӥськомы. Давид одӥг пол вераз: «Тон мыным утиськон щитэз сётӥськод, Тынад зӥбыт-востэм луэмед монэ вылӥе ӝутэ» (2 Экс. 22:36, ВД; Пс. 17:36). Та кылъёсты веракуз, Давид тодаз вайиз, вылды, со дырез, куке атаезлэн юртаз Самуил пророк лыктӥз. Инмар Самуилэз вӧйын зырӟыны куриз сое, кин Саул интые Израильлы эксэй луоз. Тямыс пиос пӧлысь Давид самой пичиез вал ке но, Иегова ӵапак сое бырйиз (1 Экс. 16:1, 10—13).

2. Мае ми эскеромы та статьяын?

² Давид одно ик соглаш луысал, дыр, соин, мар вераз Иегова сярысь псаломъёсты гожъясь: «Со инбам шоры, музъем шоры учкон понна мыкырске, тузон пушкысь куанерез султытэ... кураськисез ӝутэ, нимо-даноосын... огазе пуктэ» (Пс. 112:6—8). Та статьяын ми эскеромы, кызьы Иегова зӥбыт-востэм сямзэ возьматылӥз но малы ми солэсь дышетскыны быгатӥськомы. Со сяна, ми тросгес тодомы зӥбыт-востэм сям сярысь, куке эскеромы Саул эксэйлэсь, Даниил пророклэсь но Иисус Христослэсь примеръёссэс.

3. Кызьы Иегова милемын ассэ возе но мае со возьматэ?

³ Иеговалэсь зӥбыт-востэм сямзэ адӟыны луэ отысь, кызьы со ассэ возе тырбыдэстэм ужась-тыршисьёсыныз. Милям ужам-тыршеммы Инмарлы ярамон луэ. Со сяна, со милемыз аслаз эшъёсыныз лыдъя, озьы ик солэн потэ, милям соин матысь кусыпъёсмы мед луозы шуыса (Мад. 3:32). Ми соин эшъяськыны мед быгатомы шуыса, со лэсьтӥз нырысетӥ  вамыш — милям сьӧлыкъёсмы понна аслэсьтыз Пизэ курбонлы сётӥз. Зэм, Иегова — туж гажась-жалясь Инмар!

4. Кыӵе луонлык сётӥз милемлы Иегова но малы?

⁴ Ойдолэ малпаськомы на со сярысь, кызьы эшшо Иегова зӥбыт-востэм сямзэ возьматэ. Адямиез кылдытыкуз, Иегова ачиз быгатэ вал ужпум кутыны, кызьы ми уломы. Нош со озьы ӧз лэсьты. Инмар милемыз, аслыз укшатыса, кылдытӥз но милемлы луонлык сётӥз бырйыны, кызьы ми уломы. Милемын ӵошатыса, Иегова туж вылӥ инты басьтэ ке но, со бадӟым саклыксэ висъя солы, кыӵе ужпумъёс ми кутӥськомы. Солэн потэ: ми солэсь вань сюлмысьтымы мед кылзӥськомы, малы ке шуоно сое яратӥськомы но валаськомы, солэсь кылзӥськон милемлы котьку пайда вае шуыса (К. Зак. 10:12; Ис. 48:17, 18). Ми Иеговалы туж тау кариськомы, зӥбыт-востэм сямзэ возьматэмез понна!

5. Кызьы Иегова дышетэ милемыз зӥбыт-востэм луыны? (Учке вылбамысь суредэз.)

⁵ Иегова дышетэ милемыз зӥбыт-востэм луыны аслаз примерез вылын. Быдэс дунне вылын Иеговалэсь визьлыкоез нокин ӧвӧл. Озьы ке но со, дась луыса, лыдэ басьтэ мукетъёсызлэсь но малпанъёссэс. Кылсярысь, Иегова Пиезлы аслыз юрттыны лэзиз ваньзэ кылдытыны (Мад. 8:27—30; Кол. 1:15, 16). Иегова ачиз ваньзэ быгатэ ке но, куд-ог ужъёсты со мукетъёсызлы сётэ. Кылсярысь, Инмар инмысь Эксэйлыказ Иисусэз Эксэй кариз, озьы ик 144 000 пиосмуртъёсты но кышномуртъёсты соин ӵош кивалтыны пуктӥз (Лука 12:32). Зэм но, Иегова Иисусэз дасяз Эксэй но Быдӟым священник луыса ужаны-тыршыны (Евр. 5:8, 9). Озьы ик со дышетэ соосты но, кинъёс Иисусэн ӵош кивалтозы, нош котькуд вамышсэс со чакласа уг улы. Иегова тодэ: соос ваньзэ лэсьтозы солэн эрикезъя (Усьт. 5:10).

6, 7. Кызьы семьяослэн йыръёссы, тӧроос но анай-атайёс Иеговалэсь адӟем карыны быгато?

 ⁶ Инмысь Атаймы, кудӥзлы нокинлэсь юрттэт кулэ ӧвӧл, куд-ог ужъёссэ мукетъёссэ быдэстыны куре. Соин милемлы но озьы ик кароно ӧвӧл-а? Кылсярысь, семьяослэн йыръёссы но тӧроос Иеговалэсь адӟем каро, куке куд-ог ужъёссэс мукетъёссэ быдэстыны куро, но собере соослэсь котькуд вамышсэс чакласа уг уло. Солы луыса тӥ асьтэос вань ужъёстэс лэсьтыны быгатоды, мукет адямиосты малы ке вылезлы дышетоды, озьы ик соослы валаны юрттоды, соос но кулэ луись ужъёсты быдэсъяны быгато шуыса (Ис. 41:10). Малы эшшо дышетскыны быгато на Иеговалэсь соос, кинъёслы со кивалтэт сётӥз?

⁷ Библиысь адӟиське: Иеговалы тунсыко, мар малпало кыӵе ке юан пумысен солэн пиосыз, кылчинъёс (3 Экс. 22:19—22). Анай-атайёс, кызьы тӥ Иеговалэсь адӟем карыны быгатӥськоды? Тупась учыре нылпиостылэсь юалэ, кызьы, соос малпамъя, умойгес луысал со яке та ужез быдэстыны. Ӵектэмзы тӥледлы тупа ке, соослэн верамзыя лэсьтэ.

8. Кызьы Иегова чидамзэ возьматӥз Авраамлы но Сарралы?

⁸ Иеговалэн зӥбыт-востэм луэмез адӟиське соку но, куке со мае ке чида. Кылсярысь, Иегова аслаз ужась-тыршисьёсызлы чиданзэ возьматэ, куке соос туж ик уг оско, солэн кутэм ужпумъёсыз шонер луо шуыса, но со сярысь солы лякытэн вераны тыршо. Инмар сак кылзӥз Авраамез, кудӥз сюлмаськиз, Иегова Содомез но Гоморраез быдтыны ужпум кутӥз шуыса (Ул.-выл. 18:22—33). Озьы ик тодады вае, кызьы Иегова ассэ возиз Авраамлэн кышноеныз, Сарраен. Сарра серектӥз, куке кылӥз Иеговалэсь кылсётонзэ, бадӟым арлыдын нылпи ваёз на шуыса. Нош Иегова Сарралы вожзэ ӧз потты (Ул.-выл. 18:10—14). Инмар солы гажамзэ возьматӥз.

9. Малы анай-атайёс но тӧроос Иеговалэсь дышетскыны быгато?

⁹ Анай-атайёс но тӧроос, малы тӥ Иеговалэсь дышетскыны быгатӥськоды? Кызьы тӥ асьтэды возиськоды, куке нылпиосты яке кенешысь вын-агайёсты но сузэр-апайёсты кутэм ужпумъёсыныды соглаш уг луо? Тӥ соку ик вераськоды-а, соос шонертэм малпало шуыса? Яке соослэсь малпанзэс валаны тыршиськоды? Куке соос, кинъёслы Иегова кивалтыны право сётӥз, солэсь адӟем каро, соку со ваньмызлы пайда вае — семьяослы но, кенешъёслы но. Озьыен, ми эскеримы, кызьы, Иеговалэсь адӟем карыса, зӥбыт-востэм луыны быгатӥськомы. Нош али малпаськомы, кызьы Инмарлэн Кылысьтыз мукет примеръёс милемлы зӥбыт-востэм луыны юртто.

10. Кызьы милемлы юрттэ Инмарлэн Кылыз?

¹⁰ Иегова, Быдӟым дышетӥсьмы, дышетэ милемыз мукет примеръёс вылын но, кудъёсыз сярысь солэн Кылаз гожтэмын (Ис. 30:20, 21). Ми тросэзлы дышетскыны быгатӥськомы адямиослэсь, кудъёсыз сярысь вераське Библиын но кудъёсыз возьматъязы Инмарлы ярамон сямъёсты, озьы ик зӥбыт-востэм сямез но. Озьы ик ми дышетскыны быгатӥськомы соослэсь но, кинъёс та умой сямъёсты ӧз возьматъялэ (Пс. 36:37; 1 Кор. 10:11).

11. Малы дышетэ милемыз Сауллэн учырез?

¹¹ Ойдолэ малпаськомы, мар луиз Саул эксэен. Егит дыръяз со зӥбыт-востэм адями вал. Со тодӥз, мае лэсьтыны быгатэ, нош мае уг быгаты. Со сяна, куд-ог ужъёсты быдэстыны со уг но дӥсьты вал (1 Экс. 9:21;  10:20—22). Нош эксэй луэмез бере кӧня ке дыр ортчыса, Саул ас вылаз оскиськыны кутскиз. Кылсярысь, Самуил пророкез возьмакуз, солэн чиданэз ӧз тырмы. Сауллы зӥбыт-востэм луоно но осконо вал, Иегова ас калыксэ утёз шуыса. Нош со интые, со курбон вайиз, сое лэсьтыны правоез ӧй вал ке но. Со понна Саул Иеговалы ярамон ӧй вал ни, нош дыр ортчыса, кивалтэмысь но дугдӥз (1 Экс. 13:8—14). Та учыр дышетэ милемыз, ас вылад оскиськыны уг яра шуыса!

12. Кызьы Даниил зӥбыт-востэм луэмзэ возьматӥз?

¹² Саулэн ӵошатыса, Даниил пророк милемлы умой адӟем карон возьматӥз. Быдэс улонэз ӵоже со Иеговалы ужаз-тыршиз но котьку солэсь кивалтэтсэ утчаз. Одӥг пол Иегова юрттӥз Данииллы Навуходоносорлэсь уйвӧтсэ валэктыны. Нош пророк ӧз вера, со ачиз сое валэктыны быгатӥз шуыса. Даниил зӥбыт-востэм луэмзэ возьматӥз но Иеговаез данъяз (Дан. 2:26—28). Малы дышетэ милемыз та учыр? Куке вын-агайёс но сузэр-апайёс кылзыны ярато сцена вылысь верам речьёсмес яке милям вань трос тунсыко учыръёсмы, кудъёсыз ужан-тыршонэн герӟаськемын, соку милемлы тодамы возёно, ваньмыз понна Иеговаез данъяны кулэ шуыса. Зӥбыт-востэм сям милемлы валаны юрттэ: Иеговалэн юрттэмезтэк ми номыре карыны ӧй быгатысалмы (2 Кор. 4:7). Асьмеды озьы возьыса, ми Иисуслэсь но адӟем кариськомы.

13. Малы дышето милемыз Иисуслэн кылъёсыз, кудъёсыз гожтэмын Иоаннлэсь 5:19, 30?

¹³ Иеговалэн тырбыдэс Пиез луыса но, Иисус котьку аслаз Атаез вылэ оскиськиз. (Лыдӟе Иоаннлэсь 5:19, 30.) Иисус ноку ӧз малпа Иеговалэсь кивалтыны правозэ аслыз карыны. Филиппыослы 2:6 вераське, Иисус «Инмарен огкадь луон борды кутӥськыса ӧз улы» шуыса. Иисус Атаезлэсь кылзӥськиз: со вала вал, котьмае лэсьтыны уг быгаты шуыса, но Атаезлэсь кивалтыны правозэ гажаз.

14. Кызьы ассэ возиз Иисус, куке солэсь куризы сое, мае лэсьтыны солэн правоез ӧй вал?

¹⁴ Тодамы ваёмы, мар вераз Иисус, куке Иаков но Иоанн анаенызы ӵош куризы солэсь сое, мае лэсьтыны Иисуслэн правоез ӧй вал. Со соку ик вераз, Атаез гинэ ужпум кутэ шуыса, кин инмысь Эксэйлыкын бурпалаз пуксёз, нош кин — паллян палаз (Матф. 20:20—23). Озьы Иисус возьматӥз, ваньзэ лэсьтыны правоез ӧвӧл шуыса.  Со зӥбыт-востэм вал но ноку ӧз лэсьты сое, мае Иегова ӧз лэзьы (Иоанн 12:49). Кызьы ми Иисуслэсь адӟем карыны быгатӥськомы?

15, 16. Кызьы уже кутоно кылъёсты, кудъёсыз гожтэмын 1 Коринфъёслы 4:6?

¹⁵ Ми Иисуслэсь зӥбыт-востэм луэмзэ адӟем кариськомы, куке уже кутӥськомы Библиысь визь-кенешез: «Мар гожтэмын, солэн сьӧраз потыны уг яра» (1 Кор. 4:6). Соин ик, куке милесьтым визь-кенеш куро, ас малпанмес кужмысь ӵектоно ӧвӧл, озьы ик, нырысь умой малпаськытэк, верано ӧвӧл. Со интые, саклык висъяно со визь-кенешъёслы, кудъёсыз гожтэмын Библиын но публикациосамы. Озьы ми зӥбыт-востэмен возьматомы, ваньзэ ум тодӥське шуыса но, милям малпанъёсынымы ӵошатыса, Инмарлэн визь-кенешъёсыз котьку умойгес луо шуыса (Усьт. 15:3, 4).

¹⁶ Зӥбыт-востэм сям юрттэ милемлы Иеговаез данъяны. Но вань на мукет мугъёс, малы та сямез возьматоно. Ойдолэ эскеромы, кызьы зӥбыт-востэм луон шумпотон вае но адямиосын тупаса улыны юрттэ.

17. Малы зӥбыт-востэм луон милемлы шумпотон вае?

¹⁷ Зӥбыт-востэм луон милемлы шумпотон вае. Малы? Куке ми валаськомы, ваньзэ карыны ум быгатӥське шуыса, соку тау каромы адямиосты милемлы юрттэмзы понна. Ойдолэ тодамы ваёмы, мар луиз, куке Иисус гижлочерен висись дас адямиосты бурмытӥз. Соос пӧлысь одӥгез гинэ валаз, кышкыт висёнэзлэсь ачиз бурмыны ӧй быгатысал шуыса, но Иисусэз тау карыны берытскиз. Та зӥбыт-востэм адями басьтэм юрттэт понна тау кариз но Инмарез данъяз (Лука 17:11—19).

18. Кызьы зӥбыт-востэм луон мукетъёсыныз тупаса улыны юрттэ? (Римъёслы 12:10).

¹⁸ Зӥбыт-востэм адямиослы мукетъёсыныз тупаса улыны но умой эшъёс шедьтыны капчигес.  Малы? Малы ке шуоно сыӵе адямиос мукетъёсызлы оско но тодо, соослэн умой сямъёсы вань шуыса. Куке вын-агайёс но сузэр-апайёс ужан-тыршонэн герӟаськем ужъёссэс умой быдэсъяло, зӥбыт-востэм адямиос соос понна шумпото, соосты сюлмысь ушъяло но гажало. (Лыдӟе Римъёслы 12:10.)

19. Малы вылтӥяськись луоно ӧвӧл?

¹⁹ Нош вылтӥяськись адямиослы мукетъёсты ушъяны секыт — соослы кельше, куке соосты асьсэды ушъяло. Вылтӥяськись адямиослэн сямзы вань асьсэды мукетъёсыныз ӵошатыны но тыршыны соослэсь умойгес луыны. Мукетъёссэ дышетэм интые но куд-ог ужъёссэс соослы сётэм интые, сыӵе адямиос малпаны быгато: «Ваньзэ шонер лэсьтэмед потэ ке, лэсьты сое ачид». Вылтӥяськись адямилэн мукетъёсызлэсь умойгес луэмез потэ, озьы ик со вожъяськыны кутске, куке соос мае ке но солэсь умойгес лэсьто. Ӵем дыръя сыӵе адямиослы мукетъёсыныз эшъяськыны секыт. Ми шӧдӥмы ке, вылтӥяськыны кутскимы шуыса, милемлы Иеговалы ӟырдыт вӧсяськоно, со милемлы визьмес выльдыны мед юрттоз но та сям сюлмамы выжы медаз лэзьы шуыса (Рим. 12:2).

20. Малы милемлы зӥбыт-востэм луоно?

²⁰ Ми туж тау кариськомы Иеговалы, милемлы адӟем карон возьматэмез понна! Ми адӟиськомы, аслаз ужась-тыршисьёсыныз со ассэ зӥбыт-востэм возе шуыса, но милям солэсь адӟем кареммы потэ. Со сяна, милям адӟем кареммы потэ соослэсь, кинъёс вашкала дыръёсы зӥбыт-востэмен Иеговалы ужазы-тыршизы. Ойдолэ котьку Инмармес данъяломы, малы ке шуоно со данэз басьтыны ярамон луэ (Усьт. 4:11). Соку ми пырак дауръёс ӵоже Иеговалэн эшъёсыз луыны быгатомы, малы ке шуоно со зӥбыт-востэм адямиосты яратэ.