1. Кыӵе дан милемлы сётӥз Иегова?

 ИЕГОВАЛЭН кенешаз луыны — ми понна туж бадӟым дан! Ми огкылысь но шумпотыса улӥськомы, куке вын-агайёсынымы но сузэр-апайёсынымы ӵош Иеговалы ужаськомы-тыршиськомы. Кыӵе уж аслаз кенешаз Иегова тӥледлы висъяз?

2. Кыӵе примерез кутӥз апостол Павел аслаз гожтэтъёсаз?

² Та юанлы валэктон шедьтон понна, эскеромы примерез, кудзэ кутӥз апостол Павел, святой духлэн валтэмез улсын гожтэтъёссэ гожтыкуз. Котькуд та гожтэтъёсаз Павел кенешез ӵошатӥз адямилэн мугорыныз, нош кенешысь христианъёсты — мугорлэн люкетъёсыныз (Рим. 12:4—8; 1 Кор. 12:12—27; Еф. 4:16).

3. Мае ми эскеромы та статьяын?

³ Кыӵе гинэ калыкысь но кыӵе гинэ семьяысь ми медам потэ, озьы ик кӧня гинэ коньдонмы но кыӵе гинэ дышетскеммы милям медаз луы, Иеговалэн кенешаз ми дуно луиськомы. Ваньмы ми быгатӥськомы кенешез юнматыны. Та статьяын ми малпаськомы, малы милемыз дышетыны быгатэ пример, кудӥз сярысь вераз Павел. Нырысетӥез, ми тодомы, малы ми пӧлысь котькудӥз кенешын дуно луэ. Кыкетӥез, ми эскеромы, мар кароно, куке милемлы секыт валаны, ми дуно луиськомы шуыса. Но куинетӥез, эскеромы, малы быдэстыны кулэ ужез, кудзэ Иегова аслаз кенешаз ми пӧлысь котькудӥзлы висъяз.

4. Малы дышето милемыз кылъёс, кудъёсыз гожтэмын Римъёслы 12:4, 5?

⁴ Пример, кудзэ вераз Павел, валаны юрттэ, ми пӧлысь котькудӥз Иеговалэн семьяяз дуно луэ шуыса. Павел кутске таӵе кылъёсын: «Кызьы одӥг мугорамы трос люкетъёсыз, но котькудӥзлэн люкетлэн аслаз кулэлыкез, озьы ик асьмеос но: асьмеос трос ӵошен, нош Христосэн огазе кариськиськомы ке, соку одӥг мугор кылдытӥськомы, нош нимамы ке — ог-огмылы пӧртэм люкетъёс луиськомы» (Рим. 12:4, 5). Мар сярысь Павеллэн верамез потэ вал? Кенешын ваньмызлы пӧртэм ужъёс висъямын ке но, ми пӧлысь котькудӥз Иеговалы дуно потэ.

5. Кыӵе «саламъёс-кузьымъёс» Иегова кенешлы сётӥз?

⁵ Иеговалэн организацияз ваньмылы милемлы кыӵе ке но уж висъямын. Ойдолэ нырысь вераськомы соос сярысь, кинъёслы кивалтон уж оскемын (1 Фес. 5:12; Евр. 13:17). Христос пыр Иегова аслаз кенешезлы «саламъёс-кузьымъёс сётъяз» (Еф. 4:8, 11). Та «саламъёс-кузьымъёс» пӧлы пыро Кивалтӥсь кенешысь вын-агайёс но соослэн юрттӥсьёссы, филиаллэн комитетысьтыз вын-агайёс, ёросэз чакласьёс, библейской школаосты нуись вын-агайёс, тӧроос но кенешлы юрттӥсьёс. Вань та агайёс святой духен пуктэмын, Иеговалэн дуно ыжъёсыз сярысь сюлмаськон понна но кенешез юнматон понна (1 Пётр 5:2, 3).

6. Мар карыны тыршо святой духен пуктэм вын-агайёс, 1 Фессалоникаослы 2:6—8 лыдэ басьтыса?

⁶ Иегова вын-агайёсты святой духен пуктэ, соос пӧртэм ужъёсты мед быдэсъялозы шуыса. Кызьы мугорлэн пӧртэм люкетъёсыз, кылсярысь киос яке пыдъёс, быдэс мугорлы пайда ваё, озьы ик святой духен пуктэм вын-агайёс но быдэс кенешлы пайда вайыны тыршо. Соос ушъямез уг утчало. Соослэн вын-агайёсты но сузэр-апайёсты юнматэмзы потэ. (Лыдӟе 1 Фессалоникаослы 2:6—8.) Ми Иеговалы тау кариськомы быгатӥсь вын-агайёс понна, кудъёсыз асьсэды жалятэк ужало-тыршо!

7. Кызьы Иегова бакель каре соосты, кинъёс, вань дырзэс сётыса, солы ужало-тыршо?

⁷ Быдэс дунне вылын вань вын-агайёс но сузэр-апайёс, кудъёсыз миссионеръёс, нимысьтыз пионеръёс но пионеръёс луыса ужало-тыршо. Соос ужпум кутӥзы вань дырзэс сётыса тодытыны но дышетскисьёсты дасяны. Солы луыса та вын-агайёс но сузэр-апайёс трос адямиослы юрттӥзы Иисус Христослэн дышетскисьёсыз луыны. Та ужась-тыршисьёслэн коньдонзы но ваньбурзы трос ӧвӧл ке но, Иегова соосты жалятэк бакель каре (Марк 10:29, 30). Ми яратӥськомы та вын-агайёсмес но сузэр-апайёсмес, озьы ик дунъяськомы соослэсь тыршемзэс.

8. Малы Иеговалы дуно потэ котькудӥз, кин ӟеч иворез тодытэ?

⁸ Возьматэ-а со, вын-агайёс но вань дырзэс сётыса ужась-тыршисьёс гинэ кенешын кулэ луись ужъёсты быдэсъяло шуыса? Уг, уг возьматы! Котькудӥз, кин ӟеч иворез тодытэ, Инмарлы но кенешлы дуно луэ (Рим. 10:15; 1 Кор. 3:6—9). Зэмзэ вераса, кенешлэн одӥгез валтӥсь ужпумез — Христослэсь дышетскисьёссэ дасяны (Матф. 28:19, 20; 1 Тим. 2:4). Ваньмыз, кинъёс кенешен ӵош тодыто,— пылатӥськемъёс но, пылатӥськымтэ ивортӥсьёс но,— нырысь ик та ужлы саклыксэс висъяны тыршо (Матф. 24:14).

9. Малы ми дунъяськомы кенешысь сузэр-апайёсмес?

⁹ Сузэр-апайёслы но Иегова кенешын кулэ луись уж сётӥз. Инмар дунъя кышноослэсь, анайёслэсь, палкышноослэсь но бызьымтэ сузэръёслэсь ужам-тыршемзэс.  Библиын вераське трос кышномуртъёс сярысь, кудъёсыз адӟем карымон осконзэс возьматӥзы. Та кышномуртъёс Иеговалы ярамон вал, малы ке шуоно соос возьматӥзы визьлыксэс, осконзэс, ужан-тыршонын ӟырдыт мылкыдзэс, кышкасьтэм луэмзэс, шырыт сямзэс но ӟеч ужъёсты лэсьтыны дась луэмзэс (Лука 8:2, 3; Ап. уж. 16:14, 15; Рим. 16:3, 6; Флп. 4:3; Евр. 11:11, 31, 35). Ми туж тау кариськомы Иеговалы кенешысьтымы сузэръёс понна, кудъёсыз сыӵе ик умой сямъёсты возьмато!

10. Малы ми дунъяськомы арлыдо вын-агайёсмес но сузэр-апайёсмес?

¹⁰ Озьы ик ми шумпотӥськомы, кенешын трос арлыдоос вань шуыса. Соос пӧлысь куд-огъёсыз быдэс улонзы ӵоже Иеговалы оскымон ужало-тыршо. Нош куд-огъёсыз алигес зэмлыкен тодматскизы. Кызьы гинэ медам луы, соос пӧлысь тросэзлы нюръяськоно луэ шуг-секытъёсын, кудъёсыз тазалыкенызы герӟаськемын. Соин ик кенешын но тодытон ужын соос уг быгато лэсьтыны сомында, кӧня лэсьтэмзы потэ. Та шоры учкытэк, арлыдо вын-агайёсмы но сузэр-апайёсмы вань кужмысьтызы тыршо тодытыны, мукетъёсызлэсь мылкыдзэс ӝутыны но соосты дышетыны! Соослэн ужам-тыршемзы милемлы трос пайда вае. Иеговалы но, милемлы но соос зэмзэ ик чебересь пото (Мад. 16:31).

11, 12. Кыӵе шӧдонъёсты тӥляд кылдо, кенешысьтыды егитъёс сярысь малпаськыкуды?

¹¹ Со сяна, малпаське егитъёс сярысь. Дуннеын, кудӥныз кивалтэ Шайтан но кудӥз солэн малпанъёсыныз тырмемын, егитъёс трос шуг-секытъёсын пумиськыло (1 Иоанн 5:19). Та шоры учкытэк, соос кенешлэн пумиськонъёсаз пырисько, тодыто но осконзэс кышкатэк утё. Со милемыз туж шумпоттэ. Зэм, тӥ, егитъёс, Иеговалэн кенешаз туж кулэ луись ужез быдэсъяськоды! (Пс. 8:3).

¹² Озьы ке но куд-ог вын-агайёслы но сузэр-апайёслы секыт оскыны, соос кенешлы дуно пото шуыса. Кызьы валано, ми пӧлысь котькудӥз кенешын дуно луэ шуыса? Ойдолэ эскеромы.

13, 14. Малы куд-огъёсыз малпало, соос кенешлы дуно уг пото шуыса?

¹³ Малы эшшо дышетэ на милемыз пример, кудзэ вераз Павел? Со саклыксэ висъяз шуг-секытлы, кудӥз туннэ но кылдыны быгатэ. Тросэзлы секыт оскыны, соос кенешлы дуно луо шуыса. Павел гожтэ: «Пыд шуиз ке: „Мон мугорлэн люкетэз ӧвӧл, малы ке шуоно мон ки ӧвӧл“. Соин сэрен со мугорлэн люкетэз уг луы шат? Нош пель шуиз ке: „Мон мугорлэн люкетэз уг луиськы, малы ке шуоно мон син ӧвӧл“. Соин сэрен со мугорлэн люкетэз уг луы шат?» (1 Кор. 12:15, 16). Мар верамез потэ вал Павеллэн?

¹⁴ Тӥ асьтэды мукет вын-агайёсын но сузэр-апайёсын ӵошатыны кутскиды ке, соку малпаны быгатоды, кенешлы дуно уд потӥське шуыса. Оло нош, тӥ адӟиськоды: кенешын вань соос, кинъёс туж быгато дышетыны, ужъёсты радъяны но мукетъёсыз сярысь сюлмаськыны. Тӥ малпаськоды, дыр, тӥляд сыӵе быгатонлыкъёсты ӧвӧл шуыса. Соку вераны луоз: тӥ зӥбыт-востэм адями (Флп. 2:3). Но тодады возе: тӥ асьтэды ялан ӵошатӥды ке соосын, кинъёслэн нимысьтыз быгатонлыкъёссы вань, тӥляд мылкыдды куашканы быгатоз. Кызьы вераз Павел, тӥ малпаны но быгатоды, кенешлы дуно уд луиське шуыса. Мар кароно, сыӵе шӧдонъёсты вормон понна?

15. Мае валаны кулэ быгатонлыкъёсмы пумысен, 1 Коринфъёслы 12:4—11 лыдэ басьтыса?

¹⁵ Малпаське: нырысетӥ даурын Иегова куд-ог христианъёслы святой духсэ сётӥз, соос паймымон ужъёс лэсьтыны мед быгатозы шуыса. Озьы ке но соос одӥг кадь паймымон ужъёсты лэсьтыны ӧз быгатэ. (Лыдӟе 1 Коринфъёслы 12:4—11.) Быгатонлыкъёс, кудъёссэ Иегова та христианъёслы сётӥз, пӧртэмесь вал ке но, Инмар соос пӧлысь котькудзэ дунъяз. Туннэ Иегова паймымон ужъёс лэсьтыны быгатонлык милемлы уг сёты. Но валаны луэ: милям быгатонлыкъёсмы пӧртэмесь ке но, ваньмы ми Иеговалы дуно луиськомы.

16. Кыӵе визь-кенешез, кудзэ апостол Павел вераз, милемлы уже кутоно?

 ¹⁶ Ойдолэ асьмеды мукет христианъёсын ӵошатыса ум улэ. Со интые, уже кутомы апостол Павеллэсь визь-кенешсэ: «Котькудӥз аслэсьтыз ужъёссэ ачиз мед эскероз-чаклалоз, соку со, мукетъёсын ассэ ӵошатытэк, аслаз азинсконъёсыныз ушъяськыны быгатоз» (Гал. 6:4).

17. Кыӵе пайда вайыны быгатэ Павеллэн визь-кенешез?

¹⁷ Куке ми уже кутомы Павеллэсь визь-кенешсэ но асьмеды мукетъёсыныз ум ӵошатэ, соку валаны быгатомы, милям но нимысьтыз быгатонлыкъёсмы вань шуыса. Кылсярысь, тӧролы сцена вылысен речьёсты вераны секыт ке но, со дышетскисьёсты дасяны туж быгатэ, вылды. Яке со мукет тӧроос кадь ужъёссэ радъяны уг быгаты ке но, со туж лякыт но яратӥсь тӧро, кудӥзлы вазиськыны капчи, Библиысь визь-кенеш курон понна. Яке со котьку дась ас дораз куноосты пумитаны (Евр. 13:2, 16). Ми валаськомы ке, милям но быгатонлыкъёсмы вань шуыса, соку адӟомы, кыӵе пайда кенешлы вайыны быгатӥськомы. Озьы ик ми ум вожъяське, дыр, вын-агайёслы но сузэр-апайёслы, кудъёсызлэн мукет быгатонлыкъёссы вань.

18. Кызьы умоятыны луэ быгатонлыкъёсты, кудъёсыз кулэ луо дышетскисьёсты дасян понна?

¹⁸ Ми пӧлысь котькудмылы умоятоно быгатонлыкъёсмес, кудъёсыз кулэ луо тодытон но дышетскисьёсты дасян ужын. Милемлы юрттон понна, Иегова дышетэ милемыз организациез пыр. Кылсярысь, арня куспын ортчись пумиськонын милемлы сёто кивалтэт, кудӥз азинлыко ужаны-тыршыны юрттэ. Тыршиськоды-а тӥ тодытыкуды уже кутыны сое, мае тодӥськоды со пумиськонын?

19. Мар юрттоз тӥледлы Эксэйлыкез тодытӥсьёслы школаын дышетскыны?

¹⁹ Эшшо одӥгез туж умой луонлык, кызьы быгатонлыкъёсты умоятыны луэ,— со Эксэйлыкез тодытӥсьёслы школаын дышетскон. Та Школаын дышетскыны быгато 23—65 аресъем вын-агайёс но сузэр-апайёс, кудъёсыз, вань дырзэс сётыса, ужало-тыршо. Тӥ малпаськоды, вылды, отын дышетскыны ноку уд быгатэ шуыса. Но эн малпалэ со сярысь, мар тӥледлы люкетэ та Школаын дышетскыны. Со интые, малпалэ, малы тӥляд потэ отын дышетскемды. Собере малпаське, мар кароно, пуктэм ужпумдэс быдэстон понна. Тӥ туж тыршиды ке, Иеговалэн юрттэменыз, быгатоды лэсьтыны сое, мар тӥледлы быдэстонтэм потэ вал.

20. Малы милемыз дышето кылъёс, кудъёсыз гожтэмын Римъёслы 12:6—8?

²⁰ Пример, кудзэ вераз Павел, милемыз эшшо малы ке дышетэ на. Ойдолэ малпаськомы солэн кылъёсыз вылын, кудъёсыз гожтэмын Римъёслы 12:6—8 (лыдӟе). Та кылбуръёсын Павел нош ик саклыкмес висъя, кенешысь вын-агайёслэн но сузэр-апайёслэн пӧртэм пумо быгатонлыкъёссы вань шуыса. Со сяна, со пусъе: милемлы быгатонлыкъёсмес кутоно, кенешез юнматон понна.

21, 22. Малы дышето милемыз Роберт но Феличе агайёслэн учыръёссы?

²¹ Тани одӥг агайлэн учырез. Нималомы сое Роберт. Со кунгож сьӧрын ужаз-тыршиз, нош собере сое куризы вордскем шаераз берытскыны, Вефильын ужан-тыршон понна. Вын-агайёс Робертэз оскытӥзы: воштӥськонъёс уг возьмато, со мае ке шонертэм лэсьтӥз шуыса. Озьы ке но ачиз Роберт мукет сямен малпаз. Со тодаз вае:  «Трос толэзьёс ӵоже мынам мылкыды куашкамын вал, малы ке шуоно малпай, мыным оскем ужез быдэстыны ӧй быгаты шуыса. Куддыръя Вефильын ужан-тыршонме но кельтэме потэ вал». Мар юрттӥз солы нош ик шумпотыса ужаны-тыршыны? Одӥг тӧро солы тодаз вайытӥз: ужъёс, кудъёссэ Иегова милемлы азьвыл сётъяз, дасяло милемыз солы, мае ми али быдэсъяськомы. Роберт валаз: ортчемез шоры солы учконо ӧвӧл ини, нош саклыксэ висъяно солы, мар со туннэ карыны быгатэ.

²² Та выллем югдуре сюриз Феличе Эпископо агай но. 1956-тӥ арын со кышноеныз йылпумъяз Галаад школаез но Боливиын ёросэз чаклась луыса ужаны-тыршыны кутскиз. 1964-тӥ арын соослэн пизы вордӥськиз. Феличе вераз: «Милемлы туж секыт вал яратоно ужан-тыршонмес кельтыны. Вераны кулэ, мон понна быдэс ар юнме ортчиз — мон асме жаляса улӥ. Но Иеговалэн юрттэменыз, ваньмыз шоры мон мукет сямен учкыны кутски но саклыкме висъяй выль ужлы — атай луонлы». Вал-а тӥляд Роберт но Феличе агайёслэн выллем шӧдонъёсты? Сюлмаськиськоды-а тӥ, азьвыл ужъёстэс уд быдэсъяське ини шуыса? Тӥледлы та шӧдонъёс тодмо ке, тырше саклыктэс висъяны солы, мар али карыны быгатӥськоды Иегова понна но вын-агайёс понна. Кутэ быгатонлыкъёстэс, мукетъёсызлы юрттон понна. Со тӥледлы шумпотон ваёз.

23. Мар милемлы карыны кулэ? Мае ми эскеромы вуоно статьяын?

²³ Иеговалы ми пӧлысь котькудӥз дуно луэ. Инмарлэн потэ: ми мед шӧдомы, солэн семьяез луиськомы шуыса. Тае тодады возьыса, малпаське, кызьы юнматыны луэ кенешысь вын-агайёсты но сузэр-апайёсты. Собере малпандэс быдэстыны тырше. Соку тӥ валалоды, дыр, кенешлы пайда вайыны быгатӥськоды шуыса. Нош кызьы учконо кенешысь вын-агайёсмы но сузэр-апайёсмы шоры? Кызьы возьматоно, ми соосты яратӥськомы но дунъяськомы шуыса? Эскеромы сое вуоно статьяын.