1. Малы Иегова улонэз кылдытӥз?

 КЫӴЕ ке дыр ӵоже Иегова одӥгназ улӥз ке но, солы мӧзмыт ӧй вал. Шудо луон понна, солы нокин но кулэ ӧй вал. Озьы ке но Инмарлэн мылкыдыз луиз, мукетъёсыз но улонлы шумпотыса мед улозы шуыса. Яратон Иеговалэсь мылкыдзэ ӝутӥз улонэз кылдытыны (Пс. 35:10; 1 Иоанн 4:19).

2. Кыӵе шӧдонъёссы вал Иисуслэн но кылчинъёслэн, куке соос адӟизы, кызьы Иегова ваньзэ кылдытӥз?

² Нырысь Иегова кылдытӥз аслэсьтыз Пизэ, Иисусэз. Собере, солэн юрттэменыз, Инмар кылдытӥз ваньзэ мукетсэ, озьы ик трос миллион кылчинъёсты но (Кол. 1:16). Иисус шумпотӥз, Атаеныз ӵош ужаны быгатӥз шуыса (Мад. 8:30). Кылчинъёслэн но шумпотыны мугзы вал. Соос адӟизы, кызьы Иегова но солэн «кибашлы пуктӥськись-лэсьтӥськисез», Иисус, инбамез но музъемез кылдытӥзы. Кылчинъёс Инмарез данъязы, куке со музъемез кылдытӥз. Озьы ик соос Инмарез данъязы соку но, куке со ваньзэ мукетсэ кылдытӥз, тужгес но, куке адямиос кылдытэмын вал (Иов 38:7; Мад. 8:31). Иеговалэн вань кылдытэмъёсысьтыз солэсь яратонзэ но визьлыксэ адӟыны луэ (Пс. 103:24; Рим. 1:20).

3. Кыӵе луонлык сётэ Иисус Христослэн мозмытӥсь курбонэз, 1 Коринфъёслы 15:21, 22 лыдэ басьтыса?

³ Иеговалэн малпамезъя, адямиос пырак дауръёс ӵоже улыны кулэ вал рай музъем вылын, кудзэ со кылдытӥз. Нош Адам но Ева Инмарлы пумит сьӧлыказы бере, соос но соослэн нылпиоссы пырак дауръёс ӵоже улыны ӧз быгатэ ни (Рим. 5:12). Кызьы кылдэм югдур шоры учкиз Иегова?  Со соку ик вераз, адямиосты утёз шуыса, но валэктӥз, кызьы сое лэсьтоз (Ул.-выл. 3:15). Иегова ужпум кутӥз аслэсьтыз Пизэ, Иисусэз, курбонлы сётыны. Солы луыса Адамлэн но Евалэн нылпиоссы сьӧлыклэсь но кулонлэсь мозмытскыны быгатозы. Озьы Иегова пырак улон сётыны быгатоз котькинлы, кин мылкыд кароз солы ужаны-тыршыны (Иоанн 3:16; Рим. 6:23; лыдӟе 1 Коринфъёслы 15:21, 22).

4. Кыӵе юанъёсты ми эскеромы та статьяын?

⁴ Куке ми малпаськиськомы Инмарлэн кулэмъёсты улӟытыны кылсётонэз сярысь, милям куд-ог юанъёсмы кылдо. Кылсярысь, кызьы ортчоз кулэмъёсты улӟытон? Быгатомы-а ми тодманы матысь адямиосмес, кудъёсыз улӟытэмын луозы? Кыӵе шумпотон ваёз милемлы улӟытон? Мае ми тодомы Иеговалэн яратонэз, визьлыкез но чиданэз сярысь улӟытонлы луыса? Ойдолэ малпаськомы та юанъёс вылын.

5. Малы вераны луэ, кулэмъёс одӥг дыре улӟытэмын уз луэ шуыса?

⁵ Куке Иегова, Пиезлэн юрттэменыз, трос миллион адямиосты улӟытъялоз, ваньзы соос одӥг дыре улӟытэмын уз луэ, дыр. Малы озьы вераны луоз? Музъем вылын улӥсь адямиослэн лыдзы туж ӝог будысал ке, улон огыр-бугыр луысал. Нош Иегова лэсьтоз ваньзэ, озьы медаз луы шуыса. Со тодэ: адямиос тупаса мед улозы шуыса, ваньмыз радызъя луыны кулэ (1 Кор. 14:33). Иегова Инмар визьлыксэ но чиданзэ возьматӥз, куке Иисусэн ӵош кӧня ке дыр ӵоже Музъемез дасяз, со вылын адямиос мед улозы шуыса. Озьы ик Иисус но сюрс ар ӵоже кивалтэмез дыръя визьлыксэ но чиданзэ возьматоз. Соку со Армагеддон пыр потэмъёсын ӵош Музъемез дасялоз соослы, кинъёс улӟытэмын луозы.

6. Апостолъёслэсь ужъёссэс 24:15 лыдэ басьтыса, кыӵе адямиос луозы соос пӧлын, кинэ Иегова улӟытоз?

 ⁶ Нош тужгес но кулэез, Армагеддон пыр потэмъёслы кулэ луоз улӟытэмъёсты дышетыны Иеговалэн курон-косонъёсызлы но Инмарлэн Эксэйлыкез сярысь зэмлыклы. Малы? Малы ке шуоно тросэз соос пӧлысь, кинэ Инмар кулэмысь улӟытоз, «шонер улымтэос» пӧлы пыро. (Лыдӟе Апостолъёслэсь ужъёссэс 24:15.) Соослы трос воштӥськонъёс лэсьтоно луоз, бакель каронъёсты басьтон понна, кудъёссэ вае Христослэн мозмытӥсь курбонэз. Малпалэ гинэ, макем трос тыршоно луоз, Иегова сярысь зэмлыклы трос миллион адямиосты дышетон понна, кудъёсыз со сярысь номыре уг тодо. Дышетомы-а ми соосты котькудзэ нимаз озьы ик, кызьы туннэ Библия дышетонъёсты ортчытъяськомы? Ветлозы-а соос кенешъёсы озьы ик, кызьы ми туннэ отчы ветлӥськомы? Валэктозы-а соослы, кызьы дышетоно луоз соос бере улӟытэмъёсты? Улыса адӟомы. Нош одӥгзэ ми умой тодӥськомы: Христослэн сюрс ар ӵоже кивалтонэзлэн пумаз «музъем выл Кузё-Инмарез тодонэн пачылмыса улоз» (Ис. 11:9). Макем трос тунсыко ужмы милям луоз та сюрс ар ӵоже!

7. Малы Иеговалэн ужась-тыршисьёсызлы валаса учконо луоз улӟытэмъёс шоры, кудъёссэ соос дышетозы?

⁷ Христослэн сюрс ар ӵоже кивалтэмез дыръя Иеговалэн вань ужась-тыршисьёсызлы, кудъёсыз музъем вылын улозы, азьланяз но асьсэлэсь сямъёссэс тупатоно луоз, инмысь Атайзэс шумпоттон понна. Соин ик милемлы валаса учконо луоз улӟытэмъёс шоры, кудъёсызлы ми юрттомы сьӧлыко мылпотонъёсынызы нюръяськыны но Иеговалэн курон-косонъёсызъя улыны (1 Пётр 3:8). Соос адӟозы, Иеговалэн ужась-тыршисьёсыз зӥбыт-востэмесь шуыса но утиськон понна соос азьланяз но воштӥськыны тыршо шуыса. Соку улӟытэмъёслэн но мылкыдзы луоз Иеговалэн калыкеныз ӵош Инмарлы йыбыртъяны (Флп. 2:12).

8. Малы ми малпаськомы, улӟытэмъёсты тодманы быгатомы шуыса?

⁸ Малы ми малпаськомы, Инмарен улӟытэмъёсты тодманы быгатомы шуыса? Со понна куд-ог мугъёс вань. Кылсярысь, вашкала дыръёсысь улӟытон учыръёсты лыдэ басьтыса, Иегова адямиосты улӟытоз сыӵе ик вылтусын, вераськон но малпаськон амалэнызы. Улӟемзы бере соос уз воштӥське. Иисус ӵошатӥз кулонэз изёнэн, нош улӟытонэз — иземысь сайканэн (Матф. 9:18, 24; Иоанн 11:11—13). Куке адями сайка, солэн вылтусыз но куараез уг воштӥсько, тодэ ваёнъёсыз но нокытчы уг пыро. Малпаськомы Лазарьлэн учырез сярысь. Со ньыль нунал ӵоже кулэмын вал, озьы ик солэн мугорыз сисьмыны кутскиз ини. Нош куке Иисус сое улӟытӥз, сузэръёсыз сое соку ик тодмазы, ачиз Лазарь но соосты ӧз вунэты (Иоанн 11:38—44; 12:1, 2).

9. Малы улӟытэм адямиослэн визьзы но мугорзы соку ик тырбыдэс уз луэ?

⁹ Иегова кылзэ сётэ: Христослэн кивалтэмез дыръя «мон висисько» шуыса нокин уз вера (Ис. 33:24; Рим. 6:7). Озьыен, ваньзы умой тазалыкен улӟозы. Но со уг возьматы, соос соку ик тырбыдэс луозы шуыса, малы ке шуоно соку соослэн матысь адямиоссы соосты тодманы ӧй быгатысалзы. Христослэн сюрс ар ӵоже кивалтэмез дыръя адямиос пумен-пумен тырбыдэс луозы, вылды. Та сюрс арлэн пумаз гинэ Иисус Эксэйлыкез аслаз Атаезлы сётоз. Соку Эксэйлык быдэстоз ваньзэ, мае со пыр лэсьтыны малпаз Иегова, озьы ик адямиослы тырбыдэс луыны юрттоз (1 Кор. 15:24—28; Усьт. 20:1—3).

10. Мае тӥ шӧдоды, куке пумиськоды матысь адямиосыныды, кудъёссэ улӟытоз Инмар?

¹⁰ Пуктэ син азяды, мае тӥ шӧдоды, куке нош ик пумиськоды матысь адямиосыныды, кудъёсыз кулэмын вал. Тӥ шумпотыса серекъялоды яке бӧрдоды, вылды. Оло нош, Иеговаез данъяса кырӟалоды. Нош одӥгзэ ми умой тодӥськомы: тӥляд сюлэмды пачылмоз сюлмаськись Атайдэс но солэсь Пизэ яратонэн, кудъёсызлы луыса кулэмъёс улӟыны быгатӥзы.

11. Мар луоз соосын, кинъёс Инмарлэн шонерлыко курон-косонъёсызъя улозы, Иоаннлэсь 5:28, 29 лыдэ басьтоно ке?

¹¹ Нош табере пуктэ син азяды, макем шумпотозы улӟытэм адямиос, куке соос воштӥськыны кутскозы но Инмарлэн шонерлыко курон-косонъёсызъя улыны тыршозы. Сыӵе адямиослы Иегова рай музъем вылын пырак улон кузьмалоз. Нош соослы, кинъёс Инмарлы пумит султозы, Иегова сыӵе луонлык уз сёты но райысь тупаса улонэз сӧрыны уз лэзьы (Ис. 65:20; лыдӟе Иоаннлэсь 5:28, 29).

12. Кызьы Иегова бакель кароз ваньзэс, кинъёс музъем вылын улозы?

¹² Эксэйлыклэн кивалтэмез улсын Инмарлэн вань ужась-тыршисьёсыз ас вылазы шӧдозы, макем шонер луо кылъёс, кудъёсыз гожтэмын Мадёнъёсын 10:22: «Кузё-Инмарлэн бакель каронэз узырмытэ, кӧтӝожъёсыз сьӧраз уг вайы». Иеговалэн духезлы луыса Инмарлэн ужась-тыршисьёсыз Христослэсь сямъёссэ эшшо но умойгес адӟозы но тырбыдэс улонлы матэгес луозы (Иоанн 13:15—17; Еф. 4:23, 24). Нуналысь нуналэ соослэн тазалыксы юнмалоз, нош сямъёссы умойгес но умойгес луозы. Макем трос шумпотон соослы улон ваёз! (Иов 33:25). Нош кызьы улӟытон сярысь малпаськон али ик юрттыны быгатэ ини?

13. Кызьы Псалтирьын 138:1—4 гожтэм кылъёс возьмато, Иегова милемыз умой тодэ шуыса, но кызьы Инмар сое возьматоз улӟытон дыръя?

¹³ Кызьы талэсь азьвыл вераськиз ини, куке Иегова адямиосты улӟытэ, соослэн тодэ ваёнъёссы но сямъёссы уг воштӥсько. Малпалэ гинэ, мае со возьматэ! Иегова сокем юн тӥледыз яратэ, со тӥлесьтыд малпанъёстэс, шӧдонъёстэс, кылъёстэс но ужъёстэс уг вунэты. Соин ик солы тӥледыз улӟытоно луысал ке, со капчиен улӟытысал тӥледыз сыӵе ик тодэ ваёнъёсыныды, малпаськон амалэныды но сямъёсыныды. Давид эксэй тодӥз, Иегова ми пӧлысь котькудмес туж умой тодэ шуыса. (Лыдӟе Псалтирез 138:1—4.) Кыӵе шӧдонъёсмы милям кылдо соин сэрен?

14. Кулэ-а сюлмаськыны, Иегова ми сярысь ваньзэ тодэ шуыса?

¹⁴ Сюлмаськоно ӧвӧл, Иегова ми сярысь ваньзэ тодэ шуыса. Малы? Тодады возе, Иегова милемыз туж яратэ но котькудмы сярысь туж сюлмаське шуыса. Со тодаз возе вань учыръёсты, кудъёсыныз ми пумиськимы. Та малпан туж буйгатэ! Малпаське: улонмылэн котькыӵе вакытаз Иегова милемын артэ но милемлы юрттыны дась (2 Пар. 16:9). Озьыен, ми ноку огнамы ум кылиське.

15. Малы улӟытон Иеговалэсь визьлыко луэмзэ возьматэ?

¹⁵ Куке адямиос кулыны кышкало, соослэн тушмонъёссы, кудъёсыз Шайтанлэн ки улаз возисько, та кышканэз куто, эшъёссэс вузаны яке осконзылэсь куштӥськыны кужмысь косон понна. Нош милемлы пумит соос та кышканэз кутыны уг быгато, малы ке шуоно ми тодӥськомы: тушмонъёсмы сэрен кулӥмы  ке но, Иегова милемыз улӟытоз (Усьт. 2:10). Ми юн оскиськомы: нокин но номыр Иеговаен кусыпъёсмес лябӟытыны уг быгаты (Рим. 8:35—39). Иегова туж визьлыко луэмзэ возьматӥз, кулэмысь улӟытонлы оскон кузьмаса! Солы луыса ми ум кышкаське, куке Шайтанлэн ки улаз возиськисьёс милемыз виыны кышкато, ми соослэсь верамзэс ӧм быдэстэ ке. Со сяна, со милемлы кышкасьтэм луыны юрттэ, Иеговалы оскымон луон понна.

16. Кыӵе юанъёс аслыд сётоно но кызьы сётэм валэктонъёс адӟыны юрттозы, макем юн тӥ Иеговалы оскиськоды?

¹⁶ Иеговалэн тушмонъёсыз тӥледыз виыны кышкатӥзы ке, оскоды-а тӥ, Иегова тӥледыз улӟытоз шуыса? Кызьы тодоно, сыӵе шуг-секыт пыр потыны тӥ дась шуыса? Кылсярысь, аслэсьтыд юаны луоз: «Возьмато-а ужпумъёсы, кудъёссэ котькуд нунал кутӥсько, мон Иеговалы оскисько шуыса?» (Лука 16:10). Озьы ик аслыд таӵе юан сётыны луоз: «Возьматэ-а со, кызьы мон дырме но коньдонме кутӥсько, Эксэйлык улонам тужгес но валтӥсез луэ шуыса? Озьы ик адӟыны луэ-а Иеговалы оскемме, со мыным улон понна ваньзэ кулэзэ сётоз шуыса?» (Матф. 6:31—33). Та юанъёслы тӥ «бен» шуиды ке, соку тӥ зэмзэ ик Иеговалы оскиськоды но котькыӵе шуг-секытъёс пыр потыны дась луиськоды (Мад. 3:5, 6).

17. а) Кызьы улӟытон Иеговалэн чиданэныз герӟаськемын? б) Кызьы возьматоно, ми Иеговалэсь чиданзэ дунъяськомы шуыса?

¹⁷ Иегова ужпум кутӥз, кыӵе нуналэ но кыӵе часэ со Шайтанлэсь лек дуннезэ быдтоз (Матф. 24:36). Нош со дырозь Инмар чидаса улоз. Иеговалэн кулэмъёсты улӟытэмез потэ ке но, пуктэм дырызлэсь азьло со сое уз лэсьты (Иов 14:14, 15). Со возьма тужгес но тупась дырез, соосты улӟытон понна (Иоанн 5:28). Милям вань трос мугъёсмы Иеговалы чиданэз понна тау карыны. Малпалэ гинэ: Иеговалэн чиданэзлы луыса трос адямиослы, озьы ик милемлы но, ӧпкелён понна луонлык кылдӥз (2 Пётр 3:9). Иеговалэн потэ, тросгес адямиос пырак улыны мед быгатозы шуыса. Ойдолэ солэсь чиданзэ дунъяломы. Кызьы ми сое возьматыны быгатомы? Ми возьматомы сое, куке вань кужмысьтымы тыршомы утчаны зӥбыт-востэм адямиосты, озьы ик юрттомы соослы Иеговаез яратыны но солы ужаны-тыршыны (Матф. 28:19). Соку соос но, ми сямен ик, валалозы, кыӵе пайда вае Иеговалэн чиданэз.

18. Малы мукетъёсызлы чиданмес возьматоно?

 ¹⁸ Иегова чидаса возьмалоз, куке Христослэн сюрс ар ӵоже кивалтэмез йылпумъяськоз но куке ми тырбыдэс луомы. Нош со дырозь Инмар сьӧлыкъёсмес простить карыны дась. Ойдолэ Иеговалэсь адӟем каромы — мукетъёсызлэн умой сямъёссылы саклыкмес висъяломы но соослы чиданмес возьматомы. Тани одӥг сузэрмылэн учырез. Солэсь картсэ котьмалэсь кышкан курадӟытыны кутскиз но, со кенешлэн пумиськонъёсаз ветлэмысь дугдӥз. Сузэр вера: «Мыным чидантэм вӧсь вал. Малпамтэ шорысь милям улонмы воштӥськиз но, ми ӧм быгатэ ни лэсьтыны сое, мае малпамы вал». Нош ваньмыз та шоры учкытэк, со картэзлы чиданзэ но яратэмзэ возьматэмысь ӧз дугды. Со Иеговалы оскиськиз но котьку картэзлы юрттӥз. Иегова сямен, та сузэр саклыксэ висъяз картэзлэн умой сямъёсызлы, нош кылдэм шуг-секытлы ӧз. Со вера: «Мынам картэлэн трос умой сямъёсыз. Со нуналысь нуналэ вань кужмысьтыз тырше кышканзэ вормыны, пичиен-пичиен ке но». Макем кулэ чиданмес возьматыны ӵыжы-выжыосмылы, озьы ик кенешысь вын-агайёсмылы но сузэр-апайёсмылы, кудъёсыз кыӵе ке шуг-секытъёсынызы нюръясько!

19. Мар карыны милям мылкыдмы вань?

¹⁹ Иисус но кылчинъёс шумпотӥзы, куке Музъем кылдытэмын вал. Нош пуктэ син азяды, макем соос шумпотозы, куке Музъем тырмемын луоз тырбыдэс адямиосын, кудъёсыз Иеговаез ярато но солы шумпотыса ужало-тыршо. Нош кыӵе шумпотозы Христосэн ӵош кивалтӥсьёс, куке адӟозы, макем бадӟым бакель каронъёс вае соослэн тыршемзы вань адямиослы (Усьт. 4:4, 9—11; 5:9, 10). Макем умой луоз улон, куке, кайгырыса бӧрдэм интые, ми шумпотыса бӧрдомы, нош висёнъёс, курадӟонъёс но кулон ноку уз луэ ни (Усьт. 21:4). Нош али ойдолэ адӟем каромы яратӥсь, визьлыко но чидась Атаймылэсь. Соку, нокыӵе шуг-секытъёс шоры учкытэк, ми шумпотонмес ум ыштэ (Иак. 1:2—4). Ми туж тау кариськомы Иеговалы, улӟытонлы оскон кузьмамез понна! (Ап. уж. 24:15).