1. Кыӵе шӧдонъёсмы милям луыны быгато, куке малпаськиськомы быдэс дунне сярысь, кудзэ Иегова кылдытӥз?

 КУКЕ ми малпаськиськомы быдэс дунне сярысь, кудзэ Иегова кылдытӥз, ми шӧдыны быгатӥськомы сое ик, мае шӧдӥз Давид, кудӥз Иеговалэсь юаз: «Тынад киосыдлэн ужъёссы шоры учкыкум — инбамъёсыд, толэзь но кизилиос шоры, кудъёссэ тон пуктылӥд,— малпасько: ма со адями, кудзэ тон тодад возиськод, ма со адями пи, кудӥз доры тон ветлӥськод?» (Пс. 8:4, 5). Зэм но, кизилиосын но галактикаосын ӵошатыса, ми тузон кадь пичиесь луиськомы, но паймоно кадь, Иегова милемыз адӟе шуыса. Но кызьы ми адӟомы та статьяысь, нырысетӥ адямиосты кылдытэм сяна, Иегова сюлмаськиз соос сярысь, озьы ик аслаз семьяяз но пыртӥз.

2. Кыӵе уж сётӥз Иегова Адамлы но Евалы?

² Адам но Ева луизы Иеговалэн нырысетӥ нылпиосыз, кудъёссэ со музъем вылын улыны кылдытӥз. Нош со соослы яратӥсь инмысь Атай вал. Иегова соослы уж сётӥз: «Йылэ, трос луэ, музъемез тырмытэ, сое киулады кутэ» (Ул.-выл. 1:28). Мукет кылъёсын вераса, соос кулэ вал нылпиос вордыны но сюлмаськыны музъем сярысь озьы ик, кызьы соос сюлмаськысалзы асьсэлэн корказы сярысь. Адам но Ева Иеговалэсь кылзӥськысалзы ке но солэсь эриксэ быдэсъясалзы ке, соос асьсэос но, озьы ик соослэн нылпиоссы но, Инмарлэн семьяяз пырак улысалзы.

3. Малы вераны луоз, Иегова аслаз семьяяз Адамлы но Евалы дано инты висъяз шуыса?

³ Иегова аслаз семьяяз Адамлы но Евалы дано инты висъяз. Иеговалэн адямиосты кылдытэмез сярысь Давид тазьы гожтӥз: «Кылчинъёсын ӵошатыса, Тон сое трослы ик покчи  ӧд кары, данэн, сӥ-санэн изьыяд Тон сое» (Пс. 8:6). Зэм но, милям кылчинъёслэн кадь кужыммы, визьмы но быгатонлыкъёсмы ӧвӧл (Пс. 102:20). Озьы ке но адямиос «трослы ик покчи» карыса кылдытэмын ӧй вал. Пуктэ син азяды, кыӵе паймымон улон возьма вал Адамез но Еваез.

4. Кытчы вуттӥз Адамлэн но Евалэн кылзӥськымтэзы но мае ми эскеромы та статьяын?

 ⁴ Жаляса верано луэ, Адам но Ева кылзӥськымтэенызы сэрен Иеговалэн семьяяз луыны ӧз быгатэ ини но, кызьы ми тодӥськомы, соослэн кутэм ужпумзы кышкыт бервылъёсы вуттӥз. Нош Иеговалэн малпанэз ӧз воштӥськы, солэн азьло сямен ик потэ, кылзӥськись адямиос пырак дауръёс ӵоже солэн нылпиосыз мед луозы шуыса. Та статьяын ми нырысь вераськомы, кыӵе дан сётӥз Иегова адямиослы, собере малпаськомы, кызьы Иеговалы возьматоно, милям солэн семьяяз луэммы потэ шуыса. Озьы ик ми тодомы, кыӵе паймымон улон возьма Инмарлэсь нылпиоссэ, кудъёсыз музъем вылын уло?

5. Кызьы ми Иеговалы тау кареммес возьматыны быгатӥськомы милемыз аслыз укшатыса кылдытэмез понна?

⁵ Иегова милемыз «Аслыз укшатыса кылдытӥз» (Ул.-выл. 1:26, 27). Солы луыса ми быгатӥськомы возьматыны солэсь умой сямъёссэ. Кылсярысь, ми быгатӥськомы яратӥсесь, жалясесь, оскымонэсь но шонерлыкоесь луыны (Пс. 85:15; 144:17). Иеговалэсь адӟем карыны тыршыса, ми данъяськомы сое но возьматӥськомы солы тау кареммес (1 Пётр 1:14—16). Куке ми лэсьтӥськомы озьы, кызьы кельше инмысь Атаймылы, ми шудо луиськомы. Со сяна, аслыз укшатыса кылдытыкуз, Иегова кылдытӥз милемыз сыӵе адямиен, кыӵеен солэн адӟемез потэ милемыз аслаз семьяяз.

6. Кызьы Иеговалэн адямиосты гажамез адӟиськиз, музъемез кылдытыкуз?

⁶ Иегова милемлы туж умой улон инты кузьмаз. Адямиосты кылдытэмезлэсь трослы азьлогес Инмар музъемез улон понна дасяз (Иов 38:4—6; Иер. 10:12). Инмар шырыт сямо луэ бере, со ваньзэ озьы кылдытӥз, улон милемлы шумпотон мед ваёз шуыса (Пс. 103:14, 15, 24). Музъемез кылдытыкуз, Иегова дырын-дырын малпаськиз, умой-а мыно ужъёсыз, но адӟиз, ваньмыз туж умой мынэ шуыса (Ул.-выл. 1:10, 12, 31). Нош эшшо со адямиослы будосъёсын но пудо-животъёсын кивалтыны луонлык сётӥз (Пс. 8:7). Инмарлэн малпамезъя, тырбыдэс адямиос кулэ вал пырак улыны но паймымон кылдытэмъёс сярысь шумпотыса сюлмаськыны. Тау кариськоды-а тӥ Иеговаез со понна, мае со карыны малпа вуонояз?

7. Кызьы Иисус Навинлэн 24:15 кылъёс возьмато, адямиослы бырйыны эрик сётэмын шуыса?

⁷ Иегова милемлы бырйыны эрик сётӥз. Ми асьмеос бырйиськомы, кызьы улыны. (Лыдӟе Иисус Навинлэсь 24:15.) Милям яратӥсь Инмармы шумпотэ, куке ми ас мылкыд кареммыя солэн ужась-тыршисьёсыз луиськомы (Пс. 83:12; Мад. 27:11). Бырйыны эрикез уже кутыны луэ соку но, куке ми мукет ужпумъёс кутӥськомы. Иисус Христос милемлы та ласянь умой адӟем карон возьматӥз.

8. Вералэ пример, кызьы Иисус аслэсьтыз бырйыны эриксэ кутӥз.

⁸ Иисус сямен ик, ми ужпум кутыны быгатӥськомы, мукетъёслэсь кулэяськонъёссэс вылӥегес пуктомы шуыса. Одӥг пол Иисус но апостолъёс шыпыт интыын шутэтскыны малпало вал, малы ке шуоно соос туж жадизы. Нош соослэн шутэтскыны ӧз пӧрмы. Адямиос соосты шедьтӥзы, малы ке шуоно соослэн Иисусэз кылзэмзы потэ вал. Но Иисус соос вылэ ӧз йыркуръяськы. Со интые,  со та адямиосты жаляз но «соосты трос дышетыса улӥз» (Марк 6:30—34). Куке ми Иисус сямен асьмелэсь дырмес но кужыммес мукетъёслы сётӥськомы, ми данъяськомы инмысь Атаймес (Матф. 5:14—16). Озьы ик Иеговалы возьматӥськомы, солэн семьяяз пыреммы потэ шуыса.

9. Мар сярысь тодазы возьыны кулэ анай-атайёс?

⁹ Иегова кузьмаз адямиослы пинал вордыны быгатонлык. Озьы ик со анай-атайёсты косӥз нылпиоссылы юрттыны, соослэн Инмарез яратонзы но солы ужаны-тыршыны мылкыдзы мед луоз шуыса. Анай-атайёс, тӥ дунъяськоды-а та паймымон кузьымез? Иегова кылчинъёслы трос быгатонлыкъёс сётӥз ке но, соос пинал вордыны уг быгато. Малпаське: Кылдытӥсь адямиослы сётӥз быгатонлык — выль улон сётыны. Со туж бадӟым дан! Анай-атайёс кыл кутыны кулэ нылпиоссэс «Кузё-Инмарлэн дышетонэз, валэктон-визьманъёсыз вылэ пыкиськыса» дышетыны (Еф. 6:4; К. Зак. 6:5—7; Пс. 126:3). Атайёслы но анайёслы юрттон понна, Инмарлэн организациез сётэ Библия вылэ пыкиськыса гожтэм трос публикациосты, видеороликъёсты, кырӟанъёсты но интернет-статьяосты. Адӟиське, Иегова но Иисус туж ярато пичи вынъёсмес но сузэръёсмес (Лука 18:15—17). Куке анай-атайёс Иегова вылэ оскисько но нылпиоссы сярысь яратыса сюлмасько, та сое туж шумпоттэ. Анай-атайёс, кудъёсыз Инмарлэсь кылзӥсько, нылпиоссылы юртто пырак дауръёс ӵоже Иеговалэн семьяяз луыны.

10, 11. Мар луыны быгатэ дун тыронлы луыса, кудзэ сётӥз Иегова?

¹⁰ Иегова аслэсьтыз самой дуно Пизэ сётӥз, ми солэн семьяяз луыны мед быгатомы шуыса. Кызьы вераськиз  4-тӥ абзацын, Адам но Ева Иеговалэн семьяяз луыны ӧз быгатэ ини, озьы ик соос нылпиоссэс но сыӵе луонлыктэк кельтӥзы (Рим. 5:12). Адам но Ева валаса вылысь Иеговалэсь ӧз кылзӥське. Соин ик Инмар шонер лэсьтӥз, куке соосты аслаз семьяысьтыз улляз. Нош мар вераны луоз соослэн нылпиоссы сярысь? Иегова сюлмаськиз соос сярысь, озьы ик адямиослы, кудъёсыз солы оскымон луозы, аслаз семьяяз берытскыны право сётӥз. Со понна со аслэсьтыз «одӥг вордӥськем Пизэ», Иисус Христосэз, курбонлы сётӥз (Иоанн 3:16; Рим. 5:19). Та курбонлы луыса Иегова 144 000 оскымон пиосмуртъёсты но кышномуртъёсты аслыз нылпиос кариз (Рим. 8:15—17; Усьт. 14:1).

¹¹ Со сяна, Инмарлэн семьяяз пырыны быгато трос миллион мукет адямиос но, кудъёсыз солэсь кылзӥсько. Со луоз соку, куке Христослэн сюрс ар кивалтэмез бере соос берпуметӥзэ эскеремын луозы (Пс. 24:14; Рим. 8:20, 21). Соослэн сыӵе осконзы вань бере, соос али ик асьсэлэсь Кылдытӥсьсэс, Иеговаез, Атай шуыса нимало (Матф. 6:9). Иегова улӟытэм адямиослы но луонлык сётоз асэныз матэгес тодматскыны но аслэсьтыз эсэпъёссэ тодыны. Нош соос, кинъёс Инмарлэсь кылзӥськозы, берлогес озьы ик быгатозы солэн семьяяз пырыны.

12. Кыӵе юанэз ми али эскеромы?

¹² Кызьы ми адӟимы, Иегова адямиослы туж бадӟым дан сётӥз. Со зырӟем христианъёсты аслыз нылпиос кариз ини, нош соослы, кинъёс «туж-туж трос калык» пӧлы пыро, выль дуннеын аслаз пиосыз но нылъёсыз луыны оскон сётӥз (Усьт. 7:9). Кызьы ми возьматыны быгатӥськомы Иеговалы, солэн семьяяз пыреммы потэ шуыса?

13. Мар кароно, Иеговалэн семьяяз луон понна? (Марклэсь 12:30).

¹³ Иеговаез яратэ но солы вань сюлмысьтыды ужалэ-тырше. (Лыдӟе Марклэсь  12:30). Иеговалэн трос кузьымъёсыз пӧлысь одӥгез тужгес но дуноез — со солы йыбыртъяны луонлык. Ми Иеговалэсь курон-косонъёссэ быдэсъяськомы ке, озьы ми солы возьматӥськомы, сое яратӥськомы шуыса (1 Иоанн 5:3). Иисус пыр Иегова косӥз дышетскисьёсты дасяны но соосты пылатыны (Матф. 28:19). Озьы ик Иисус вераз, ми ог-огмес яратыны кулэ шуыса (Иоанн 13:35). Соосты, кинъёс кылзӥсько та курон-косонъёслэсь, Иегова аслаз семьяяз пыртоз, кудаз быдэс дуннеысь пӧртэм кылъёсын вераськись адямиос ужало-тыршо (Пс. 14:1, 2).

14. Кызьы ми возьматыны быгатӥськомы, мукетъёссэ яратӥськомы шуыса? (Матфейлэсь 9:36—38; Римъёслы 12:10).

¹⁴ Адямиослы яратэмдэс возьматэ. Яратон — со Иеговалэн валтӥсь сямыз (1 Иоанн 4:8). Ми Инмарез тодэммылэсь азьло ик со милемыз яратӥз ини (1 Иоанн 4:9, 10). Ми солэсь адӟем кариськомы, куке мукетъёслы яратэммес возьматӥськомы (Еф. 5:1). Одӥгез тужгес но умой амал тае лэсьтыны — юрттыны мукетъёслы Иегова сярысь тодыны, али талы дыр вань на. (Лыдӟе Матфейлэсь 9:36—38.) Озьы ми адямиослы луонлык сётӥськомы азьланяз Иеговалэн семьяяз пырыны. Пылатӥськемез бере но адямиез яратыны но гажаны кулэ (1 Иоанн 4:20, 21). Кылсярысь, ми ум малпалэ, адями урод малпанъёсын мае ке лэсьтӥз шуыса, малы ке шуоно ми ум тодӥське вань мугъёсты, малы со озьы лэсьтӥз. Со интые, ми возьматомы солы гажанмес но сое асьмелэсь умойгес шуыса лыдъяломы (лыдӟе Римъёслы 12:10; Флп. 2:3).

15. Кинлы ми возьматыны кулэ жалясь но лякыт луэммес?

¹⁵ Ваньмызлы лякыт но жалясь луэмдэс возьматэ. Иеговаез асьмелэн Атаенымы ниманы мед быгатомы шуыса, милемлы вань ужъёсамы Библиысь возетъёсты уже кутоно. Кылсярысь, Иисус дышетӥз: милемлы жалясь но лякыт луэммес возьматоно вань адямиослы, тушмонъёсмылы гинэ но (Лука 6:32—36). Куддыръя со туж ик капчи ӧвӧл. Соин ик милемлы Христос сямен малпаськоно но солэсь адӟем кароно. Ми котьма ласянь Иеговалэсь кылзӥськиськомы ке но Иисуслэсь адӟем кариськомы ке, соку инмысь Атаймылы возьматомы, милям пырак дауръёс ӵоже солэн семьяяз луэммы потэ шуыса.

16. Кызьы ми утьыны быгатомы Иеговалэн семьяезлэсь ӟеч нимзэ?

¹⁶ Иеговалэн семьяезлэсь ӟеч нимзэ утелэ. Семьяын пичи пиналъёс ӵем дыръя адӟем каро бадӟымъёсызлэсь. Кылсярысь, бадӟымез пизы Библиысь возетъёсъя улэ ке, со умой адӟем карон возьматоз пичи вынызлы. Нош куке со урод ужъёс лэсьтыны кутске, пичиез выныз со сямен ик лэсьтыны быгатэ. Озьы ик луыны быгатэ Иеговалэн семьяяз но. Куддыръя оскымон христиан мурт Иеговалэн организациезлэсь куштӥськыны быгатэ яке урод ужъёс лэсьтыны кутске. Со шоры учкыса, мукетъёсыз но солэсь адӟем карыны быгатозы но озьы Иеговалэн семьяезлэсь ӟеч нимзэ сапталозы (1 Фес. 4:3—8). Милемлы сыӵе урод примеръёслэсь палэнсконо но номырлы лэзёно ӧвӧл, милям инмысь Атаенымы кусыпъёсмы мед сӧриськозы шуыса.

17. Кыӵе малпаськонлэсь палэнсконо но малы?

¹⁷ Иегова вылэ оскиське, нош коньдон но ваньбур вылэ эн. Ми асьмелэн улонамы Инмарлэсь Эксэйлыксэ но солэсь шонерлыко курон-косонъёссэ нырысетӥ интые пуктӥмы ке, Иегова кылзэ сётэ, милемлы сиён-юон, дӥськут но улон инты сётоз шуыса (Пс. 54:23; Матф. 6:33). Соин ик ми ум малпаське, кызьы малпасько та дуннеын, коньдон но ваньбур утьыны но шудо карыны быгато шуыса. Иеговалэсь эриксэ быдэсъян  гинэ сюлмын каньыллык вае (Флп. 4:6, 7). Милям пӧртэм арбериосты басьтыны коньдонмы луиз ке но, милемлы асьмелэсь юано: «Нош луоз-а мынам дыры но кужыме та басьтэм арбериосты уже кутыны но соос сярысь сюлмаськыны? Уг кутскы-а мон укыр зол ваньбурме яратыны?» Тодамы возёно: Иегова милемлы, аслаз семьяезлы, сётӥз уж, но со возьма, ми сое умой быдэсъяломы шуыса. Озьыен, милемлы лэзёно ӧвӧл, та ужез быдэсъяны маке но мед люкетоз шуыса. Милям уг поты луэммы егит кивалтӥсь кадь, кудӥз, Иеговалы ужан-тыршон но солэн пиез луон интые, бырйиз кыӵе ке арбериосты! (Марк 10:17—22).

18. Кыӵе дан но кузьым сётэмын луоз Инмарлэсь кылзӥськись адямиослы?

¹⁸ Инмарлэсь кылзӥськись адямиослы бадӟым дан сётэмын — пырак дауръёс ӵоже Иеговалы йыбыртъяны но солэн матысь эшъёсыз луыны! Соос, кинъёс оско музъем вылын улыны, быгатозы сюлмаськыны музъем сярысь, кудзэ Иегова кылдытӥз, адямиос шумпотыса улыны мед быгатозы шуыса. Ӝоген Инмарлэн Эксэйлыкезлэн кивалтэмез улсын музъем но, отын улон но быдэсак воштӥськозы. Иисус быдтоз вань шуг-секытъёсты, кудъёсыз луизы Адамлэн но Евалэн кутэм ужпумзы сэрен. Иегова улӟытоз трос миллион адямиосты. Соос быгатозы тазалыкоесь луыны но пырак улыны музъем вылын, кудӥз выльысь рай луоз (Лука 23:42, 43, ВД). Куке Иеговалэн нылпиосыз тырбыдэс луозы, котькудӥз соос пӧлысь быдэсак возьматоз «данэз, сӥ-санэз», кудъёсыз сярысь Давид вераз (Пс. 8:6).

19. Мар сярысь ноку но вунэтоно ӧвӧл?

¹⁹ Тон туж-туж трос калык пӧлы пыриськод ке, тынад паймымон осконэд вань. Иегова тонэ яратэ но тыныд аслаз семьяяз пырыны ӵектэ. Соин ик котькуд нунал аслад улонэныд сое шумпотты, ноку но эн вунэты Иеговалэн кылсётонъёсыз сярысь но соосты сюлмад возь. Дунъя инмысь Атаймылы йыбыртъяны но сое пырак дауръёс ӵоже данъяны луонлыкез!